Lunglawm tikimtu chapter-24

 " Fela te an awm tih i hriat vang ami min zui leh tlat " In a kan let leh hnu chuan ka ti a

" Min ngaihdan mai mai chu'h " ati deuh hluk alungawi vaklo ani maithei ka ngaipawimawh lo

" Eng nge i sawi duh chu " Vari ka muttir hnuah ka ti leh nghal hmak

" Sawi ṭan mai dantur pawh ka hrelo " A ti leh a, vin hrep tumin ka ang zuau tawh amah bawk chuan

" Naute kha tihtlak i tum em? " 

" Chu chu i sawi tur ami nge naute hi i fa ah i ngai zawk, naute hi i fa anilo " Ka ti nghat asawi pehhel lutuk chu ka ning tawh

" Ka fa anih leh nih loh pawh i chian bik chuan loh kha " A tih leh chuan rum zeta melhin

" Chhuak zawk mai rawh, thil ṭangkailo pui pui ka ngaithla peihlo " Thinrim viau mahila ka vin vak tawhlo

" Ka fa anih loh vang zawkin thudik hi ka hrilh ang che " A ti leh a, chhang tawhlo in a thusawi hun chu ka ngaichang

" Kha zan khan kan mu dunlo, khatih lai khan duhthlan tur dang ka nei biklo a, khathil kha ka tih loh chuan i chungah eng nge thleng dawn ka chiang biklo ani " A sawi zawh rual rualin ' Eng nge i sawi awmzia ' kalo ti nghal vat

" Zan khat chu Bawihtei'n min lo bia a, offer tenawm zet minlo pe anih chu, thinrim zetin Bawihtei chu kalo chhanga ka hau zek bawk, ka duh che ka phalo mahse, ka duhna che hi a fim tawka i harsatna tawh remchanga hmang duh tur ka nilo mahse, ka ngaihtuah chianga an offer kha pawmlo mahila midang an ruai leh thei dawn tih ka chiang bawk, khatia ka tih mai loh chuan i nun a chhe vek dawn ani " A sawi thui bawka asawi zawh rualin thawpui ala halh

" A aia chipchiar zawkin sawi rawh, Bawihtei chuan kei min hrai rui a min mutpui turin ati che maw " Ka ring phallo a mahse, Tea hian dawt asawi chu ka ring chuanglo

" I rilru aṭha lutuk mi zawng zawng hi an rintlak loh tih ka hrilh ṭhin che kha, Bawihtei mai anilo i ṭhiannu Lawmi pawh atel " a tih lai chuan ' maw!" Kati vak, mak ka ti em ani

" Ka sawi zawh hun nghak phawt rawh " Tea chuan ati a, ka tha te hi a khur leh dar dar tawhin ka hria

" I ṭhiannu atel ve tih ka hriat khan hrilh che ka tuma, chu chu aṭha ber ni pawn ka hria, mahse, ka ngaihtuah chiang a engmah athlen hma khan hrilh ta che ila i awih miahlo ang, i ṭhiannu chu ila ring zawk daih ang tiraw? " A tih chuan ka mit ka chhinga harsa zetin ka bu nghat nghat

" Khavang tak khan duhthlan tur dang ka neilo a, inveng tura hrilh lawk ta che ila, sawifiah kual vek angai leh dawn Sawifiah ila min ring dawn chuanglo " Tea chu ka en a, sawi ve tur reng reng ka hrelo

" I chhiatna duh hrim hrim ni ila kha zan khan mutna damdawi nilo tisa ti phur thei damdawi ka pe ang che, chu damdawi chu Lawmi khan min pe bawk mahse, duhlo in mutna damdawi zawk ka pe che a, kha hmeichhe pahnih te kha ka rap lutuk an hmeichhiatpui laka an chet duhdan kha an kawchhungah ramhuai alut anih ka ring hial, i thlalak minlo la dil hram anih chu! I bulah khan kamu lo zingah khan sawifiah duh teh mahila khatiang kha kan boruak ani tawh si a " Hetiang reng reng hian sawi tur ka vai ngailo

" Lalai dawt i hrilh tho alawm " Ka ti a Tea chuan ahmai atuai puat, Lalai kha dawt hrilh kherlo se heti khawp hian ka huat ka ringlo

" Fela'n i sawifiahna pawh ngaithla lo a in inkar atih tawp avang khan nangpawn i kalsan ve maitheih ka ringa, chuvang chuan thudik kha ngawihpuia i bula awm kha ka tum a ka hmasial vang ani mahse, nang lahin huat takte in min hua a, Fela lahin hmuh pawh min hmu duh silo, ka thil tihsual khan zantin mangṭhalo min neihtir ziah " A sawi zawh chuan hahdam sawt hmel a pu

" Engtin nge ka tih ang " Ka pum chu ka khawih a, hei hi Fela fa ani, Hrilh ta ila min awih ka ring chuanglo a, tunah phei chuan hmeichhe dang anei tawh bawk si

" Min sawisa hrep dawn mahse, ka hmu anga thudik hi ka hrilh ang, in inkar ka tichhia a engpawh thleng dawn se thudik hi ka hrilh ngei ngei ang " A ti nghet charh

" A ngailo hrilh duh suh, thudik pawh hrilh la awmzia a awm tawhlo ang, ani chuan hmalam apan tawha sawi leh chiam tur pawh a awm tawhlo, thudik ka hriaa naute pawh Fela fa ani tih ka chiang tawh bawk, tihian atawk tawh " Thudik hriat chak viau mahila thudik chuan min ti hahdam huai lo a, ahma zawng aiin min ti hreawm niin ka hria. Ka ṭhian leh ka ngainat em em in ka laka rilru chhe lutuk a pu maithei chuan min ti na em ani, engtin nge hma ka lak ang ka hrelo a, tuna ka rilru put hmang erawh chhe tak ani tih chauh ka hria, hetiang em em a rilru chhia hi ka pu ngailo.

Ka chanchin hi ka chhungte engtin nge ka hrilh ang, pangai taka nau hi ka pai tlang anih chuan alo la langchhuak dawna, kanu ten hria se ka fa paina min zawt ngei dawn, Fela nen kan inṭhen chhan sawi angai anga thudik engkim sawichhuah vek angai dawn bawk, ka dinhmun hi a khirh chho tulh tulh zawng anih hi. 

Zanah chuan Lalai leh Seni anlo leng leh a, common room ah hnathawkin ka inchhawp hnawk niai mai

" I va buai awm ve " Lalai'n pangai taka alo tih luh laiin 

" Eitur i nei em? " Seni'n alo ti lut ve thung a, a in an loh theih ṭhin khawp mai 

" Eitur ka neih pawh ka hrelo " Seni zawk chu ka chhanga, Fridge chu a hawng leh diam tawh

" Hnathawhtur tlemte ka hawn a, ka zo tawh ang ani " Tiin ka inchhawp hnawk niai ho chu ka dahfel pah zung zung

" Thawkrim lutuk ṭhin suh " A tih chuan ka nui ringawt, ka thawkrim em em hranlo, team ah inṭhen ve takah chuan inel loh theih loh a, duhdah deuha hnathawh hi a theih loh. Seni'n eitur a siam leh rak rak a, Lalai nen chuan hna chungchang kan sawi ve mial mial, Vari pawh tlaiah khan chaw a ei ve a aharh peih veleh deuh tawh, zingah te chuan a mu tawpa engmah a ei ṭha peihlo kha ania.

" Vawiin ah Fela nen kan inhmu a " Kan bulah Seni alo ṭhu ve tawha, thil a ei pah tuam tuam

" I beng sawk ami? " Nui vur vur paha ka tih chuan

" In inkar ti chhetu hi na takin ka dem, a hlimlo tih ka hmuthiam ve veka, nang i hlim silo in inkar hi awlsam taka chinfel mai theih angin lang mahse, a khirh lutuk a ka thluak inti buai zo vek tawh " A ti leh bawrh bawrh, ka hmuh lai chuan ahlim thei viau si 

" Ka hmuh lai chuan a hlim reng alawm " 

" I hmuthiam lo anih chu " A ti hlak, a thinrim ta emaw ka ti leh hman alawm, henu em em hi chu a 

" Inlo kal hlauha atihzia hrilh duh che u ka nei a, ka ṭhiante in nia ka hriat ang zawng zawng hi chu hre ve vek ula ka duh " Hre ve ngei se anni nen chuan hmalak dan tur pawh ahriattheih ang

" Eng nge sawila, i sawi ek ek a i ngawi leh vung vung sia " Dawhtheilo zetin Seni'n ati veleh tawh

" Ka sawi zawh hma chu minlo ti khaihlak su " ti leh te te in chipchiar thei ang ber chuan Tlai lama Tea thil min hrilh ho chu ka hrilh a, nau ka pai tih ka sawi tel lai chuan Lalai insum theilo in ' Tak tak ami? ' alo ti pek a, hrechhuak leh thut in a ka ahup nghal vat. Ka sawi zawh hnu chuan thawm areh tlawk tlawk a, Sana chek ri chu ri bengchheng awm chhun ani hial ang, ka mak tih ang em chuan mak anti velo maithei mahse, a ṭhawng ve tho ang 

" Lawmi chu engtin nge arilru achhiat em em theih le " Lalai'n zawi sapin alo ti chhuak halh a, Seni erawh ala ngawi vung vung mak ati velo nge aṭhawng lutuk zawk pawh ka hrelo

" A rilru a kalsual tih chu ka hriatna arei tawh mahse, hetiang em em chu atih duh ka ringlo a " A ngawih vang vang hnuah Seni chuan alo ti ve a

" Keichu amak kati ka chungah hetiang taka rilru chhia apu hi hriatthiam ahar kati bawk " Ka tih chuan Lalai'n min kuah a

" Ka sawi kha fimkhur turin ka chah thlap che kha mahse, i tan pawh fimkhur vek theih anilo a, thil thleng chu athleng vek tawh a, Lawmi chu ngaidam turin ka ti miahlo che mahse, Pathian hian kan tana remruatna ṭha zawk anei tih erawh ringhlel suh " A ti sep sep a, engtia rei nge pangai taka ka ṭawngṭai lohna chin pawh ka hre tawhlo, ka ro a ṭawngṭai tum ve ṭhin mahila chham tur ka hrelo, harsatna leh buaina neuh neuh nei mahila Pathian hnena thlen turin dil dan ka hrelo ani ber.  

" Doctor i hmu tawh reng reng em? " Seni'n atih chuan lu ka thing a

" Naktukah kan kal dawn u nia " Lalai'n alo ti ve zat a, Mal bik riaua ka in ngaih chang pawn ka ṭhiante hian ka mal loh zia min hriattir leh ṭhin

" Keichu ka let peihlo, Lawmawmi ka hmu anga ka insum theilo ang tih ka hlau " Seni'n ati leh, ani hi chu a pui ve a, Lalai a insum theih viau laiin Seni chu ani veleh miahlo, in anna riau kan nei keipawh mi langtlang deuh mai kani a, thil thup ṭit ṭet te hi ka thiam vaklo, ka dikna ah chuan insual pawh huamin ka ṭang na ṭhin. Mahni dikna a ngawih tlatte hi ka thiam velo a, ka aia upa anni emaw ka thliar velo.

" Pawnah thil eichhuak ang u, zingah hian in entir an tlem ang in check up hma zawk ila " Kan tho nge tho lo Seni'n ati leh nghal zung zung, a phur nge a helhhawlh ni 

" Kan tho ve chiah anih hi " Lalai'n ati hlak

" Ho mai mai intho tlai lutuk " Sam phe siau a inherin mawng sawi lah lah chungin room aṭang chuan achhuak

" Kanu te hi engtin nge ka hrilh ang le " Seni chhuah tawh hnu chuan ka ti a, Lalai hian thurawn min pek theih ka beisei ani

" Zep nei kuallo in hrilh vek rawh, i pa te chuan i chunga thleng kha an ngaithiamlo viau maitheia an rilru dam zawngin sawi i tum dawn nia, i chungah Tea pawn engmah ati lo tih kan hria a, asawi angin sual duh hrim hrim nise mutna damdawi ringawt chu ape lo ang che " A ti dap dap asawi zawh chuan pik zetin thawk kala halha, thi silo in engmah hrelo a mut bawrh bqwrh ka chak

" Luakchhuak ang khan i awm velo ami? " Thingpui inlaiin Lalrinfeli'n ati leh ham ham tawh

" I ninawm " Ka tih chuan anui uar uar a

" I pum chhunga naute tan khan chhel deuhin awm rawh, dinhmun harsat ber lai pawh hian lawmna tur leh nuihna tur hi zawn hram hram aṭha ania " Ho deuh deuh asawi karah hian min fuih ve reng zel, kan inhmuh theih loh pawn msg min lo thawn hram tho

" I thaw fuh leh thei phian sia " Tia Lalai'n afiam chuan aner nang

" Fela hi hrilh i tum em? " A ti daih lehnghal

" Hrilh pawh ka tumlo mahse, vawikhat chu pangai deuha hmuh ka duh " Zuai raihin ka ti, Tunah chuan ka kaltir ve tak tak pawh ahun tawh ani, ahma kha chuan thudik hrilhhriat ngei kha ka tuma mahse, tunah chuan aṭul tawh pawn ka hrelo. Ka lunglawm tikima ka hun tamtak hlu taka min hman pui avangin ka lawm ani, nun awmze neilo hmang ang maia ka in ngaih laiin Fela alo lang a, nitin mai hi ahlutzia ka hriatthar phah. 

Lalai leh Seni te nen chuan Clinic ah kalin ka hming an lam hun kan nghak ṭhap, hoodie lian deuh ka ha a lukhum ka khum tlat bawk, Lalai leh Seni te inkarah ka ṭhu a akhat tawkin ka bula mi te pahnih chu an inhnial sek, ka hmelhriat ka hmu ang tih mawlh chu ka hlau 

" Lalthansangi " An tih chuan Lalai leh Seni an ding nghal hluai a, inlak muk ve deuh pawh hian anuih loh theih loh, alut lo tur pahnih kei aiin anlo ding leh hmasa zawk miau a

" Hetah kanlo nghak ang che, zam reng reng suh " Anti a, min tihdan mai mai chu'h indo naah kal tur te pawh ka ang alawm mawle. Doctor nu chu alo fel khawpa min lo be nghal sawk sawk, ka awmdan vel chu ka hrilh ka rai tih chu ka sawi tlang duh mailo

" Sex i hmang tawh em? " Tlang deuha min zawh chuan ka hmui sehin ka ngawi vang vang 

" Engpawh nise i zun va test phawt teh, tihdan i hria ang tiraw? " Tiin test kit chu min pek atum a

" Ka test tawh alawm ka rai a " Ka tih chuan Doctor nu chuan mak minti deuh aniang min en vung vung

" Tihtlak i duh chu ani em lovang tiraw? " Khauh fakin ati a

" Min tihtlak sak thei ang em? " Ka tih chuan thawpui la halhin dawhkanah chuan a kut pahnih anghat a, chiang deuhin min en

" Mami eng harsatna nge i tawh chu ka hriatpui lo che, nangmah ang rual hi anlo kal fo a an buaina chu nangmah ang tho hi ani ṭhin, thil ṭha ber rawn tur che chu ka hrelo mahse, thil dik erawh i puma naute kha pai tlang rawh " Dam dapin ati 

" Ka hlauthawng " Zawi sapa ka tih chuan lainat hmel deuhin min en a

" Kan thil hlauh kan paltlang hian kan chak sawt ṭhin ania, i period loh aṭanga chhutin naute khan thla2 a pum tawh ang, ultrasound kan ti anga achiang mai ang " Min nuih var var a

" Naupang hian nun anti hlim ṭhin, mi ṭhenkhat chuan nau an pai theih nan an theihtawp an chhuah a, nangin naute ṭha taka i pai lai iti tla anih chuan anunrawng thlak viau ang. Naute hian duhthlang thei nise titla leh mai mai turte pum chhungah hian an awm hauhlo ang " Ka kut chu ka malah nghatin ka hum ruh ngat ngat

" I rilru siam rawh inti chakla, ka pasal nen hian kum3 kan innei tawh mahse, kan beisei ber fa kan nei theilo a, keiin ṭhat lohna ka nei silo ka pasal lah chuti bawk, ka clinic a fa titla duh anlo kal chang hian ka awt ṭhin, keiin duat taka enkawl tur ka mamawh laiin nangni'n tih tlak in tum a, in dinhmun awhawm zia hi, ka awt ṭhin che u ania aw " Doctor nu chu ka en tlawk tlawk, a mittui chu a hru zeuh zeuh a, Ka khawngaih phak chu anilo mahse, ka lainat in ka khawngaih tho. 

" Naute kha i duh loh pawn neila keiman ka duh " A tih leh chuan kalu ka thing nawk nawk, tihtlak ka tumlo hrim hrim ka mipa hmangaih hnen aṭanga ka thil dawn ani a, chutin ka paihbo phallo hrim hrim 

" Ka naute hi tihnat ka phal hleinem " Ka ti a, ka pum chu ka chul pah zeuh

" Ultrasound va tila ilo lut leh dawn nia " Tiin lehkha ah chuan thil aziak mawlh mawlh a, a ziah zawh hnuah lehkha chu min pein room aṭang chuan ka chhuak

" Naute chu ahrisel ṭha em? Engtin nge alo tih che " Min hmu nge hmulo Lalai leh Seni'n min lo hnaih nghal ruak ruak

" Ka ṭha alawm, Naute ṭhat leh ṭhat loh en nan Ultrasound ka tih angaia " Ka ti a

" Anih chuan tila " Seni'n ati leh tut tut

" I mak sek sek emai, chutin atih zung zung theih loh zun achhuah loh chuan alang chianglo anti a, tui in tam angai alawm " Ka ti hlak hlak

" Ava han mak lehzel tak " Tiin akalsawna alo let leh chuan tui intur alo keng tel, tui bottle hnih vel ka in hnuah ka zun a chhuak ve ta hlauha Ultrasound chu ka ti ve thei hram. Ka tih zawh chuan result nen Mdangi luh loh karah Doctor hmu tur chuan ka lut veleh

" In enkawl ṭha viau rawh, i hrisel leh naute ahrisela i dam leh adam ani mai, i lungngaih leh a lungngai a, nu leh fa hian inzawmna thui deuh innei ania " Ati a thildang pawh min hrilh nual mai, damdawi eitur min ziahsak leh hnuah ka chhuak veleh a, naute pawh thla2 leh kar2 vel ani mek Damdawi kan lei hnuah clinic aṭang chuan kan hawng a. In kan thlen hnu a Ultrasound thlalak ka hmuh chuan an buai tawk leh viau

" A dum vek hi, map te pawh a ang " Seni'n ati nuah nuah a, Lalai'n inla hre deuhin a hrilhfiah zung zung

" Kan Thluakfinga alo chhun viau ang a " Te an tia rin ai chuan kan hlim phian mai.

" Nangmah chauh ini tawhlo a, chaw ei loh mai mai pawh a chi loh anih chu aw, hrisel deuha i awm angai ania " Lalai'n ka thil ei tlem lutuk chu min manganpui, naute an sawi sek lehnghal a an helhhawlh rih ni berin ka hria

" Raino luakchhuak i nei lo ani maw, i vannei dawn aniang" Lalai'n bawkin ati a, raino luakchhuak nei ila chuan hei aia hma hian ka in hrechhuak ang

" Nia, chutiangin keimamah hreawm vak a awmlo " Ka ti a, Doctor pawh khan raino luakchhuak ka nei rih lo chu ka vanneih thu asawi, nakinah kala tuar hle dawn nge ka hrelo a, tun atan chuan ka ṭha viau e. Lalai te hawn hnuah kanu'n alo call tehmiala, ka chanchin hi engtin nge ka hrilh ṭan dawn ka hrethiamlo, an hlimna thlensak reng ka duh a mahse, an lungngaihna leh an zahna ka thlen ngei dawn ani, chutia ka in ngaihtuah chhung chuan phone ri chu a tawp hmana mahse, alo ri nawn leh

" Aw nu " Zangkhai vahin ka ti a

" I buai deuh emni? " 

" Buai deuhlo ka ringtone ka ngaithla zo leh phawt anihkha " Ka tih chuan kanu chu a ṭeu nghal hlar

" Engtikah nge i naupanchhiat hi a reh dawn le, miin hmanhmawh te pawn anlo be thei che, ringtone ngaihthlak kual vel angailo " Vin hlak hlak in alo ti

" Aw, nangte chuan thu pawimawh vak sawi tur i neilo a " Tia ka fiam leh chuan

" Anih chuan engmah ka hrilh lo che anga ani mai alawm" Alo ti ve ngei

" Sawi mai mai teh, ka fiam mai mai che anih kha " Ka tih chuan 

" I pa nen lo zin kan tuma " A sawi zawh hma hmain 

" Tak tak ami? " Ka ti hluai

" Ka sawi zawh hunte nghak veta che " Kanu'n min lo vin leh hman tawh

" Aw anih sawila " 

" Naktukah kanlo kal ang, chu chu kalo hrilhlawk che ipa pawn angai che aniang, ka zin ve dawn mi ka tia zinchhuah ahreh theih nen aremti ve tlat " A ti mawlh mawlh a, kanu leh pa lokal tur chu ka lawm rualin ka hun tawn hian azir silo, hrilh ngei an ngai anga an hrilhhai dan tur te ka ngaihtuaha hreawm ka ti lawk, kanu nen kan inbiak zawh chuan ka awmna ngaiah chechanglo in ka ṭhu reng, a hunlo ah Fela nen khan kan chesuala tuna ka chunga thil thleng hi Pathian min hremna aniang tih te ka ngaihtuah, chutiang anih chuan thil ka tisual miaua hrem pawh hi ka phu. Tlai lamah chuan atawp nan tal Fela hmuh leh ka duh a, ṭha taka thlah ve ka duh ani 

' Naute lo en reng rawh i pa chu ka hmuhpui ang che, tun bak hi chu hnai takah i hmu thei kherlo maithei ania aw, min ngaidam dawn nia itana ka tihtheih hi a tlem em ani' Ka pum chu chulin naute chu ka be mawlh mawlh

" Khawnge i kal dawn Sangsang " In aṭanga ka chhuah chhoh chuan pawnah U saia alo awm a, an fanu Pekpeki alo infiampui turh turh mai, amah a palian sia a inhmeh lo lutuk

" Ka ṭhian pakhat ka tlawh lawk dawn a " Ka ti a ka sawi zo chiah ' Kalo kal ve duh ' Pekpeki'n ati nghal

" A tlai tawh sia i hritlang ang " Ka tih chuan

" Ka kal ve chak " Tiin a men nghal pui pui

" Naute, au kal naah chuan sihal atam lutuk " A fanu chu a pawm kang pah lawp a, Pekpeki pawh chuan min ngen chhunzawm biklo, be chhunzawm tawhlo chuan rang zetin ka kalsan

" Ka rualin kal rawh " Taxi ka phar tur chu Tea'n min lo danga

" Ringawt che chuan kal duhna ka nei " Ka ti nghat, kava haw em em pawh ani tawhlo, min duh tih ka hria a ahma ang khan ka ngaina thei lo

" Kan kalna tur a in ang " A ti leh et

" Khawnge ka kaldawn pawh i hria ami? " Tiin ka melh pah kha kha 

" Lalruatfela i hmu dawn " A tih chuan ka meng nghal kawk, 'engtin nge i hriat ' tih ka tum lai takin

" Ka hre ve tawp chuvang chuan ka rualin kal rawh " A ti leh zat a, engmah ka zawt tawp silo

" Eng nge itih ve dawn " 

" Thudik ka hrilh dawn, hriat chu a phu ve alawm " Atih chuan 

" A ngailo " rang zetin kati

" Eng nge i hriat a, diklo deuhin angai reng che asin " ani pawh a aw ki adam vaklo

" Chu pawh nise apawilo, sawi suh " Ka tih chuan min en vung vung a

" Anih chuan ka hruai ang che " Ka remti ve ta nge nge, Tea Motor chuan Fela in chu kan pana, ka ṭawng chaklo bawk nen ka mit ka chhinsan vang vang, motor adin takah chuan ka mengchhuak a, Fela in piah lawkah kan lo ding reng tawh, kan dinna aṭang chuan kawtzawla Fela leh a hmeichhe awmpui an tih Zuali chu chiang deuhin an hmuh theih 

" Rf, pangpar ho hi engtin nge kan tih ang " Ring deuh taka Zuali'n atih chuan Fela chhanlet dan tur ka ngaichang 

" Pawt phawi vek mai rawh " A ti let a, kalo insangmar hman viau ani, an inbiak zawm dan erawh ka hre thei tawhlo

" Kal zawk mai ang " A tan ka hlu tawhlo takzet ani, hmaichhana ka hmuh leh kher pawh angai tawhlo, A nui a ahmelṭhain a chhelo em em bawk, hla tak aṭang pawn amawi em em tho

" I hmu dawnlo maw " Tea'n ati nghata

" Hmu dawnlo hmuh chhantur a awm tawhlo " Car seat chu ka ngheng dawt a, ka mit ka chhing nghal vang vang

" Ka lakah i huaisen nen " A ti leh hrama, chhanlet hrep duh mahila ka meng duh tawhlo, ṭha deuh chuan atlanchhuak veleh maia, ahma zawng khan beisei kala neih ruk vang nge tunah chuan kan inkar aṭha tawh ngai dawnlo tih ka inhrilh rualin ka na leh veng veng

" Thudik chu min sawi tir maita che " Thui deuh kan tlan tawh ang tihah Tea'n ati a

" Hmeichhia kha a awm ve tawh tih i hmuthiam lo emni, khanu kha awmlo se thudik hriattir chu ka tumsa ani tunah chuan thildang inrawlh ve a awm tawha, tihian awm ila theihnghilh a awlsam zawk ang " Ka ti a, engmah asawi chhunzawm tawh biklo 

" Min mamawhna a awm chuan min lo be dawn nia, ka thil tihsual vanga i tuar hian hreawm ka ti teh ania " In kan thleng leh tawha

" Aw le, ka lawm e, ka lakah chuan inthiamlo duh tawh suh" ka ti a, leng tur pawn ka sawm duh talo, engkim mai hian minti hlauthawng zo vek tawh. Damdawi ei ka ngaih avangin chaw chu ka ei ve a, ka ka hi a da luap a engmah hi atui tak taklo, chaw ka eikhamah hna ka thawk ve mawlh mawlh a, zan dang anglo takin ka mut achhuak hma phian leh nghal, zanah hian ka mu ṭha ngailo a chhunah lah ka mu ngai silo, ka taksa in atuar pawh hi a awm viau chuan ka hria. Ti lui thei tawh thlawtlo in ka indahfel a ka mu nghal hmak, khumah ka mu kai chiaha ka muhil leh lawk thei silo a, ning zetin phone chu ka khawih ta ringawt, a tawp nan tiin Fel chu msg ka thawn leh ' Dam tak leh him takin i hringnun chu ziah chhunzawm rawh, min hua la min hmuh chang pawn min hrelo ang hmakin i awm dawn nia ' Tiin tawpna thu chu ka thawn ve ta, min hua in min hmu duhlo reng se ka tan pawh theihnghilh a awlsam phah deuh mahna.

Vawiin ah kanu te anlo thlenga, counter ah ka hmuah theih loh avangin Saipuia ka tibuai leh ta ngawt, Saipuia'n min lam saka ka inluah thleng min thlah sak thlap achungah pawh ka lawm khawp mai, kanu te anlo zin sia tiin kan hna banah bazar ah ka tlang a, chaw hmeh leh ka mamawh thildang ka leh zawh hnuin aremchan lai tiin tshirt zawrhna ah ka lut a Lawmi alo la awm ve zui, ka chhuak leh nghal daih dawn mawni ka ti hmana mahse, thil tisual tu pawh ka nilo ka chhuah chhan tur a awmlo ti rilru chungin belo chuan tshirt ho chu ka enkual a 

" Kan va inhmu khat ve Sang " Ati lar lar a min be miahlo mahse, pawi ka tih loh nen ka chungah arilru putzia ka hrechiang tawha pangai tak pawn ka en thei tawhlo, a chetphung vel hi ka hlau deuh tlat tawh

" Inhmuh vak chhan tur a awmlo alawm " Ka tihsan maia ka thil lei tur pawh thlang kual chiam tawhlo in pahnih chu kala a dawr nghaktu chu pe in paper bag ah minlo dahsak thlap

" Fela nen in in ṭhen tih ka lo hria a, ka tawrhpui khawp mai che " Nui sawng chunga atih leh chuan amitmeng aṭangin aharhfim lo tih ka hrethiam 

" Lawmi, mawl viau turah min ngai suh, ka ngawih reng avang hian min zuam bawk suh ang che " Ti ram hmakin pawisa ka pe a, ka thil lei tawhsa khai bawr ṭai chungin dawr aṭang chuan ka chhuak, bazar bag ka keng bawk silo duh ai chuan ka bawr deuh ani, ka thil khai arih deuh vang nge ka tai chu ana deuh riai riai a, mi tlemna lai deuhah dingin ka pum chu ka dawm rawk rawk

' Naute min kalsan thei miahlo ania ' Ka ti ta ringawt a, ka thil tawn hi ka tan chuan thil thar vek ani a, naupai te naupai laia taina tih te ka hrethiam velo, vawiin lamah pawh engtin mah ka awm silo a, Thil rit ka khai vanga ka tai ana chu ka hlauthawng ani

" I ṭha em? " Ti tu an awm avang chuan ka harh zawka, ka hawi chhuah chuan ka hmaa Lalruatfela lo ding reng chu ka hmu a, mak ka tihzia pawh chu ka thup buailo ka hmelah alangchhuak vekin ka ring

" Ka ṭha e " Ka ti a, min lo bia chu amak ka ti 

" Khatianga chaklo leh puih ngai khan ka hmuh ah inlan tawh suh " Bul hmukin ati leh a, chhang mai dantur pawh ka hrelo

" I puih ka ngai hleinem " Tiin ka thil khai ho leia ka dah ringawt chu ka la leh sawk sawk 

" I ngai chu anih hi " Ti nghutin ka thil khai lai chu min laksak a

" Min hmulo ang ah in ngai rawh " Dawhtheilo zeta tiin ka thil khailai min laksak tak chu ka phih let ve a, alo la chelh nghet em em zui

" Luhlul chhuah lo teh Zuali'n min nghak a hun ka ngahlo" Tiin akalsawn nghal nulh a, kei erawh Zuali hming arik tel takah chuan kal nachang hrelo in ka dinna ngaiah chuan ka ding reng

" Sangi " Ti a min koh leh rual chuan ka harhchhuak zawk, hetiang em em a min thamlo tur hi chu ani biklo, ka dikna ka hre ve kar tawh bawk si, ka thinrim ve takzet

" Min puih ka ngailo ka tih kha i hrelo emni, ke ka nei a kut ka nei bawk, min hmulo ang ah in ngai rawh " A thil ken chhuhsak pahin ka ti ve fak fak a, thinrim deuhin ka kalsan nghal hlawk hlawk, a bialnu in anghak tih kha min sawikhum kher angailo, puih ka dillo a biak pawh ka be hmasa lo, ka kalsawn hnu chuan ka ngaihtuah chianga ka thinrim tulh tulh

" I va bawr ve " In ka thlenga kanu'n min lo chhawk thuai, kapa chu sofa ah alo mu thluang duai a, kanu leh pa ka han hmu mai chu ka ṭah te pawh achhuak

" Kalo let har inti em? " Ka ti sawk sawk a, kanu'n ka thil lei ho a dahchhuak mawlh mawlh, kapa bulah chuan ka ṭhu nghal a

" Lo tho duh suh Pa " Thawh mai atum chuan kalo nem mu rawk rawk

" Min nem khawlo mai dawn alawm " Nui huah huah chungin ati a, kapa ke chu ka malah nghatin ka hmehsak niap niap

" Kawng achhia iti em? A hreawm viau lo maw " Ka tih chuan

" Hmu chak hle lo che ila chuan kalo kal miahlo ang, motor chuan hi ka ngeih vaklo " Atih chuan ka khawngaih ang reng, in chung aṭanga atlak aṭangin insawisel neuh neuh hi anei chho a, ahma a pa mawngzang ber leh khaw ṭhenawm ah mitthi an awm chang pawha kal ve ngei ngei ṭhin kha tunah chuan aduh vang pawh ni hauhlo in a mawng rit ber ani tawh

" Kava lawm ve kapa, ka duat viau ang che " Ka tih chuan choka aṭangin kanu alo rak chhe ngang mai

" I nu in min thik leh anih chu " Kapa'n ati a, kan pafa chuan kan nui kar kar

" Tinge thawmhnaw te hi lian hlei hluai hi ilei ziah a " Tshirt pahnih ka lei kha kanu'n alo keng phei a

" Min phuar ṭup hak chu aninawm alawm " Kati ve maia, ka kawr chu ka malchungah lo theh thlain kan piah ah chuan alo ṭhu ve a

" Tui pawh a so tawh va inbual fai teh " Kapa en reng chungin ati a

" I inbual dawn mi pa, tui chu kava siam ang che " 

" Awmdun rei ula in in ngeih leh awm tawp silo " Kapa ka ngaihsak vel chu kanu'n min eilo lutuk

" Kapa nen chuan in ngeih loh lai kan neilo " Tia ka chhan chuan ahmui min tih sawih khum a, kapa nen kan nui hawk hawk, kapa inbualna tur tui ka siamsak a, kanu'n eirawng alo bawl fel diam tawh bawk nen tihtur a awm vak tawhlo, Ka online a kan ṭhian grp ah chuan ka lut ve mai mai, Lawmi pawh ala awma Lalai te nen kan inbiak na chu achhiar vek mahse, alo lang velo hrim hrim. Sts te ka nei ve zuai a sts ka neih khat theihzia hi, ahma pawn kan khuaa ka ṭhiante'n minlo be tawp zel, ' ka number i nei tawhlo ami? ' te anlo ti leh nawlh ṭhin. Zanah chuan U duhi te nupa anlo leng thla a, anti lawmawm tak tak ani an fate pahnih inah an daha Pekpeki erawh anlo hruai ve, anlo lut chiah ka bulah alo kal leh nghal, he naute hi chu alawmawm terh terh ania

" In fanu hi a fel lutuk, a inthlahrung mah mah zela lo leng ve rawh tih chang pawn aduhlo tlat zel " U duhi'n atih chuan kanu'n sawi belh tur ahre leh viau ang, Kapa leh U saia chu kan piahah thildang an sawi ve nuap nuap a, mipa hi chu an zia hi adang leh tlat zel, in hmu chiah pawh nise an sawi duh hi a in ang ṭhin a, na ngainat zawng te nen an inkawm ngeih nghal thei zel

" Nep hek mawle, hrilh fin theih loh anih hi, arual pawl loh zia hi " A ti zung zung kanu em em hi chu a, ka chanchin aṭangin thlai huan siam chungchangah an kai chho a, akhat tawkin kuva an ei sek kanu te pawh ngaihven vaklo chuan pekpeki nen ka phone ah yt kan en daih

" Chhuatah mutna phah ila kan vaiin mu ang u " Ka tih chuan kapa chuan rem ati maia kanu bawkin a sawi ṭiat leh tawh

" I duh leh lo mu velo mai rawh, Bawihte, mutna chu siam rawh kan pahnihin kan mu dawn nia " Nui vur vur chungin ati a kanu hriat loh lamah amit min siai zeuh, kapa tactic chu hrethiam vatin chhuatah mutna chu ka siam zung zung a, kapa nen muthran kan tum tak tlatah chuan kanu pawn mutna chu min siampui leh mek hi 

" In over dun sia " Kanu chu aphun pah reng tho, alai ah kamu a kanu leh pa banah ve ve chuan ka kuah, ka thlamuanna te hi ka tan an hlu dun em asin

" Kan fa naupang zawkin nupui neiin fa hial an nei dawna, kan fa u zawk lah nu leh pa karah mut ala chuh hram hram zel chu ani sia " Kanu'n nui vur vur chungin ati a

" Ka upa telh telha ka tan hian in hlu telh telh asin " Ka tih chuan 

" Min hmangaih em emtu min ngaihsak reng ṭhin Fanu kan nei che hi inu nen hian kan vannei " Kapa'n ati ve a, a ban ka kuahna ka kut chu a chul hliau hliau

" Mu tawh ang u le, zingah thawh kan hai palh ang " Kanu chuan dam diai in ati, ka mit ka chhinga ka mut chu chhuaklo mahse, ka thlamuang em em thung. kanu te tui taka an mut bawrh bawrh hnuah pawh kala meng renga, kanu te hnena ka naupai thu hrilh hriat hun hi ani ka huphurh lawk em em

Zinga ka harh chuan keimah chiahin kalo mu tawh, peihlo deuha tho in room aṭang chuan ka chhuak a

" In va tho hma ve Nu " Kapa nen thingpui no dawm dunin kawngkapui bulah anlo ding a

" Kan harh laklawh anih hi harh tawh chuan mut reng hi anuam lo a, pang akham zung zung ṭhin bawk si " Kapa'n ati a kanu'n thingpui min thlitsak thlap, thil nuam tak zawng avan ni tak, an thlazar hnuai ah engmah ngaihtuah hah lo a kan awm ṭhin lai kha angaihawm ta khawp mai.

" Nu pa, reilote hna kava kal anga, kan tei chhhuak dawn nia aw " Hna kal tura ka inpeih thlap hnuah chuan ka nu leh pa te chu ka hrilh a

" Tei chhuah pawh angailo, hna chu ṭha deuh va thawk la " Kapa'n ati chuar chuar, kanu pawn alo thlawp vata

" U duhi khi nilengin inah a awm ṭhin, in khuahar chuan inhan chho mai dawn nia " Kal ta mailo chuan ka ti leh a, an khawhar ka hlau ve em ani

" I hna aṭang chuan lo hawng hma duh suh, vawiin chu i pa nen aṭhianpa va tlawh kan tum hrim hrim a " A tih takah chuan 

" Aw le, fimkhur ula " Tiin in aṭang chuan ka chhuak a, pawn thleng kanu chuan min thlaha, fimkhur turin min chah ve bawk, Company ka thlen chuan kan buai ta zek a, kanu te bulah kalo let hma ang ka ti ve vela dawt ka sawi chiang ani. Nileng chuan kan buai ve a lehlam team office ah te kava kal ang lawp lawp a, team lehlam te nen hian kan in pawh vaklo. Tlaia in a ka hawn chuan kanu te anlo la hawnglo a, ala tlai chhelo bawka ka call duh talo lenna an hriat phawt chuan lengkual ve rawh se. Ka intihfai zawhah eirawng ka bawla, eirawngbawl lai laiin ka rilṭam em em mai lehnghal thingpui te ka in leh rih, ka ka tuilo lutuk areh ṭan dawn anih ka ringa ka lawm rilru viau

" Inkal na chu anuam em? " Kanu leh pa lo hawng chu kalo be vat a, eirawng pawh ka bawl zo diam tawh, an leng rei ve khawp mai

" Nuam khawp mai, Aizawl ka kal lohna arei tawh lutuka inu chu awmlo se ka bo hrim hrim ang " A jacket hlih pahin kapa chuan ati a

" Aizawlah ṭhianpa i nei tih pawh i sawi ngai silo a " ka tih chuan

" Ṭhianṭha lutuk kan nilo kan khaw chhuak ania, kan kal remchang em a kan tlawh ve mai mai anih hi " A ti leh chuar chuar

" Bawihi, Fela nen in inṭhen tawh emni? " Kan ngawih vang vang hnua ka nun atih chuan ka phawk deuh hra

" Tinge? " Ka ti a, kan inṭhen thu sawi tlang tawp hi hreawm kala ti deuh tlat

" Vawiin ah ka hmu a, mizoramah a awm reng te chuan min hmu tur pawha alokal ve ka ring, nang lahin engmah i sawi bawk silo " A ti leh a, kapa nen chuan ka chhan leh hun an nghak tih ka hria, engkim ka hrilh vek mai ang

" Thil ka sawi dawna ka sawi laiin minlo pawt chat su aw " Ka ti hmasa te te, uluk taka thil ka sawi changa min tibuaitu an awm hian ka sawi tur a bo duak zel, chuvang chuan thil serious deuh ka sawi ve chang hi chuan min tibuai lo turin ka hrilh hmasa ziah.

Cont..