Tuamdamtu chapter-13

 

Inchhung ka luh chuan min en deuh ṭhapin ka hria a, ka zak lutuk ringawt let leh ngawt chi ani tawh silo, Udampuia te ṭhutna lam chu ka pan ding a, ani pawn chiang zetin minlo en reng, abul ka thlen chuan atawlhsan deuh a, ka ṭhut aring te pawh aniang

" Valleyball an practice naah kan kal dawn asin " Ahriat tawk tur lekin abeng bulah ka hrilh sar sar a, ka sawi zawh rualin chiang zeta min en 'khawngaih in ' hmui phun chuan kati a, abuk tak nghat ah chuan hlim zetin ka chhuak leh nal nal 

" Min ti zak lutuk " Beiseia bul ka thlen chuan kati hlak a, ala nui vur vur leh nghal

" Aphal chuan kal ila " Ati a, kan kal hnak hnak, an khua ani bawka hmelhriat angah a, be tawk an awm reng bawk 

" Inu te i tlawh dawnlo ami? " Ngawi renga kan kal lai chuan kati sep a

" Court bulah an awm alawm, chuvang alawm kal ka tih hram ni " atih chuan ka bu nghat nghat a, Khaw dung vel chu anuam ka tih zawk tak ani, Naupang kan kal pelh ho chuan min en leh dauh dauh zel a, Nu leh pa ṭhenkhat ho chu theihai kung hnuaiah an ṭhu khawm a, an nui leh dar dar zel 

" Beisei, ilo hawng alaw " An tih chuan kan ding leh hrih a

" Umm, Minister motor kalo khalh a " Ati a, ka nin ahlau ve deuh aniang 

" Valleyball court ah kan zu kal ang e, hetah kan awm rei hman silo a " atih hnuah kan kalsan a, kawtlai ah chuan Ar hmuh tur an awm nual a, An inbul velah te chuan thlai rah hmuh tur pawh a awm nual mai

" I vawikhat kalna ami? " Beiseia'n atih chuan 

" Umm, Thingtlangah ka kal ngailo " ṭha deuh chuan kalo ti ve mai a

" Thingtlang nun hi chu ala zalen halh a, mihring kan inpawh a kan induhsak bawk, chawhmeh insuah te kanla ngaihlu a, kan khua pawh hi kan khua anih avang nilo in anuam kati mahse, Ṭhalai te hi kan thatchhia hei hi insiamṭhat kan ngai lutuk, Ruihhlo atam em em bawk a " Anui pah hak hak a, thil min hrilh ve nuap nuap bawk, Valleyball court pawh kan thleng har lo

" Pavillian ah sawn i ṭhu dawn nia, kan inah ka han chho lawk ang, nangmahin i awm hreh em? " Atih chuan lu kalo thing a, Hmeichhe lamin an beng a, an thawm aring khawp mai an nui leh dar dar zel a

" Chair ah hian lo ṭhu rawh, ka reilo ang " Atih chuan ' kal thuai rawh ' ka ti a, akal hnuah erawh ka ṭi deuh dak mai, tumah han kawm nel tur ka hrelo, pavillian chhunga awm ve ho chuan min melh leh zeuh zel a

" In awmhmun kha sawn ve rawh u " An sira mipa awm ho in an ti leh hluk zel a, Hmeichhe ho erawh ball atlak apiangin an nui leh vak zel

" Mikhual emni inih " Nu pakhat hian min be nawlh a

" Umm " Nui sang chungin kati sep

" Beiseia nen khan in in hria emni? " Ati leh zel a

" Ummm, hria ani mai " ka ti leh tawp, min biak vak ngaihna ahre tawh biklo aniang, a ngawi veleh ta daih a, kan sir deuh ami te chuan ' Beiseia hian nupui alo ru aniang ' te anti a, ka nuih aza ru lutuk 

' Mipa kan kim tawh, kanlo khel ve tawh ang ' An ti a, hmeichhe lam pawh anlo chhuak diah diah, Pavillian a anlo lawn ve chuan ka ṭhutna kalo siamrem thuai a, anri nghal bawrh bawrh mai, ka awm ve chu min en leh zeuh zel a, amak ve viau ang mikhual ka nih bakah kala rai zui ania

" Ka rei em? " Beiseia lo chhuk leh chu ka lawm lutuk

" Rei ṭep " Ka tih chuan 

" Sorry, Inpa te pawh chu anla zo lo aniang chu maw " ati a, ka hriat bik loh thu kalo sawi ve mai, Hmeichhe ho chuan an be bawrh bawrh a, an innel hmel hlawm khawp, Mipa khel chu kan en a, an thiam hlawm khawp mai hmuhnawm ka ti a, thildang vak ka ngaihtuahlo 

" Khi anlo kal " Hmuhnawm ti zeta Ka en lai chuan Beiseia alo ṭawng leh thut a, ka phu deuh zawk bawk nen rum deuhin ka melh a

" Tute maw? " Ti hlak chungin ka hawi chhuak a, Udampuia te chu Pavillian panin anlo phei a, Midang pathum vel antel ve bawk, Ka en ve rualin Udampuia nen chiang zetin kan in melh leh a kalo nuih var var, Pavillian alo luh rualin ka chhipah afawp leh zeuh a

" Ṭha deuhin khel rawh u, Hei kan sport minister in ahun chep tak karah a en dawn che u ania " Palian ve deuh dul kiar luah mai leh lukawng bel chuan ati lung lung a, Court chhunga awm ho chuan kan lam anlo hawi ṭhap mai 

" In zo tawh ami? " Ka bulah alo ṭhut ve rualin kati vat a

" Umm, ava hmuhnawm awm ve " Dam dapin ati a, ka kut chu ahum leh vang vang 

" Anthiam reuh lutuk, Valleyball hi chu ka ngaina hrim hrim a " Ka ti sar sar a, min en vung vung avang chuan ka en ve a, mitmeng fiah leh dam thlapa min en reng chungin anui suk a

" Tournament kan fight dawn a, kan bei ngawrh ve lai tak ani " Nichina lukawng bawk khan ati leh a, kan bulah alo ṭhut velai ka hrelo hrim hrim 

" Ka nupui in thiam ati khawp mai " Nui suk chungin ati a, Lukawnga kha anui hak hak 

" Valleyball hi chu kan tithei ve viau zel " ati a, asawi zui ṭeuh mai, an thusawi lam ka ngaihsak vaklo

" Khatiangin mipa dang melh ngawih ngawih suh " Ka bengbul a alo tih chuan ka ner nang a

" I over aw " ka ti hlar, Lo biaa chibai tawk an awm ve reng a, tumai pawh chuan nui sangin min be hlawm vek a, ka rin aiin anuam kati daih

" Midangin min kalsan tawh a, kan kal ve thuai loh chuan " atih chuan ka thaw hak a, kan awm rei ve tawh a ahun tawh reng 

" Min zu kalsan mai dawn emni? " ka tih chuan tur zetin min melh a, ka nui hak hak 

" Kal ang " ti hluaiin ka ding vut a, ka dinchhuah rualin alo ding ve nghal luah a

" Pu Hruaia te kha ankal tawh si a, rei deuh awm duh mahila kan inhlat lutuk chu atih chi lovang " Lukawnga leh midangte chu a enkual thuak a, anni pawn anlo hrethiam khawp mai

" Kan chelh rei zawk lutuk che u alawm, Hetiang hi kan beisei phalo hrim hrim, hun khawhral nan phei chuan i mit kan tlunglo viau ang " anti zung zung a, an inngaitlawm thiam lutuk chu an bula awm anuam kati 

" Hun khawhralna ṭha tak ani, hmahun eng tak innei pawn ka hria, Ka nupui pawn hmuhnawm ati khawp mai 'Min zu kalsan mai rawh u ' ati a mahse, ka phal silo a, remchangah in khel en hun te pawh ala awm leh mai ang" ati ve duah a, Ṭawngkam te hi athiam in abei nalh ve thei ania, amah en mai hi chuan thumal pa5 aia tam chhakchhuak ṭhin hmel pawh apu lo 

" Jenny, lo pe ta che " Atih leh lai chuan Jenny a awm ve tih ka hre chiah, Jenny chuan Lukawnga chu Envlope hi ape a

" Ball leh net vel kan ken kha kan sem zo hman a, kha kha inpawm mai aniang chu, remchangah Ball pawh in pek kan tum ang a " atih lai chuan kut anlo beng dar dar a

" Hetiangte kan beisei hleinem " An ti a, an lawmzia an hmel aṭangin ahriattheih

" Thla la lawk ila, Ig lamah page kan nei ve a, chuta post tur chuan. Aremchang ang em? " Tlangval lian lemlo tarmit vuah chuan ati a, thla te kan la leh ang lawp lawp a.

" Kan lawm hle mai, tluang deuhin zu kal rawh u " Min mangṭha sap sap a, Pavillian chhukna step ka kal tur te chu ka kawngah akuah run a, ka lawn lai pawn pangai deuhin ka kal tho sia mahse, min ngaihsakna chu anuam kati 

" Khatiang mai mai ah hun khawhral hman kan nih loh nen " Kan tlan chhuah leh rualin Jenny chuan ati hlak hlak a

" Khatiang mai mai tih te chu a " Ka ti fan raih a, Miin an theihtawpin an practice a ' mai mai ' lo tihsak chu ka ngaihdan ani tehchiam lo 

" Nupui inih chuan i pasal hun khawhral lo in ṭawiawm zawk rawh " Atih leh lai chuan ka chhan hmain 

" Jenny, i ṭawngkam fimkhur teh " Udampuia'n alo ti hluk a, chhan en ah pawh ka en tawhlo 

" Ka sawisual emni? Hun tight zia te chu i hria alawm " ati leh zel a, Beiseia chuan ngawi rengin motor akhalh a, Jenny ṭawngkam kha lem duak har ati ve viau ang, a khua ani a, aṭhiante anni bawk

" A thiamsa leh athlengsang sa ringawt buaipui hi Sport minister tih tur anilo, Harsa tak chunga lo ti chho ve beuh beuh te dawmkan leh ṭanpui hi ka tih tur ani, chu chu hun khawhralna anilo, khawpui a cheng leh sum nei te nitin tlai tin Coach hnuaia training ṭhin aiin thingtlang mite puih hi ka thlang zawk " Udampuia aw chu a khauh in hnial chi ani tawhlo tih chu kei aiin Jenny hian ahrechiang zawk ang, akut chu ka chelh sak a, akut pakhat chu ka kut pahnih in ka hum ve thei ṭawk ani

" Pawisa ami i pek kha " ka tih chuan abu nghat a, thawk ala ham ham bawk 

" Hmeichhe lam chu an en tlak vaklo mahse, mipa te kha chu an thiam tawp " ka tih chuan anui suk a, alamah min pawthnai hret bawk 

" An club president khan asawi alawm, hmeichhia chu nikum aṭangin an inzir ve chiah a, thiam nghal tawp chu ahar ve ang " Ati sup a, a awm a bei chial chungin a khabe hmul ṭo siar siar chu ka khawih neuh neuh a

" Naute ka neih hunah min zirtir vela " ka tih chuan cool zetin min en a ka lai pheng chuan ka lei ka chhuah leh tawh

" Zirtir tur che ka ngah mai " amah en tura ka hawichhuah lai chuan ka chal ah alo fawp zeuh a, hahdam deuha thawk la suai suaiin ka Pasal awm khauh far a bei chial chungim mit ka chhing siai siai a, Ka pasal kiangah hian ka hahdam ṭhin, Ka nun thim tak aṭanga min khaichhuak tu anih avang nge ka tan hian ahlu in apawimawh takzet tawh, keimah ka inrin aia nasa in amah hi ka ring zawk.

...

" Bawihte, eichak i nei em? " Kanu nen kan bazar a, Kan zin kan hawn aṭang pawn karkhat zet chu aliam leh tawh, insawiselna em em ka neilo a, nitin ka hun hman chu a hahdamthlak ti ila ka sawifiah berin ka ring, inthlahrung reng reng in ka awm tawh biklo a, kanu te bulah pawh ahma ang em chuan la awmlo mahila ka zia chho viau tawh, Udampuia nen kan inkar pawh aṭha a, Ruahthimpui leh chhum dum kha Vanneihna ruah leh chhum varin athlak ve mek niin ka hria

" Nei lemlo, Ka rilṭam tawh zawk " ka tih chuan anui hak hak a, ahma ang chiaha ka pawh leh aṭang hian, ka duty loh apiangin kan awmdun chawt zel 

" Khi tah khian kan han in eipuar dawn mi " Kan chhak deuha Restaurant chu amelh zeuh a, ka hniallo viau ka rilṭam tawh em ani 

" I duh duh chah rawh " Ṭhutna awla kan ṭhutthlak rualin menu min pe a, phur zetin kalo ban vat, ka order zawh chuan ka hawikual a mahse, ka mi hmuhte avang chuan ka kawchhung hi avawt rawih rawih in ka hria

" Diklo a awm emni? " Ka hmelah chuan alo lang chhuak nge kanu chuan ka hawina lam ahawi ve vat a

" Awmlo e " ka ti ro halh a, ka dang ro hulh avang chuan dawhkana tui an chhawp chu ka in nghal khawlh khawlh 

" I hmelhriat emni? " ati leh zel a, kalu ka thing nak nak 

Kan eitur chah alo thleng a mahse, eichakna ka neilo hlauhthawnna chuan min tuam hlup hlup ni maiin ka hria

" Nute, thil in ei chhuak alaw " Jenny leh Lawmkima chu kan bulah anlo ding a, ka thawk ka chelh nghal tlat, Jenny chu anui sang a, amitmengah chuan min huatna bak hmuh tur a awmlo 

" Kan bazar a, Bawihtei hi arilṭam deuha, eng nge intih zawk " kanu chuan nui var var chungin ati zang vah a

" Thil sawidun tur kan nei a, kan inhmu lawk anih hi " anui leh hak a anui ri te chu ka rap zawk, min kalsan hnu chuan thawk kala ham ham, kha aia rei awm selang chuan ka thidang thei ang, kanu bulah chuan pangai deuh angin ka awm lui tlat a mahse, ka hlauthawnga Lawmkima khan afa kapai tih ahrilh ang em? tinge thlamuang leh rilru thawveng tak hian rei tak ka awm ve theih miah loh le. In kan thlen leh rualin ka chauh thu chhuanlamin room ah ka tlang nghal a, inthlak lemlo in khumah ka inthawlha puan ka sin hlun bawk, ka khur der der a, eng ber nge ka hlauh pawh ka hrelo mahse, ka thlamuang hlawl lo ani tawp mai, Chhum var kha chhum dum in alo thlak leh ta nimaiin ka hria a, ka tawt up up bawk.

" Duatte " ti ri ka hre ruai ruai a, ka biang chu kut lum vung vungin a khuap run in ka hria, peihlo zetin ka meng siar siar a, hnai deuh takah Udampuia min lo en ngur ka hmuh chuan ka meng kawk a, ani erawh chuan thaw huai hmel apu

" Na i nei em? " Awm hla deuhin ati a, ka taksa chu ahuh hliam a, ka awmdan chu ka hrethiamlo ngei mai 

" I inkhuh a, ithlan atla vek anih hi " atih chuan ka mut hma thil thleng bawk chuan min luhchilh leh a

" Eng nge thleng, kanu khan in bazar thu asawi a " ka mit ah min melh ngur a, ka melh rei ve ngamlo 

" Ka ṭha alawm " Zawi tein kati sep a, awih lo tih hriat zetin athaw hak thung, inbeng kangin khum lu ngheng chuan ka ṭhu a, ka thawmhnaw pawh kan bazar na ang ang kha ala ni, ka thlanin ati hnawm chap bawk 

" Hey, min lo hnaih suh " Min hnaih atum chuan a awmah kalo nam dat a, ka thlan rim hi keipawn kati hleithei lo 

" Lo inti fai la, chaw ei turin kan chhukthla dawn nia " atih chuan ka lo ' Aw le ' thuai a, inthlakna la sawk sawk in bathroom ah ka lut nghal a, tui lum hmanglo chuan tui vawt ka hmang zawk a, ka kawchhung hi asa hal ni maiin ka hria, Lawmkima leh Jenny berkher ka hmu dun khan min ti chiai zo vek ani

" Duati " Bathroom kawngka ari dat dat a

" Aw, kalo chhuak " Shower chu ka off nghal vat a, ka ngaihtuahna kalo kawm leh nasa mah mah ani

" Tui vawt i hmang elaw? " ka chhuah rualin min dinchilh nghal run a, amitmeng buai nak chu ka hmuhhmaih lo 

" Umm, ka hmang deuh mai mai " kati nghal vat a, thawk alak hrawih chuan ka ip deuh chawih mai, ahmui lum veng veng in ka chal afawp vang vang a, chumi hnuah a ka aṭangin alo thaw chhuak leh ham ham 

" Inthlak rawh, i lu te kha tih hul hmat angai dawn anih kha, kalo chhuk chhung ang " tih leh in her arual a, achhuah hnu chuan ka inthlak nghal zung zung, ka sam chu towel chuan ka hru nawk nawk a, hair dryer chuan ka chhem ro nghal bawk, ka inpeih fel vek hnuah inhnuai ah chuan ka chhukthla a, choka ah tlangin kanu chaw ei lo siam mek chu ka pui nghal sawk sawk 

" Iṭha deuh tawh maw? Rai lai hian mood inthlak thut hi a awm ṭhin a " Hmuhnuam zetin min nuih var var a, keipawn ka nuih let ve sang

" Eirawng pawh ka bawlpui lo che a " Inthlahrung deuhin kati sep a

" Angai teuhlo, i mu thei kha azia zawk, inthlahrung lutuk ṭhinlo teh " ati hlak hlak a, athinrimlo tih ka hrechiang, Udampuia hi nei talo ila hei ai hian ka pawhin ani pawn min duat zawk ang, Dawt liamtham tak ka sawi avangin ka hlauthawng hmaa an bula ka hlim lutuk chuan nakinah kala lungngai leh thuai dawn tih thlenga ka ngaihtuah ṭhin avangin hlim luih ahar ṭhin takzet. Zanriah chu kan vaiin kan kil ho tehmial a, Zorina aṭawng bawrh bawrh laiin Remrema erawh angawi ngul a, Udampuia leh kapa chuan Zorina thusawi chu an zawm ve leh zeuh a, kanu chuan a khak reng thung. Thleng sil ka tum chuan Kanu'n a phallo a mahse, ka tih luih ve tlat avangin min hnial ta biklo, Ka sil zawh chuan kapa te bulah ka phei ve a Udampuia a awm ka ring vang ani pakhat

" Nu, Udampuia hi khawnge " Ka ti sep a, ṭhu ta lemlo chuan ka hawikual a

" Room ah achho anih kha, i hmel adiklo han hahdam rawh " Ati zung zung a, Nui var var in 'Muttui' ti a kanu leh pa te ka thlah hnuah inchung ah chuan ka chho ve a, Udampuia chu Balcony ah chhuak chiah silo in pawnlam chu alo thlir reng a

" Diklo a awm emni? " a inthlakna khuma adah tawp chu la kangin bal bawmah ka khung a, alo inher ruai ruai chu ka mitsir in ka hmu reng

" Chu chu ka zawhtur zawk che ani " Amitmeng chu ka chhiar thiamlo, amah hmachhawn zawng chuan ka ding a

" Ka ṭha alawm " Nui lui sangin kati a, khatiang avang khan tihbuai ka duh tawhlo, ahnaah rilru apek angaia kei leh zel in ka tihbuai reng chuan a hah lutuk palh ang 

" Vawiin ah Jenny te inhmu, adik tiraw? Kanu in asawi a, Jenny te inhmuh hnua i hmel adanglam sawtzia asawi bawk " atih leh zel chuan ka en mawl tawp, amitmengah chuan dawt hrilh luih chi ani tawhlo tih ka chiang viau bawk

" Englo, Ka..ihh Lawmkima nen ka hmu dun a " Ka tih niai chuan aphun hluk a, min lo pan hnai vut bawk 

" I hlau emni? " A awm a min kuah bei paha atih chuan ka mittui ahnai leh kuar tawh

" Ka hlau, Jenny leh Lawmkima in hmu khan kan tana thilṭha an sawi dawnlo tih ka chiang lutuk, ka hlau a ka kawchhung hi asa hulh hulh bawk, ka dang te hi aro a tui in nghek nghek mahila aro leh zel " Ka sawi zawng chuan ka awm hle hle theilo, ka taksa hi ka tih chet pawh nilo hian a che leh dat dat ṭhin a, ka khur hlak hlak bawk nghet deuhin min kuah a

" Shit!.. inbengdai rawh Duatte, ka awm alawm anni khan an tina pha miahlo che " ka chhipah afawp vang vang a, ka kut ka hum ruh ngawt ngawt chu ka thlah a, thawk kala ham ham 

" Thudik hria se Kanu hian min haw ngawt ang " Ka ti ṭiak a, min chhang tawhlo a mahse, min kuah nghet sauh thung, ' A haw lovang che ' tia min hnem lo chu ka lawm takzet, dawt avanga ka hlauhthawnna hi dawt hmang bawka inhnem leh ka duhlo.

Cont...