Tuamdamtu chapter-18

 

" Ramtei chanchin i hrilh lo ani maw? " Zingah kanu chuan min chhuahchhal a, ka chhang lemlo 

" I sts te kha delete nghal rawh, inhauh avanga khatiang hman nghal ngawt tur ani ngailo " ati leh hlak hlak a, nizan khan ka rilru abuai nuaih a, ka rilru a lang hmasa ber angin ka che tawp kha ania, zingah ka delete nghal daih a ka zak chem chem bawk. Ka sts lo comment tu an tam a, thil ṭullo tawp khawk kati ani. 

" Ka delete tawh " ka ti a, tui chu ka in khalh khalh, ka dul puar lah chu ka chul heuh heuh bawk 

" Nu, thil eng emaw avangin dawt hrilh ta che ila min hua ang em? " Kanu chawhmeh chawk mawlh mawlh chu ka en reng a, ka thusawi avang chuan athil chawh lai chawl meuhin min lo en

" Achhan azir aniang chu, nizan aṭang tawhin i awmdan adiklo, thil nilo lo ngaihtuah lo khan hawng tawh rawh, inu pawn alo ngaihtuah lutuk che, Bawiha lahin min lo call sek a, i awmna hrilh lo tura min tih avangin ka sawilo anih kha" ati hmarh hmarh a, athil chawh lai bawk a chawh chhunzawm leh

" Aṭha sawi suh, chaw eikham ah in check up in ka kal dawn, zanah kalo hawng leh ang " Ka tih chuan chek hlukin gas chu a off a, ka lam lo hawiin kawng dawm al chungin min en 

" Chhan ṭha tak anih loh chuan hetah ilo kal ka phal tawhlo, hawng ang che Pasal neih tawh hnuah naupangchhia zetin awm reng loh tur " ati hmak a, thutawp asawi ni awm hrimin a hmui achip nghal hmak bawk. Chaw ei laiin kapa chuan thil thleng a awm em tih te min zawt a ka chhan hmain kanu in ' Ati tau ve deuh anih kha, vawiin lamah alet leh ang ' alo ti zung zung a, kanu chu rum zetin ka melh, chaw pawh minti eichak mai mailo

" Ka huphurh vang che anilo, nangmah chauh ini tawhlo naute kha ngaihtuah la, inhauh hleka chhuah ringawt te hi aṭhalo, tuar la i tawrh theih loh tawpah chuan i tan kan awm reng, engtik lai pawn ilo tlu lut thei " Ka room ah kanu nen kan awm a

" Ka hria alawm " kati sep mahse, ka rilru erawh thlak ka tumlo, Vawiin hi ka in checkup hun ani a kan in aṭang chuan inkhalh chhuak 

" In enkawl ṭha rawh aw, vitamin te kha ila ei em? " Doctor chuan ati a, ka ei thu in kalo chhang vat

" I hb ahniam deuh a, i bp pawh ahma aiin atla hniam, thil eiṭha ang che " ati hmuk a, ka nui ringawt tunlai tak hian thil ka eiṭha lo ve em ani, Damdawi min ziahsak ho ka lei laiin Kanu Udampuia nu zawkin min lo call a

" Minva ti mangang ve " Ka lak rualin alo ti nghal a, ka inthiamlo takzet

" Nu, tihpalh " ka ti sep a

" Apawilo, lo hawng vat rawh aw " ati leh a, ka chhan hmain call chu adah zui nghal daih, ka damdawi lei chu la in pawisa te ka pefel a, tunah chuan ka thil huphurh em em ka tih angai tawh dawn. Hmanhmawh lemlo deuh in ka tumram chu ka pan a, ka thlen hnu chuan thawk la ham ham chungin kawngka chu ka kik a, kawngka lo hawngtu in min hmuh rualin ngeiawm zetin min nuih sawng mai, ngaipawimawh lo luiin 

" Luhna tur kawng min kian thei em? " ka ti kha fak a, chhunglam aṭangin Udampuia'n ' tunge lokal' alo ti a, chhungril hi ache dat thei, ka lantir huhlo thung

" Kan lawm tehchiam lo che asin " ti a nui hak chungin kawng min kian a, Ṭhutkhawnnaah chuan Udampuia chu min hnungchhawn zawngin aṭhu a, ka thawm ahriat avang nge alo leh hawi vut, min hmu chu a beisei biklo tih hriat takin a mitmeng dam raih ṭhin chu a phawk deuh hra a, kei erawh zalo zetin ka nui thung 

" Min hmu chaklo tih chu ka hria ania " ṭhen lui sak chungin kati ve kher a, amak ti hmel chu athlak leh diam tawh 

" Jenny min hawnsan thei tawh ang " Atih chuan Jenny lam chu ka hawi ve kher a, a huat tur tawk lekin ka nui seih bawk, ka tisual lo e amitmeng pawh aling nghal phat alawm 

" Dampui " No zetin ati a

" Ilo kalchhan hre rawh, ka nupui nen hian inbiak kan ngai" ati chang ta fak a, Jenny pawn hnial chi ah angai talo nge sofa a abag chu la sawkin achhuah dawn chuan min su deuh kher a, kei lah kalo inringlo bawk nen ka pai deuh khat

" Tihpalh " awlsam zeta tiin a chhuak a, thawk la halh in ka dindan ka siamrem leh nghal

" Lo ṭhula " Jenny chhuahfel hnu chuan Ati sup a

" Ti hian ka ding mai ang, sawi tur ka ngah lemlo " ka tih chuan, tak ngala min en chungin aphun hluk a, asawi pawh ka hre mai mai lo

" Sawitur ka ngah " ati a, hnial zui chiam peih lo chuan a piaha single sofa ah chuan ka ṭhu thla, ka chezia chu chik zetin min lo en 

" Duati " atih ril ruih chuan ka thawk ka chelh nghal tlat a, chiang zetin ahmel chu ka en bawk, ṭawngkam nem leh ka hriatnuam tur in min belo se ka duh 

" Ka sawitur ka sawi hmasa ang " ka tih chuan mitmeng dam zeta min melh chungin abu nghat a

" Inṭhen ka duh, ti hian inṭhen mai ang, chhuanlam tur chu a awm ve mai ang, chhuanlam pawh kan mamawh lemlo maithei bawk " ka sawilaia min lo tihbuai ka hlauh luatah ka mitchhing vak chungin ka sawi nghal zung zung

" Inṭhen thu kha sawichhuak teivet suh " ati hluk anih chu! Nizan zankhua in ka ngaihtuah a, heihi ka tihtur ani in ka hre bawk, Min hmu duhlo a ka kiangah a awm duh loh miau chuan tinge ka neih luih tlat bik ang, hmeichhe dawuhzep tak chu kani maithei naute tan hi chuan nu chheltak kani thung

" Hei hi aṭha ber, kei aia hmeichhe ṭha leh fel i phu ka tih kha, nunhlui ṭawp leh a nunhluiin a umzui reng hmeichhia hi chuan ka kiansan tawh ang che " ka tih leh chuan thawk ala hrawk a, en pawh ka en duh tawhlo, ka mittui chu ka dang kir hram hram a mahse, alo luangthla tho

" Thlalak ka hmuh khan ka insum zo lo ani, Lo let leh vat ka duh avangin engkim ka hna pawh lutuk awmlo in ka thawk a, hmuhhlan che nghahhlel em em laia kha thlalak ka hmu khan min ti chawmawlh vek a, thinrimna in min tuam hlup hlup bawk " Athusawi chu adik ngei ang, keipawh ni ila amah ai hian ka che nasa daih zawk maithei ani, hei avang tak hian ania Udampuia nen hi chuan inṭhen aṭha zawka ka hriat ni, Nunhlui ṭawp zet nei kani a ka nunhlui te hi thui tak ka tlansan tawh emaw pawh inti ṭhin mahila ka inchhuih khut changin min lo umpha leh thuai ṭhin. 

" Keimah ka inrin aia nasa in ka ring che ka tih kha, I thusawi engmah hi rinhlel ka neilo " Ka tih sep chuan

" Anih chuan engvangin nge inṭhen chu ila duh tlat " Ati hmuk a, ipik zetin thawk kala hap 

" Ka nunhlui hian ala tina leh ṭhin ang che, Mipa smart leh inthunun thei tak, zaidam em em khan kan thlalak i hmuh ringawt pawn i insum theihna i hloh vek a, eng anga hun khirh ah pawh fim taka ngaihtuah hram ṭhin khan engmah ngaihtuah fim hmanlo in i che a, i tan hian ka ṭha tawklo " Ka tih chuan thawm areh vang vang a, sana in chek ri bak hriattur a awmlo.

" Mipa famkim ka nilo tih chu tikhan achiang mai alawm, chuvang tak chuan hmeichhe famkim ka duhlo ka mamawh miahlo bawk, Laldampuia hian Lalhlimpuii hi ka mamawh a, ana te, a hliam te, ahreawmna leh alungngaihna te thlenga tuamdam sak ka duh " Kan ngawih dun vang vang hnuah alo ti khauh a, sawi tur pawh ka hre tawhlo 

" Ten hmel zeta ka pum i melh hnu khan i bulah hian ka inthlahrung zual tih i hrethiamlo emni? I thinrim laia i awmdan kha adam zawngin ka ngaihtuah hram hram a, theih chin pawh ka nei. Mahse, ka naute i en dan kha ka ngaihtuah let apiang in ka la ṭim uai uai thei " Ka ti fiah fak fak a, amah ka en rualin na tuar hrep ang maiin amitmeng chu adanglam 

" Duati " atih halh chuan 

" Aih, tikhan min ko suh, kan inkar chu ti hian ti tawp mai ang " ka tih leh rualin ache vut a, min hnaih nghal ruak bawk, a cherang lutuka chuan min ti hamhaih takzet

" E..eng nge maw itih le? " ka ti lawi rat a

" Inṭhen kha sawi tawh suh, ka ṭhen dawnlo che ka lakah i lungawi lo anih chuan i lungawi hun ka nghak mai ang " Ka hmai zawnah ati khauh far a, aṭawng zawngin ka hmai alum pha, kan inhnaih lutuk chu thawk pawh ka thaw ṭha ngamlo, ni reilo te chhung mah nise atello a hun hman kha ahreawm takzet 

" Udampui " Ka tih sep rualin min fawp nghal chawt a, hawisawn ka tum chuan ka biang tawnah chelhin talsawn theilo in min siam chu ani der, duhthawh leh ngengnawl zetin min fawp ngawr ngawr a, luhlul chhuaha ka hmui ka chip tlat chuan min fawp reng chungin a kiai suk, ka ngei lutuk leh thinrim bawk si chuan asam ah ka kek a, chutia ka tih veleh chuan chimawm lutuk in arum anih chu! Hetiang bak bak a mihring ngeiawm leh chimawm thiam hi ka hrelo

" I va kawlh tak " Ati hluk a, ading mar nghal vut 

" Min fawp lui ziah suh " ka tih hmuk chuan dak meuh in anui a

" Zanriah kan eichhuak dawn mi? " engmah thlenglo ang maia a awm chuan min ti lungawilo zual

" Laldampui, min kalpah viau suh " Ka tih hlar chuan 

" No Duati, kal pah theih pawh inilo, lian vaklo mahla " nghal zetin ati leh a, ṭawng pawh ka ṭawng peih tawhlo 

" I kalna tur sawi hmasa lo in chhuak tawh ngai suh " ati a, chhan pawh ka chhang peih lo

" Min tih mangan zia i hria em? Call i off a, Nupuii lahin engmah asawi silo " atih leh hluk pawn, kala ngawi reng 

" I sts te lah kha " atih rualin kalo nui hak a, tur zetin min melh nghal khui thung 

" Nu nimai tawh tur inih kha, naupangchhia zetin che tawh suh " ati leh a, ngawi mai mai tawh se kati

" ka kal tawh ang e " ti hliai in ka tho ṭiah ṭiah a, ka pum hian thawh te hi minti harsat ve tawh 

" Min sawi nawn tir suh, zanin hetah kan riak ang a, naktukah kan hawng dawn nia " Atih chuan Thinrim lutuk in ka melh ngawt ngawt, min hmu duhla a bawlhhlawh tenawm zet angin ka naute a en a, min ṭawngkhum bawk, a pangtilum leh amah hi ngai viau mahila, a chetdan kha ka theihnghilh thei bik lo

" I chetdan kha ka theihnghilh theilo, chuvang chuan i bulah ka cheng duhlo " kati a, kal pelh mai ka tum chu hnunglam aṭangin min lo kuah a, ka nghawnga athawk lum hak rualin ka mur chhuak nghal vek thei 

" Duati " Tham ṭuakin ati a, a ngengnawl takzet 

" Khami ni khan kalo bia che asin, ka mangan em em lai khan nangmah hi ka hrechhuak hmasa ber che a, hna inei tih ka hria mahse, ka mangang a nanglo chu biak tur ka hrelo " Ka ti chhuak halh a, ka hmui ka pet fan fan bawk 

" I P.A khan i buai thu asawi a, chuti chung chuan biak hram che ka dil mahse, khanu khan min ṭawng el kual vel a, khatih laia ka rilru a lang ang ang khan ka che chhuak ta tawp ani, Naute chungchang asawichhuah ka hlau a, i kiangah ka awm theih tawh loh ka hlau kha khan minti mangang bawk " ka mittui aluang zung zung a, ka ṭap chu ani mai, nghet zetin min kuah a, ka bekah ahmui anawr vang vang. Amah avanga hreawm leh ka nat em em lai khan Hetianga ṭah hlawp hlawp hi ka chak anih kha mahse, amah avangin na in hreawm mahila abulah bak ka ṭap chhuak thei chuanglo, keimaha ka awm lai khan ka mittui ahul a, Udampuia bula ka awm a akut dam thlupin min khawih leh meuh chuan ka mittui pawh tawp thei tawhlo tur ang hrimin anih hi alo chhuah 

" Ka tihpalh Duati, i na te tuamdamsak tur che ka nih laiin i hliamah chi ka phul ta zawk a, Ka bulah awm rawh ka tihsual ka siamṭhat min phalsak hram rawh, keimah avanga i natna te hi ka *Tuamdam* leh ang " Ati sup sup a, ka la inhnit feih feih reng.

" Thil hrechianglo in che buan buan tawh suh aw " Alama inher pahin ka ti a, ka pum in min dal deuh tawh mahse, ahma zawng chuan ka kuah tho, alungphu dup dup chu ka ngaithla a

" Ka hrereng ang " atih chuan ka nui a

" Minla hmuh duh loh reng ka ring a, hreh deuh chungin kalo kal " ka tih chuan anui chhuak hak a, keipawh ka nui tho, atira ka tumdan leh tuna ka awmdan hi a inperhsan lutuk

" Ka hmu duh che ka chak bawk, ka lakah i lungawi loh ka ringa ka inthiamlo bawk chuvang chuan kala hmu ngamlo che " ati a

" Jenny kha ka thik lo anilo mahse, ka ring zawk che a, chiang taka ka hmuh a, i sawi ngei anih loh chuan, Jenny thusawi mai mai chu rin ka tumlo " hei hi ka rilru tak tak ani. Zanriah eichhuah ti viau mahse, ka peihlo a eirawng kan bawl chawp a, eirawng ka bawl laiin phone ahmang thung

" Kanu te chu ka hrilh tawh aw " ka chawhmeh siam bih duk duk pah chuan ati a

" Aw le, awm sawn teh " ka chetna tur adal avang chuan ka nam a a che eih lo, rum deuh in ka en chuan min kiai khum suk. Hlim deuhin zanriah chu kan ei dun a, ka ipik tup pawh azia ta deuh, hmeichhe zahawmna reng reng nei tawhlo hi zahawm takin min enkawl ṭhin a, min ngaihsakin ka mamawh zawng zawng min pe bawk, amah avang hian hlu bik riau in ka inngai a, hmeichhe dang aia ka famkim loh bikna ka hre ngailo. zan hun huphurh em em ṭhin khan Udampuia kut khama ka mut leh takah chuan ka hahdama mutchhuakin min zem chiai chiai mai, kan in ngai ve bawka duhthawh zetin min fawp leh ṭhin bakah, thildang chu sawitel vek chi pawh anilo, Ka pasal Laldampuia angchhungah hian Lalhlimpuii hi ka famkim ani.

" Ilo chau em? " Udampuia office bang chu room ah ka zui chho a

" Teh hlauh che chuan, ka zawh tur zawk che alawm " ka tih vak chuan anui ruh ruh a, he thu hi ka sawikhalh hman ngailo reng reng, Kan inhauh ve aṭang khan kar khat chu aliam veleh ta reng mai, kan inkar pawh apangai veleh tawh viau a, ka hna pawh chawlh kala fel tawh, kanu nen nilengin in kan nghak a, tihtur chu a awm vak lemlo hah na tur phei chu engmah kati ngailo, ka awm awl lutuk chuan nau ka har ang tih ka hlau deuha kawtzawl velah ka kal kual sek zel. 

" I chau zawk em? " A coat chu ahlip a, kalo laksak vat alawmna siam hi ahar biklo, hetiang mai mai a ngaihsakna ka tihlan chang hian alawm tawk ve em em ani, ka tan thil min tihsak ngaihtuah chuan hetiang te chu ka tan tih aharlo 

" Heite nen hian ka hmuh loh che u chuan ka chau reng " A mit min siai tel leh hram a, ka pum chu achul pah zeuh bawk 

" Papa kha kanlo ngai tawh lutuk a " Ka ti a, Kan naute chuan apa kut chu alo tlawh let ve nasa mai, Udampuia mitmengah chuan phurna leh lungawina a in lan chhawk zut ani ber, min en in anui hawk hawk a

" Papa chu ahre tawh hle mai " ti cool ruih in ka hmui ah min fawp zeuh a

" Inbual la, kanu ka zu pui ang e " ka tih chuan min hnial biklo, towel ka pek chu la in Washroom ah alut a, a thawmhnaw hak tur ka dahchhuahsak hnu a chhuah ka tum laiin Udampuia phone chu alo eng pap pap a screen ah chuan Jenny hming alang va va 

" Hello " ka tih chuan thawm areh duk a

" I pasal chu iva khuahkhirh vel ve " Anui zui har har a, ngeiawm ve tak chu ani, hetiang hmeichhe cheap lutuk hi ka ngaitheilo, ka hmeichhe ngaihtheih loh ber te anni. Mi pasal anni tih hre reng chunga lo biak ve sek te hi ahmuh zawh loh thlak, an mahni lah hian zahna chang an hre ṭhaklo leh nghal

" Pawimawh a awm emni? Keichuan ka khap bur hleinem, apawimawh chuan phone hi kape mai dawn alawm " Ka ti a, ka nui tel hak bawk 

" Nangnu hi, tikhan ngaihṭha deuh chuan i awm ve vel a, i pasal khan nang aiin min mamawh zawk, a mamawh pawh pe thei hleilo che " ati fiak ṭhat a, phone chu ka dah hla deuh, ka beng ati chhet mai dawn alawm 

" Mi pasal tihbuai reng hi ahmuh zawh loh thlak iti lo ami? Thil zahthlak deuh chu maw ' min duhlo tih hre reng chunga tihbuai ṭalh hi a zahthlak ' Ka pasal phei chu mi pasal anih mai bakah ala duhlo zui che a, ka hrilh ang che thil hrechianglo in ka zeldin ve chiam ngailo, ka pasal hi ka ring tawk, nang ang hmeichhe thusawi avang mai maiin ka pasal hi tihtauh san ka tum hauh hleinem, i hna ah chiang bawk ang che " Ka ṭawnghnem lutuk chu ka thawk achham mai dawn alawm

" Hmeli, i hlim reilo ang, kala ti chhe vek dawn che" atih ṭhat lai chuan phone ka dah daih a, khatiang lutuk kha chu mi pangai ah ka ngailo, mi pangai ang deuh pangai miah silo anni ber mai. Athusawi te kha ani pawn a awih lo ang, ka pasal hian min phatsan ka ringlo hrim hrim, ani ang hmeichhe lakah ngat phei kha chuan.

" Ila chhuk na nge " Washroom kawngka arik rak rualin Udampuia'n min be ri ka hre nghal 

" Nia, i phone ari a " Towel aveng a, min lo pan hnai chhat chhat, ṭullo zetin Jenny thusawi ' a mamawh pawh pe thei hleilo che ' tih kha ka hrechhuak a

" Tunge " A phone ka lek kang chu aban vut a, a hmet nghal mual mual bawk, khuma phone thehthlak pahin aphun hluk a

" Ilo chhang duh anih kha " ati a, khuma athawmhnaw ka dahsak chu a ha nghal mawlh mawlh 

" Udampui, min nghak thei tiraw? " Ka zawhna avang chuan, mitmeng fiah zetin min melh run a

Cont..