Tuamdamtu chapter-23

 

" Eng nge a an " Kanu leh Udampuia inbe ser ser chu chianglo deuhin ka hria

" A khawsik a awm leh tawh " Udampuia chuan ati halh a, Kar liamta aṭang khan chhan awmlo in ka tlun leh tawp zel a, ka tlun areh hnuah hian ka chau em em bawk, Inpui lamah kan let leh tawh a, kapa in ' Ka fapa te chenpui theilo nih ka duhlo ' atih tlat avang ani, kan insawn phei aṭanga ni3 vel naah ka damlo ṭan a, a inthlahrun awm tak tak ani

" Damdawiin ah chuan hruai mai rawh " Kanu in atih chuan ka huphurh lawk, ka thil ei atuilo bawk nen ka taksa achhe rawk rawk mai ani, ruhro che thei ka ang ber 

" A khawsik hi reh se ka kalpui ang " Udampuia'n ati a, ka khawsik tirh khan min kalpui atum daih tawh mahse, ka hnial ve tlat kha ania

" Buhhawp ka siamsak, tlem tal eitir rawh aw " Atih hnuah kawngka ari rak a, achhuak leh nghal ani maithei, reilo ah ka mutna khum chu ahniam sat a

" Damdawiin ah kal ang aw " Ka zai ngai deuha atih chuan ka hnial tawh biklo, ka damloh hian hreawm ati a zanah pawh atlaivar ṭhak chang a awm ṭhin, ka khawsik hian chhuah hun bik te anei a, zan lai ah leh chhunah ka tlun ziah zel

 " Tinge maw i dam theih loh ni " Ka sam achul a, hreawm atih hmel khawp mai, khur beuh beuh chung chuan ka nuih var var a, kan inkar apangai leh aṭangin hun aliam leh nual tawh a, kan inkar aṭhat bakah ka chhungte nen kan boruak a pangai leh tawh a, kapa nen chuan la inbe chiahlo mahila ahma ang in kan inhaw tawhlo ve ve. Dawt a hun hman reng ai khan thudik an hriat vek hnuah ka nun a hahdam zuala ipik tup leh rit ngawih ngawih ang khan ka awm tawh ngailo, inthlahrung reng reng in ka awm tawh biklo a, Damṭha phei ilang chuan anuam zual ang, ka damlo ve te hi min duat lutuka ka dam theilo zawkin ka hria. 

" Awi! ruhro nunna nei ini ringawt " Mahriati'n min hmuh rualin ati hlak a, ka nuih tlawn vur vur 

" Innu hi chu maw, awmze neilo a luhlul ve ringawt hi ania, abuaithlak asin aw " ati zui leh hlak hlak a, Udampuia chuan alo sawi belh ve sup sup, Doctor hmuh hmain thisen lak tir ang ka tih tlat avangin Mahriati kan hmu ta chu anih hi, Min hau hlak hlak leh nghal

" Malaria Pf/pv anih hi, engtin nge maw i kai theih le " Ati chiam a, ka rin loh lam daih ani 

" Avan mak " ka ti sep ringawt, Malaria kher chu kalo ring biklo 

" Doctor hmuh kher angai dawnlo anih chu " ka tih chuan Udampuia ngaihdan anilo nasa

" Kan hmu ang " Ati deuh bur a, hnial lui lo chuan Doctor chu angaihṭhat nan kan hmu ta ngei bawk, Damdawi kan lei haw leh hnur a damdawi ka hmuh zawng ringawt pawn ka luakchhuak nghal hlui thei.

" In entir hma deuh ula chuan, i dam hma mai tur ania " Kanu in ati sep sep a, chaw ka kil ve ngei a ka eichak avang pawh ani hranlo mahse, ka rin ai chuan ka eitam daih, zan aṭang chuan Malaria damdawi chu ka eiṭan a, Udampuia vekin min buaipui leh, Kanu pawh ka damloh avangin alo leng ve fo a, kanu ka hmuh changin ka ṭap ngei ngei zel 

Udampuia nu zawk in ' awmphei hrih se, alungleng vang pawh ani ve thei a ' atih changin, Udampuia'n ' Riah chu angailo ka lenpui mai ang ' ati tlat zel a, kanu te pahnih in an lawm thei khawp mai, Udampuia hi fiam nuam anti a, an fiam reng zel. Udampuia pawh kapa puiin dawrah akal ve ziah tawh a, kanu a awm tho a min awmpui run tawh biklo. Kapa pawh akum a tam ve tawha dawra awm reng atlin tawh biklo, hnathawk chu chhawr ve tho mahse, enpui ve reng an ngai tho, Udampuia te hian Hardware dawr lian deuh an nei a, Alun in a changtlung bawka Aizawlah chuan alar pawl tak ani, Petrol pump pawh nikum aṭang khan an buaipui chho a, chu chu Zorina hian abuaipui ve deuhin ka hria.

Zing ka harh chu tuk dang ang lo takin ka kua alet but a, insum hmanlo a uak tuarh chungin thawh phang pawh awmlo chuan bathroom ah ka tlan lut chan chan a, Udampuia ka ti harh hrim hrim ang, luak chhuah em em pawh neilo in ka uak tuarh tuarh reng tho

" Tinge a " Udampuia chuan ati hnawk ṭuak a, ka chalah adawm bawk

" Ka hrelo, ka kua ano thut " Ka ti a, toilet chu flash in ka ding chhuak chu min lo pui vat, ka kam te ka ṭhuah leh tete a, ka hmai ka phih nghal bawk

" Ehe! " ka hmai phih zo chu ka au vak a, Udampuia chuan min melh kawk

" Chiam chiam a, eng nge i hriat " Ati nghut a, ahawikual nghal vut bawk 

" Ka drawer ah khan test kit a awm, va la teh " Ka ti zung zung a, abanah ka beng dat dat bawk, ka thusawi chuan aṭhawng nge ache eih lo 

" Udampui " Ka sawi pah nawk bawk, harhchhuak thut ang mai chuan Washroom aṭangin achhuak vut a, drawer ahawng ri rawk pawh chu ka hria, ka inrinhlelna hi dik hram se kati, ka phur a ka huphurh bawk, test kit min pek chuan la vatin 

" Chhuak rawh " Ka ti nghal zat a, engmah sawi buailo chuan achhuak veleh mai, a awmdan chu mang rama cheng te pawh a ang alawm, engmah asawi buai bawk silo

" Lalpa ka lawm e " Test kit chu en in ka phun chhuak sep, Ka rai, Udampuia fa ka pai, ka rai hmasak kha chuan ka hriat rual rualin ka hlauthawng nghal a, tunah hi chuan ka rai theih nan ka ṭawngṭai hial alawm, Udampuia min lo dawnsawn dan tur ka hriatchian em avang te pawh aniang.

" Iṭha em? " Wahsroom aṭanga ka chhuak chu min lo hnaih ruak a, chhang lo chuan test kit chu ka pe, a en rualin ameng kawk a, amitmenga phurna, lungawina, mak tihna leh lawmna in chawhpawlh nuai avang a de nghal sar sar chu ka en reng a, test kit a enna aṭanga mit la sawnin chiang deuhin min en 

" Ka rai ohh i rai " Ati nawk nawk chu ka nuih hawk hawk, aṭawngsual chuan ati danglam phalo hrim hrim, min kuah chuan nghet deuh in ka kuah let a

" Umm, i rai " ka tih chuan rum hawkin anui leh hawk hawk a, anui ri chuan ka thinlung hi anghawr che thei, room chhung chu a nui ri thum zetin aluahkhat ani ber. nau ka lai leh mai thei chu ka lawm takzet. Chaw eilaia kanu te kan hrilh chuan an lawm khawp mai, kanu phei chu a mittui atla hial a, kapa erawh anui huah huah thung, Ka pasalin a ka chhungte ahrilh a, kanu phur lutuk chuan ' Kalo kal nghal dawn ' alo ti a, Ka pasal in alawm khawp mai, Udampuia pa in ' Chhungkaw inhmuh khawm pawh akhat, i naupai lawmna ni pah fawmin chaw eikhawm ang u ' ati a, midang chuan anlo pawmpui khawp mai, kanu pawh bazar chawp chuk chuk a, Zorina leh Remrema pawh an chhuak lo. Mahriati ka hrilh chuan alo au ring lutuk a phone ka dah hla dawrh, chaw eitur a Mahlima nen ka sawm chuan anlo kal tur thu asawi ve nghal a, inbe rei lo chuan kan dah leh thuai. 

" I damdawi " Room ah kan phnihin kan awm a, damdawi ahai rak rak bawk 

" Ka ei chhunzawm tawhlo ang " ka tih chuan ahriatthiam loh hmel khawp mai 

" Naute pai lai chuan Malaria damdawi ei chi anilo " ka tih chuan aphun hluk a, damdawi chu dahin ka bulah alo kal hnai

" Ahunlo ka ti phal bawk silo " Ka pum chu akhawih zeuh a

" Ka ṭha mai ang " Ka tih chuan, ka chhipah afawp vang vang a

" Ka lawm e ka nupui, Ka hmangaih che " Atih sup hnuah Dam leh duhthawh deuhin min fawp a, nui hakin ka chhanglet nghal. Kan chhungte anlo kal khawm a, ka naupai chu min lawmpui hlawm khawp mai, an rik laih laih laiin kei erawh ahmaa ka khawsik hunah bawk, ka khawsik alo chhuak leh tawh a, Udampuia'n room ah min hruai chho in min muttir a

" Damdawi i ei thei bawk silo " pik zetin thawk ala leh halh ṭhin

" Apawilo, ka tuar thei alawm " ka ti sep a, ka bulah lo mu in min kuah a, khur beuh beuh chungin ka lo kuah let vat, Ka tlun areh hnuah ka inbual leh a, chumi hnuah chuan inhnuaiah kan chhukthla dun a, Common roomah puitling ho an ṭhu khawm a, Choka ah chuan a naupang lam an awm khawm aniang an ri hlut mai. Kan va luh ve chuan min lo nuihsawng hlawm a, Nicholas pawh alo awm ve, ahnathawhna ah alet leh daih tawh ang chu tih laiin

" Hmeichhe lamah abil teh lul nen, Naute siam dan te alo thiam ve ani maw? " Ati hlut a, kan nui dar dar, Udampuia lah angawi mai duh biklo

" Formula vak a awmlo a, chawh chhuah ngai pawh nise ka buailo ang, mipa tan ahar lo" ati let ve kher a, An nui ring hlawm khawp mai

" In ninawm e " Mahriati'n atih hlak chuan

" In hmabak ve tho alawm " Nicholas in nui hak hak chunga atih chuan, adang aniang angawi leh hmak a, Mahlima chu anui suk suk mai. Puitling ho bulah ka ṭhut phei san a

" I khawsik chu areh tawh maw? " Udampuia nu in min zawt a, ka kut akhawih pah neuh neuh bawk

" Umm, reh tawh ka ṭha tawh " ka ti ve mai a

" Rai laia damloh hi ahreawm teh ania, Mo nih phei chuan inthlahrun te hi ana a, min phut lo mahse, kan inchhunga kan awm anga awm reng amawi bawk silo " Udampuia Nute chuan ati bawrh bawrh a, kalo pawmpui khawp mai Kanu te hi fel viau mahse, ka inthlahrung ve ṭhin tho 

" Rai ala na ve hrim hrim anih hi " Kanu in ati ve zat a, Ka rai hmasak ka hrechhuak a, ka lak nat zia kha inzep angai bawk nen khan engtin nge kalo tuar theih le kati

Hunserh chu kapa in ahmang a, Udampuia pa kan ti zet na in ' Hmingsanga'n hmang zawk rawh se' ati miau a, kapa in hunserh ahman hnuah chaw kan ei a, kan hlim tlang hlawm khawp mai.

Hun akal ve zel a ka naupai pawn thla5 hmel ahmu veleh tawh, ka chhungte lakah vuina tur ka hrelo a, min duatin min ngaihsak em em vek, ka rai aṭanga karkhat vel bak zingkar luakchhuak ka neilo a, ka thil ei atuiin ka taksa pawh aṭha leh tawh viau

" Thil lo lei ṭeuh zel suh " Ka pasal lo hawng chuan naute thil alo hawn leh nual tawh a, kalo melh ram ram chu min nuih tlawn vur vur

" Ka hmu fuh " ati leh mai a, alo lei hawn changa ka hauh apiangin ' Ka hmu fuh ' ati ziah, hmuh fuh tur angah bik khawp mai

" Ilo chau em? " Ka dul puar lah chu ka chul zeuh a, atih ziah danin ka chhipah afawp leh bawk

" Ka chhipa i fawh hian i inti thei kati " ka sawi zawh rualin anui chhuak hawk a, ka nui ve tho ka chhipa afawh piangin 'I inti thei ' ka ti ziah zel, a inla sang bik thei em ani

" Inchungah thawmhnaw pho ka han seng ang e " Ka tih chuan 

" Angailo, i dul apuar tawh " ati hmuk a, tilui pawh ni ila aphal dawnlo tih ka hria, Naute thla3 vel anih laiin step tawp hi rapsualin ka tlu a, Ka pasal a mangang khawp mai, inchunga kan room ah pawh awm tawhlo in inhnuaia mikhual room kan tifai a, chutah chuan kan insawn ta daih a, inchunga ka chhoh aphal tawhlo bur 

" Aw le, kapa te bulah chuan va kal rawh, Siamsiami kava tir lawk mai ang " Ka tih chuan abu nghat a, choka ah ka pheisan

" Ilo awm ani maw? " Remrema choka a ka hmu thut chu min ṭhawng deuh, Siamsiami mitmeng chu a buai deuh nak a

" Ummm, mamawh i nei ami? " Atih chuan ka nui a

" Nei lemlo e, Siamsiam, inchunga thawmhnaw pho khi han seng teh a, Udampuia'n inchunga chhoh aphal silo a" ka ti zung zung a

" Aw le " atih sep chuan ka chhuahsan leh nghal, Hmani lawk aṭang khan Nula kan nei a, kanu pawh a hahdam ve ta deuh, atir chuan duhlo viau mahse, ka tilui ve tlat a, keimah ka chet tak tak an phal silo kanu a hah lutuk a, a inthlahrunawm

" Kan naute kha ka hmangaih loh avanga thil leisak ngailo ka nilo ania " A ban khamin ka mu a, athil sawi avang chuan remlo zetin ka en

" Eng nge i sawi awmzia " ka ti ha bawk

" Hei hi thil ka leisak ziah a, Kan naute kha ka leisak ngai silo a, i lungawi loh ka hlau " ati sup a, akutin ka dul a khuap run bawk 

" Ka lungawi alawm, lungawi loh chhan tur ka nei hleinem" ka ti a, ala hre ve reng pawh hi ka tan chuan atawk lutuk

" Khatih lai khan ka lakah i inthlahrung a, bat neiah i in ngai tlat bawk si, Naute thil ka leisak ziah chuan hreawm itih zual ka hlau a " ati leh a, min ngaihtuah avang zawk ani, lungawi loh na ka neilo 

" Ka hria lawm, ka lawm lutuk ania aw Udampui, ka tan chuan vantirhkoh ang mai ini, i thil tih ang khan tu mipa mah in anthei velo ang, Ruahthimpui kara ka kawng thlan hi adik tih ka hre tawh, nang tih loh chuan thimah bawk min hruai lut a, ka natna azual ting ṭhin mahse, nang chuan min tuamdam a, min dimdawiin ka nat i hlau bawk, Ka hmangaih che " Ka ti sep sep a, lungawi deuhin min melh vang vang

" Ka hmangaih che ka nupui " Ati a, mitmeng de sawr sawr in min melh vung vung, adawt a thilthleng tur ka hrechiang viau...

Pathian zarah Fapa duhawm tak mai ka nei a, ka fapa ka hmuh rualin ka na zawng zawng te an dam vek maiin ka hria, kg3 leh 600gr lai ani a, alian thelh thawlh bawk nen min hliam nasa a, duh ang pawn ka chesawn theilo. Ka pasal lah in afapa chu a en ngawih ngawih zel a, alungawi khawp mai, Nicholas lahin fiam nuam ati mai sia

' Ka siam ngei anih hi, ti ang hrima i en vung vung zel le ' ati ṭhin a, midang ho in an nuih leh hak hak ṭhin, Udampuia pawn huat ah ala chuanglo. Kan naute hming atan Udampuia Pa in ' Pathian min hruaina hi a ropui emai Lalhruaizela ni rawh se' ati a, kan pawmpui tlang khawp mai, Kanu te pahnih in min chhawk hneh a, damdawiin ah pawh kan awm reilo, Duattu ngah a inti deuh nge ka fapa pawh zanah asual ziah a, a ṭap thiam si apa leh api hian an awi hliau hliau zel a, Tih theih nei hleilo in Kapa leh Zorina te Remrema te thlengin an meng ve reng zel, naute chu an atchilh tlang lutuk chu ka nuih leh hak hak ṭhin, keichu kala che ṭha theilo a, satel ang maiin ka tal ṭual ṭual hi ani tawp, hnute pek angaihin min lo pe tawp a, abakah chuan ka pawm ngailo. Ka bula che sat sat leh phun leh bul bul chuan min ti harh a, ka meng siar siar, ka thil hmuh chuan min nuih tir suk, Udampuia chuan Kan fapa chu alo ṭhutchilh a, a dieper athlaksak in ka hria, Bawihtea chu aṭap lo teh mial a, dim light eng ah chuan an pafa in ka hmu chiang viau 

" Min kaihthawh mai tur alawm " Ka tih chuan min lo melh vut a, pa zetin a kiai suk

" Aṭap lo a, ṭap se chuan i harh ang " ati mai a, ati dik ve reng, zanah aharh in aṭap ziah a, harh loh theih pawh ani ngailo 

" I chau awm? " Ka tih chuan a fapa melh vung vung chungin

" Ka chakna pahnih in awm chhung chuan ka chau tak tak theilo " Bawihpuia chu apawm kang a, alo tal ve bat bat mai, alian reuh bawk nen pawm lawih tham ani ve hrim hrim

" I pawm zing lutuk a, pangtilum ahre tawh teh ania aw, pawm kan a awih kher loh chuan amut duh tawh loh kha " ka tih ser ser chuan

" Ka awi zel mai ang " ati mai a, ka chhang zui tawhlo, an pafa in awi hliau hliau chu ka thlir reng a, ka vanneihzia hi nitin in ka hre thar ṭhin, nau ka pai leh nghal maite bakah ka hmeichhiatpui dang te chu fa anneih pawn an pasal ten an buaipui ve vak ngailo a, zan ṭah an vei pawn 'kalsawn pui teh, a bengchheng ' anti hlauh zel a, ka pasal ve chu ka harh hlau in aman a awi hliau hliau zel, nau kan neih hian thilsen pal kan nih avangin mut te kan duh a, ka pasal hi chuan a hrechianga min chhawk vek zel, ti hian chhunah dawr ah akal ziah bawk a sawiselna ka neilo, Ka chhhungte pawh anni tho, aṭah chiam changte hian kapa ber in ' Bawihi na anei aniang, nachhawkna kha pe leh mai teh ' ati chuar chuar a, Nachhawkna kan pe leh tawp zel. Kan nunah hian vuina tur hlir kan zawn chuan hlimna tur a awmlo, Harsatna tawklo mihring kan awmlo a, Harsatna kara kan vanneihna hmuh tum tlat hi apawimawh, chu chuan hlimna leh lawmna tur chhan tamtak min pe ṭhin, chu chu keipawn ka hmuthiam ve in ka hria, ka chhungkua ka thlir hian ka vanneihzia ka hre ṭhin.

Ruahthimpui sur buan buan kha kiang in, chhimbal alo zam ve ṭan a, chhum dum chhah tup tup pawh chhum var thianghlim zetin athlak ve tawh, Ka natna te min tuamdamtu ka pasal Laldampuia hian ka lakah phut let nei ngailo mahse, ahlim na thlen sak zel ka duh a, Chhungkaw hlutna hria leh Chhungkaw ngaipawimawh em em tu hi chhungkaw hlim tak dinpui ngei ka tum ang.

A tawp ta.