Young Lady and Gentleman Chapter-13

 " Kapu, inbengdai phawt teh " U Ima bawkin ati leh a, kapa min chelh loh na lam ka banbul ah aman ve chat

" In chhungkua nen inhnimhnaih ka duh lo " Kapa'n ati a, kapa min chelhna chu anat em avangin talchhuah ka tum ve ngar ngar. 

" Tunah hian min zuilo anih chuan, kan inzawmna hi kan titawp ang " Ka che lai ka tawp chat, kapa chu mak ti deuhin ka melh tlawk tlawk, Engtin nge chutiang em em chu asawi theih

" Pa " ka ti chuai deuh raih, U Ima chu ka en a ani pawh a rilru abuai hmel ngang mai, kan piah daihah Dandani ading ve reng bawka 

" Zui hawng phawt rawh, nang lo chu nupui neih ka tum lo tih i hriat kha, kalo hruai leh em em ang che " Ka ban a chelhna thlahin akut pahnih chuan ka biang adawm a

" Umm, Ka ring che " Ka sawi zo chiah kapa'n min pawt sawk a, ka ṭang tawhlo mahse, U Ima te lam ngawt chu ka en a, Ani pawn ding khawng luah chungin kapa nen chuan min thlir reng, An lang theih tawh loh thlengin kala hawilet ve ṭang ṭang a, ka mittui aluang zung zung bawk 

" Kapa " Ka u alo lang ve hlawl a, ka rilru na leh hreawm ti lutuk chu ka puakkeh thei mai dawnin ka hria

" Naktulah ticket la ang che, kan khua ah kan hawng ang " Kapa chuan ati bur a, min ngaihsak tawh miahlo in motor ah alut nghal

" I ṭha em? " Ka u in ati sup a, chhang lo chuan car hnungah chuan ka ṭhu lut ve nghal Nutei te car in anlo kal anih hmel, ka ṭawng lo a kapa chu ka melh eih lo bawk. Kapa hi ka huattheih ka ring ngailo a, min enkawlna min ngaihsakna min hmangaihna te avangin kapa hi engtik lai mahin engvang mahin ka huat theih ka ring ngailo mahse, tunah hian ka hua a tinge a fanu hlimna a tihchhiat kher, duhthlan tur nei leklo in min siam bawk, car seat ah ka ke ka hlang ka mittui tla reng chuan ka thinlung natzia ati chiang ngawt ang chu. Ka ṭap ve mai mai ngailo a, ka rilru anat viau pawn ka tuar mai a mahse, ka mittui a tel chinah erawh ka rilru ana ve hle tihna ani. Nutei tein kan thleng a car aṭang a ka chhuk rualin kapa'n min pawt sawk a, inchhungah min kai lut dawr dawr 

" Keimah pawn ka kal ve thei reng " Ka tih pawn min kai lut zel a, room pakhat chu hawng rawkin min thehlut deuh nawk

" Thunun theih loh fanu neih ka tum hauhlo, i inhmuhchhuah thleng kha tah khan awm ang che " Ti hlukin kawngka chu akhar a, pawnlam ah akalh nghal rak rak, chhuatah ka ṭhu thla hnawk a kapa chetdan chu ka hrethiam theilo

" Pa, hetiang em em a tih chu achi loh ang " Ka u in ati ri pawh ka hria a, Nutei'n ' Mipa nena zan riahchhuah te zawng azahthlak emai, min tih mualpho hmain inva hruai thei chu alawmawm, anu a chhun khawp mai ' ati ri pawh ka hria ka u in a khap a, kanu diktak chungchang asawi ani ngei ang, ka mittui a hul leh hmak tawh Kawngka chu chhunglam ah ka kalh ve hmak a, chhuat ah chuan mu in ceiling ka en vang vang, engtik laiin nge ka mutthilh pawh ka hrelo, ka mumangah U Ima te pafa thum ka hmu a, anlo la hlim em em leh nghal

" Amelia " tiri chuan minti harh a, room alo eng ut tawh ka mit ka nuai chat chat a, ka ṭhu chhuak hlawl 

" Ka nau " Ka u in atih leh pawh chuan ka chhang chuanglo

" Ko ko suh, a luhlul reilo tawp ang " Kapa'n ati hluk hluk a, kapa sawi vang hrim hrim pawn ka thih hma chu hetah han ka awm mai ang, Phone min chhuh daih a U Ima chu amangang ve viau in ka ring. 

" Kawngka ka hawng ania, kapa nen kan chhuak dawna Nutei te an chhuak tawh bawk, tumah inah an awm dawnlo, luhlul chhuah tlatlo lo khan lo chhuak la lo in eipuar ang che " Ka u in alo ti a, chu pawh ka chhang duh chuanglo

" Kapa duh loh dan ngawta awmlo hian, kapa thu awih la arilru hneh tum zawk rawh " A ti leh a, thawm a reh nghal vang vang. Rei fe hnuah room aṭang chuan ka chhuak a, choka dawhkan ah chuan ka phone alo let bal mai, ka u min dahsak tih hria in ka khi sak, eitur an khuh chu ka ei buai peihlo a ka rilṭam thlawtlo. Room ah bawk lut leh in ka in kalh hnan leh nghal, U Ima missed call a tam ngang mai, ka call nghal a ka phone call chang ang hrimin ala rang khawp mai

" Ka ṭha ania aw " ka ti nghal a, a thaw huai tih pawh ka hre thei

" Call i chhang thei silo a, ka ngaihtuah lutuk che alawm " Ati sup a, a aw chu a zuai deuh riau in ka hria

" Kapa'n ka phone ala daih alawm, tunah chuan inah an awmlo a, ka u in ka phone min pe a " Min kalh hnan tih chu ka sawi duh talo, tunah tak hi chuan ka in kalh hnan ani zawk mah

" I bialpa ni mahila i pa lak aṭanga la sawn tur khawp che in thuneihna kala neilo a, i pa anihna ah ka zah angai bawk " Min hmulo mahse, ka bu nghat nghat 

" Lo tuar hram hram rawh, Chhungte malsawmna tello a inneih chu thil ṭha ber anilo mahse, duhthlan tur dang kan nei ta ngang lo anih chuan ka tihtur ka hai hauhlo ania " Ka hahdam huai thei, a harsat thu sawiin min kalsan ve mai ka hlau a chu chu ka rilru luah tu ber ani bawk. 

" Kan khua ah min hawnpui atum a " Ka ti sep a, Ni reilo te ah ka suangtuah ṭhin fashion designing pawh ka zir zo ve mai tawh dawn a mahse, ti mai hian ka tawpsan dawn chu ani si a, ka rilru hi ana ve ngawih ngawih

" I rilri ti hrehawm suh, i suangtuahna ang te kha kala tih puitlin sak em em ang che " Nghet churh in alo ti a, ka mittui a tling leh pam tawh

" Ka hria lawm, ka ring che a kapa awmdan hi amak kati " Ka ti ṭiak a

" I pa chu dem reng reng suh, a hmangaih lutuk vang che anih hi " a lo ti mai a, rei deuh chu kan inbia. Tlaiah kapa te anlo hawng a an thusawi danah naktukah kan hawng dawn a ang, U Ima in an duhdan a an thu awih hrih tura min tih avangin keipawh luhlul chhuah ṭalh ka tumlo, zanah chuan kawngka ka kalh pawh ka hawng a Ka u alo lang hmasa ber

" Engmah i eilo, i rilṭam em? " Min enkual thuak a

" Ṭamlo, naktukah ami kan hawng dawn " ka tih chuan min en kawk a

" Umm, vawiin ah i thawmhnaw pawh kan va la a, Nu Saii te chungah pawh a inthlahrunawm khawp mai " Ati ve nuah nuah, mi pangai tan chuah hrehawm tihna tur chu ani ve alawm, Thla eng emaw zat min awmpui a, ka lakah an sual ngailo ka mamawh min zawt reng a ka tan an in huam em em bawk. Kan laka an ṭhatna kan rulh let dan hi an lawm bik ka ringlo. 

" Anih chu " Ka ti a, khumte ah chuan ka ṭhu thla hnak 

" Min dil duh i neilo emni? " A tih leh chuan ka en haw

" Neih pawh ka hrelo, ka thil duh hi nang chuan min pe thei silo a " Ka tih chuan a kiai suk a

" Reilo te chhung chu ka hmuh tir thei maithe che asin " A tih chuan ka harh zawk

" Anih, ka rilṭam " Ka ti vat a, Ka u in min nuih vur vur 

" Eng nge intih dawn " Ka u nen kan inzui chhuak chu Nutei'n min lo be ding a

" Thil kan leipui lawk ang e, kapa kha ilo hrilh mai dawn nia" Ka u in ati a

" Saw lai dawrah khian kalo nghak ang che " Nutei te in chhakah U Ima car alo ding reng tawh a, Ka u chuan min kalsan vuk vuk, hmanhmawh leh phur deuhin U Ima car ah chuan ka lut nawk nawk

" Tuman anlo luh khalh dawn hleinem che " Min nuih a

" I van nawm loh hmel " Ni1 pawh tlinglo kan in hmulo a ahmel chu a tla deuh kuam in ka hria, ka hmuhsual te pawh ani maithei

" Ka rilru ka hmang nasa deuh a " a ti mai a, ka kut chu a la a ahum vang vang

" Ka ngaihtuah a " A ti sup a, a hmel landan serious run chuan ka awm ati nuamlo

" Hei tunah khan Hulk i ang leh tawh ania " Ka ti a, ka nuih var var 

" Kan inkar hi kan ti tawp mai angai ani " U Ima chu ka en vang vang a

" Eng nge i sawi awmzia " Zalo deuhin ka nui lui pah hak

" Kan inkar hi kan ti tawp ang, chu chu itana ṭha ber niin ka hria, keimah vanga i pa hauh i tawrh te hi ka duhlo, in pafa inkar hla tial tial hi ka hmu a, ka inthiam thei lo ani " Sawi ve tur pawh ka hrelo, hmu tura in ka chhuahsan lai kha chuan ka phur viau asin

" Chhunah pawh kan inbia a engmah i sawi silo " Ka ti a

" Hmaichhanah sawi ka duh vang ani " Thawm areh vang vang a, ka kut a vawn tlat chu ka pawt let a alo thlah ve mai

" Tinge atir te khan min ṭhen mai loh " Ka ti ve ta hmak a, ka lungawilo lutuk, ka nuna mipa ka lakluh te pahnih rintlak loh dun zia hi, an in ang reng Papuia nen danglamna an nei chuanglo 

" Ka tihpalh ani " A tih chuan ka chhang tawhlo, Engmah sawilo in kawngka ka hawng a ka chhuk nghal sawk sawk

" Ruatpui " Alo chhuk velai ka hrelo hrim hrim, min pawt ding a

" Min ko tawh suh, Ka nuna mipa ka lakluh hmasak zawk kha mipa laktlak loh ka ti a mahse, mipa dang zawng zawng ka hmuhdan ani chuanglo, a vawihnih nan ka nunah ka lalut leh ta che a mahse, i lo danglam bik chuang miahlo, kawng tluangtlam leh zau nuam takah chuan nghet takin min chelh a, kawng bumboh leh khawkrawk takah chuan min chelh nghet theilo anih hi " Khawlai ah kan awm tihlam ka ngaihtuah hman tawhlo, ka lungawi lo a ka tawt tup tup 

" Kan inkar ka tihtawp avang hian ngaihzawng dang ka nei leh dawn tihna anilo, ka nei thei lo che anih chuan nupui neih leh ka tumlo " Min chelhna ka phih thla a, vawikhat mah hawilet lo in ka kalsan vang vang, kanu thusawi ka ngaihtuah let zut zut. ' fiah hmasa rawh ' atih kha, ni e ka ring lutuk a ka nat phah leh anih hi. 

" I lo let tawh maw " Dawr kawtah ka u alo ding a, ka mood in a zir lo bawk nen ka chhang peihlo

" Eitur chu ka lei tawh, kan hawng dawn ami? " Ka darah min kuah a, min tih ang ang chuan ka awm tawp

" Imanuela kha mipa ṭha tak ani, khuanu ruat inni takzet anih chuan in inṭhen hlen hauh lo ang " Ka u hian U Ima in min ṭhen dawn tih ahria, kei aiin alo hre hmasa daih zawk anih chu! 

A tukah chuan kan hawng a, Dandani chanchin ka hrilh ve chuan min khawngaih lutuk a call a kan inbiak laiin alo ṭap bai bai mai, Kawngtluani'n earphone ka ngaithla a zun ram thiara an chawlh pawn ka chhuk ve ngailo, ahmaa ka natna ka lo tuardaih tawh chu alo so leh bulh bulh a, a hreawm zia leh tuarchhuak tura ka beih nasatzia hrechiang em emtu ka thinlung leh taksa hian he natna tuar nawn leh hi a duh tawhlo ani, ka chak tawklo a ka chhel tawk tawhlo. Papuia avanga ka natna ka phumbo tawh kha tunah U Ima vangin alo irh chhuak leh a ka tuar leh dawn anih hi, a kawng a thuiin a chhuk chho leh viau ang le. Kan khua kan thleng kapi leh kanu ten min lo hmuak a, chanchin an hre vek tawh tih ka hria a, lem deuhin ka nui kual vel peihlo

" Chhang tui deuh ka siam asin, thingpui ka siam anga i hmeh dawn nia " Kapi in ati seuh seuh a, min kaiin inchungah min luhpui 

" Pi, ka inbual fai hmasa ang " Ka tih chuan ' Aw le " A ti ve mai a, Ka u in ka bag room ah a khai luh chuan ka zui lut ve nghal

" Amelia, chaklo tak ang khan awm zuai vel teh suh " A ti hmuk a, en pawh enlo chuan ka suitcase chu ka hawng rak rak, ka hringnun hring mawi tak kha hlo tur phul ang maiin a ro leh rup tawh maiin ka hria, sawi tur a hre tawh biklo nge min chhuahsan a, a chhuah hnuah ka inbualfai a, ka harh deuh vuk in ka hria. Kapi in min ngaihtuah em avangin peihlo deuhin ka chhuak leh a, choko ah ka thingpui tur alo in hung ran, bowl ah chhang min lo chhawp bawk a, chaklo viau mahila ka ei ve tho. 

" Nu, Kimkimi kava tlawh lawk aw " Aizawl ka awm chhung khan kan inbe fo a, kan chanchin a hre ve nual bawk.

" Aw le, rei tawhlo la ipa te an rilṭam leh hma ang, chaw ei hmat pawh aṭha " Kanu in kawta pangpar tui a pe a

" Min lo eisan ru ka eipeih lo ang " Ka tih chuan 

" Chaw nghei aṭhalo, lungawi loh avang taksa tih chhiat tum phet hi aṭhing lutuk " Ati leh zek a, chhang buai tawhlo in ka kalsan 

" Nu lalte, i va buai awm ve " A dan ngaite in pangpar bawk alo buaipui leh tawh

" Ilo hawng ani maw, pangpar buai hian ka buai reng mai anih hi " Anui var var a, kan in hmuh hmasak ai thlawt chuan hmuh anuam alawm 

" Hmuh i nuam hle mai " Ka ti a, alawm ve hmel khawp mai

" Ilo kal aṭang khan Kimkimi'n a zia athlak a, kan rualin chaw alo ei a room ah tawm renglo in zingah hma deuha atho a, kawtlai ah te hian a kal kual ṭhin, a room pawh kan ti fai a amah pawh ahlim sawt lutuk " Ati siam siam a, chutiang thu hriat tluka hlu a awm lovang

" A van lawmawm ve, amah hmu turin kalo kal a " Ka ti a 

" In chhungah a awm, zu lut rawh keipawh kalo lut ang " Inchhungah ka lut a, alo reh leh duk mai Choka ah thawm a awm a, Kimkimi anih ka rin laiin Kimkimi pute Mawia lek alo ni 

" Euu, Amelia chu inhmuh loh karin ilo va duhawm tawh ve, Mi pasal tur i ngaizawng te kha an tiin ka hria a, chutiang ngaizawng mai mai tur chuan i uihawm mang e " A ti a, ahmel leh anui hmel seng sung te chu ka ngaina lo, chu ai mahin min melh dan amitmeng danglam zet chu mimawl hlawm tawp nilo tan chuan hmuh hmaih chi va ni suh, ngainat loh sa teh lul nen

" I hriatsual anih dawn chu " Ka ti ram hmak a, nel emaw anel tura awm ka tum miahlo

" An sawi duh leh tawh em che hi, kan khua ilo thlen hmain i chanchin kan hre vek alawm " Ati ham ham a, ngei zeta ka melh laiin 

" Eng nge inlo tih " tiri ah ka hawilet a Kimkimi ka hmu chu ka hahdam huai huai thei 

" Eng tilo e, Amelia hi a duhawm thu kalo hrilh mai mai " Alo ti dam ang thluam a, Ka ngei lutuk chu sih pilh vek ka chak

" Ka ṭhiannu hi lo fiam ve tawh suh, zaklo lutuk mai " Kimkimi a vin hlar a, Mawia pawh chu a chhuak ve nghal mai, a chhuah dawnah min enkual leh thuak mit nghal tak anei anih hmel

" Hnaih suh " A chhuah fel hnuah Kimkimi'n ati hmak

" Ka hnaih hleinem " Ka tih chuan bu nghatin min kai a room ah min luhpui, a dul puar ve al tawh chu a in hmeh lutuk, amah lah chu a infit sia nuih ati za mang e

" Ilo thlenna arei tawh em? Kan khua ah i lar leh tawh khawp mai " A ti zung zung a, chhan hmasak zawk tur pawh ka hrelo

" I putea pawn mi pasal tur ngaizawng ang in min ngaih kha " Lawmlo fe in kati a, Kimkimi mitmeng pawh a ling leh nghal hlar 

" Mi hur awm ngaihna hrelo anih saw " Ati hmak mai, thildang ka sawipui a, U Ima nen kan inkar kan sawi leh takah chuan keimah zawk ka hreawm leh tawh

" Rilru ti hah lutuk lo la " Ati sep a, min kuah chuan kalo kuah let ve vat, apum vangin nghet deuha in kuah a har ve deuh a

" Engmah kalo hawnlo che u, ka lo hawn dan chu ihriat kha " ka tih chuan za deuhin anui a, a room pawh a felfai leh tawh khawp mai, Kimkimi nihna diktak ani kimkimi chu a room hi a felfai thlap zel kei ang lo takin. In ah ka hawn leh chuan zanriah anlo ei mek a

" Ka tunu lo ei ve nghal rawh " Kapi in alo ti var a

" Pi, ka rilṭam lo emai ka ei hrih lo mai ang " Ka ti a, room ah ka lutbo nghal daih, chaw ka ei mumal loh vang nge ka chau deuh ngiai a, ka zawi ngawih ngawih bawk. Zanah chuan kapi in thingpui leh chhang min lo pe leh a, min ngaihtuah ve ngawt mai

" Pi, a ngai hleinem " Ka lo ti a, dawnkante ah thingpui leh a hmeh a dah hnuah ka bulah alo ṭhu a

" Ka tunu ka ngaihtuah lutuk che ania, i pi hi min ngaihtuah vela chaw ei loh mai mai te hi ching teh suh " A ti chiar chiar a

" Pi, ka hun tawn hi hreawm kati a, chaw ka ei chaklo kapa ka hmuh hian ka lungawi lo a, ka haw thei chuang silo, ka mamawh lai takin U Ima in kan inkar ati tawp a, ka tan chuan pawmthiam ahar emai " Ka ti a kapi chu ka kuah thlawp, kapi chuan ka hnunga chul hliau hliau chungin

" Papuia nen in inṭhen pawn i tuar a, i tuar chhuak thei mai alawm tunah pawh i thei em em ang " A ti sep sep

" Pi, Papuia kha chuan ngaihzawng anei nghal a, khavang tak khan natna ka neih te kha huatna in apawlh avangin tuarchhuah a awl bik aniang, tun hi chu a danglam, midang vanga min kalsan ani velo a mahse, min ti hrilhhai a huat ka tum viau pawn ka haw chuang silo, chu chu Papuia nen an danglam na ani " Ka ti mawlh mawlh, nunhlui a tel anih miau avangin Papuia hming arik tel angai leh ṭhin.

Kan khua ka awm aṭang pawn karkhat lai aliam leh tawh, thil thleng hlimawm ka nunah sawi tur ka neilo a, Kapi nena kan nuih dun hun hi a hlimawm lai chu ani mai, ka hunawl apiangah Kimkimi ka kawm fo a mahse, a putea vangin ka tim ru tawh khawp mai, min endan adiklo tlat hian awm ati nuam ṭhinlo, Dandani nen kan in be fo a, a nu damdawiin ah an luhpui leh anih hmel a anni pawh an buai ve khawp mai

" Bawihte, I phone hi a ri reng ania, kala thiam ve bawk silo" Choka ah ka awm a, Common room aṭangin kapi in min lo au lang lang, ka thil chan lai dahin kapi bulah chuan ka tlanphei a

" Tunge a " Phone chu ka la kang a, Kapi'n ka hrelo ka mit afiah lo lutuk a, ati chiar chiar 

" Ve tehmial che chuan " Emily ani a, kan inbe khat khawp mai

" Ate " Sam zawk in alo ti a

" Sam, nangmah maw " Ka ti hluai a

" Umm, Ate engtik nge ilo let leh dawn " A lo tih leh chuan chhan dan tur pawh ka hrelo

" Sam, kan khua ah ka hawng tawh a, kalo kal thei tawh pawn ka ringlo " Naupang mah nise thu awmze neilo hmanga beiseina siamsak ka duhlo, tun atan chuan Aizawl kal leh chu ka ngaihtuah tawhlo hrim hrim

" Apa nen in innei dawnlo tak tak ami? " Alo ti leh reuh a

" Umm, a theih loh alawm. Sam Noah adamṭha em " Ka ti daih a

" A damlo a, i awm loh hmu khan a ngai che a zanah aṭap vak vak zel, Apa in biak che a phallo a tunah pawh damdawiin ah an awm " Ka mangang nghal em em a, tih theih ka nei bawk silo 

" Engtin nge a awm, ana viau em " Ka ti nghal zung zung, ka chiai vek tawh

" A thaw ṭha theilo a " Alo ti mai a, min ti mangang zual sauh 

" I bulah kham Emily a awm em? " Ka ti a

" Aw awm e, i be duh ami " A tih chuan phone chu emily pe turin ka hrilh a " Au, Ate in abe duh che ' atih hnu lawkah

" Aw Amelia " Emily in alo ti nghal var a

" Noah chu aṭhalo viau emni? " Ka ti nghal tawng

" Nizan khan aṭap nasa lutuk a, a ke leh kut vel a khawng vek a athaw ṭha hleithei bawk silo, hmanhmawh deuhin Damdawiin kan panpui nghal chuk chuk a, Oxygen te a hip hnuah azia a tunah chuan aṭha tawh, Pneumonia ani awm e atetlai pawn anei tawh a, a kut khawng vel kha chu aṭah vanga ataksa ṭang lutuk pawh ani maithei " A ṭah chhan chu Sam khan alo sawi tawh a, a ngaihtuah awm loh tih hre mahila ka ngaihtuah lutuk tho 

" Aw le, ka lawm e " Ka ti sep 

" I ngaihawm lutuk, Sam leh Noah pawn an ngai lutuk che, Sam chu mipa anih bakah Noah aiin thil a hrethiam a, ṭap ve vak vaklo mahse, a ngai che a. Noah chu chutiang ani velo a, a nuar a aṭap ringawt zel a, a khawngaihthlak " An chanchin ka hriat loh khan ka ngaihtuah a, an chanchin ka hria a ka hahdam chuang silo

" Lo enkawl ṭha rawh aw, tihtur ka nei sia ka dah hrih mai ang " Ka ti a, min chhanletna pawh ngaichang tawhlo chuan ka dah nghal daih, eirawng ka bawl chhunzawm a Dandani'n alo vcall zui 

" Damdawiin ah kan kal a, Noah ka hmuhtir ang che " Alo ti a 

" Tinge chanchin min lo hrilh veloh " Ka chhuahchhal titih

" I rilru a hreawm ka hlau alawm " Alo ti a, ka chhang zui tawhlo

" U Ima leh Nupuii te an awm dawna, lo ṭawng ve kherlo mai rawh " A ti sar sar a keipawn vedeo ka off daih, Kawngkhar ahawng a, a chhungah chuan Nu saii leh U Ima anlo awm Nu saii chuan Dandani chu alo be sawk sawk a, Noah khuma mu bal chuan ka mit ala chat, ka khawngaih lutuk chu ka mittui a lo hnai leh kuar tawh

" Hey naute, Dam thuai thuai rawh aw " Dandani'n ati a, Dandani ahmu chu Noah pawh chau tih hriat deuh in alo nui ve

" Thawn rawh ka tih kha i thawn em? " U Ima in ati sup a, Dandani chuan camera ati che zawk zawk

" Thawn e, a dawn tawh chu ka ring a " An thusawi chu ka hrethiamlo

" In awm tho sia ka va chhuak harh ang e " Nu saii'n ati ri ka hria a kawngka ari nghal rak bawk

" Tinge Amelia nen in inkar itih tawp kher " Dandani'n ati a, ka thinphu a rang ve nghal dawt dawt thei 

" A ngai alawm " Tih chauhin a chhang

" Ka ngaihsan ṭhin che nen i nep kati " Ati leh khawl a, U Ima tan chuan hriat nuam tak zawng ani lovang

" Ka nep alawm, atana ka tih theih chu khate mai kha ani " A ti leh sup, Dandani chuan Camera chu keng pangaiin Noah bulah a kal hnai leh a

" Anite, Au ka ngai " Noah in atih chuan ka mittui aluang thla puat, a aw ri zuai deuh te chuan min ti na ve veng veng thei 

" Naute, i dam hunah kala hmuhpui dawn che nia, chaw te eiṭha la i dam thuai thuai anga Damdawiin aṭanga i chhuah hunah Au chu kan hmu ang. Aṭha em? " Chawpchilhin Noah hmel chu adanglam nghal thei

" Tak tak ami Anite " Ati a, amitmeng danglam chu ka hmu h hmaih chi pawh anilo

" Beiseina awmze neilo siamsak suh " U Ima in ati hmuk a, an ṭawngri chu ka ngaithla kar

" Tunge beiseina awmze neilo ti, ka hmuhpui dawn " Dandani lahin ati let ve hmak bawka

" Tihbuai ka duh tawhlo, keini tello in a hun hmang tawh rawh se, A duhthusam leh a suangtuah ṭhin chu nise, a chhungkua bulah hlim takin awm rawh se " Call chu ka off rawk rawk a, ka hmai hupin ka ṭap khur dar dar, theih se au vak vak ka duh ka kawchhung tawt lutuk hi azia phah ka ring. Zanah chuan ka u room ah ka kal a

" Sawi duh i nei ami? " Alo ti a, a room a ka luh hi chuan sawi duh ka nei turah a ngai tawp zel

" Sawi duh lam anilo zawh duh che ka nei " Ka tih chuan anui huk a

" Ka ring reng a " Ala ti hram

" Ka awihlo " Ngawi ta mailo chuan ka ti let ve leh tho

" I chalah khan a inziak vek alawm " Ati a anui pah sung leh nghal

" U Ima awmdan hi ka hrethiamlo " Zawh tur ka ngah a mahse, zawh ber tur ka hre chuanglo 

" Mipa ka nihna anga a rilru tur awm ang min zawt anih chuan keipawn ka hrethiam biklo, ka hmuh hmasak ber khan mipa rilru thlak mai mai chi anilo tih ka hre thei a, a bakah chuan ka hrethiamlo " Ka hnual rawih thei 

" Anih leh engtin nge min ṭhen dawn tih i hriat " Ka tih chuan anui a, Rum deuhin ka lo melh 

" Ka hrelo, khami zan khan hmuh a duh che tih min hrilh a, keichuan rem ka ruatpui mai che u ani, kan kal lam leh ilo let lam kha i hmel adanglam dawrh a, a ṭhen che tih ka ringthiam zawk " Ati leh zung zung a, hmmm engmah hriatbelh tur a awmlo emai, eng ber nge hriat ka duh pawh ka hrelo, beisei eng emaw ka nei a chu ka beisei chu ka hre biklo

" Khami zana kanlo kal chhan kha chu ka hrilh thei ang che " Ka ding uaih tawh chu a thusawi vang chuan ka ṭhu leh

" Sawila " Ka ti a

" Zomuani khan kapa alo bia a, in inruk thu leh Nu saii te nupa pawh an thinrim tih alo sawi, in awmna pawh kha ama min lo hrilh vek ani " A tih theih tawk chu dawt sawi chauh alo nih chu

" I bungrua la a Nu saii tein ah kan va kal khan kapa leh U hriatpuia chu an inbia a mahse, an thusawi chu ka hre bik hauhlo " A ti leh a, ava han zawhtlak loh ṭhin tak, a sawi chhumbung si 

" Tinge i ngaihthlak ruk loh " Ka tih chuan, a min tih hmel deuhin alu min thin khum a

" Va chhuak tawh rawh, e lawk" Tiin a dawhkan pawhdawh chu pawtchhuak in a hai rak rak a, envlope hlai ve deuh pakhat hi alo phawrh hlawl

" La ta che " Ka kutah min hmehbel chawt a, ka u hmuhlai chuan ka hawng rak rak

" Ehe! " a chhunga thil awm ka hmuh chuan ka ti vak a, ka u chu ka en a envlope chhunga lehkha chu ka en leh bawk, amak ve em ani

" U Hriatpuia tihsak che anih kha " Ka u in ati sup, Envlope chhungah chuan Fashion designing ka zirchhuak tih chianna certificate alo awm a, Ka zirchhuak chiah lo a mahse, U Ima in min buaipui sak tih ka hria. Ka u room aṭanga ka chhuah hnuah kapi room ah lut kawi zawka chumi hnuah ka room ah ka lut bo leh nghal daih. Ka in ngaihtuah vang vang hnuah U Ima chu ka call ta a

" Bawihi " Call a chhan rualin alo ti sup a, min koh dan chuan ka lakah nghawng ala nei khawp mai, inṭhen hmingpu mahila inṭhen erawh kan anglo, inbe khat satliah ang mai kanni, ani pawn Bawihi alo la tih dut dut tho hi

" Predator alawm ka nih " Ka tih chuan a nui tih ka hria

" I damṭha tiraw? " Alo ti dam diai a

" Ka damṭha alawm, kalo biak chhan che chu Certificate kha ka hmu a, ka lawm e " Ka ti a, ka in humruh nasa mai

" Kan company ah pawh ilo thawk thei ang " Alo ti let a

" Aizawl ah lokal ka tum tawhlo " Ka ti ve hmak, kal ka tum tawhlo tak tak, U Ima hmu reng chungin ka hnaih thei tawh dawnlo a, mahni ka inhrem mai mai ani.

" Engvangin " Alo ti chang bal mai

" Hetah hian awm ila ka duh zawk, Suangtuahna tih puitlin theih tluk chu a awmlo mahse, ka suangtuahna zawng zawng tih hlawhtlin kher hi angai ka ti hranlo, dream chu dream nise ahlu reng zawk ang " Ka ti ve ta duah, Aizawl ah pawh kal ila ka hlim tak tak thei chuanglo ang

" I suangtuahna ti hlawhtling turin tun hun hi hunṭha ber ani " A lo tih leh chuan

" Ka dah dawn, Min puihna ah ka lawm e " Ka ti a call chu ka dah nghal. 

..

" I u nen Aizawl ah chuan in awm thei ang " Kapa chu ka en zawk a

" Ka u chu a duh leh kal rawh se, keichuan Aizawl kal tumna ka nei tawhlo " Ka ti ve nghat, ka nun a kuai let kual nasa lutuk hi ka lungawi tawhlo

" Sawi loh ang hian awm tum phet ṭhin suh " A ti leh hluk tawh, ka chhang duh tawhlo a

" Hnathawk la i chhungte hi hahdam taka min awmtir ahun ve tawh " A tih leh chuan ka nui hul hak

" Teuhlo hna ka thawk lovang, Kapa ka hreawm hi i duh hrim hrim emni? U Ima nen min pawt ṭhen a chumi hnu lawkah an company ah thawk turin min duh leh a, iti ve mah mah ani " Ka ti vin ṭhat, ka thinrim lutuk chu ka khur dar dar thei

" In hau reng teh suh u, Sanga(Awi, Changtunu pa hming hi ka hre tawhlo, ka ziahsual leh comment ah lo sawi mai ru) nangpawh in bengdai rawh " Kapi alo inrawlh a, kapa nen kan boruak sosang lutuk tur pawh alo ti zia deuh 

" Min zahna i tlachham ta lutuk hi insiamṭha ang che, i pa kani a theihtawpa enkawl tu che kani bawk, i tana ṭha tur ka tih chu lawm takin pawm theilo mahla lungawi lo chung pawn pawm tho rawh " A tih leh hram chuan ka puakdarh vek ni maiin ka hria

" Ka zah che tunah hian zahlo che ila i kiangah ka awm tawhlo ang, ka nun i thuhnuai lutuk hi ka hahpui tawh anih hi kapa, ka tana ṭha tur chu keimah min thlan tir theilo emni, ka puitling ve tawh asin, ka daisual ta anih leh ka tuar mai ang, ka tana ṭha tur ti a ka nuna ilo inrawlh chiam chang hian ka chau ṭhin ka hah hluah hluah " Ka sawi zo a thawk kala nghal ham ham, kapa chuan mim em vung vung a chutah ka beisei loh tawp thil alo sawi

" Khami ni khan lo thi dun law law zawk ila aṭha tur " Kapa ṭawng zawh rualin Kapi ka u leh kanu ten kapa an au ṭhat a, kei erawh ka khawvel hi a mang duk 

" Iti anglo hle mai, chutiang em em a thui sawi tur chuan kan buaina hi a ho mah mah " Kapi in ati ve hlak hlak a, a lungawi lo hle tih a aw khur dar dar danah ka hria

" I tel ve angai hleinem keimah zawk hi thi ila, i hahdam tawh dawn nia " Ka mittui lo luang ngiai ngiai chu ka hru thuak a, hmanhmawh deuhin kan in chu ka chhuahsan nghal, Ka u leh kanu ten min auh zuina chu ka tlan hlatsan zel a, min lo um dawn tih hria in ka theihtawka chakin ka tlan zel, thim viau mahse, ka chhungril na leh tawt lutuk chuan engmah min pawisak tirlo, Football field ka tlanthleng a, thinkung lian deuh hnuaiah chuan ka ṭhu thla hnak

" Amelia " Ka u min ko ri ka hriat chuan ka biru vat a, beidawng a an kalsawn thleng ka biru, an kal hlat hnu chuan ka ṭhutna ngaiah bawk ka ṭhu leh a, thingkung chu nghengin ka thaw hle hle, khatiang thu kapa in asawi mai kha ka hrethiamlo takzet, ka ngaihtuahna a fim ṭan a ka thimrimna la rehlo mahse, ka awmna ah chuan rannung thawm a awm reng a, a thim bawk si ka hlau a mahse, chuti mai chuan hawn ka tumlo, ka inti paukhauh a thingbuk ngheng chuan ka ṭhu lui ngar ngar, Ka thinlung chuan U Ima hming a lam reng a ka rilru no lo chhuakin mahni inkhawngaihna avang chuan ka ṭap leh ta nge nge. Veivak in min hmuh mai ka hlauh avangin hnim buk chhungah/Hnuaiah chuan ka lut a, rem thei ang berin ka mu bawk ti hi chuan veivak mai mai chuan min hmulo tawp ang, naktuka ka awmdan tur ka hrelo a, zanin atan chuan naktuk lampang ka ngaihtuah buai duhlo. 

" Amelia Lalruatpui " Meng miahlo in ka nui, Ka mumangah lehzel pawh U Ima min ko ri ka hria ka ngai viau aniang, ka mitmen ka tuma ka theilo, ka taksa ka ti che dawna ka thei miahlo bawk

" Lalruatpui " U Ima min ko ri chu ka mumang ani miahlo, ka harha mahse, ka taksa ka ti che hleitheilo ka awmdan chu ka hrethiam hauhlo mai, maimizialin ka awm tihna nge

" Hnim buk kha enṭha teh u " ṭawng nak nak thawm a awm chhunzawm a, ka awmna lam an lo hnaih tawh viauin ka hria

" Heta hi " Ka bulah thawm a awm rawk rawk a, Ka mit ka meng theilo

" Bawihi " Tiri a awm rualin ka lu a kang nawlh a, ka biang chu kut lum vung vungin a dawm tih ka feel thei, ka taksa chu a khur a ka rilru aharh vek laiin ka taksa chu ka thunun thei miahlo

" Hawnpui thuai teh ang u " titu chu Ka u ani, vawi leh khatah ka kang lawp a

" Bawihi, i ṭha dawn ania " U Ima chuan ati pah sup sup, Theihtawpin ka ṭanga ka mit chu tlem te in ka meng set set, Min kalpui hlawk hlawk tu chu chianglo riauin ka hmu thei, heipawh hi ka mumang mai mai chauh ani, ka harhchian hunah chuan U Ima chu ka hlat takah a awm leh tho ang, ka chau lutuk chu ka ṭang thei tawhlo ka zawi leh hnawk a, thawm ri nawk nawk awm leh ṭhin pawh chu a reh nghal duk.

" A khawsik pawh a reh tawh a, alo harh ṭep tawh ang " Thawm ka hriat leh hmasak ber ani, Ka mit chu ka ti che a awlsam deuhin ka meng chhuak riai riai

" Bawihi " U Ima alo kun hnai a, ka kutah a chelh nghal vat

" Nang maw " Ka ti sep a, ka aw ri chu a ringlo khawp mai 

" Buh hawp kha eitir i tum dawn nia, kan lo va chhuak ang" Kanu ṭawngri ka hria a, en tur pawh in ka che sawn peihlo, ka taksa sil ṭhum chu a hreawm khawp mai 

" Iṭha em Bawihi " Min ngaihtuah zetin U Ima in ati leh a, khumah lo ṭhu kaiin ka biangah a dawm pah bawk

" Eng nge hetah ilo tih " Ka dang aro hulh a, ṭawng pawh a harsa

" Nakinah kan sawi ṭha dawn nia, tui i in duh em? " A ti daih a, ka dang aro miau avangin ka bu nghat tui chu fimkhur deuhin min intir a, min dimdawi lutuk chu a hahthlak 

" Ka ṭha, min dimdawi lutuk suh " Ka ti hlak a

" I ṭhalo " A ti hmuk lehnghal, kan inhmuh loh na arei ve ta deuh bawka a hmel chu ka en uluk ngang mai, a bo leh daih hlauin tim daiin a biangah chuan ka dawm a, a biang ka dawmna kut chu lo vawn hnan in 

" Ka mumang ini lo " Ka tih chuan hreawm tih hmel deuhin thawk ala halh a

" Bawihi, ka tihpalh ka thuthlukna kha i tana ṭha ber tur anih ka rin vang ani " A ti ṭuak a, min hnaih rawkin ka chal leh a chal ati si vang vang

" Ka ngai lutuk che ka.. " Ka sawi zawh hma chuan ka hmui ah alo fawp nghal chawt a, mittui luang ngiai ngiai chungin ka fawp let ve, rei tawk fang lungxhim deuha kan infawh hnu chian a inla hrang a

" Aizawl ah let ang aw, I pa in remti lo mahse, ka kaltir tawhlo ang che " A ti a ṭawng ka a chhanglo in kalu ka bu nghat, a awmdan siamremin ka bulah alo inthawlh ve a, akut min kham tir in min kuah khawm hlun, U Ima angchhungah chuan hahdam suai suaiin ka mit ka chhing leh vang vang. U Ima bulah hi chuan ka hlim mai nilo ka hahdam tel tlat ṭhin.

" Thinrim laia thuthlukna siam vut vut hi ka duhlo chuvang chuan ka inbengdai ang, Ka hawng anga Palai kalo tir dawn " Kapa chu a ngawi ngal a, U Ima chuan inringtawk zetin kapa chu a melh kalh, Zana in aṭanga ka tlanchhuah kha kan khua ah hria an awm vaklo a, U Ima chu Ka u in chanchin alo hrilh a zanah Kan khua alo pan nghal chuk chuk alo ni.

" In inkawp chu ka remti ang mahse, inneih erawh kala phallo " A ngawih vung vung hnuah ati a, ka lawm lutuk chu ka rak chhuak ṭep ani insum hman hramin

" Iti tak tak emni kapa " Ka ti a, a thusawi kha Ring si ring chiah ngam silo in ka awm

" Ti tak tak e " A tih leh takah chuan ka ṭah nuih hak, U Ima chu ka en phei a hahdam huai hmel a pu, ka en tih ahriat chuan mawi ka tih deuh ang khan minlo nui leh a, ava hmelṭha chiangkuang tak!

Cont..