Young lady and Gentleman Chapter-2

 Noah nen chuan ka room ah kan awm a, rilru a kal thui reuh lutuk, Noah chuan eng eng emaw hi a sawi ve siam siam a, vawiin lam a an lam zir te chu a ti chhin a, kan nui dun nasa mai

" Noah, au sualpui pa chuan au chu engtin nge atih ṭhin " Khumah thatchhe deuhin kan mu a

" Nu pawh i nei velo a ti ṭhin a " Ati reuh a, ka rindan sa deuh mah nise an ti tak tak ṭhin tih ka hriat chuan ka kawchhung hi a sa pup pup mai

" Nakinah keimah kala sawisa hrep dawn nia " Ka tih chuan, a mutdan a siamrem ve sat sat a

" Au apa in anu chu vanram ah akal tawh atia " a ti sep a, a hmel ka thlir vang vang hnuah ka kuah a, a hnungah ka chulsak hliau hliau, han hnem dan tur mai ka hre biklo, rei vaklo ka kuah hnu chuan ka inla hranga mahse, Noah chu tui zetin alo muhil hman tho, nichin aṭang khan a ngui ka ti deuh reng ani, a letling zawnga kan mut avang chuan kan mutdan chu ka siamrem a a harh bik lo. a bulah mu ve chung chuan kanu te ka call a

" Aw Mate " U rsa zawk in alo chhang a

" Khawnge Kanu " Ka tih chuan nghal zetin ' khawnge kapa' alo ti veleh kher a, nuih rin hlau deuhin ka nui nghawr dat

" I biak tlak si loh a maw " Ka ti leh a

" Min be chaklo zawk anih kha, min lo biak i tum ve reng reng hleinem " a lo ti ve ngei a, awm tlang ilang chuan min tihbuai dan ngawt a zawng leh awm sia

" Be chak e, ka lunglen ka hlau alawm " Ka lunglen ka hlau tak tak, U rsa nen hian awm tlanin in tibuai reng mahila ka zinchhuah chang chuan ka ngai ber zel

" Lunglen ngaihtuah suh, ṭha deuh khan zir la nau designer ka nei ṭep tawh em? " te alo ti uang leh vel a, nuih za viau e tilo chuan ka nui ring ngamlo

" I bulah mi an awm ami? Nuih rin iva hlau ve " Alo ti ta ngei bawk

" An tunu ka bulah amuhil a " Ka tih chuan

" Ehhh,, a pa i hmu tai deuh anilo maw, pathlawi ngaihzawn duh chuan an fate an be ṭha hmasa ṭhin an tih kha " Zuk han ti a! Hepa hi chu aw

" Lalruatsak hmelchhepa " Lawmlo zetin ka ti a, a nui hawk hawk leh nghal, rei vaklo kan in biak leh hnuah kan dah a, vawiin lam ah ka chau ve deuh bawk nen Noah kuah tura in siamrem in ka mit ka chhing ve riai riai. Ka lo muhil ve ni ngei tur ani, ka harh leh meuh chuan khua alo tlai duai tawh, Noah chu tui deuh in alo la muhil. A mu laklawh sia zanah a mu theilo hrim hrim ang, kawngka ri rak ah chuan ka hawi phei a, U Ima alo lut mek 

" Ilo harh tawh maw? " Ti sup in ka mut lohna lam sir ah chuan alo ṭhu thla a

" Umm " Ka ti ṭiak

" Heite chu zanah a muhil theilo khawp ang " A fanu sam chu a chulsak a

" Tih mut ka tum miahlo ania, khumah kan mu zal mai mai a, alo muhil ringawt " Ka lo ti ve niah niah a, min lo en zawk a, nui suk chungin a fanu bawk a en leh

" Ka hria alawm, kan ti harh tawh ang e " A ti a, ham bai bai chungin ka tho chhuak a, ka sam pawr phang chu ka chul mam thuak thuak

" Duatte " A ti dut a, Noah chu a tal eih lo, a taksa sawi che dat in a ko leh sup a, Noah pawh alo tal ṭalh ṭalh, a tho pangai mai dawn emaw tih laiin a ṭap a, a pa in pawm mai a tum chuan a leng nasa mai

" Keiman kalo thlem ang e " Ka ti sep a, khumah chuan ṭhu thla leh in Noah chu ka ko ve sep a

" Keiman ka pawm daih ang che aw " A mu lai chu pawm tho in ka malchungah ka nghat a, ka awm ah a bei nghal hle hle, ka hmai a za mer mer a, ka hawichhuah chuan U Ima nen kan in melh chiang ngei mai

" Ruatpui lo chhuk pui mai rawh aw " A tih chuan ṭawngka pawh a chhanglo in ka bu nghat a, a chhuah hnu chuan thawk kala ham ham, ka thinphu rang deuh dawt dawt chu tu vang nge tih ka hrechiang khawp mai. Noah chu a hmai te ka phih pui a, a nuih leh var var hnu chuan inhnuai ah ka chhukthla ve chauh

" Inla chhuk ve tawh maw, Laklawh deuh a amut hian nuar a ching ṭhin a " Nu saii'n alo ti leh barh barh a, Sammy chu a pa bulah aṭhu ve ran a, min nam avang khan a in thlahrung ve nge min melh ṭha ngamlo

" Noah te chu a fel tawh alawm, a nuar lo hrim hrim " Ka tih chuan Noah chu a nui ve hek hek reuh a

" Au bula awm chu nuam ati viau aniang, a mu rei emai " Pa hruaia chuan alo ti ve ngei a, amah nen a inrem lo ka tih vang nge mak ka lo ti, uang deuhin a ṭawng ve thiam pawh ka ringlo ania

" Zanriah ka peih tawh asin " Emily in alo ti a, ei an rawt nghal takah chuan Emily pui turin choka ah ka lut ve nghal, Noah lah chu a pi bulah awm duhlo in min zui kawi ve zel a

" Emm, ilo buai em? Kalo muhil daih a " Ka ti a, ka inthlahrung tak tak

" Buai teh nang, eirawngbawl chu maw ka t*l then na tak alawm " A ti kher a, kan nui dun kar kar

" Naktukah chuan ka pui leh vek tawh ang che " Ka ti ve leh tho

" I lo tih ve sek kha anuamlo zawk, min lo pui zeuh anih chuan thuhran nise " A ti a, eng emaw lai ah chuan a dik ve reng, awmpui a an lak ani a, ka lo tih ve sek khan a tan aawh anuamlo zawk maithei ani mahse, ka tan pawh awl deuha awm chu anuam biklo. Huizz mi in a awm hi a buaithlak anih hi, venthawn tur an tam emai, Noah chuan ka bula chaw ei kher a ngen leh tlat a, A pi in a thlem viau pawn ka kawr hmawr ah a pawt tlat

" Lalruatkim, sual rawng bawl reng reng suh, i u zui la chaw va ei rawh " U Ima chuan khauh zetin ati hmuk, Noah chu ka en thla a, ṭap mai tur hmel a pu 

" Ka va eipui ang " Ka tih chuan U Ima bawkin min lo khap

" Naupang anih kha, in thunun tir lo in kan thunun tur anni " A ti leh hmak a

" Ka rilṭam em em hleinem, ka va inchawi pui ang " Ka ti leh hram a, Nu saii chuan min lo pui vat, ka chaw thleng siamin an chaw eina ṭhin ah chuan ka kalpui a, Sammy chuan alo ei mial mial tawh, min hmu ve thut chu a meng kawk a aṭhawng ve deuh aniang. ka rilṭam lo tak tak a, ka eitam hranlo Noah pawh chuti tho

" Tihpalh " Sammy chu ka en dawrh

" Engtin maw? " Ka tih chuan 

" I hre reng " Ti vak in a chhuak leh nghal daih, tihpalh tih chu hreh ve ngar ngar khawp mai. Zanah chuan Noah chu a mu duh reng reng lo a, ka bulah a awm deuh chawt, A pi in thlem a mahse, ka bulah mut a tum tlat tho

" Midang bula mut a hreh theih nen, A ni bulah pawh a mu duh ngai miahlo ania " Nu Saii chuan ati a, ka nuih liam mai

" A mut duh leh mu ve mai rawh se " Ka tih chuan a inthlahrun hmel ngang mai

" Nu sai, inthlahrunna tur a awm hleinem " Ka ti a, Noah kai chung a kalsawn kan tum lai chuan

" Noah, khanu " Sammy in atih lai chuan a pa in alo pawt chat a ' Sam, Au ' a lo ti khauh, Sammy chu a ngawi vang vang a, au min tih chu a hreh ngang aniang

" I u khan, a riahpui reng dawnlo che ania, nakinah pawh ka bulah mut tum tawh miah suh " Awi he naupang sualthiam ve reuh zia hi, I u ati kher chu a pi leh pu bakah a pa chuan an nuih pui a

" Tinge maw au tih pawh chu i hreh tlat le " A pi in ati vang vang

" Sam, i duh chuan ilo mu ve thei ania " Ka tih chuan 

" Ka duh lo ve " a ti vei hmak a, nui vur vur chungin Noah nen chuan step ah chuan kan chho hnak hnak, tlai ah a murei bawk a, ala meng fiah ngang mai keipawh chuti tho

" Noah, Home work te i ti tawh em? " Tih tur a awm bawk silo, Noah chuan lu a thimg nak nak a

" I bag ka va la ang e aw, kan pahnih in kan ti dawn nia " ka tih chuan a mu lai chu a tho hliai a, hlim zetin anui sen sen 

" Min tihpui dawn maw " a ti a

" Tihpui dawn e, tinge i duh vaklo ami? " ka tih chuan

" Ka ṭhiante chu annu ten an home work kha an pui ṭhin a, ka ṭhiante khan school ah an sawi ṭhin " a ti leh a, phir mah nise Noah hian Sammy a phaklo zual in ka hria, ṭawng leh thil tih hrim hrim ah pawh, Sammy chu mipa inla pa chi luhlul zet ani bawk nen athil tih engkim a felfai thlap reuh a, Noah erawh chutiang chu a ni leh chuang miahlo, a ṭawng pawh a la bahlah nuai ṭhin a, a sawi short cut thei viau bawk

" Au hian ka tihpui ṭhin tawh ang che " Ka tih chuan a khek raih a, a bag la tur chuan ka chhuahsan, an unau room bikah chuan Sammy chiah a awm ring in ka kik buai duhlo a mahse, U Ima ka hmuh chuan ka ding deuh dat

" Eng nge ni, mamawh i nei ami? " Amah anglo deuhin alo ti ve zung zung a, Sammy nen chuan dawhkan an kil dun a, Home work a tihpui ve ani ngei ang

" Noah bag ka lo la dawn, Home work ka tihpui dawn a " Ka tih chuan Noah bag awm na chu min kawh hmuh a

" Zanah a ti buailo ang che maw, a mutthilh hun ah ka lo hruai dawn mi? " Ka chhuah leh dawn lai chuan alo ti leh a

" A ngailo, mahni a mut tlawng ai chuan anuam zawk ang" Ka ti ve mai a, ka chhuahsan leh nghal, Noah nen chuan home work kan ti dun a, kan pahnih chauh pawh chuan ian nui leh hawk hawk zel. Dar10 velah a muhil ve chauh a, kei erawh ka mut ala chhuaklo lutuk, Noah bula mu chung a Fb vedeo vel ka en lai chuan Whatsapp msg alo thleng a, Fb chu chhuahsan in Whatsapp ah chuan ka lut

' A mu thei em? ' tih a ni a, Number lawng tawp mah nise tunge tih ka hrechiang khawp mai, a fanu chu a ngaihtuah ve ngang aniang

' A muhil deuh chiah, lo ngaihtuah suh i fanu hi ka ei lovang ' ka reply a, a number chu ' Pathlawia' tiin ka save

' Noah ai chuan ka ngaihtuah zawk che ' a msg chu ka chhiar nawn tluk tluk, mak deuh in ka thinphu a rang nghal dawt dawt maw le, ka en reng lai chuan a dang alo thleng leh a ' Noah chu naupang ania a muhil mai thei dawn a ' tih ani

' Ka mu thei ka tih kha, Noah hian min ti buai miahlo ania ' ka ti let a, Min ngaihtuah vang hrim hrim pawh anih loh hi, ava ho tak ka thinphu lah alo rang hman leh nghal.

' Aṭhat chu, nangpawh mutthilh tum rawh, zanah a mu chhe ve ṭhin ania ' a lo ti leh duah a, a inthlahrung ve hle mai, Pathlawi inthlahrung tak anih hi, ka ngaihtuahna avang chuan ka nui tet tet

' Aw le, muttui ' tiin ka reply a, Emoji ham lai ka thawn tel bawk

' Mangnuam ' Ṭawngkam chu bei maksak ve hle mai, Pathlawi maksak tak anih hi.

Aizawl ka awm aṭang pawn thlakhat dawn aliam tawh a, nitin Designing class kala kal ve zel, ka tuina tak ani bawk nen hma ka sawn ve viau chuan ka in hria, Dandani nen kanla inkawp chawt a, engkim kan ti dun ṭhin. Tuman Company neitu te in ah ka awm tih an hrelo a, ka inthup ve ṭang ṭang Dandani tak ngial pawn a hrelo. Vawiin chu class kan nei reilo a, Nu saii'n naupang va hruai tur a min tih avangin Naupang pahnih school lam ka pan leh mek a

" Au " Noah in min hmuh chuan a hlim khawp mai

" Fimkhur rawh " ka ti zo hman chiah a tlu bawk thlawp a, rang deuhin ka tlan phei ve nghal

" Ana em? " Kaitho pah chuan ka ti sawk sawk, a mittui parawl kuang mahse, a nui ver ver a

" Ana lo " A ti ve tlat, a khup a tauh na chu a pilh a 

" Ka pawm ang che " Ka pawm kang a, waiting shed ah chuan ka ṭhutpui

" Khawnge i u " Ka hawikual a

" Ka hrilh che kha au, khami te nen khan " a ti a, ka hrethiam ve nghal

" Noah, khawiah nge chumi te chu an awm " Vawiin hian hmuh ve ngei ka duh ani

" Saw lai ah sawn an kal ṭhin " Kum5 an tling ve dawn chauh a, insual han hrat nghal em em mai chu'h, Noah chu ka pawm a asawi na lamah chuan kan kal, Naupang pa3 hian Sammy chu anlo din hual ve khanglang anih chu! Khawvel han mak tawh zia hi

" Hey, nangni ho kha " Ka tih chuan an lo hawi hra hlawm a, Sammy pawh a meng bial kawk alawm

" Ek cheh rual lek si, in zak em? " Ka ti Khar khar a, hlauhawm deuh turin ka aw ka ti danglam ve deuh 

" Kapi, tunge inih " Pakhat chuan ati ve reuh a

" I pi hian ka ben hrep che i duh loh chuan, insual tawh reng reng suh ang che " A chal ah ka kawk sawk a

" Eng nge ilo tih dawn " Sammy chuan alo ti ve ngei

" Lo ngawi rawh " ka ti ram hmarh

" Naupang ka kut khingkhat pawh hi i hneh lovang, midang tibuai ve khanglang tawh suh u, kal nal nal ru " Ka ti a, min melh rum ve hlawm lutuk, ka ngei lutuk chuan an tukhum ah ka beng leh ṭheuh a

" Ka buaina ah lo inrawlh suh " An kal hnu ah Sammy chuan ati leh a

" Lokal mai mai teh " Ka tih ve hmak laiin ka phone alo ri a, Pathlawia alo ni zui

" Aw, hello " ka tih chuan

" Naupang ho i hruai ami? " A lo ti let nghut a, a thin ka ti rim ta emaw ka ti mai dawn alawm le

" Aw hruai e, kan lo hawng ṭep " Ka ti let ve mai a

" School kawt ah ka awm, khawnge in awm " a tih leh chuan 'kan lo kal ang ' ti zung zung in phone ka dah 

" I pa in min nghak tawh, lokal ru le " Noah chu ka pawm leh a

" Sam, ka bag hi lo khai teh " Ner nang chungin a la ve mai, kan pathum chuan kan inzui chhuak hnak hnak a

" Eng nge intih " U Ima chuan kan chhuahna lam kawk zeuh in ati a, chhan mai ngaihna pawh ka hrelo, Sammy chu ka en zeuh a hrelo ang hmakin motor ah a lut daih leh nghal

" Kan kal kual mai mai " Ka tih chuan awih loh hmel deuhin min melh run a

" I chhe ren run khawi teh " Ka ti hlak a, Noah chu motor ah ka ṭhut luh pui ve nghal

" Au, ka ke khu a thip sep sep " Noah chuan a pa hriat hlau deuhin ka beng bulah a ti ve sar sar a

" In ah damdawi kan hnawih ang a, a dam vek mai ang " ka tih chuan a ngawi veleh mai. 

" Noah khup pilh chhan leh khata ṭanga inlo chhuah hlawl dan chu han sawi teh le, dawt ka ngaina lo ania " Noah khup ah damdawi ka hnawih zawh ah ka room ah ka lut a, ka beisei loh deuhin U Ima alo ṭhu run

" Noah kha chu a tluk na ania, Kan vak kual ve mai mai ka tih kha " Za lo zet in ka nui a

" Ruatpui " Khauh zet a atih leh nghut chuan thawk kala hap a

" Aw anih, englo.. Naupang dang in Sammy kha anlo tibuai ṭhin a, tibuai tih lemah an lo insual ṭhin a, naupang ho kha ka hau mai alawm, Pakhat leh pakhat chu nise ka inrawlh miah lovang, inrawlh chhan tur pawh ka neilo mahse, Pathum leh pakhat chu a fair lo a, thil fair lo deuh chu ka enliam theilo alawm " Zai zir meuh in ka ti duah a

" Ṭha deuhin atir ah min hrilh mai tur alawm " A ti dam leh thlup a

" Min hauh ka hlau alawm " Ka tih chuan anui chhuak hawk

" Mim hlau ami? " A tih chuan amit a en let kar chungin

" Hlau lo " Ka ti sep mahse, ka tha hi a khur der der amah ka hlauh vang erawh ani mawlh lo

" Min hlau suh, Noah leh Sammy i buaipui ṭhin avang in ka lawm e " U Ima chu ka en reng, hriatthiam har deuhin min melh ve reng a

" A ho emai " In thing harh vat in ka ti a, tih ber tur hrelo in ka meng kual ralh ralh, ka kut ka khawih pah niap niap bawk

" Inti fai rawh " Ding vut in a chhuak nghal daih a, min ti hrilhhai dawn alawm le, ka intih fai hnuah lu tuam bur chungin inhnuaiah ka chhukthla a

" Au, a nutei alo kal a " Noah chuan phur zetin min lo au a, a nui sen sen bawk, hmeichhia kala hmuh ngai loh pakhat hi alo awm ve reng bawk, a nui sang a ahmelṭha khawp mai

" Ani maw! Anuam i van ti awm " Ka tih chuan a bu lap lap mai, an hlim tho a tiin choka ah chuan ka tlang daih a, Common room ah khan U Ima pawh a ṭhu ve ngei a mahse, phone a bih ngur ngur anih kha

" Bawihna nupui unaunu anih kha " Nu saii chuan min lo zui lut ve tih ka hre miahlo

" Umm anih chu " Ka ti sep a, sawi vak dan tur ka hrelo

" Naupang ho hmangaih pui thei ber tur niin kan hria a, innei se kan ti, Zomuani hi chuan a hniallo a " A tih leh chuan ka khawng awt in ka hria, nupui a nei leh dawn maw!?

" Nupui maw? " Ka ti chhuak sep a, U Ima hmel chiang deuh in ka mitthla zui nghal

" Umm, naupang hi an khawngaih thlak a, midang zawng aiin Zomuani hian a hmangaih thei ber dawn a, chuvang chuan kan nawr ve deuh a mahse, Bawiha hian a duh tlat lo a " A sawi tawp lam chu thawk huai huaina tur thil ani

" Tunlai ah chuan mihring hi kan fel tawh a, nuhrawn te pawh an sual kher tawh bik hleinem " Ka ti khawmawi ve a, Nu saii pawh a bu nghat nghat

" Ani reng mai, Bawiha hi chu mi rilru nghet chi hi ani a, 'Ka nupui nau neih ka tumlo, an duh chuan naupang pawh hmu rawh se ka hniallo, inzawmna siam kher ka duh lo' a ti hmak zel a, ka sawichhuak tawhlo " ati leh bawrh bawrh a, an chhungkaw thil lutuk min hrilh mai danah min enhrang lo hle tih ka hria. Choka aṭang chuan a chhuak leh thuai a, Emily chu tih tur a awm leh awm loh ka zawt 

" Awm em em lo, salad siam ani mai " A ti a, fridge hawngin salad tur chu ka la chhuak ve mai

" Kapi hian a ngai fel ve sia, ka chungah chuan aṭha lemlo" Emily chuan ati a, ka melh vat 

" Zomuani saw maw? " Ka tih chuan za lo zet a nuiin abu nghat a

" A fel hmel ka lo ti asin " Ka ti mai a, midang rel chiam hi ka ti ve ngailo a, mi in ka bulah midang an sawisel chiam te hian hreawm kati ṭhin

" I hrelo anih chu " A ti a, ka sawizui pui vak loh avang chuan nuamlo ati deuh aniang gas bulah a ding sawn leh daih a, dawhkana ka phone dah chu alo ri ve mek

" Aw, kimkim " Ka ti nghal tawp a, tunlai chu Kimkimi nen pawh kan in be khat khawp mai

" Naktuk class i neilo ang tiraw? " A lo ti zang vah a

" Nei dawnlo " Ka tih chuan alo au deuh chiam a, ka phone ka dah hla rang lutuk

" I mawl sia maw, Laltlankim " Ka ti hlak a, ala nui uar sauh leh nghal, eng chu hria nimaw

" Naktuk chu dine out ila " A lo tih leh chuan ka ngawi vang vang

" Ka hrelo, Nu saii te pawh ka hrilh ve phawt loh chuan " Zep loh chuan ka chak ve reng

" Thlakhat chuang i awm tawh a, vawikhat pawh kan la inhmu lo, naktuk chu ka ring dawn che nia " a tih hnu ah a dah leh hmak a, salad chu ka chan chhunzawm mawlh mawlh. Zomuani chuan chaw a ei ve nghal dawn a, kei aiin upa daih mahse, ka u buai peih lo. Dawhkan an lo kil ve tak tak hmain ka chaw tur ka siam mawlh mawlh a, an lo lut leh ka choka chhuahsan tur kan in tawk

" Inchawi i tum alaw? " U Ima chuan ati nghut a, nui ver ver in ka bu nghat

" A va ṭullo ve " ti leh mahse, ka kalpel a Noah te bulah chuan ka ei ve leh mai, Noah chu a ṭawng leh siam siam a, Sammy chuan inla puithu deuh in a khap leh ṭhin, an unau chuan ka tibuai lo a, ka chaw eilai ka ei mawlh mawlh, mak min ti ve deuh aniang an pahnih chuan min melh leh zeuh zel. Zanriah eikham pawh chuan Zomuani chu ala awm ve reng a, eina ka tihfel pui hnuah ka room lamah ka chho nghal daih, ka va mil loh vang pawh ani hranlo. Kimkimi chuan min lo txt leh a, Dine out chungchang bawk min sawipui, Nu saii kala dillo ka tih chuan Emoji thinrim sen vek chu alo thawn leh tuar a, keimah chuan ka nui hak hak 

" I nuam sam lo deuh emni? " Nu saii leh Noah an lo lut a

" Ka ṭha alawm " Ka tih chuan anui ve leh sang

" I bulah mut ati veleh tlat a, a ti buailo ang che tiraw? " A ti zung zung a, min tihbuai loh thu ka hrilh ve mai

" Englo.. Nu sai, naktuk ah ka ṭhiannu in Dine out ila ati a, kal ve i remti em? " Ka huaisen na zawng zawng sawmkhawm in ka ti a, Nu saii chhuah tum pawh a ding leh dat

" Phal loh tur a awm hleinem, chhuak harh ve rawh " A ti a, ka lawm ngei mai Noah chu a muhil har lo a, min kuah chial a a mut ṭhin avangin phone khawih pah pawh hi a rem vak ngailo mahse, harsa deuh chung pawn ka online ve reng zel, whatsapp ah sts ka view mai mai lai chuan Pathlawia msg alo thleng a, hawng nghal mai lo turin ka insum hram ani, ka hawn nghal chuan a msg ka chamg emaw atih ka hlau, min3 vel ka nghah hnu ah ka hawng ve chiah a

' I rilṭam em? ' tih alo ni, min3 chhung ka nghak ve ania, a ho chu ka ti ve khawp mai

' Chaw ka ei ṭeuh alawm ' tiin ka reply a, ani chuan a seen nghal chu te mai mai chuan min ti hlim nia maw le

' I ei ṭeuh lo tih ka hria, Zomuani vang kha ami? ' a msg chu engtia han chhan tur nge ka hrelo, chhan dan ka ngaihtuah reng lai chuan typing a in ti leh nghal a

' I online reng chuan min ignore miah suh ' a lo ti leh reuh anih chu, huiham hepa pui hi a awmdan hi ka dawngsawng thiamlo, msg a type ve keuh keuh tur ka mitthla a, Noah en zeuh pahin ka nui seih

' Zomuani vang anilo, ka rilṭam lo hrim hrim alawm ' tiin ka reply a

' Muhil tawh rawh ' a lo ti leh daih a, ka hmui ka ti pawrh tarh ringawt

' Aw le ' a seen a, min reply tawhlo, la mu mai lo chuan Dandani msg te chu ka reply ṭha leh vel a, engmah ti em em lo chuan kala online ve reng

' Online tawh suh, mut a hun "' Pathlawia hnen aṭang bawk in ani, a thu lo ve e

' Ka thu thu ' Ka ti ve kher a, a msg lo thleng leh nghal chu ka hrelo der hmak, ka online rei tawh biklo a, ka muhil ve nghal daih. 

A tukah chuan Dar11 velah Kimkimi'n pawn ah kan awm alo ti a, keipawh ka insiam peih thlap tawh avangin Nu saii hrilh in ka chhuak ve nghal a, Pawnah chuan car dum hi alo ding a

" Kan pahnih chauh in amaw ka tia " Car chhungah chuan Mipa pahnih an tel ve a, Kimkimi chu ṭawng rin hlau deuh in ka chhuahchhal

" Car an nei a, an sual lo ania lokal rawh " Min pawt nawk nawk a, ka lo kal lo mai ang tih leh mai ka duh mahse, Kimkimi tih hnual ka hreh avangin ka ngawi ta zawk a

" Tlai kha i theihnghilh ang e aw, ka ring che ania. Kan in hmu leh dawn nia " Bazar thleng min thlah a, an tel velo tur chu ka hlim ngei mai, motor chhungah khan mipa pahnih an ṭawng tam ber a, mipa ṭawngthei zet hi ka ngaina lemlo. Kimkimi nen chuan kan kalkual chiam a, lei tur a pui a tam si, bazar ah hian kal zen zen chi pawh anilo anih hi. kan ṭhiandun a kan len chhuah chuan thla kan la sek zel, tunah pawh thla kan la eh ṭeuh tawh.

" Kan pum hnawhpuar ve phawt ang " Rei fe kan kalkual hnuah ati a, ka pawmpui khawp mai

" Engtin nge khami te kha i hriat " Kan thil chah kan nghah laiin ka ti a

" Phone aṭangin " Awlsam zetin ati a, ani pawh hi ri phawr phawr ang kha ani a, thil reng reng aṭhalo em tih lam ngaihtuah lo tih chhin zel tum ang chi kha ani. 

" Keichu ka ngaina lo " Ka ti a, ka zep buai peihlo nileng in an bulah khan awm ila an ṭawng ka rui thei hrim hrim ang. 

" Ka ngaina biklo, bawl an nuam a pa te thawhchhuah ring a chapo an nih kha, duh duh naah min hruai thei a, sum save na atan a ṭha lutuk " A ti leh mai a, a ngai awlsam ve ngawt mai, ka awmna te chanchin min zawt ve a, an fel thu leh naupang pahnih pawn min ngainat thu ka sawi ve sep sep

" Pathlawi zunah ilo uai ringawt ang e aw " Ati a, anui pah har har bawk, ka uai ṭan der in ka hria. Thil kan ei zawh hnu ah kan leng kual leh a, ke a kan kal kual leh hrep hnuah taxi a phar a, min hruai tumna pawh ka hrelo e a

" Khawnge kan kal dawn " Kimkimi chu a ngawi reng a, a awmphung hi ka hrethiamlo

" Vawiin a ka ṭhian khan a bday ah min sawm alawm, chaw hlui kan kilpui ve lawk ang a kan hawng dawn nia " a ti a, ka phawk nghal hra 

" Ka hawn a ngai tawh, chutiangah ka tel ve duh hleinem " Ka ti chiam a, min rawn hmasa lo a min hruai atum pawh chu ka lungawi lo

" Kan rei dawnlo, vawiin ah min pui a, a bday a chawhlui kil ve te chu a pawi hleinem " Ngaihsam zet in ati leh hmak, Kimkimi te hi an khawsak a hniam hranlo a, a pa hi kan khua Middle school principal ani, keini nen chuan tehkhin chi pawh kan nilo, lungawi lo ru deuh chuan ka ṭhu ngawi ta kar a, kan khua a ka ṭhian Kimkimi kha ang tih na pawh ka nei tawhlo. kan kalna chu in lian vaklo ani a, a fal ang reng. Music ru dup dup a a bengchheng ngei mai 

" Kan thleng tawh bawk a, keichu taxi hian ka let leh dawn" Ka tih chuan

" Amelia, a rei dawnlo " Min pawt a, a ṭhiante hmaah tih zah ka hlau ve bawk si, ka zui ve ta zel a

" Inlo thleng tawh maw? Chaw ei pawh kan peih ani mai" Vawiin a motor khalh lo tu zawk khan alo ti zung zung a, Kimkimi chu mipa pakhat hian alo kai hrang daih, chulai hmun chu nuam ka tilo takzet, zu rim a nam ham ham bawk a

" Ṭhiannu in ve rawh " Vawiin a mi bawk kha ani

" Ka duhlo " Ka tih chuan anui sawng a, ava hmelchhe tak, U Ima hmuh ngun phei chuan hepa hi chu hmuh ṭhat a har khawp mai

" Hnar kual vel lo teh, tunlai hmeichhe ho hi chu ka hrechiang ve tawk che u, sum a awm chuan khum min ṭawmpui hreh ngailo " A ti ham ham a, ka luak ati chhuak lutuk

" Nuai1 pawh min offer la i hmel fahrah leh pian ṭhing lutuk bulah chuan ka mu chuanglo ang " Ngeiawm zetin ka nui ve hak, a thin ka ti rim ani mahna min melh rum sawt a

" Nang hmeichhe lep chiah " Min tih chuan ka ngaithei bik der lo

" Nang mipa pawh tling zo lo " Ka ti ve hlak, ka ṭawngkam chu a haw ngang aniang kan bula dawhkan chu a tlawh thlu ṭhuai a, min lo man a tum chuan kalo tawlhsawn a, kan thawm chu tuman an hrelo nge min ngaihsak lo, kimkimi pawh a bo hmak, ka thinrim dan chu pui tak ani

" Mipa ka ni nge nilo chu ka hmuh tir ang che, i ṭhiannu remruatna avangin ilo kal theih nan ka bday pawh zanah ka lawm loh phah tih i hria em? Chuti mai chuan ka kaltir dawnlo che " Ti chhur chhur in min lo pan a, ka tawlh hnung ve zel bang ka ngheng dawt takah chuan ka mangang ve ta khawp mai, nui sawng chung a ka biang a khawih chuan ka tha neih zawng zawngin a awm ah ka nam a, alo rui ve tawh bawk nen a kat dawrh a, a tlu ri rum rum mai, music ring deuh pawh chu a tawp nghal a, kan thawm chu a ring ta viau aniang awm ve ho chu anlo hawi ṭhap, hmeichhia pawh an awm nual a mahse, an mitmeng adiklo vek tih ka hre thei, Kimkimi chu khawi aṭangin nge ka hrelo alo lang leh nawlh a

" Eng..eng nge awmzia " A ti buh niai a, thinrim lutuk in ka melh ngawt ngawt

" Ka rin ang i nilo khawp mai Kimkim, min hralh ani ringawt alawm " Ka ti chhuak nghek, thinrim zetin ka bag ka hai rak rak a, ka phone chu la chhuakin ka hriatchhuah hmasak ber U Ima number chu ka dial nghal a, ka awmdan chuan a ṭhawng nge anla chechang lo 

" Hello " U Ima aw ka hriat chuan ka hahdam sawng sawng thei

" Min lo hruai thei ang em? " Ṭah chhuah hlau zetin ka ti sep a

" Khawiah nge i awm? " Zawhna min zawt chiamlo chu ka lawm a mahse, Kan awmna hi ka hre hauh lo

" Kan awmna hi sawi rawh " Phone chu ka hup a, Kimkimi chu ka melh kar, zawi te chuan kan awmna chu a sawi a, U Ima chu ka hrilh ve nghal, ka tihbuai vak hlau mahila amah bak biak tur ka hrelo ani. 

" Amelia, ding teh, heyy " Ka chhuak chu Kimkimi'n min zui chhuak a, Min koh na te chu ka hrelo der hmak, ka kut ah min chelh din takah chuan rum zetin ka en a

" Eng nge ila duh, i nundan ang khan ka nung ve theilo, keichu neih chuangliama heta awm hi ka nilo aw " Ka ti kha fak

" Ka tihpalh " a tih chuan ka nui hawk a

" Ka ngaidam theilo che, ka ṭhian emaw kalo ti ṭhin che a mahse, rul anga fing, bak anga phakar ilo nih hi " Ka ti chiam, a hmel hi hmuh reng pawh ka chaklo, Kimkimi'n ka kal ve dan a ngaihtuah a, khami te bulah khan eng ang in nge min sawi ang, khati khawpa min ngam te kha, ka ngaihtuah let phei chuan ka kaw chhung hi a so bulh bulh thei. 

" Ka tihsual vawikhat anih kha, a thleng tawhlo ang " Ala ti ngam nia mawle

" Min hralh ṭep anih kha, engtin nge i ṭhian ni leh lo i mihringpui chu pawh i hmeichhiatpui chungah i tih theih " ka ti leh nghek, ka sawi zawh rual deuh thaw in kan bulah U Ima motor ngei chu alo ding dawt a, amah alo chhuak nghal bawk

" Kal ang " A ti hmuk a, Kimkimi chu melh nawn tawh miahlo in motor ah chuan ka lut ve nghal, a ngawi reng a, ṭawng chak lemlo mahila a ngawih reng chuan ka ngaih aṭha chuanglo

" Khatah khan eng nge itih " In kan thleng a, motor aṭanga ka chhuak tur chu min be leh tho sia, a hma zawng zawng pawh a ṭawng duh hleilo

" Ka ṭhiannu khan min bum " Ka ti hmak, zep kual ṭit ṭet kha ka peih velo

" Bum tur in awm tawh suh " Tih chauh a sawi, ka hmui petsawi zeuh in ka chhuk a, inchhung ka luh rualin Noah in min lo ko leh nghal chul 

" I lo hawng tawh maw? " Nu saii'n min lo nuih leh var var tawh, Nu saii leh Noah hmaah nui sang mahila ka chhungril hi a hreawm ve lutuk, mahni a awm ka chak ngawih ngawih, inti fai tura room ka chho tur chu Noah in min ngen lo teh tlat a ka lawm ngei mai, room ka thlen rualin khum mawng lamah ka ṭhu sawp niai a khum chu ka bawh thlawp, Ka tette aṭanga ka kawm ka ṭhian tak tak anga ka ngaih leh ka rin in min tihdan chu paidam harsa ka ti ve thlawt, ka mittui alo luang ngiai ngiai a

' Kha chen ṭhian kan ni a ṭah chu a awm alawm mahse, tun bak hi chu amah avangin ka ṭap tawh lovang ' ka ti chhuak sep.

Zanah chuan ka mutthilh theih ngang loh avangin Noah mutthilh tawh hnuah thawm din deuhin, in chung ah ka chho leh a, kapa thu min hrilh la hrechhuak uar uar, ka duh avang rengin kal lo mahila ka awm anuam thei chuanglo, thawm awm rak ah chuan ka hawi phei a, U Ima alo ding leh luah tawh hepa hi min enthla ṭhin aniang

" Min zui ru ani maw? " Nui ṭha chunga ka tih chuan ka bulah alo ṭhu thla ve leh a

" Misual lo chu ka zui ru ngailo " Hmmm, ve ngei hian a

" Anih vel chu " Ka tih chuan

" Mi pakhat rinawm loh avangin mi zawng zawng hi an rinawm lo ta tih na anilo ania, vawiin thil thleng kha chu ka zawt dawn lo che, nangpawn hriatreng loh tum rawh" a ti a, ngun deuhin kalo ngaithla

" U Ima, nupui neih leh i tum em? " A thilsawi nen a in tu ha lo deuh ka sawi avang chuan a hamhaih ve deuh aniang

" Ka leng tar tawh dawn " A ti anih chu! Ka tan beisei a bo nghal lutuk

" I ti anglo emai a " Kan ti ngawt a, ka chhipah chul in min nuih suk, min tihdan hi pa in fanu chunga a tih ṭhin ang chiah ani, kei lahin chutiang mai mai chuan ka ngai ve der silo, ka duh huam phei chu anilo mahse, ka vei ani.

......

" Ka lo thlah ang che " Vawiin ah class kan ṭan leh tawh dawn a, gate aṭanga ka chhuak chu ka bulah U Ima car alo ding ve dat

" A ngailo, taxi in ka kal thei alawm " Chuan ka chak ve reng mahse, U Zuali thilsawi ka ngaihtuah thlenglo thei biklo ani, a tlan mai dawn emaw tih nak laiin motor aṭang chuan alo chhuak a

" Tinge ka ruala kal chu i va hreh ve, i awmdan hi amak riau, Company ah lah nise min pehhel char char a, ka hrelo tur ah i ngai anih chuan i tisual viau ang " A ti nghut nghut a, ṭi deuh in ka nui ringawt. U zuali thusawi ka hrilh theilo a, min hrelo anga awm tura hrilh turin ka ngam der silo chutianga ka tih phak pawh anilo, pehhel mai loh chu tih theih ka nei tlat lo ani.

" Chutiang anilo " Ka tih pawh chuan min melh ngur a

" I lo chuang lo anih chuan vawiin ah in class ah kalo kal ang " A ti hmak mai le, hepa hi a sual ve zia 

" Aw, a nih " Min thlah ringawt chuan tuman an hmu chuanglo ang, a thilsawi hi ati leh duh tak tak dawn tih ka hria, nam nul mai mai chi pawh anilo

" Min hlau chu ani em lo maw? " A ti sup a

" Hlauh chhan tur che ka nei ami? " ka ti ve hmak, anui suk leh ta nghal a, ṭawng thei chi ni mahila han sawi chiam tur ka hre bik tlat lo

" Hetah hian kalo chhuk ang " Company thlen hma deuh chuan ka ti a, a hrelo der hmak thei maw le

" Lo chhuk ve duh suh aw, bye bye ni hman nuam " Ti zung zungin ka chhuak a, motor chu kalsan thuai thuai ka duh 

" Ruatpui " Phawk hra in ka hawilet a, alo chhuak ve leh tak tak, ka hlauthawng nghal der

" Eng nge i hlauh " Ka hmel landan chu a hrethiam aniang 

" Hlauh ka neilo, bye " Ti leh sep in ka kalsan daih a, ka awmdan chu keipawh hian mak ka inti, min thlah ve ani mai a U zuali thusawi ka zawm chiam chhan tur pawh a awm in ka hrelo, tun aṭang chuan peih lo mahse, ka inthlah tir zel tawh ang, ka tan ṭan lak nan aṭha ting, ka ngaihtuahna chu ka nuihpui eh ang vur vur a, ka mawl hmel viau ang, Dandani alo la thlenglo aniang kan in nghah na ṭhin ah chuan alo la awmlo a, ka nghak ve ta zawk a, hun dangah chuan min nghak ziah. 

Cont...