Young Lady and Gentleman Chapter-7

 Vawiin ah kanu te anlo kal dawn a, lo hmuah duh mahila vawiin hi Competition 2round kan ṭan leh hun ani bawk si, Nu saii'n keiman kalo hmuak mai ang ati a, inthlahrung viau mahila tih theih a awmlo, U Ima nen Company kan pan leh a, dan ngaite in keimah ka titi leh char char. Bialpa ṭawng mawh deuh neih chu mahni a inkawm mawlh mawlh a ngai reng mai, min chhan ve chhun lah 'Umm' ani tawp a mahse, Lalhriatpuia hi chuti lutuk a chut erawh anilo.

" I inbuatsaihṭha em? " Dandani ati leh sar sar tawh

" Tehnang rilru ah alut lo reng reng, kapa damlo nen " Ka ti hap a, ka sam ka chul ka chul ringawt

" Engdang vang anilo, i bialpa in a vil hneh lutuk che a chuvang anih kha " A ti leh zat zat tawh, henu han ngeiawm famkim zia hi chu 

" Aw ni e, amah bak ka thluakah hian a awmlo " Ka ti ve ngat a, a ner kual nasa mai

" I pa te chu vawiin ah ami anlo thlen dawn " A ti leh daih tawh, a thusawi inhlat theih dan hi. Aw tiin ka chhang ve mai bawk a

" U Ima tan Makpa interview ani leh mai a " A ti leh ham ham tawh a, keipawh ka nui ve tawh tho. A bulah hi chuan a nuih loh theih loh. Intihsiak chu kan ṭan leh a, rilru ah thildang atam ve bawk nen ka duh ang pawn ka ti ṭha theilo. First ai pawn ka che chhe zawk tih ka inhria mahse, ka ngaihtuah hah vak duhlo, In lama kan hawn ve theih meuh chuan Kanu te pawh anlo thleng tawh a, Nu saii'n an in a awm turin sawm viau mahse, Kapa chuan a hnial tlat a, Nutei tein ah an in nghat anih hmel

" I pa te chu hmuh kawi i duh em? " U Ima chu kuah chung chung mai ka duh, mi in a awm ka nih avangin ka duh ang zawng zawng sawi hi ka inthlahrung ṭhin a, U Ima hi chu a kum a tam tawh bawk a sawi kher ngailo hian amah hian a sawichhuak ṭhin a, ka tan lah alawmawm ṭhin bawk si, han ngei ngawih ngawih hi chu thil har tak ani.

" A rem chuan ka duh a " Ka ti a, Motor kawngka min hawnsak ah chuan ka ṭhu lut 

" A rem loh na a awmlo, inthlahrung viau ṭhin lo teh " A ti hmuk a, ka nuih vur vur ringawt

" I fel ber mai " Alo ṭhut luh ve rual chuan kalo ti a, ani pawh nui sang in

" Ka lawm e, Young lady " A ti ril ruih a, min koh dan chuan min ti hamhaih leh tawh

" Min koh dan hi thlak kual reng suh aw " Ka ti hlak a, ka lungawi lo hranlo

" I inhmeh alawm, ka tan chuan young lady ini " A tih leh chuan ka chhang tawhlo, hla ka play san daih a, tunlaia ka ngaihthlak uar em em mai chu play in ring deuh in ka sakpui al al 

" I zai uar hle mai " Ka zai zawh hnuah ati leh sup zel a, atir chuan ka nuih mai a mahse, ka zai zawh apianga i zai uar hle mai ati ziah chu kei thin tertek nei hian ka dawh reng theilo

" Eng nge khatia ilo tih zel a " ka ti vin hlar a

" I zai uar alawm " A ti leh hram nia! Hepa hi

" I zaithiam ti ve maita che " ngawi ta mailo chuan ka ti ve zel a

" I zaithiam loh vang alawm i zai uar ka tih " A tawpah chuan keimah zawk ka titau leh bur bur tawh, nidang anglo takin a ṭawng dut dut reng a, kei lah ka titau laklawh si kan chhangṭha duhlo lui vel a. Nutei tein pawh kan thleng a, Nutei'n min lo dawngsawng ṭha khawp mai

" Lokal kher angai hleinem " Min hmuh rualin kapa'n a ti nghal a, kapa chu a taksa a tla deuh kuam mai

" Min ngailo viau suh " Ti hlak in abulah chuan ka ṭhu, kanu in U Ima chu a be luam a, Kan pathlawia pawn a chhan ve sup sup hi

" I luhlul thei e Kapa chu, i damloh tirh te khan in entir tur ania, tunah na te ila nei em? " A kut cher riak chu ka khawih neuh neuh, kapa hi palian leh sa ṭha deuh ani ve a, tunah chuan a cher riak tawh 

" Ka ṭhat veleh mai ka ring alawm " A ti ve mai a, heihi alawm kapa chu a ngaihsam thei lutuk a, mangan tawpah Damdawiin kal angai leh tho a, Damdawiin te hi nat tawp a kalna tur ah angai tlat zel, nat tirh te a Damdawiin kal hi a duh ngailo reng reng 

" A tir a damdawiin kal hi i duh lo ziah " Ka ti hmarh hmarh a, min nuih tlawn leh vur vur tawh

" Kapu, tunah in sawiselna ila nei em? " U Ima in alo bia a, kanu choka lut tur chu ka zui ve nghal daih, Kapa'n engtin nge a chhan pawh ka hrelo 

" Hawn rawt vat rawh aw, Imanuela tan hawn rawt kha anuam dawnlo ania " Choka kan luh fel hnuah kanu in ati zung zung a, ka bu nghat nghat

" Nu, naktukah ami in entir chu intih " Nutei thingpui siamtur chu kalo pui a

" Umm, in entir hma ila ka duh deuh a " A ti a

" Kalpui in ngai dawn em? Naktuk chu ka awl dawn a " Kanu chu ka en kar a

" I nutei a awm alawm, I chawlh ni chuan Saii pui zawk rawh " Kanu in atih chuan ka hnial biklo, Nutei thingpui siam chu Kapa leh U Ima te ka va pe a, an lo titi tui khawp mai, choka ah bawk ka let leh. Nutei pasal hi sawrkar hnathawk ani a, fa pahnih chiah an nei a kan in pawh lutuk lemlo, an fanu aiin an fapa U Beiseia nen hian kan inkawm thei zawk.

" Imanuel chu a fel hle mai " Kan ngawih reng laiin Nutei'n ati ve sep a, kanu in a sawizui pui hlut mai, kei erawh ka nui var var a mahse, kan in ngaizawng tih hi hria se tuna an ngaihdan ang hi ala ni reng ang em ka hrelo, Kan in ngaizawng tih an hriat vek hunah chuan Nu saii leh kanu inkar pawh hi a danglam maithei ani. 

" Anih chuan hawn kan rawt tawh ang e, Noah te anlo ban chuan an khuahar palh ang " Nutei leh kanu titi tui lai pawh an chawl dat

" Ni e, va hawng tawh ru " Kanu in ati a, choka aṭanga ka kalchhuak chu kanu leh nutei'n min zui ve zel

" U Ima " Ka koh na ahriat avangin min lo en vut a

" Eng nge nita " A ti sup 

" In laklawh loh chuan kan hawng mai dawn mi? " Ka ti sep a, min en kur a ka zam ve lek lek alawm

" A pawi hleinem, Kapi kanu in naktuk tlai lamah chaw eiturin a sawm che u a, hruai in ngaih chuan Ruatpuii nen hian kanlo hruai ang che u " A ti zung zung a, kanu te tan hnial ngaihna a awm miahlo

" Naktukah kan in entir dawn a, kan chanchin ala chianglo emai " Kanu in ati a

" Chanchin kan inhrilh ṭha dawn nia, Damdawiin kal duhna bik in nei em? " A ti leh ta daih a, ala ṭhu kur bawk si

" Nei lemlo e, a remchang apiangah ani mai " Kanu in atih chuan

" Ka ṭhianpa kalo be dawn nia? naktukah Ruatpuii nen kan va hruai dawn che u nia " Ti pahin alo dingchhuak a

" Inti buailo mai rawh, Ruati(Nutei) a awm a kan inbuai pui thei ang " Kapa in alo hnial vat, a hnial kha ka ring hrim hrim a

" Kapu inthlahrunna tur a awmlo, naktukah kanlo hruai dawn che u nia. Ruatpui kan kal dawn ami? " Min lo en a, kalo en reng avangin kan mit a in tawng leh chat, min nuih suk a lai zet in kalo nui ve seih

" Aw, kal ang " Ṭhutphah a ka bag chu kala sawk sawk a, kanu leh Nutei chuan pawn thleng min thlah 

" Naktuk chungchang kha, iti tak tak ami? " Kan tlanchhuah leh rualin kati nghal tawp a, a tih tak tak loh tur chu asawi ka ringlo ka zawt ve mai mai ani

" Bawihi, ka tih tak tak loh tur ka sawi ngailo, naktukah chuan kan kalpui dawn nia " A ti nghet charh a, ka lawm lutuk chu ka thup theilo

" Anih leh chaw ei vel kha, Nu saii nen in in be tawp silo a " Ka tih leh chuan

" Min lo hrilh alawm, hlauthawng suh " A ti leh tawh, ka hlauthawng tawp silo a.

...

Zingah chuan kanu te hruai turin kan kal a, Noah in min ngen tlat avangin kan hruai tel veleh, Nutei tein kan thlen chuan kanu te pawh anlo inpeih tawh a

" Kan tibuai viau ang che a " Kanu chuan ati leh ṭhin, a inthlahrung tih ka hailo

" Kapi, inthlahrung suh u kanu avang pawn heihi chu ka tih ve tur alawm " U Ima chuan ati thluam zel a, motor ah chuan a hma ah kapa chuan tirin ahnungah kanu leh Noah nen kan ṭhu a. Noah chuan kanu chu a ngaina nghal em em a, kanu lah naupang ngaina hrim hrim ani bawk a, an inbe reng mai, kapa leh U Ima pawh an titi ve sup sup a, an thusawi chu ka ngaihven lemlo. Kanu leh kapa ka hmu leh thei chu ka hahdam huai huai a, ka hlim veng veng in ka hria. Clinic kan thleng a, ahma a ka kut kan phelh tir naah bawk khan ani, kan buai ve ngai miahlo in U Ima chuan abuaipui zung zung a

" Ka lawm e aw " Kapa te nghakin ṭhutna ah chuan kan ṭhu dun a

" Lawmthu sawi suh, nangmah piah lamah kanu avang pawn ka buaipui hi ka tihtur ani " A ti sup a, anui var var bawk hmuh ava nuam tak

" I rilṭam em? Sawlai ah sawn Restaurant a awm asin " Ka en vung vung lai chuan ati leh a

" ka rilṭam pawh ka hrelo, Noah zawk hi " Ka ti sep a, Noah chu ka bulah ṭhu in ka phone a en a, a tlei ve khawp mai

" Duatte, i rilṭam em? " Dam diai in a fanu chu a bia a, Noah pawn a rilṭam thu a sawi ve mai a

" I nu te chu nghak law law ang, Duatte api te kha nghak lawk ang u aw " An pafa inbia chu ka ngaithla

" A rilṭam tawh viau maithei asin, kapa te chu nghah kher angai lovang " Ka tih ve laiin Noah chuan a pa thusawi zawk chu a pawmpui a kan nghak leh zel mai aniang chu. kapa hi ṭha leh vat se ka ti takzet, hna ka neih a ka chawm ve hun thleng min dampui se kati, enkawl a an duh leh mamawh pek ve zel theih ka chak. Inbe lemlo a kan ṭhut ngawt ngawt laiin kapa te pawh anlo chhuak ve chiah a

" Engtin nge, aṭha em? " Kalo zawt nghal zung zung a

" Tihtur dang a awm tawh loh chuan thil ei pahin kan sawi ho dawn nia, damdawi lei ngai a awm pawn leichhung a rei hleinem " Kanu ten min chhan hma in U Ima in alo ti veleh khauh a, kapa pawn a pawmpui aniang abu nghat nghat mai, Restaurant pan chuan kan inzui chhuak leh hnak hnak, Noah chu U Ima in zo zetin a pawm a, kan hmaah kapa te ankal a, an hnungah kan zui ve zel kapa chuan thil asawi chuar chuar a, kanu chu anui leh hak ṭhin, kanu leh kapa te hlim hmel hmuh leh pawh a hahdam thlak ngawih ngawih anih hi

" Hey " Kapa te ngawt ka en laiin ka darah U Ima in min lo kuah a, ka meng phawk nghal hra

" Min lo hmulo vang " A ti sup a, ka chhang zui tawhlo. Restaurant ah kan ṭhu ṭhap a

" Nu, kapa chu engtin nge anlo tih " Ka nghak thei thlawtlo ani, ka hre chak zek zek

" Rannung seh leh typhod ani awm e, damdawi a chawh ṭeuh a, admit in duh em ati a, i pa hian ahnial leh tlat a " Kanu in atih chuan kapa chu ka melh rum leh hrih a

" Damdawi i ei anga i zia mai ang kapu, bet lutuk nih loh chuan damdawiin a awmte hi a huphurh awm ve ṭhin alawm " U Ima in alo chhan leh tawh, kan eitur chah alo thleng a, kapa leh U Ima bakah kanu te chu an titi char char a, Noah nen chuan eitur kan ei mial mial

" Tunge rilṭam vaklo kha " Ka sam ka thil ei paha lo uai thla ka benga min zehsak pahin Lalhriatpuia'n ati leh hram a, ka thil ei lai ṭhulh meuh in ka melh rum

" I hneawm " ka tih chuan a nui vur vur a, kapa te chu awmlo se ka vin hlak ang mawle, nghal reuh lutuk mai.

Kan eizawh chuan kapa Damdawi tur chu kan lei leh a, U Ima in aman pek atum chuan kanu leh kapa in an hnial nasa mai, U Ima pawn ati lui ṭalh biklo mahse, ' Kapu ka kan ve na ' tiin pawisa chu a pe lui tho a, kapa te tan lak loh ngawt chi anilo. keipawn chutiang em em chu nuamlo ka ti deuh, mihring hi kan mak ve ngawt mai khawngaih nih te hi kan duhlo a, mi in min khawngaihte hian tlawm ah kan la ve tlat ṭhin. Keipawh midang ṭanpui nuam ka tih rualin midangin min ṭanpui emaw min khawngaih hi ka hlau ṭhin. Kanu te chu Nutei te in ah kan thlah leh a, keini pawh in lam panin kan hawng leh bawk, kan thlen chuan chaw anlo ei tawh a, thil kan eina ala reilo bawk nen chaw ei leh vel chu ka peihlo, Noah pawn a duhlo a kan pathum chuan kan eilo ta vek. Vawiin ka awl ni anih avangin Emily a awm hrihlo bawk nen inchhung vel ka tifai a, tlai lamah kanu ten chaw anlo eidawn avangin Nu saii chu a bazar a, kawtzawl leh inchhung vel ka tifai ve thung, keima tawkah ka hah ve khawp mai. Nu saii lo hawn hnuah ei kan rel leh char char a, kapa te bakah Dandani te chhungkua in anlo ei tel ve dawn a, ka mawng pawh kala hung hmanlo, U Ima lahin min lo call ve reng a, min va ngai ṭhin tak.

Zawmna(tlemte)

Kanu te anlo thlen chuan ka va chhuak ve zawk a, reilo te ṭhutpui in choka ah bawk ka lut leh nghal a, Noah leh Sam anlo thlen ve hnuah phei chuan kan ri hlut tawh mai

" I buai em? " Choka ah U Ima alo lut ve a

" Zep loh chuan ka buai, zep deuh pawn ka buai tho " Ka tih chuan anui hawk leh nghal

" Ka han inthlak anga kalo pui ang che " a ti ve ngei a, ka hnialbuai peihlo, Nu saii pawh alo lut veleh zawk zel a, keimah chauha ka che chu min khawngaih niin ka hria

" Nu sai, ka ti thei alawm inleng va kawm zawk rawh, hei ka zo dawn hnai " ka tih takah chuan ani pawh a chhuak ve leh mai a, Sam alo lut ve teh nawlh

" Ka rilṭam " A ti a, chair ah chuan ṭhu in dawhkan chu a bawh hnak

" I damlo ami? I va zuai ve " A pang te chu ka dehsak leh hrih a, tlem chuan a khuasik deuh anih hmel

" Eng nge i ei ang " Ka tih chuan a lu athing nak nak a

" A awlsam ber ani mai " Zawi te in ati a, he naupang hi chu ka va lainat ve reuh tak, Noah chu hmeichhia anih bakah midang a kawm nel zung zung a, Sam ang tak hian a fing var velo bawk, Sam erawh Noah nen piang rual reng mahse, a fing kar a thil a hrethiam bik bawk, chutia kan inṭhut chilh reng lai chuan U Ima alo lut leh a

" Tinge a " A fapa pang chu alo deh sak

" A damlo deuh anih hmel, ka riṭam ati a in eipuar se mu hahdam daih rawh se " Ka ti mawlh mawlh

" Eitur chu kalo siamsak ang, i buai kha buai chhunzawm rawh " a ti sup a keipawn ka hnial lo, ka chawhmeh siam lai chu ka tih chhunzawm a, U Ima pawh a che ve rak rak mai

" Ehhh, nuam inva tifal ve " Dandani lo lut chu ari leh phawr phawr mai

" Leh phawr phawr che chuan " U Ima chuan ati nghut a

" Tikhan minti suh ka ṭhiannu hi ka fuihpawrh mai ang " Dandani chuan ati nek a, U Ima pawh anui ta ringawt, Dandani chuan Sam chu a be ta daih a

" Dandan, inlo thlenna arei tawh em? " Ka tih chuan ' kan lo thleng deuh chiah ' a ti leh mai a

" Anih chuan thingpui ka va pe lawk ang, engzat nge innih" no ka la chhuak pah rak rak

" Kanu leh pa ani mai, kan pathum chiah in kanlo kal " Ka thingpui siamsa chu ka thli chhuak a

" Keiman kalo pe ang, Sam saw ngaihven zawk rawh " Tray min lo chuh a, Eirawngbawl ka peihfel deuh ta bawk a, Sam bulah chuan ka ṭhu ve a, U Ima in eitur a pek chu a ei ve mek, U Ima chuan a fapa chu a en leh vung vung ṭhin

" Ka rilṭam ania mahse, ka ei thei tawhlo " Sam chuan ati nang nang a, a ka atui lo ve aniang

" I ka atuilo anih dawn kha, room ah mu hahdam daih rawh, kalo kalpui ang che " Ka ti a Sam pawh abu ve nghat nghat

" Keiman ka han awmpui zawk ang, Dandani a awm kha nakinah inlo chho ve dawn nia " An pafa chuan an in pawm chho a, Puitling lamin an be ri pawh chu choka aṭangin ka ngaithla reng, Sam damlo ve ringawt chuan awm ati nuam lo, motor in asut dawn laia ka va chhan aṭang khan ka chungah pawh sual achhuah tawh ngailo a, ka bulah pawh a awm tam ve deuh.

Dandani nen choka a kan inkawm melh melh laiin Dandani nu alo lut ve nawlh a, ahma ang tho in ahmel leh taksa vel chu adang bei a, a khawngaihthlak takzet

" Dandan, no ruak va seng rawh " A ti sep a, a ṭawng te hi a zawi sep sep ania

" Ka va seng zawk ang " Kan titi tui lutuk a, no seng na chang pawh kanlo hre leh tawhlo anih hmel, ka kal tur chu Dandani'n min dang a, choka aṭangin min chhuahkhalh hmak

" Amak ṭhin ania " Nui sang chungin Dandani nu chuan ati a, biak mai dan tur ka hriat loh avangin ka ngawi ta reng a, Dandani nu pawh chu ngawi rengin a awm ve reng

" Unau dang i nei em? " Dandani nu in atih leh chuan ka en dawrh a, a thu min zawh teh thut chuan min ti hamhaih deuh ani

" Aw, u mipa pakhat ka nei a " Ka ti sep a, a mitmeng chu a dul zual sawt in ka hria, ka ngaihbel mai mai nge pawh ka hrelo

" Anih chu, i hmelṭha hle mai " A tih leh sep a, hamhaih deuhin ka nui ve tawp

" Inva sawi ril hmel ve, eng nge inlo sawidun a " Dandani chuan no ruak chu tray in alo chawi lut a

" Engmah kan sawilo, i ṭhiannu hi chetpui ve char char rawh aw " A tih hnuah choka aṭangin a chhuak a, a awmdan kha ka hrerhiam lo. Eirawngbawl kan peihfel tawh tho avangin Dandani nen chuan room ah kan chho a, Naupang room ah chuan kan lut tlang nghal, Sam chu alo la mu a abulah Noah pawh alo mu ve than, an bul chair ah U Ima aṭhu ve kurin phone a bih ngur ngur a, Dandani nen kan lut thawm ahriat chuan alo hawichhuak ve chiah

" I va veng ṭha ve " Dandani'n atih laiin keichuan U Ima kut a ka phone ngawt chu kalo en, Noah khan ka phone a en a, tunah U Ima kutah alo awm leh daih chu thilmak ani.

" kha kha ka phone ani lawm ni? " Pan hnaiin ka phone chu lak mai ka tum a, a kut ala dahsawn daih zui 

" Awi! I phone a check ve ngei alaw " Dandani lah ala nui mai mai zui a, chhuanlam siamin min chhuahsan zui bawk

" Kan lo luh laia i lo bih ngur ngur kha ka phone ani chiang mai " Kan pahnih chiaha kan awm hnuah ka ti ṭha leh 

" Kha i duh chuan en ve rawh " A phone zawk min pe a, lungawi lo deuhin a phone chu akut aṭangin ka phih sawk

" Ka phone ah khan engmah hmuh tur a awmlo " Ka ti hlar a, ka thusawi ngaipawimawh lo zetin ka phone chu a en leh a

" Hei hi engmah anilo maw? " A tih hluk chuan ka en a, Papuia min lo biakna vel kha a chhiar anih hmel

" Aw, engmah anilo chhanlet pawh ka chhanlet ngai loh kha " Ka ti ve hmak a, min hnial ngaihna ahrelo nge ahmui chip hmakin ka phone bawk chu a en leh tawh, keipawn a phone chu ka ensak ve a, ka check sak chu ka ti duhlo ka check lo miau a, aman en ve rawh atih vang chauh a en ve kani. Zomuani'n alo biakna atam ber a number hriat loh aṭang pawn msg a dawng nual mai, han thik em em tur ka neilo a, Zomuani'n a be nasa lutuk erawh awm anuam vaklo, U Ima thung chuan tawi te te in a chhanglet a chhanlet loh tawp chang pawh anei, chu chuan ngaih ati ṭha deuh.

" A chawh ve ngawt mai " A tih leh chuan ka en leh a, min lo en ve chiah anui ang vur vur leh nghal a

" Eng nge, i hlauhawm vur vur lutuk " Ka tih hlak chuan anui chhuak hawk

" Hepa hian i hlutna ahre chho dawn chiah anih hmel " Ka phone chu min pe a, keipawn ka lo pe let ve nghal

" Papuia maw " Bo hu chungin kalo ti a, a bu nghat nghat mai

" A ho emai " Ka tih chuan aṭhutna aṭanga ding hluaiin ka bulah alo insawn leh nulh a

" Ka rinhlel vang che a i phone kha en ka nilo ania " Ka darah min kuahin min awm hnaih hret a

" Aw, ka hria e " min awm hnaih lutuk chang hian ka thaw theilo ṭep zel

" Kan chhuak ve hrih dawn mi? Sam pawh a pang adai vek tawh " a tih chuan rang deuhin ka ding a

" Aw apawilo " Ka ti thuai bawk, ka chetdan avang chuan anui leh hawk hawk a, ka biang te hi a sen ṭan ṭanin ka hria, ka lai hma tih ahria a min tih laih phet hi atum ziah. Zanriah chu kan ei ta a, kan ri ve laih laih mai mahse, ka ngaihbel nge kapa leh kanu chu an hlim loh hmel riau in ka hria, an nui ve tho a mahse, an nui hmel te chu a lem tlat nidang ang anilo. Dawhkan ah kan kil len vek loh avangin Naupang pahnih chu in chawipui ka tum a, Dandani'n in la zei deuhin min lo dang leh

" Chaw bel chang rawh " A ti leh tlat a, ka melh rum vena te chu eng atan mah atilo, Puitling lam chuan sawi tur an hre khawp a, ngawi rengin chaw chu ka ei ve mial mial, Dandani nu chaw khawrh ka tum chuan atir ang maiin alo la nei tam a, chu aia la mak zawk chu kapa a en leh veng veng ṭhin chu ani, nichin aṭang khan kapa a en zeuh zeuh kha ka hmu a, a awmdan zawng zawng nen a mak ka ti. Zanriah eikham ah rei vaklo an ṭhu khawmuang a, eina vel kan tihfel zawh ah Dandani te chu an hawng nghal a, Ka inpeihfel ve thlap hnuah kanu te chu U Ima nen kan thlah ve leh thung a, motor chhungah te chuan kanu chu a ṭawng manglo, thil ngaihtuah ṭeuh hmel a pu reng a, Kapa pawh chuti tho, U Ima pawn ahrethiam ve nge ngawi rengin motor a khalh mawp mawp 

" Nu, kapa nen inhmel ava diklo ve, eng nge awmzia " Kanu inchhung lut tur chu ka chelh ding a, kapa chu a lut diam tawh, U Ima erawh alo chhuak velo, motor ah min lo nghak

" Diklo a awmlo, kan ṭha alawm " A tih pawh chuan ka rilru ahmin zo lo

" In hmel awmdan hi ka hrehrang ve vek ania aw, ka rilru inti nuamlo " Ka ti leh hram a

" Kan chau ve deuh a chuvang aniang " A tih leh pawh chuan ka rilru ala nuam theilo

" Ahma pawn khatiang khan in awm ngailo, vei deuh nei in ang " Ka tih chuan a taksa che awk khawp in thawk ala a

" Nakinah kan la sawiṭha dawn nia, Imanuel saw hawnpui rawh, a fapa kha adamlo ani lawm ni, a angaihtuah tawh viau ang " A ti zung zung a, chelh zui renglo chuan ka luhtir ta nge nge

" Kan in chu nuam anti vaklo ami? " U Ima chuan ati ta reng a, kanu te hmel khan a ngaih atih ṭhat loh ka ring reng a

" Chutiang pawh anilo, thildang ah rilru buaina an nei aniang " Ka ti niah niah, a chhan tak ka hre biklo tlat, a nihna takah chuan U Ima ai mah hian a chhan diktak ka hre chak daih zawk. A tukah chuan class ka kal a, vawiin hian 2round result an puang dawn a, 2round a tling te hi chuan final an lut dawn ani, kapa te pawh doctor in in checkup leh tur a atih avangin an la hawng dawnlo a, an awm chhung hian thil hriatchian duh ka nei, kanu hi kala zawt leh hrim hrim dawn.

" Vawiin hian compettion buatsaiha finalists te kan hre thei dawn a, in hlauthawng hlawm em? " Miss Angeli'n ati a, ka thinphu ran dan chu pui tak ani

" Competition a kan finalists te chu " A tih fan raih hnu a

" Sangkimi " Atih chuan Ka thaw chhuak hawk, a sawi zel a Dandani nen kan hming alan ve takah chuan kan in kuah chung chung

" Karthar aṭangin finale kan ṭan ang, a kalphung leh thildang chu a dawn hnaiah kan inhrilh hre ṭha leh dawn nia " Miss chu a chhuak a, finalists te hi mi pa5 kan ni. Sangkimi'n min perh deuh a ṭawng aneih pawh chu kan hrelo der hmak, eng nge ahriat ni min hmu mawh ve em em ringawt a, ka engah mah hian a thawk tawp silo. Dandani nen chuan Cafetaria ah kan chawl a, kanu te chanchin hrilh chak viau mahila Nutei tein ah lenkawi ka tum tho avangin ka call buai duh talo

" Class banah kan inah lo leng kawi la " Dandani'n atih chuan ka mitthla ah a nu kha alo lang nghal a

" Kanu te tlawh kawi ka tum a, tinge pawimawh a awm ami? " Ka ti nghal zung zung

" Chutiang a awmlo, kanu ngainat chi ini aniang asawi reng che a " A ti leh mai a

" Nidangah ani mai, lokal chu duh viau mahila kanu te tlawh kawi ka duh a, in ah hawn tlai lutuk chu ani bawk silo " Ka ti a, Dandani pawn min hriatthiam hmel khawp mai

" A pawi hleinem, hun ala tam alawm " A ti veleh mai bawk, an in a leng turin min sawm khat a, min sawm ve chhun a hnial zel pawh anuam ka tilo

" Washroom ah kava kal lawk aw " Ati a a tho zui nghal, Dandani kalsawn hnu chuan kanu chu ka call ta nghal a

" Nu, vawiin lamah kapa eng nge a an " Call a chhan rualin ka ti nghal zung zung

" Ka luhai hi ala awm deuh a, abakah chuan ka zia ati, a khawsik pawh a reh tawh " Ka hahdam suai suai theiin ka hria

" A van tihzia ve, class banah lo penkawi ka tum a mahse, Dandani'n an inah leng turin min sawm sia, kalo tlawh kawi hrih lo mai ang che u, apawi lovang tiraw? " Ka ti a, kanu min chhanletna nghakin ka ngawi kar

" Lo pengkawi zawk ta che, Dandani tein ah chuan hundang ah ila leng dawn nia " Kanu in alo tih chuan ka hamhaih ang reng

" Mahse, leng turin min sawm ngailo a min sawm ve chhuna han hnial hi anuam lo ka ti ve deuh mawle " Ka ti ve hram

" Lenglo phawt rawh, min lo hmu zawk dawn nia, ipa in min ko ka dah hrih ang aw " ti zung zungin a dah nghal daih a, kanu awmdan teh thut chuan min ti hamhaih hle ani, Dandani lo let leh hnuah class kan pan leh a, Nutei fapa U Beiseia'n min lo call ve nawlh leh nghal

" Amelia, class in bang tawh em? " Hello pawh ka tih hma in alo ti nghal thawr a

" Kan bang harlo ang, class chu kan ṭan leh dawn chiah zawk a " Ka tih chuan

" In zirna bulah hian ka awm a, in ban hun kalo nghak ang kan in ah lenkawi itum ani lawm ni? " Alo ti zung zung a, ding datin ka hawikual thuak thuak, Dandani lahin thil thleng min lo zawt ve sek a

" Engtin nge in inah ka lengkawi dawn tih i hriat " Ka tih leh chuan ' Ka antena aṭha alawm ' tih chauh in min chhang duh a, call ala dah hmak zui 

" Nutei fapa anih kha, tlaiah kalo hruai ang che ati a " Ka tih zat zat chuan Dandani anui hak hak a

" Engmah ka zawt tawp silo che a " ala ti zui, a hnungah ka chum pawp a, room ah chuan ka nem lut rawk rawk, U Ima in tlaiah kalo nghak ang che atih pawh chuan ka hnial a, Dandani chhuanlam ah ka hmang hmak, Sam adamlo a hawn hmat chu thil ṭha tak anih laiin kanu te tlawh kawi ve ka duh si a, U Ima in ahriat chuan min hruai leh ngei kha atum leh awm si. Chutiang chu ka duhlo Sam pawn a pa chu angai ve ngei ang, damloh phei chuan kan rilru te hi a no zual a, duat kan mamawh bik, nu an nei tawhlo a an pa hi an neihchhun ani ve tawh tlat.

Class ban chuan U beiseia'n min lo hruai ngei a, min fiam zuk zuk reng bawk si, abula awm hi anuam ṭhin, An in a tlang mailo chuan a ṭhiante inah a pengkawi leh a, ka hauh hlau in a inṭawng khalh zung zung bawk si, thinrim theih pawh anilo. An in kan thlen chuan Nutei'n min lo be leh hlut a, chaw ei ve nghal rawh atih chuan ka hnial rang lutuk

" Pa vawiin lam eng nge ilo an " U beiseia chu a room ah a lut bo nghal a, keipawh ka kalchhan ber kapa bulah ṭhu in a ka be mawlh mawlh 

" Ka ṭha lutuk tawh e, min ngaihtuah lutuk suh " A ti dam diai a, min ngaihtuah suh atih avang hian ka ngaihtuah loh phah lo, in thiar tur a bathroom ah aluh chuan kanu ka ṭhuthnaih sauh a, ka awmdan avang chuan kanu pawh anui hak hak 

" I thil hriatchak ka hria " A ti a anui pah vur vur bawk

" Nu, min hrilh ngei ka phut ania aw, bakah Dandani tein ah len i phal loh chhan pawh " Ka ti mawlh mawlh, kanu hmel pawh a serious leh tawh lutuk

" Thil zawng zawng hi i hriat vek a remlo a, i hriat vek aṭul lo bawk, chuvang chuan hriat ṭalh tum suh, i hrethiam tiraw? I tana ṭha tur vek anih hi " A ti daih a, ka zawhna achhan ka rin tehlul nen a chhanglo chiang khawp mai

" Ngaihṭha lo deuha awm chung hian pangai deuhin engtin nge ka awm theih ang " Ka ti ve hlar a, Nutei chu choka ah abuai bawk a kan nufa chuan min lo ngaihven lo

" Tum mai rawh " A ti ṭalh, beidawng zetin thawk kala vak a

" Kanu tak tak inilo tih ka hria " Ka sawi zawh rualin kanu mitmeng leh awmdan a inthlak vek a, mitmeng buai nak chungin min en ngawt ngawt

" Lalruatpui, khatiang thu duk daklo lutuk engtin nge i sawi theih " Engtik laiin nge kapa alo let pawh ka hrelo, kanu pawh alo insiamṭha leh vek tawh, ahmel ah engmah alang chhuak leh tawhlo a, kapa mitmeng chu a rum al thung

" Kapa ka hria alawm, nizana in hmel danglam dawrh te kha ka hre ve vek, Dandani nu in a en leh veng veng zel bawk che a, eng inzawmna nge in neih " Ka ti hlak hlak a

" Khatiang thu awmze neilo leh ṭangkai lo i sawi leh dawn anih chuan in check up tawhlo in kan hawng ang " Kapa'n atih hmuk chuan sawi leh tur hrelo deuhin ka ngawi reng, Kanu chu ka en a leh lam hawi a amittui ahru leh zeuh ṭhin ka hmuh chuan ka thusawi atthlak zia ka hria

" Nu, ka tihpalh kh..kha kha sawi ka tum anilo " Ka ti bah nawk a, kanu chuan min lo en a, a mit a sen ram mai

" A pawilo mahse, i nu kani tih hre reng ang che " a ti sep a, kanu hi kanu tak anilo tih chu mi ṭawngkam aṭangin ka hre daih tawh ka awih duhlo a mahse, kapi nen an sawi dun lai ka hre leh a, khatih laia ka rilru natzia kha, kanu hi kanu tak anih loh kha ka ring phallo ṭhin, min enhrang lo a ka u nen ang khat rengin min enkawl ṭhin, a chang chuan ka u ai mahin min duat ṭhin bawk. Kanu tak chanchin ka hrelo a kanu hi kanu ang takin ka en reng ṭhin, vawiin hian engvanga khang thu kha sawichhuak mai nge maw ka nih le

" Va hawng tawh rawh, i ngaihtuahna seng vak vak lo la, in intihsiakna ah chauh i rilru pe rawh " Kapa in atih leh nghut chuan ka ngaihtuahna ram aṭangin ka harh zawk, U beisei alo lang veleh hlawl a, ka ṭawng ve hma hma in kapa chuan min thlah turin alo hrilh nghal zung zung a

" In in hau alaw, Papuia kha ava den ve " In kan chhuahsan hnuah ati zawt zawt a, ava thawveng bik tak

" Hau mai mai lo " Ka tih chuan anui hawk a, rilru a khingbai si, Ka result pawh ka hrilh ta miahlo

" Ilo lut kawi duh em? " Gate pawnah kan ding a

" Aih, lut lo mai ang ka thinlung neitu in min lo nghak reng tawh " A ti ham ham a, a nui ang vur vur leh nghal, a ban puam a beng thlawp in

" Vawiin hian i hneawm ngar ngar " ka ti hlak a, mit min siai zeuhin chak deuhin min tlan liamsan a, keipawh gate chu hawngin ka lut hnak hnak

" Ilo hawng tawh maw? Ipa chu eng nge a an " Inchhung ka luh chuan Nu saii ka hmulo a Pa hruaia'n min lo be ve tehmial

" A zia tawh lutuk " Ka tih chuan ' A lawmawm e ' ati sup a, Choka ah thawm a awm leh rak rak avangin Pa hruaia chu choka ah ka pheisan a, Emily eirawng lo bawl mek ka hmuh chuan ka nui var var, a awmlo rei ang reng sia angaihawm fu ani

" I va ngaihawm ve " ka tih chuan a phu deuh zawk a, alo leh hawi rang lutuk

" Awi! Min van ti phu tak " Ti chul in min lo kuah chung chung a, kan pahnih pawh chuan kan hlim dun ve em em mai ani

" Naupang anlo la hawnglo ami, Nu saii pawh ka hmulo reng reng " Ka tih chuan a nui put put a

" Nu saii chu Pa hruaia nen an in hnial deuh a, a titau " A ti a, a nuih danah an in hau na lemlo aniang

" Chuan Sam hi vawiin lam eng nge a an " ka tih leh takah chuan a hawikual zeuh a, ṭawng atum lai takin choka pawn lamah thawm a awm a

" Sam eng nge kan ei ang " Zomuani aw ngei maiin ati ri ka hriat chuan ka khawng awt in ka hria, alo kal ka rin loh lutuk vang aniang

" Anute, keipawh thil tui tawk ka duh ve " Noah in phur zeta ati ri ka hre zawm a, za lo deuhin ka nui hak. Ni e, an nutei alawm tinge maw kalo ngaihmawh viau ni.

Cont..