Young Lady and Gentleman Chapter10

 Kan khua kal tur chuan kan inbuatsaih a, zing chhuah kan tih avangin zan lamah kan insiam a, chutia kan insiam vel chu Sam leh Noah an phur ve ngang mai, keichu inken tam vak ka tumlo a, Naupang pahnih room ah an thawmhnaw tlem ka siamsak laiin Sam pawh ka bulah a che ve sek, chutiang taka a helhhawlh chu mak kati, Noah ai mahin a phur zawk

" I va phur ve Sam " Ka ti ta nge nge a

" Ate, in khuaah chuan motor ri a awm ve reng lovang tiraw? " A tih chuan ka bu nghat nghat a

" Bengchheng deuh ah ka awm peihlo a " A ti ve niah niah a, min nel ve ta lutuk chu awmdan pawh ka thiamlo, keimah zawk hi ka lai ṭut mai

" Kan khuaah chuan maw chhunah loah an feh a, khua a reh ruih zel alawm mahse, tlai lam leh zingah chuan naupang tualchai an awm ṭhin a, an ri ve hlut ṭhin " Ka thiam ang tawk chuan ka hrilhfiah ve 

" Ka infiam ve chak " A tih leh chuan ka nuih var var a

" I infiam ve dawn alawm " Ka tih chuan a ha lang vekin anui ve sun sun, tuna ahmel hi paih lo a alo ṭhanlen chuan ala hmelṭha viau ang. Zingah chuan Noah in min kaitho a, a helhhawlh a amu ṭha theilo reng reng amah avangin zanah pawh ka harh zing, zan dang anglo deuhin a harh zing a alo harh apiangin ' au zing ani tawh em? ' ati ziah a, zanlai ah pawh kan in nuih leh hak zel. Kan kal tur chu Pa hruaia leh Emily ten min vai liam a, Pa hruaia'n Nu saii hnenah ' Zan khat bak chu a theih loh vang ' A ti deuh reng a, Nu saii'n avin leh hlak hlak ṭhin.

" A hma kha chuan kalo kal ve fo a mahse, Sam te an awm tak chinah chuan ka chhuak thei talo a, in khua ka kal lohna chin pawh ka hre tawhlo " Nu saii chuan ati siam siam a, a hmaah ṭhu rawh ka tih pawn aduh tlat loh avangin a hnungah naupang pahnih nen an ṭhu a, Sam te pawh tukverh ah dakchhuakin an ri ṭeng ṭung mai

" Sam, tukverh ah dakchhuak su motor atam si a hlauhawm " U Ima in ati sup a, keipawn kalo belhchhah ve vat, Sam te awmdan pawh hi ka hrethiam lutuk, Naupan lai kha chuan zin te hi nuam kanti bik a motor chuan te pawh nuam kan ti ṭhin viau alawm. Tunah pawh kala ni reng motor ka rui ngailo a, motor ruih loh chuan zin chhuah vel pawh hi anuam. Kawng zatve vel kan tlan tawh ang tih ah Noah pangai taka ala chuan laiin Sam erawh a rui ṭana a luak leh burh burh ṭhin, kawng sir rem laiah kan ding a kan tui ken te chuan ahmai ka phih sak a

" Ka pawm ang che " Ka tih pawn a hnial biklo, a hmaah chuan ka ṭhutpui a, a sang ve uai tawh sia inpawm chu a rem chiahlo khawp mai

" A hreawm em? " U Ima chuan min ngaihtuah zetin ati leh ṭhin a

" A hreawm loh, min ngaihtuah suh " Sam zawi deuh ngiai sam chu ka chulsak heuh heuh a

" Zingah an helhhawlh lutuk a an in eipuar ṭha duhlo a, thil tuiril ringawt an in a chuvang aniang, khua kan thlen veleh eitur kan leisak dawn nia, Hotel pawh kha an siam velo maw " Nu saii chuan ati bawrh bawrh a

" Siam e, Sam pawh in eipuar se a zia veleh mai ang " ka ti let ve sep, Sam chu ka be deuh reng, a nguai lutuk chuan aluak leh mai ang tih te pawh a hlauhawm

" Chaw ami kan ei ang " U Ima in ati a, Hotel kawtah kan ding reng tawh 

" Sam chaw i ei chak em? " Ka tih chuan ' Aih ' ati sep a, tuman chaw kan ei duh loh avangin Hotel ah chuan chawl talo in a bul chiah Thingpui dawrah chuan kan lut ta zawk a, U Ima chuan kan duh min zawt kualin amah chuan a order zung zung, motor a khalh char char a chhawk tur kan awm silo U Ima pawh a pawr pheng mai, a hmel landan pawr deuh chu ka nuih vur vur a, min lo la hmu fuh zui 

" Ka nuihzatthlak viau ami? " min lo hnaih hretin Ka bengbulah alo phun sur sur a

" Aih, i sam kha a pawr pheng a chu zawk chu " Ka tih chuan a chulmam nghal thuak, eitur alo thleng a Noah pawh motor ah khan a muhil deuh char char a, a sam a thur sang mai, keipawh hi ka chhe viau ang chutia ka ngaihtuah lai tak chuan U Ima in ka sam alo chul mam a

" A thur viau alaw " Ka tih chuan lu athing a

" Tlem te in " A ti mai, Sam chuan eitur pawh chu a ei hleitheilo a, ka khawngaih khawp mai Noah erawh a ṭawng leh barh barh tawh

" Engmah tham a ei bawk silo, dawrah chhang emaw eitur dang kava lei ang e " Nu saii chuan kan piaha dawr chu a pan phei a, Noah pawn api chu a zui ve daih, Sam pawh ka ban kuah in min si chialin a ding ve a, U Ima chu a fapa hmaah ṭhu hniamin

" Ka fapa i va zawi ve " A ti sup a, a fapa biang chu a piai sak zeuh 

" Ka khawngaih reuh e, Motor ruih hi puitling pawn hreawm anti ṭhin ania " Ka ti a, Rui ve ngailo mahila motor rui ṭhin te hian ahreawm zia bak an sawi ngailo

" Ate, ka luakchhuak " Sam in atih chuan ka hawikual ruai a, Dawr sira hnim buk laih lam chu ka pan pui hlawk hlawk

" Hetah hian luak rawh, ni asa anga arimchhe hman lovang " ka ti a, Ka sawi zo deuh chiah aluak leh nghal bawrh, U Ima pawh tui bottle keng run chungin kan bulah alo ding ve reng a, thawpui ala leh hulh ṭhin

" Aluak leh ani maw? Avan zialo e aw " Nu saii te anlo kal ve a, Sam pawh a duhtawk aluak hnu chuan a zawi zual sauh, a thil ei ve te chu aluak chhuak leh vek. Tui chuan a kam ṭhuah tirin ahmai ka phih sak leh a, ka romal chu ka ti huh bawk. Pawm mai ka tum lai chuan U Ima zawkin min chet khalh a, Zo zetin Sam chu a pawm a motor lam apan pui pawk pawk, motor a ka ṭhut luh hnuah ka malchungah alo nghat a, ti chuan kan khaw lam pan chuan kan in khalh chhuak leh ta. Kan khua kan thlen chuan ala tlai lutuk lo a mahse, dar3 chu ari val val tawh ang, Ka chhungten kawt ah min lo nghak a

" Kha chu a rui ani maw, ava zialo ve " Kanu'n Sam ahmuh chuan ati a, Sam zawi ngiai chu Ka u in alo pawm nawlh a, bungrua chu la lut tur an tam tho avangin inchhungah ka u chu ka zui lut ve nghal

" I fa hual chu i duat hle mai " Ṭhutphah ah amut a, ka lut min hmuh rualin min fiam leh nghal

" I over emai aw, bungrua va lakpui rawh " ka tih chuan nui hawk hawk chungin a chhuak leh nghal a

" Sam, kan khua kan thleng tawh ania aw, inbual la i duh em? I harh kawk mai ang " Sam chu alo meng riai riai a

" Ate, ka zawi vek " A ti sep a, pawnlam thawm pawh alo awm ṭan a, Sam bulah chuan ka ṭhu a anlo lut chu ka ngaichang reng

" A inti harh peih na nge Bawihi " U Ima chu ka melh kawk, ani pawn a ṭawngsual chu a hrethiam ve nge min melh ve kur a

" Kalo bualfai dawn mi? " A ti leh ta daih a, anui pah suk suk leh nghal, kan bula awm ho in min ngaihsak vaklo a kan vannei

" Ka bual thei alawm, ka room ah lo pawm lut la thawmhnaw kalo la lut ve ang " Ka tih chuan abu nghat a, Sam chu alo pawm nghal nawlh, mitmei a ka room awmna min zawh chuan ka hrilh vat a

" Nu, Sam saw ka va bualfai lawk ang aw " Ka ti khawmawi a, kanu chuan ' Ni e, va tifai rawh ' ati ve mai a, kapa chu ka en buai duhlo

" Bathroom a awm ami? " Ka room chu a enkual a

" Umm, tetakte kapa in min siamsak alawm, ka dawih thei sia zanah zung turin ka chhuak ngam ngailo a " Ka tih chuan min nuih leh tawh

" Keiman kalo bual ang, a thawmhnaw lo dahchhuak rawh" Sam thawmhnaw chu a hlihsak mual mual a

" Umm, Noah ka va ngaihven ve ang room ah kan luhsan daih sia " Ka tih chuan a lo aw ve mai a, Sam thawmhnaw ka phawrhsak hnuah room chu ka chhuahsan leh a, inleng anlo la awm nak nak mai, Nu saii hria anlo la awm nual a Nu saii pawh anui ring ṭhin ngei mai

" Noah, lokal rawh ka bulah " Ani leh nilo angin Nu saii sirah alo ṭhu ngawi kar a, ka koh ri ahriat rualin rang deuhin ka bulah alo kal a, room ah chuan ka luhpui ve ta daih.

" Au khawnge Sam " Room ah chuan a hawi kual ruai a

" A inbual a, nangpawh inbual ve rawh aw chuan kawtlaiah kan leng mai mai dawn nia " Ka tih chuan aphur leh tawh khawpa a bu lap lap mai. Sam leh Noah te an inbual fai hnuah ka intifai ve a, ka zawh veleh U Ima pawh a inti fai ve nghal, kan inpeihfel meuh chuan zanriah ei ahun der tawh

" Duata, Vaipaden kha lo sawh teh aw " Kanu in atih lang lang chuan choka ah ka phei ve a, Kanu leh ka u anlo buai viau

" Kalo pui ang che u, eng nge tih a ngai " Ka tih chuan

" Chaw ei siam rawh, i u kha chuan a sawh reilo ang naupang an rilṭam tawh ang " Ati sawk sawk a, keipawh ka che ve nghal vat. Zanriah pawh hlim tlang takin kan kil ho a, naktuk lamah kan huanram ah chuan kal kan tum ani

" U Li-a, fapa inei tawh ami? " Naupang ho tak hi chu aw! Zanriah kan eikham a, tihtur ang ang ka tihfel hnuah Varanda ah ka ṭhu chhuak a, Ṭhenawm naupang ho anlo lang ve nawlh, an thil min zawh te lah chu abuaithlak 

" Nei tawh e, pahnih ka nei tawh " Ka tih chuan an awih khawp mai, ka bulah anlo ṭhu ve a

" Kanlo infiampui ve " An ti sar sar a, ka nuih an ti za ṭhin 

" In in fiampui dawn nia mahse, tunah chuan athim vek tawha infiam na chi pawh ani tawhlo, zingah inlo kawm ve dawn nia aw " Ka tih chuan an bu nghat nghat hlawm a

" Lehkhazir angai kan hawng dawn, naktukah chuan kanlo kal ang aw " An tih hnuah an in lam panin an tlan hawng leh dial a, an awm loh chuan areh duk mai 

" Ka zawng che alawm " U Ima alo chhuak ve a, inchhung lamah inleng kan nei ve reng a, U Ima be tawk an awm ve neuh neuh bawk nen chuvang ania hrilh lemlo a pawnah ka ṭhutchhuah daih ni

" Lo inkoh hran daih kha thilnuam ani silo a " Ka tih chuan anui a, ka bulah min si chetin alo ṭhu leh kher a, alo ṭhu deuh chiah U Sanga te anlo lang ve a Papuia pawh atel, U Ima chuan a ṭhutdan asiamrem chuanglo

" Ilo hawng tih kan hria a, kanlo kal anih hi " An ti a, ṭhutna awl ah chuan an ṭhu ve nghal

" In van fel em em, thingpui cial deuh ka lum ang che u " Ka tih chuan U Fela'n ' Aw i thingpui cial kha alawm kan in chak tawh ' ati hlut a, ani hi chuan min fiam peih hrim hrim

" I kal leh dawn nge helam ah i awm ve hrih ang " Papuia'n ati sup a, U Ima chu min si reng a ṭhu chungin phone a khawih mual mual 

" Ka hre biklo, ka kal leh chu ka ring " Ka ti a, za lo deuhin ka nui pah bawk

" Kal tawhlo mai rawh, tu emaw hi a pul thei mai ang " U sanga'n atih fiamthu chuan nuih aza lo duh ngei mai, U Ima a ṭhu ve kur bawk sia, ka bialpa hlui tih ahre ve reng bawk si. Kan khua hi chu hetianga infiam leh nulh nulh hi kan hrat a, huat a lak chi lah ani der silo 

" A pawt tu ana ve alawm " Ka ti ve kher a, ka chhanletna chu an lawm ngang mai

" Thingpui kan lum ang e " Ka ti a, rang deuhin inchhungah ka lut nghal

" Bawihte, thingpui no lo seng rawh " Kanu in alo ti nghal a, Gas ah Ketli chhuangkai in no seng tur chuan Sitting room ah ka phei nghal

" Nu khawnge Noah te " Noah ka hmuh mai loh avang chuan kanu chu zawi te in ka zawt a

" I pi room ah an awm " a ti a, no ka silfai vek hnuah kapi room ah chuan ka lut ve a, Noah te unau chuan kapi thilsawi anlo ngaithla kar a, tibuai talo chuan ka chhuak leh, thinpui ka siam a U Ima in tur chu a sen in ka siamsak, coffee kan nei ve silo a

" I va han fel ṭhin tak em aw " Thingpui chawi chunga ka chhuak chu min lo fiam leh nghal a

" U fela chu i ninawm " Ka tih hlak chuan ala nui mai mai zui 

" Coffee kan nei silo a, a sen hian in mai rawh aw " U Ima pawh abu ve nghat, thingpui an in zawh hnu rei vak lo ah U sanga te ṭhian thum chu an hawng a, inleng ho pawh an ṭin ṭan tawh keini pawh inchhungah kan lut a

" Amelia khum ah naupang leh Saii mu mai se, chhuatah Amelia mu se, Rsa'n aṭhianpa a riahpui a Rsa khumah Imanuel chu mu ve thung rawh se " Kanu in rem aruat zung zung a, naupang pahnih pawh an muhil tawh ang chu tih naklaiin anlo la meng fiah khawp mai, ka mutna tur ka phah laiin an unau chuan anlo lut a

" Tah khan kamu ve duh " An ti ve ve a, khumah mu rawh u ka tih pawn an duh bau lo

" Phah zau la, an duh leh mu rawh se " Nu saii'n atih chuan ka phah ṭha leh a, kan pathum chuan chhuatah kan mu ve dal, a tlai deuh ta bawka vawiin lamah motor kan chuang nileng deuh tho bawk nen kan muhil hma tlang khawp mai. Zingah ka harh chuan Nu saii leh Naupang te chu anla mutui khawp a, thawm dim deuh in ka tho ṭhem ṭhem

" Pa i tho tawh alaw " Kapa chu choka ah alo awm reng tawh a, a thawhna arei tawh hmel

" Ka harh laklawh a, ka mu lui duh tawhlo anih hi " A ti mai a, thingpui pawh alo siam diam tawh

" Tumah anla thawh loh hi, thingpui kha inthlit la pawnah kan ṭhu chhuak dawn mi " A ti a amah zawk chu a chhuak nghal, zui chhuak mailo chuan ka hmai ka phih leh te te a chumi hnuah ka chhuak ve ta chiah

" Ka rilru ka thlak mai mai ngailo tih i hria tiraw? " A bula ka ṭhut ve rualin ati a, a sawi tum ka hrethiam ruak

" Pa keipawn ka chhun che tih ihriat kha " Kati let sep a

" Imanuela nen chuan ka remti dawnlo, min pallui anih chuan ka khuahkhirh ang che " A ti ta nghut a, atira ka ngaih awlsam ang ngawt chu ani dawnin ka hre talo

" Pa, ka duh takzet alawm " Ka tih chuan kapa chu arum nghut a

" A theih loh, ṭhen ang che " Ti hmukin atho nulh a, inchhung ah min luhsan hmak, midang anlo tho ve sap sap a, kapa pawh pangai deuhin a awm chhunzawm a, naupang pahnih pawh ṭha deuhin a chhawnchhaih mai mahse, keichu ka pangai mai theilo a, kapa in U Ima ngaihzawn a phallo em em mai chu ka hrethiamlo ani. Tukṭhuan eikham ah huanram kal tur chuan kan insiam a, ka che reng reng hi nidang ka anglo ka zawi ngawih ngawih, U Ima te chu ka en leh veng veng zel a kalsan tur anga ka in ngaihtuah chuan ka thaw hi a pik hluah hluah thei.

" Api, a van nuam em em " Huanram kan thleng a, kanu sawi ang tak takin thlai an nei ṭha ngei mai, Vaimim pawh a awm nuala a ṭha hlawm em em mai leh nghal. thlamah kan lut a, kanu leh Nu saii chu thlai la turin an chhuak leh nghal a, U Ima nen chauh kan awm tawh

" I tho nuam vaklo ami? " Ka pang alo dek a

" Ka tho nuam alawm " Ka tih chuan chik zetin min en a

" I pa khan thilsawi anei ami? " A tih chuan ka meng nghal kawk 

" Eng...engmah a sawilo, tinge? " Ka ti vak a, U Ima chuan ka awmdan vel chu mak atih hmel lutuk

" Kalo thawh khan pawnah inlo ṭhu dun reng a, in sawi muk hmel sia kati mai mai " Ka biangah a dawm a, ka thinphu dup dup pawh a pangai leh ṭan 

" Tui kan chhuang ang e, tah khan lo ṭhu rawh tui ka chhuan zawh ah kan tei chhuak ve dawn nia " Ka tih chuan ṭha deuhin ka sawi ang chuan a awm ve mai a, keipawn mei chhem tumin ka buaipui ve nghal sat sat

" Puih i ngai em " Alo ti ve ngei a, a thiam pawh ka ring chuanglo

" Aih, ka ti thei alawm, thingtlang nula ka nih hi " Nui vur vur chunga ka tih chuan 

" Predator tan ahar hleinem tiraw? " Ati veleh kher anih chu! Mei chhem tum a ṭhu tung at chungin ka leh hawi a ka melh rum vak

" Ti khan melh rum vakla alo alh mai thei asin " A ti leh hram a, tih ngaihna hrelo zetin ka nui ve ta nge nge, mei ka tih nun hnuah tui ka chhuang kai a

" Tei chhuak ve ila, kanu te ringawt kan rin chuan an rei lutuk ang " a ṭhutna aṭangin alo tho ve ṭuah ṭuah a, nichin aṭang khan thla ala ve deuh reng a, thlam aṭanga kan chhuah hnu pawn thla ala kual nasa mai

" Kan company hi enkawl lo ila chuan Photographer ka ni ngei ngei ang " A ti ve sup a, tun ṭum hi ama chanchin min hrilh vawikhatna ani, ka bialpa ni mahse, a mimal chanchin zawh chiam ka tum hranlo, a ṭul atih chin leh hretur a min tih chin chu min hrilh mai turah ka ngai.

" I model ah kalo ṭang ang, i duh chuan ka thla ila reng dawn nia " Ka tih chuan ka darah min kuah a, Naupang leh kapi te awmna Vaimin hmun lam chu kan thlir dun 

" Kapa din company hi ṭha taka enkawl ka duh, a chang chuan tuina aia a ṭulna avanga hna kan thawh hi angai ṭhin a, kan tuina tih tluk chu awmlo mahse, aṭulna avanga nu leh pa thuawih hi alo hlu leh zawk nge nge ṭhin " A ti duah a, a thusawi chuan ka ngaihtuahna ati thui viau, kapa in kan inkar hi apawm miahlo a, heng te hi hreve tase min kalsan mai ang em le. Sam leh Noah chu kali in vaimin lakdan te ahrilh pah a, kapi laksa chu Sam leh Noah chuan an keng ve zel, U Ima nen chuan kan in en a kan in nuih dun var var, a darah ka lu la nghat a ani pawn ka dar a vawnna chu ati nghet salh.

U Ima te pawh an hawng tawh a, kei erawh kala cham dawn, Nu saii te hawn tuk ah kapa chu Aizawl akal thut a, a chhan ka zawh lahin ' thil pawimawh ' tih chauh asawi, kanu ka zawt a ani pawn min hrilh ṭha duhlo, U Ima nen pawh kan in be ve reng a, Company ah a buai ve ṭhin avangin min lo biak loh chuan ka be hmasa ngailo, nitin kapi nen inah kan awm deuh chawt a, min ngai sia ka awmpui rei dawn silo a, engmah ka tihsan ngailo kapi nen inah hman deuhin kan awm ṭhin

" Pi, nangin kapa Aizawl kal thut chhan hi i hria em? " Ka tih chuan min en zawk a

" Ka hre bik hauhlo mai " A ti ban charh, tinge maw ka chhungte hi ka rinhlelh vek chhan pawh ka hrelo

" Anih leh thil ka zawt che ang a, dik tak in min chhang rawh aw " ka tih leh chuan min en vung vung in abu nghat a

" Kanu hi min hringtu diktak anilo tiraw? " ka tih chuan mak ti hmel pawh a pu miahlo

" I upa ve tawh alawm, i hriat pawh aṭul ve tawh " A tih chuan ka thaw huai mai, thudik chu engpawh nise na taka min siam thei thil pawh nise hriat ngei ka duh, ngawi rengin kapi thilsawi tur chu ka ngaithla kar a

" I pa leh nangmah hringtu i nu kha an inneih hnuah kan khua ah anlo pem ve rawih a, nupa hlim leh in ngaina tak anni an inhau pawh kan hre mang ngailo, hausa lua lo mahse, an pahnih nun kha a awh awm ṭhin asin. Chutiang chuan an khawsa chho ve naw naw a, ahnu rei vaklo ah Sangtei chuan nau apai ta a, ipa kha ahlim teh asin, a duat theih ang tawk in i nu kha aduat ṭhin. Chung chu an ṭhenawm te khan kan hrechiang, ilo piang a i pa lawm lutuk khan min lo hrilh kual a, keini pawh kan lo kal ve nghe nghe. mahse, thlakhat i tling chiah tih khan i nu zia kha adang chho a, an pahnih in hau kha kan hre ta zeuh zeuh, ipa kha a dawhthei a atlawm zawk ah aṭang hram ṭhin, tukkhat chu tuna inu ka fanu nen hian kan varanda ah sawn kan ṭhu a, ipa te in pawh hi chiang deuhin alang thei. Kan nufa a kan titi mawlh mawlh lai chuan inu hi bag lian vaklo khai chungin alo chhuak hlawl a, ipa in nangmah pawm chung che in alo zui chhuak bawk, mak ti deuhin kan en reng a an thusawi zawng zawng erawh kan hre theilo. A tawi zawngin sawi ang Inu chuan ipa leh nangchu a kalsan ta che u a tute mai pawh khan ipa kha kan lainat asin, hnathawk chungin a enkawl che a chhunghnai anei bawk silo. kan khua anlo awm tirha pa anga aneih Pu Zahlira te sawn a hnathawh hlan in nangchu anlo awm ṭhin che a, keini pawn kan lak chhawk fo ṭhin. rilru mang leh hreawm reng reng a hringnun a hmachhawn chu atuar thei ta nganglo nge intihhlum atum ta a, Pu zahlira te inchung aṭang sawn nangmah pawm chung chein zuanthlak atum anih chu! Tuman kan dem ngamlo dem turin i pa khan engthil mah atisual tlat lo a. I tan pawh a bei ve a arilru natna kha anasa bawk si, thih atlang ta kha kan dem lo, chutah chuan ka fanu hian nang leh i pa nunna chu a chhan ta ani " Ka mittui luang thla ngiai ngiai chu hruk pawh ka tumlo, kanu hi kanu tak anilo tih chu ka hre teh meuh mai mahse, hetiang thil athleng tih ka hrelo, kanu min hringtu ka huatna avangin ka kawchhung hi a sa chhuak vek ni maiin ka hria.

" Pi, engtin nge kanu chuan min chhan " Ka hrawk athip hlar a, ka ṭawng ri pawh a zawi viau ang 

" Khatia ipa zuanthlak tum kha a zui ve a, I u Rsa hi i nu fa bik ani tih pawh i hriat ka ring i nu hian sawn a pawm tihna anih chu, khatih lai khan Rsa hi kum5 lai ani ve tawh a school kan kal tir ṭan ve mek ani, i pa hnenah chuan heti hian asawi a ' I fanu chungah khatiang kha ti lul suh, i beidawng tih ka hria i hreawm tih pawh, khawngaihin ka enkawl phal hram rawh, ka enkawl ang naute kha min pe rawh ' ṭap zawih zawih chungin ati a, i pa rilru buai lutuk pawh kha a fim ve ta aniang, naute chu a pe ta a tichuan i nu hian a enkawl chho ta che a, i pa khan kan ina awmpui tawp kha aremti bik silo, kan in leh in in akar tawn zak zak ṭhin, khatia in hnaih a in hmu reng ta na na na chu i pa pawn hnemtu amamawh lai tak ani bawk nen an in ngaina chho a, tun hun hi kan thleng anih hi " A ti leh dap dap a, kanu leh pa te chuan thawnthu ngaihnawm tak anlo nei ve reng anih hi, kanu chu ka zah zual a, min hringtu nu pawn min hmangaih theih loh laia min hmangaih em em mai te chuan hmeichhe ropui tak ava nih tir chiang tak em! Ka ṭap nasa bawka ka mit men pawh anuam lo urh mai. 

Tlai lutuk loah kapa Aizawl kal pawh alo thleng a, a damloh avang khan a taksa ala ṭha lutuk lo a, alo thleng pawh a chauh hmel khawp mai, kapa thil lo hawn vel ka dahfel hnuah room inbual turin ka lut a, inbual ta mailo chuan phone ka khawih leh te te U Ima missed call a awm avangin ka call back a

" Room ah phone ka dah daih a " A lak rualin kati nghal tawng a

" I buai anih kalo ring a, eng nge itih " Alo ti a, a aw rik dan chu ka sawifiah thiam chiahlo a sehchilh deuh tlat

" Kapa alo thleng deuh chiah a, tunah chuan room ah ka awm " Ka tih chuan areh vung vung a, a dah ta emaw ka ti hial

" U Ima " ngaihṭha zanlo chuan kati leh sep a

" Ka ngai tawh che, lo let thuai thuai rawh " A ti bul bul a, a ṭawngdan chu ahma kan inbiak ang anilo a sehchilh tlat ani

" I rui ani maw? " Ka ti hlak a

" Tlemte ka in " Sawi leh tur pawh ka hre tawhlo, karkhat pawh kala awm bo lo a, chutianga zu a in mai te chu mak kati

" Anih chu " Ka tih nghat laiin ' Tunge i biak a ' Hmeichhe aw tliang ralin ati ri ka hre leh zel a, Zomuani aw anilo tih chiang takin ka hre bawk, ka nghing dawt a ka dang aro huam bawk sawi belh tur pawh ka hrelo

" Bawihi, ka dah hrih ang " A sawi zawh hmain call chu ka dah a, ka hmalam chu ka en ngawt ngawt, insawifiah atum miahlo te chuan min ti thin ur zual, mood off zetin ka inbual a ka inpeih fel hnuah ka chhuak a, kapi in chaw ei a rawt avangin choka ah ka tlang 

" I hmel teh bar chu " U rsa'n min lo fiam leh zuk a, ka u hmuh ah chuan ka nui lui hram ani. U rsa fel ve deuhna chu chaw eisiam velah hian min pui ziah zel, a ṭul chuan thleng pawh a sil ve lawp lawp a, a ṭhiante pawn an fiam ve ziah a ' inla pa deuhin thleng asil hnu hnu zel ' an tih pawn a haw ngai lemloa a nuih liampui mai zel. 

" Aizawl ah i kal angai tawh lovang " Ka antui hawp tum pawh ka ṭhulh daih, kapa chu ka en kawk a

" Timaw? Thlakhat chiah class kal angai tawh a, competition ah lah pakhatna kani a, zirchhuak pawh ni ila company ah ka thawk nghal thei dawn asin " Ka ti zung zung a, kapa thusawi chuan min ṭhawng khawp mai

" Ka thu chu zawm mai rawh, zirchhuak pawh nila company ah chuan i thawh ka remti chuanglo " Kapa chuan ati leh nghut a, min ngaihsak lo zetin chaw a ei chhunzawm mawlh mawlh

" Kapa iti mak ve khawp mai, phallo mahla Aizawl ah chuan ka kal tho ang, ka chak ber chu Designer nih ani a, chu chu ka ti hlawntling ve dawn chiah asin " Ka ti ve leh ngat a, kapi in min khap nghal vat mahse, ka hrelo der hmak 

" Designer nih ila duh vang ngawr ngawr nge Imanuela bulah zalen taka awm i chak zawk " A tih hmuk chuan tihtheih neilo thinrim zetin kapa chu ka en a

" A pahnih in ka duh ve ve, kapa i mak emai Papuia nen kan in ngaihzawn lai pawn i phallo a, ' Hna aneilo hnathawh mumal pawh neilo, engtin nge a chawm ang che ' iti fo a, tunah mipa puitling leh hnathawh mumal tak nei min chawm zo em em tu ka tawng a i pawm leh thei chuanglo a, ahma ang kha chu kani tawh biklo ania aw kapa "Ka tho a ka kut silin choka aṭang chuan thinrim deuhin ka chhuak a, room ah lutin ka in kalh hnan nghal hmak. U ima lahin zu a in a kapa lahin ala duhlo em em bawk si. Chutianga rei ang reng taka ka ṭhut ngawt ngawt lai chuan ka room kawngka alo ri dat dat a, thawm ka nei duhlo hrim hrim 

" Bawihte, keimah ipi " Kapi aw ka hriat chuan tho vatin kawngka chu ka va hawng a

" I pa hi hnial buan buan ṭhin suh " A ti a, ka kut ah vuanin khumah min ṭhutpui 

" Pi, kapa hi ka hrethiam thei thlawt lo " Ka ti a, ka pi chuan min kuah in ka hnungah a chul hliau hliau 

" I pa hian i tan aṭhaber a duh tih hreta che " A ti dam diai 

" Ka tan U Ima hi eng nge aṭhat loh na " Ka ti ve ṭang ṭang ka sawi zawh rualin U Ima in zu a in tih ka hrechhuak leh nghal a, eng emaw hleka zu in nghal maithei ang chu ka tan eng nge aṭhatna? Keipawh hi ka rilru abuai lutuk 

" Papuia chu i pa sawi ang in hna aneilo a, Hna neilo chu kan buaina ani lo mahse, athatchhiat zia te chu tlang hriat anih hi i hmu a i hre vek alawm, apa tar tawh tak nitin ramah akal laiin Papuia'n apui ve ngai ami? Mi taima tan chuan hna neilo hi buaina anilo, mi thatchhe tan chuan hmahun a eng lo " A chawl dat a 

" Imanuela chu a ṭha afel alawm mahse, Pathlawi ani a fa pahnih lai anei tawh, i ngaih ang ngawtin thil hi a awlsam lo ania aw " Kapi min kuahna aṭanga inla hrang in ka ṭhu ngawi kar a

" Keichuan i hlimna apiang hi ka pawmpui che, i na anih pawn i tuar mai turah ka ngai mahse, chu chu i pa ngaihdan ani velo " Ati a, engmah kan sawi tawhlo, kapi chhuah hnuah ka hmai te ka phih a rilru tawt ṭun in ka mu, U Ima ala reh vang vang a Dandani nen kan in bia mahse, ka rilru ah alut thlawt lo, txt chuan biak hreawm min ti deuh nge alo call ta nge nge a

" Hey, tinge nilo lo a min lo reply a, i thu type chhiar ahar si " call ka lak rualin alo ti hlak hlak a

" Sorry, ka rilru hmun dangah a awm daih alawm " Ka ti ve mai a

" Eng in nge i rilru tibuai " Alo tih leh chuan ka hrilh ve ta vek a, ka sawi zawh chuan sawi mai tur ahre biklo nge angawi vang vang

" Vawiin hi U Zosangi thihcham ania, chuvang aniang U Ima chu a ruih hmeichhe lo ṭawng vel kha chu ka hre biklo" A nupui thihcham anih avangin a rui a, kei min ngaihtuah velo reng reng, mitthi tawh thik ka duhlo a ka thik pawn ka hrelo, harhfim pawha ala hmachhawn theih loh na chuan a thinlung ala luahkhat hle tih a hrilhfiah in ka hria, Dandani chuan thildang min sawipui daih a, tlem chuan min ti zangkhai leh deuh. Zanah chuan ka mu theilo a, phone pawh ka khawih chuanglo inchung melh in ka meng kiau a, ka tuihal takah chuan room aṭangin thawm dim deuhin ka chhuak a choaka ah lutin fridge tui chu ka in nghal khalh khalh, ka in zawh a tui bottle keng chunga choka ka chhuahsan tur chu U Rsa lo lut tur nen kan in su ṭhelh 

" I ṭhianpa i la riahpui emaw ka tia " Ka ti sep a, kal ta mailo chuan ka ding leh hrih

" Riahpui a ngai tawhlo, i muthei lo emni? " A tih zawm zat a

" Umm " Ka bu pah nghat

" Keipawh ka mu theilo, kan titi mai mai dawn emni? " A tih chuan ka hnial biklo a, ka room ah kan inzui lut

" Kapa hi hnial pung pung ṭhin suh aw, kan tana athawhrim zia hria la zah aphu in hmangaih a phu ngawih ngawih " Ka u thusawi chu adik kati mahse, hnial loh hi alo har ve ṭhin aniang, ka u hi chu engkimah a puitling a min fiam nuam tiin naupangchhia deuha awm chang nei mahse, thil a hrethiam ṭhin. Ka u tan chuan kapa hi a pahrawn ang ani a kei ai maha ahrethiam leh a zahthiam hi amak kati

" Pathlawi anih vang maia U Ima a duhlo hi ka hrethiamlo alawm " Ka tih chuan 

" Tun ang hi in inkar ani reng dawnlo, chu chu kapa te hian an hre phak a, i nat an hlau alawm " A ti dam leh dap, ka ngawih tak rengah chuan a aw athiam leh kharh a

" Designer i nih loh chu ka duhlo a, kapa hnenah pawh ka dilsak che, i zir chhunzawm thei ang kapa hnenah chuan inluah tur zawna keipawh hnathawka awmve tur angin ka sawi a, ka zawn chhung chuan Nu Saii te in ah ila awm thei ang " Ka u chu ka en ngawt ngawt

" ka lawm e aw, U " Ka ti ṭiau a, ka mittui aluang ngiai ngiai mai

" Kapa thu awih tur chuan ka duh che ania, Tunah tut tut chuan ahar ang mahse, i tum ve tur ani. Papuia chungchangah pawh kapa dodal leh kalh zawngin i awm lui tlat a, a tawpa thil thleng chu kei ai pawn i hrechiang, chhungkua aiin ngaihzawngte hi dah hmasak ngai loh tur, kan mangan vawrtawpa min tuamhlawm tu chu kan chhungkua tho anni " A ti leh dap dap, ka u thusawi chu ka ngaihtuah zui ve vang vang.

Kapa pawn Aizawl kal chu aremti a, U Ima tein ah awm remti tawhlo viau mahse, ka u in inluah tur a zawn hmuh vat tur thu leh rei ka awm angaih loh tur thu ahrilh chuan lungsi zanlo chungin a remti ve ta tho a, U Ima pawn a ruih tukah khan min lo bia, insawifiahna nei maplo in pangai deuhin min lo bia a. A lakah ka lungawi loh em avangin ṭha deuh pawn ka be theilo, Noah te pawn Nu saii phone aṭangin min lo be deuh reng a, min ngaih tawh thu an sawi ve deuh reng, Anpa chungah lungawi lo mahila naupangte erawh ka ngai tawh lutuk

" Naktukah Aizawl ka kal dawn asin, engtik nge let leh itum" Papuia leh U sanga te anlo leng leh a, kapa ten damlo an kan avangin kan pali chauh chuan kan awm, kapi lah a room lamah min awmsan daih a

" Ka hrelo, Naktuk tuk leh velah hian ka tum deuh a " Ka ti ve mai a

" Naktukah chuan tum vela keimah chauh chuan a khawhar thlak dawn sia, suma fare ato tho bawk si " A sawi zo deuh chiah ka phone alo ri a, U Ima ala ni leh nghal

" Aw, Hello " Ka ti a, Papuia'n min en ve kur bawk si 

" Ka lo hruai ang che " A lo ti nghal tlawng 

" Eng ah chuan maw? Eng nge i sawi awmzia " Ka ti hlak hlak, tunlai ka thinchhiat dan hi keipawn hreawm kati

" Naktukah kalo hruai ang che, inhmu lo a awmrei chi kan nilo " Atih chuan ka sa ve nghal phat, han vin hlak hlak na hmun ani chiah bawk silo 

" Lo inkawm lawk ru aw " Ti khawmawi in char lamah ka phei a Lalhriatpuia'n 'in leng i nei alaw? " Alo ti leh hman hram, ka chhang duh miahlo 

" Min lo hruai angailo, naktukah chuan lo let ka tum reng " Ka ti zung zung a, anihna takah chuan ka tum der silo 

" Sumo in maw " Alo tih chuan ka thaw hak, ani pawn kan awmhran rual rualin zu a in nghal a, insawifiah tumna pakhat mah aneilo, runluih chakna chuan ka khat tup tup mai

" Umm, min lo ngaihtuah suh, inleng ka nei sia phone hman san daih amawi lo ka dah aw " Ka ti a, min chhanlet hma in call ka dah nghal daih, kan inkar hi a zau riau in ka hre tlat a, ka awm hi anuam bik chiah lo, Papuia chuan an hawn dawnah a ruala ka kal ve duh leh duh loh min zawt leh a

" Kapa te kalo sawipui ve ang, a rem chuan kalo txt ang che " Ka tih chuan a bu nghat nghat a, an hawn hnu rei vak loah kapa te pawh anlo hawng ve a, an remtih ring chiahlo chung chuan Papuia thilsawi chu ka sawi chhawng a ' Sumo fare safe pawh kha azia ve a ' tiin tawp ka khar

" A rem te chuan apawi hleinem, i kal angai tho tho a " A ti ve then a, a tho a ti dawn ila kan mu dawn chiah ani si a, a mood a fuh aniang

" Ka va mu lut teh ang " a tih zawm a, an room ah alut nghal daih

" Kimkimi nen in in kawm talo ami? " Kanu in atih chuan ka ngawi reng, khatiang kha ka chungah ti mahse, ja haw tak tak thei biklo a, tette aṭanga inkawm engkim ti dun ṭhin leh ka aiawh zo em emtu ani a, khami ni khan a harhfim lo a, harhfim nise khatiang kha ka chungah atih ka ringlo bawk

" Kawm tawhlo " Thil thleng kha kanu te ka hrilh lo a, hre ve kher lo se ka duh vang ani

" Puitling i ni ve tawha a chhan chu ka zawt kil kel lo ang che, anih leh arai tih i hre ve tawh em? " A tih chuan ka meng phawk viau in ka ring 

" A rai a! " ka ti vak a, kanu in ka hmui alo hup vat

" Ṭawng ring vak suh " A tih hnuah " Umm a rai alawm, kan khua ah a awmna a rei leh tawh, a fa paina asawi duh lo a achhungte pawh an mangang. a dul pawh a puar ve ṭan tawh an ti a, kei phei chuan ka hmu ngailo inah a tawm reng a, hmuh tur a awmlo" A ti leh a, sawi tur pawh ka hrelo 

" A van mak ve " Ka ti halh a, ka ṭhian hnai tak chuti maia a nun chhe ta em em mai chuan min ṭhawnga min ti hamhaih in ka na ve veng veng

" Damdawi te alo ti ṭhin ani awm e, hmeichhe ngainatawm leh fel deuh kha ani ṭhin si a, apawi tak tak ani, a ruk hian buaina alo tawk ru zawk nge le " Kanu pawn ati ve vang vang, ka room ka luh hnu pawn ka ngaihtuah zui a, kan inkawm laiin buaina leh harsatna tawk angin a awm ngai silo Kimkimi chanchin ngawt chuan min luah a, Papuia pawh ka biak theihnghilh ṭep ani, ka hriatchhuah veleh ka txt nghal a, ka msg chang ang hrimin min lo reply nghal

' Chaw eikham ah kan chhuak dawn nia, kan tlan rei lutuk lo ang ' a tih chuan ' aw le ' tiin ka reply a, ka offline leh nghal daih, Dandani msg pawh ka chhang buai talo mai, mut ahun tawha ani pawh a muhil daih tawh ang, Chaw eikham ah kan kal dawn tho chuan zinglam ah Kimkimi chu hmuh ve ngei ka duh ani, chu chu ka tana ṭhian ṭha tak alo nih tawh naah ka bat leh ka tihtur diktak ani pawn ka hria.

Cont..