Lunglawm Tikimtu Chapter-10

 Zanah chuan Common room ah kan awm a, tv ah CDrama ka en mai mai laiin Fela chuan laptop akhawih mual mual thung, Inbe lemlo mahila inhnaih teah kan ṭhu a, ahna tui taka athawh laiin keipawn ka film enlai tui takin ka en ve tho. Sofa ka ṭhutte hian pangai taka ṭhut hi ka thiam velo a, ka ke ka hlang chho vek zel motor ka chuan pawn ani tho, a thawl deuh chuan ka ke ka hlang ngei ngei.

" Ka phone kha minlo ban teh " Ka phone ari a la thei tho mahila ka tir ve chak hrim hrim

" Hello " 

" Tinge msg te hi enna chang reng reng i hriat loh " Kan khuaa ka ṭhiannu Liandingpuii ani a, min lo vin hlak hlak mai

" Tv ka en daih alawm " Ka ti a

" Ka pasal neih hun chu ilo kal ve thei ang tiraw? " Alo ti, Liani nen hian tette aṭangin kan in kawm a, kan mizia a in ang in kan inmil ṭhin viau, zirna avang tein hmun dangah ka awma ani erawh chu class10 ah zirna a chawlhsan, Liani pa Pa Ṭhaa hi ahma chuan zu ngawlvei chhungkaw chawkbuai tu ani a, khatih lai khan zirna zawm duh viau mahse, an chhungkaw dinhmunin a zir lo ani unau pathum anni a an khawsak kha aberh ṭhin viau. An chhungkua an buai em em ṭhin chung khan ṭhiante zingah hlim thei tak ani reng ṭhin mahse, tunah chuan Pa Ṭhaa pawn kohhran te bel in Rawngbawltu hial ani chho a, chhungkaw hlim tak an din chho ve mek ani

" Kal ve dawn chiang e mawle, i ni pawimawh berah ka tel ve loh ten " Phur sarhin kati a, pasal anei tur pawh hi ka lamwpui lutuk, a pasal tur lah ka mipa hriatchian kan khua ami tho ani a ka duhpui em em bawk

" Ṭhianah ka hmang dawn che ania " 

" Awi iti anglo emai, Mamawii te pawh an awm a keichu ka khaw zeilo emai " Ka pha nghal zung zung

" Ka ni pawimawh berah ka ṭhianṭha takin min dinpui se ka duh, ka phut tlat che ania " Phat zel pawh anuam ka tilo

" Aw le, kan tum dawn nia engtik nge in bazar ang, helam ah inlo bazar dawn nge " 

" Umm, Malsawmkima'n khalama bazar kha a duh tlat alawm " A ti hlak hlak, kan mizia a in ang ka tih kha kan ri phawng phawng zel

" Aizawl nula hmuh a chak vang bak anilo ang " Ka tih chuan alo nui uar uar 

" Kan inbe ṭha leh dawn nia aw, kan bazar hun turte pawh kan inhrilh ṭha leh ang a " A ti a call adah

" Coffee ka siam ang che i duh em? " Laptop hmaa la kun reng Ka bialpa chu ka zawta

" Ka zo ṭep " Tih chauhin min chhang, min chhang dangdai ṭhin si, Liani nen kan inbia a ka tv en mood ah pawh ka cheng thei tawhlo, tv chu off in Fela kawm tlak ani silo phone chu ka khawih a, Ka phur thutin Nizana ka thlalak kha ka sts a, Caption ah ' Realease ' tih ka hmang bawk, ka ṭhiante tih loh chuan an hrethiam velo ang

" Eng nge i en " Tiin Fela chuan ka phone chu hnai deuhah alo bih a, Youtube short ka en lai tak ani ka thil en lai lah chu CDrama an in kiss lai tak ala ni zui, Fela chuan a aw athian kharha keipawn sawi mai tur hrelo zetin ka chil ka lem khalh

" A hmuhnawm lutuk " Ka ti ta ngawt a, Zawi muangin Fela pawh aṭhu ṭha

" Coffee chu kava siam ang aw " Tia ka tho chu min pawt ṭhu leh a, Sofa ah ṭhu talo chuan Fela malchungah ka ṭhu dawt, ṭang ṭungin a darah chuan ka chelh

" Kalsawn suh " A ti a amitah tak ka en kiau laiin ani chuan ka hmui ngawt a en a, ka chil ka lem leh khalh, Ka biangah dawmin min hnaih tulh tulh a, a tih tum ka hriaa ka mit kalo chhing tawp, Ahmuiin ka hmui alo si a ka thawk ka chelh nghal tlat, ka bianga min dawmna kut chu a khur der der tih ka feel a, a hmui ati che leh chiah chu a irh fiak a, ka inla hrang nghal

" I ṭha em? " Ka ti a, a malchung aṭanga thawh mai ka tum laiin ka kawngah chelhin remlo deuhin ka awmah ahmai aphum, hahdam tumin thawk ala sek a asam chu ka khawihsak neuh neuh

" A pawilo ania " kan ngawi dun vang vanga, hreawm atih ka hlau bawk si, Min kuahna chu a thlah thawl ve ta deuha, alo hawi chhuah chuan nuih var varin a biangah ka fawp zeuh

" Danglam tum kher suh, i nihna ang ang hian ka duh che" Ka tih chuan mawi zetin min nuih let a

" Thlathar hian Kan khuaa ka ṭhiannu in pasal anei dawn a"

" Chuan " Ka kut khalh niap niap chungin ati a

" Ṭhian ah min hmang dawna, ka kal ve angai dawn tihna anih chu " Tiin asam karah ka kut ka rawlha ka ṭhamsak salh

" Mo ṭhiana ṭang chu an lengtar duh asin " Min fiam ve ngeia

" I awm tho a ka lungngailo " Ka tih let chuan anui hawk hawk

" Ka rit em? " A malchungah kala ṭhu renga

" I zang lemlo " Ati leh kher

" Lalruatfel rit min ti viau suh aw " Ka ti hlar a

" Mipa romantic tak ka nilo a, dawt sawi ka thiamlo " Ati leh hrama a awmah nam sawkin ka ding

" Min pawm tawh miah suh " Lungawi lo deuha ka tih pawn ala nui vur vur reng a

" Ka ti mai mai alawm " A ti a, ka lungawi thei chuanglo, tum bara a piaha ka ṭhu chu min be seka, ani anglo takin a ṭawng peih lutuk, ka kut lo vawn atum changin ka bensak thlawp zela ' Min dimlo ṭan hle mai ' A ti uang zel bawk si, ka thinrim rei theilo. 

" I nu te hi anlo zin ngailo ami? " In ngeih deuhin kan ṭhu duh leh rial tawha

" Zin zeuh zeuh " 

" I ngai ṭhin em? " Ka tih leh chuan

" Lungleng rual ka ni tawhlo " A ti nghut

" Chu zinsan che pawh ni ila min ngai dawnlo ani maw? " Ka mitko ka san ralha, alai deuh nge min en lo in

" Ngai dawn e " A ti a

" I va cute tak " Ti chiamin A biangah ka piai nawk nawk a, ka bialnu ni zawk awm ani kei aiin a lai hma daih zawk. Zingah chuan ka phone riin min ti harha peihlo deuhin ka chhang, Lalremruati alo la ni zui

" Happy birthday " call ka lak rualin alo ti a, ka meng nghal kawk

" Ka birthday maw " Ka ti hu, ka kum pawh alo tam veta deuh aniang, birthday pawh kan theihnghilh veta zeuh zeuh mai

" I ṭhing sia maw, i bialpa nei thar kha i a vek anih kha " A lo ti chiam chiam

" Biapa ka nei ami? " Ka nui pah vur vur a

" Ve lutuk che hian pangai tak ten min lo hrilh tur che ania, i sts aṭang chiah in kan hrethiam " Alo vui ve nang nang

" Nangmahni ka hrilhna che u anih kha, midangin an hrethiam ve teuhlo mai " Ka ti a, tukin chu thawhphan pawh ka neilo

" A zei em? " Min zawh leh ka ring reng a

" A cute " Ka tih chuan a nui ar ar

" Ka hrethiam mai mahse, khatiang khan ngaih anti ṭha zawk alawm, mipa zei lutuk te chu an hlauhawm " Ati zat zat, tawnhriat ngah ber awm ang hrim hian thil hi asawi ve ṭhina

" Tawnhriat hi i ngah sia " 

" Min hmusit ami Lalthansang " Alo ti vin nghal hlar

" Teh nang ka ngai tawh che " Uang deuhin ka ti a

" Tunṭum i birthday chu kan lawmsak theilo ang che, kan hlawh alo la lut hlawm silo a, min hrethiam ang chu tiraw.? Bialpa fel deuh i nei tawh tho a, i hawi hil bik chuanglo ang " Ka ṭhiante hian ka birthday apiangin min lawmsak ṭhin, Saipuia hnen aṭang kha chuan thilpek chauh ka dawng ṭhin a, kan birthday ni pawn darkar1 vel bak kan awmdun ve ngailo, a chang phei chuan present min pe tur ngawr ngawrin inhmu ang ati ṭhin, ka ṭhiante khan min khawngaiha ' angailo ' ti ṭhin mahila min lawmsak ziah zel. Hun kal tawh ngaihtuahleta Saipuia min tihdan vel ka ngaihtuah thlen hi chuan tinge kan inṭhen dawn khan vawikhat tal ka ben loh le ka inchhir, chu chu Saipuia laka ka inchhirna awm chhun ani.

" A pawilo ka upa ve tawh alawm lawm kher pawh ka duh tawhlo, lawmpuina min hlan tluka hlu a awm hleinem " Ka ti let luama tihtur aneih avangin kan inbe rei lemlo, ka birthday te ani ve bawk sia whatsapp ah lutin sts ka enkual a, Kan khaw lama ka ṭhiante ho in min lo wish nual tawha helama ka ṭhiante pawh chuti tho, kan khaw lama ka ṭhiante chuan ka thlalak hlui leh hmelchhiat zet zetna an hmang far a, en pahin ka nui chhuak hawk hawk thei kan khua ka awm lai hian ka va han cher chhe tak. Tunah chuan lian lemlo mahila ka khal ve tawha hmuh pawh ka nuam ve deuh tawh, room aṭangin ka chhuaka Fela thawm a awm leh rak rak tawh ang chu tih naklaiin areh ṭhap, ani hi thawh ahai aniang a. Zawi deuhin choka ah ka luta dawhkanah chuan lehkha te pakhat hi no hian alo delh a, Fela dah anih hmel lehkha ah chuan ' Lab ah ka kal, chaw hmeh kha tihlum angai ang ' Tih alo inziak a, thawh ahai aniang te ka ti vela thawh chu a hailo chiang khawp mai, ka birthday te ani ve em em a zingah Lab ah min kalsan daih chu ka hnual rawih rawih mai. Hna kal ahun chuan chaw pawh eilo in ka insiama, nimin ang chuan ka phur ta lo khawp mai, phur vaklo a kan office ka lut chu 

" Happy birthday " Ka teammate ten anlo ti rual ṭhapa, lehkha chehnawi anlo vawr chiam bawk, ka beisei loh lutuk anih avang chuan ka ang pham ringawt

" Ka lawm e " Ka luh dawna ka ngui tehreng nen chawpchilhin min ti phur nghal, Ka thlalak lianpuiin anlo tara ' Happy birthday ' tih an ziak bawk Birthday girl tih inziak chu min bah tir bawka

" I upa leh ta sawt mai " Ti pahin U Zira'n Present min pe a, midang pawn min pe tliar tliar Bawihtei pawn min pe ve ngei, Boss lo lut chuan min hauh chiam ka ring ania 

" Happy birthday, present ka lei thiam velo i ac ah thil leina tur kalo thun ang " A ti a, birthday present te chu ka hnar dawn teuhlo mai

" Ka lawm e boss " Nui var varin ka ti

" Vawiin chu i birthday ani a chawlh ka pe ang che u, in duh chuan in lengchhuak dawn nia " A ti chiah chu kan vaiin kan au rual vek, Boss pawh nui vur vurin a room ah aluh ve tak kha

" Banner te saw a to si, in in seng viaulo maw " Ka tih chuan

" Lo kal rawh thla la ang u, kan inbuatsaih nasa a thla kan lak loh chuan a kim nang " Dari'n ati a kan ri chel chul mai, Duhtawka thla kan lak hnuah Cake kan zaia

" Ka cousin in Karaoke anei a, kan kal dawn ami? " Miriami'n ati nawlha, kan pawm tlang aniang kan ding nghal vek

" Kal e le chhunah kan zai al al mai ang chu " Tea'n ati a kan nui dar dar, Miriami cousin Karaoke ah chuan boss ho in kan kal a

" Eng nge kan zai ang Birthday girl hian thlang rawh se " Mic min pe a

" Tui lai rap " Ka tih chuan an nui nghal uar uar, Boss leh Tea U zira te chu an ṭhu a, midang zawng ding chungin kan zai Dari lahin vedeo in a cover sek a thla pawh ala nasa tawh lutuk

" Zai chu a ninawm tawh Shopping ila " Bawihtei'n ati 

" Shopping rawh u, vawiin chu ka pawisa in hmang dawn nia " Boss in ati a

" Aih, birthday present kha atawk " Ka ti ve tlat, Midang pawisa hmansak huau huau hi ka duh lo

" Kal kual mai mai kha anuam ve alawm " Miriami'n atih chuan

" Bazar kha chu hmeichhe ho kal rawh u, kan awm ve zel chuan nuamlo inti palh ang " U zira leh Tea'n anti a

" Keipawh ka hman tawhlo " Boss pawn ati ve, boss lokal tawhlo tur chu ka thaw huai, kan kalhran dawn chuan boss chuan pawisa min pek atum ṭalh a, ka hnial fithla ṭhak

" Tinge i lak loh kan hmansak ham ham tur ania " Dari'n ati ham ham a, a uang mai mai tih hriain ka chhang lemlo, Bawihtei pawh chu aṭawng ve siam siam renga kan hlim tlang khawp mai, infiamna chi hrang hrang kan ti chhin kuala, chumi hnuah Bazar ah kan kal leh

" Vawiin chu ka sum pai aral vek dawn anih hi " A khat tawkin Miriami'n ati deuh chhen, Bazar a kal hi chuan kan mamawh ni hleilo it avanga lei te hi kan ngah thei lutuk a, Ṭul tawp ah lo chuan bazarah pawh hian ka kal duh ngailo, Dawr pakhata kan lut tur chu kan piaha ka mi hmuh te avang chuan ka ding chawt

" Sangi lo lut teh a cute hlawm lutuk " Dari'n atih pawh chuan ka lut mai theilo, Fela leh Seniori te chuan minlo hmu velo a kei erawh chuan chiang takin ka hmu thei, ka lungawilo a hreawm ka ti em em bawk. Call emaw msg tak ngial pawh min thawn hman loh laiin Seniori nen hlim takin an bazar dun vela, Fela te ka en reng lai chuan Ṭhiante'n min lo au ve chhen bawk nen Dawr ah chuan ka lut ve a Toys zawrhna ala ni zui 

" Hei hi Tea pek che ai khan alian zawk tiraw? " Teddy-bear lian deuh hi Bawihtei'n alo pawm a, Ka teammate te in present min pek ho kha company ah ala awm vek tak e

" Lian zawkin ka hria " Naute lem lian pui pui atam khawp mai, Chung zawng zawng zingah chuan Savawm lem chuan mit ala ber zel a, ka ṭhiante chu an duh ber ka thlantira ka tan an in seng nasa si eng emaw tal ka leisak ve loh chuan nuam ka tilo, atirah chuan an duhlo khawp a mahse, ka tih luih tlat avangin an thlang ve a, Dari'n Naute lem voice record theih chu athlang pek a, kan hlimpui dar dar khawp mai, Fela leh seniori erawh chuan rilru kilkhat an luah ve tlata ngaihtuah zui duhlo in thildang rilru la peng thei tur ka zawng ve char char. Kan bazar zo a Company a ka thil dah vel kan la leh te te, banner pawh ka hawn a Birthday girl tih inziak pawh kha kala bat reng, Company a kan let leh hnuah kan in ṭhen darh ve ta hlawma, keipawh taxi in in lam ka pan a ka bawr haw zek lehnghal, inkeng bawr laih chungin in chhungah ka lut a inchhung chu lo reh ṭhiapin a thim khap bawka ngaihṭha zanlo chuan pheikhawk hlip turin ṭhutna ah chuan ka ṭhu thla a, hman hmawh lemlo takin ka pheikhawk chu ka phelh a, ka phelh zo sleeper buna ka ding leh chiah chu 

" Happy birthday " Tiri a awm rualin light alo eng nghal pap, Fela'n cake a kenga ka ṭhiante an zai rual ṭhap ṭhap

" Min va surprise ve " Ka ti hliai ringawt, Birthday cake a bati chu ka chhem hlum a, ka thil hawn ho chu Ka ṭhiante'n min lo laksak zung zung

" Ka lawm e, hetiang te inlo tih ka beisei hleinem " Ka ti a, Fela ka hmuh chuan vawiin thil thleng ka hrechhuak leh tawh, ka hlim lutuk thei miahlo lehnghal

" Kan surprise chu i lawm vak nange " Lalai'n atih chuan lu ka thing a

" Dawt min hrilh ithiam hle mai " Tiin ka nui lui var var, Saipuia leh a ṭhiante pawh anlo ṭhu ve khap mai, Seniori leh mipa pakhat kala hmuh ngai loh pawh an tel ve

" Happy birthday Princess " Fela'n ati a, lungawi lo deuhin ka en reng, lungawi loh na sawichhuah chiam hun ani der silo a

" Diklo a awm emni? " A tih leh pawn ka chhanglo, Cake te ka zaia cake zai zawhah Seniori leh mipa pakhat kha chu an hawnga present pawh min pe ve thlap, Kan ṭhian dang te chuan chaw anlo ei dawna chawhmeh pawh an lo keng thlap anih hmel

" Kan birthday girl ber hi a nui ṭha duh tlat lo " Seni'n ati a

" Min huphurh tlat " Mafaka'n uang deuhin ati ve

" Vawiin ah kan teikual nasa lutuka ka chau deuh, ka inbual harh anga kan lam siau siau ang chu " ka tih chuan

" Ni e, va inbual harh rawh i rimchhia " Lawmi'n a kut a ahmai zap lap lap chungin ati khera, a hnungah ka ben thlawp kha. An mahni buai buaiin an buaia min ngaihsak hlawm tak taklo, room ah ka luhsan a kawngka ka kharfel chiah Fela'n alo hawng leh nghal a

" Seniori te lokal ve kha i lungawi lo ami? " A tih chuan

" Anni lokal vanga lungawilo ringawt tur khawpa rilru chhia ka ni ami? " Ka ti deuh hlar, Zingah pawh min wish lo a lehkha chiah min hnutchhiah chhunah pawh msg leh call takngial pawn min belo a, Seniori nen an bazar dun leh tho bawk si

" Ka hrethiam lo alawm " Zuai raihin ati a, thawpui kala halh

" Vawiin nilengin min belo a, Seniori nen khan in bazar dun leh tho sia " 

" Chuvang chauh chuan maw " Hahdam huai hmel apu a, min hnaih sauh bawk

" Chauh anilo " Ka ti ve hlar a

" Ka bialnu piancham ka vawikhat lawmna tur ania, Google in min pui vek thei tawh silo a, idea ṭha deuh nei tur ka rawn ve angai alawm. Seniori khan in cheina tur vel min leipui a " A tih chuan ka lungawi loh na kha vawm bo ang hlauh ani, chawpchilhin ka lungawi nghal 

" Ka tihpalh " Tiin ka kuaha a awm ah hmai ka phum sat sat

" I lungawi loh chuan min hrilh rawh, ka hriat loh chuan thlem ngaihna che ka hrelo " Nghet deuhin min kuah leta

" Min surprise dawn tih ka hrelo a, Seniori nen ka hmuhdun che u khan ka lungawi lo alawm " Ka tih chuan ka chhipah ahmui anawr vang vang

" Hun ka neilo, nang leh ka zirlai tih loh thildang ngaihtuah nan hun ka neilo " A rinawm zia min hrilh chiamlo a mahse, ka ring em em tho

" Ka rimchhia " Inlak hran ka tum chuan min kuah nghet sauh

" I sam su rawh aw " Min thlah pahin ati leh kher

" I sual thiam ve sia maw " Ka sam chul thuak pahin kati a

" I shmapoo rim saw atui a " A ti ve hlauh aphakar thiam ve asin

" Va chhuak rawh, keipawh ka inbual dawn " Ka tih chuan thuawih deuhin a chhuak ve maia, a chhuah hmain ka chalah a fawp zeuha kan lai dun veleh em em tho. Ka inbual zawhah chuan Fela nen kan inkar aṭha leh ta bawk nen a nui ring ber berah ka ṭang leh tawha, Chaw pawh kan ri nawk nawk a kan ei ṭeuh mai. Tunah hian Lalrinfeli ṭawngtheih vangin Thlahrang film kan en a, light off ang u ati tlat bawk si

" Uii keichu ka ning e, a hrang leh tawh em? " Fela ka pawt sek reng a, thuawih deuhin min hrilh ve mual mual

" Thansangi dawih zia hi a over si, keini te chu hlauh chang pawha kuah tur kan nei hleinem " Lalai'n ati hlara

" Kuah tur neih ringawt pawh anilo, zanah keimah tho in alawm ka mut dawn " Ka tih chuan mipa ho rilru kawi a chhuak a, an ngai kawi leh tlat pek

" Chu zanah mutpui i beisei deuh ami? " Samuela'n ati a, Chaw eina kan tihfel vel hlan khan inchungah an in sek aniang an rim adik tawhlo

" In rilru a kawi e a " A ti hlaka, huatah pawh kala la lutuk lo

" Kawi ami khumah te chuan i ngam huai viau ang chu " Saipuia'n nui vur vura atih chuan kan tv en lai tih loh thawm areh nghal duk

" Sairengpui ṭawngtam vak suh aw " Ka ti ram hmarh 

" I thinrim hma emai kan fiamthu alawm " A tih leh pawh chuan ka lungawi thei tlat tawhlo, Khitiang lam zawnga min ngai khawlo tur khian a lakah vawikhat pawh kala inphelh lo chiang emai, rindan a min puh ngawt pawh khi ka lungawilo

" Samuela chu movie mood iti chhe vek alawm " Lalai'n tv off hmak pahin ati a

" Eng nge ka tihchhiat anihna Fiamthuah Thansangi a thinrim anih kha " Samuela pawn ati pawr hlar mai

" In fiamthu kha nuihpui huah huah chi ani emni? Mi rilru te hrim hrim chu an awm mahse, fiamthuah mi an nuih loh chuan fiamthu anilo animai " Lalai bawkin ati leh 

" Fiamthu kan tih chuan fiamthu ani mai, hmeichhia tete lo in ṭawngthei lutuk " Samuela'n ala ti hram a

" In hauh chiam angaih loh kha, Samu nangni pawh khatiang zawngin hmeichhia fiam ṭhin su, mipa awmkhawm naah chuan kan ṭawngkam lo hraw deuh mahse, hmeichhia kan bula an awm chuan fimkhur tur " Mafaka'n dam dapin ati a, Fela chu aṭhut dan ngaiin ala ṭhu reng

" Rindan te chu kan nei thiang alawm, ngaihzawng A ṭhen hnu reiloteah mipa dang a ngaizawng leh nghal theia ngaihdan chu kan siam ve thei alawm " Lalawma'n alo ti ve leh, thinrim an chak hrim hrim ni tawhin ka hria

" Ngawi mai mai teh Lalawm, zu in in anih pawn buaina tih chhuah phet tum su " Seni'n ati ve hmak, keichu kala ngawi hram hram ani ka ṭawngchhuah ve chuan ka dim duai leh dawn lo a, ka rilru a awm ang ang ka sawi chhuak leh phawng phawng dawna thinrim lai hi chuan ngawih theih hram hi ka duh

" Ni e, Sangi tan pawh Nunhlui sawichhuah sawichhuah kha anuam dawnlo ania, Fela a awm ve reng leh nghal Fela pawh a zahawm alawm " Lawmi'n alo belhchhah ve a tv kan off tawh bawk nen thawm areh diak tawh

" Lawmi lah hi inla fel deuh hian i ṭawng ve chhena, i ṭhiannu thlavang hauh ve tur pawh ini emni? " Kan ngawih ṭhiap laiin Lalawma bawkin ati leh a, Lawmi chu ka ngaihbel nge a hlautthawn hmel riauin ka hria

" I va mak ve Lawma, mipa zawk si iṭawng chhen a " Mafaka pawh a aw ki adam vak tawhlo

" Eee Mafak min vin ve suh " Ti rum al in dawhkanah juice kan hun chu a vai baw chuai, Lalai leh Seni te an ṭe ṭhata kei erawh ka thinrim tawh lutuk

" Eng nge i huat ber " Fela'n ati nghut a, Fela banah chuan ka chelh ve ṭai mai

" Engmaw " Ngeiawm deuha nui pahin Lalawma chuan ati leh, Atira pawr hmasa zawk zawk Saipuia leh Samuela an ngawi leh hmak thunga

" Eng nge i huat ber ka zawt che, Lawmi thusawi kha nge Sangi hi i hua, nge ni a keimah hi min haw hrim hrim " A ti chher chher tawh mai, a ngawi rei ka ti bawk a aṭawngchhuak reng reng chu a hlauhawm ani tawp

" Ṭhiante bialnu hlui ngaizawng nghal thei inih kha, huat tham pawh ini emni? I ṭhianpa in khanu avang khan atuar meka, Thansangi nen hian in huatawm ngawih ngawih " Titu Lalawma chu ka en tlawk tlawk, Chuti tak chuan minlo haw ṭhin chu ani sia

" Anla in ngaihzawn lai reng pawn in chengduna, Sangi lahin engkimah Puia a mawhpuh veka " Samuela'n alo tih zawm ve zat

" Samuel Sairengpui Vanlawm hawng rawh u, kan boruak ti chhe tur hian engvangin nge inlo kal ve, kan sawm che u pawh ni hleilo " Lalai'n a ti fiak ṭhak, engkima ka thlavang hauh na ber ṭhinte anni a, Saipuia min tihdan chiang taka hretu, ka hreawm tihna ka lungngaihna hrechiangtu te hi an ngawih mai mai ka ringlo reng ani

" In ṭhiannu kha Puia tello in a awm theilo, kan telloh te chuan aṭhiannu birthday ah pawh a kal duh loh kha " Hmusit zetin ati a, ṭawng ka tum lai takin

" Mahni bialnute lam tura ṭhiante tir ṭhintu mihring chu ngaihzawng reng tlak ani emni? Thutiam zula hlen leh theilo mipa chu damchhunga in nghahna tlak ani meuh ang maw? Ṭhiante hlutna hria bialnute ngaihthah leh tlat ṭhin mihring kalsantu chuan diriam aphu em? Min chhang rawh. " Fela chu a ding hluaia athinrim zia chu hmuh hmaih chi anilo

" Ṭhiante aia bialnute ngaipawimawh ṭhin hi mipa anni lo ve " Lalawma'n ala ti, Han ngawih ve mai mai tawh awm ania

" Sairengpui ngun deuhin ngaithla rawh lunghlu hlutna hrelo midangin ahlutna hriaa an chhar tak hnua ahlutna hre thar tu ini, lunghlu chhartu in midang an pe kual dun dun tawh ngailo " Nichina a thinrim tehlul nen tunah chuan aṭawng dam leh thlap tawha, a ṭhutdan ngai bawkin ka bulah alo ṭhu, ka kut avuan a engmah sawilo mahse, a mitmeng tak ngala min ngaihtuahna lang chuan min ti hahdam veng veng

" A tlai tawh tho alawm le, hawh u ṭin zai rel tawh ang u " Mafaka'n ati hlut, Boruak ṭha kan nei thei tawh dawnlo tih a hrethiam te pawh aniang

" Ni e apawilo, In hi chu an pahnih tihfai turin dah mai tur" Lalai' ati lang lang a, zalo zetin anui hak hak bawk, an ding sap sap a Lawmi chuan min enṭha ngam tawhlo, a thil tihsual ka hrelo a Lalawma thusawi kha a awmzia ka hrelo bawk, zu ṭhat loh zia sawifiah rawh minti ta se Samuela leh Saipuia Lalawma te hi ka kawhhmuh ang. An ruih loh chuan midang pawisawi aia fiamthu thawh ṭhin, midang chanchin chhe lam sawi ngailo mihring tluang ve tawp te kha zu an lem hlek chuan an ruih loh laia an mize let thawk in an awm ṭhin.

" Boruak a chhe ta vek sia apawi hle mai, Fela lakah pawh a inthlahrunawm " An hawng tur chu pawn thleng ka thlaha, Fela erawh inchhungah a awm thung

" A pawi hleinem tuman khatiang athleng dawn tih kan hre lawk lo a, inthiamlo suh u " Ka tih chuan

" Surprise tur che khan Fela athawkrim ania, engkim kha abuaipui veka kan pui ve chauh ania, a inbuatsaihna kan ti chhe vek ani ringawt " Lalai chu a inthiamlo ngang aniang

" A pawilo ka tih kha, Fela pawh a thinrimlo ang " 

" A ding thut khan Lawma kha a hnek dawn emaw ka ti hman alawm " Thawveng zetin Seni'n ati ve thunga, kan ngaihmawh zawngte hi a in anglo hlawm ṭhin asin

" Lalrinfeli thawven hawr hawr dan hi chu, kan kalsan ang che aw, Muttui " An kal hma chuan kan in kuah leh tete a, an tlanliam thleng chuan ka thlir

" I thinrim ami? " Fela chu Sofa ah ngawi ngalin ala ṭhu a, abulah tim daiin ka ṭhu ve

" Tinge chute min zawh keiman alawm zawt tur che " Chiang deuhin min en a

" Ka nunhlui thil vek ani a, hreawm kati " Ka tih chuan min chawi nawlhin a malchungah min ṭhuttira, min chawi dan hi rihna nei velo ka ang ṭhin, hmeichhe te deuha kalo piang hi chu Fela hi a vannei ngawt mai, a duh loh dan deuha ka awm chuan min chawisawn lawp lawp thei a.

" I nunhlui thil in min ti buailo " A tih hnuah zawimuanga minlo hnaihin min fawpa a irh fiak ta biklo e, ka mitchhing chial chung chuan a nghawngah ka kut suihin ka chhanglet ve, In kiss chu zeilo hlawm tawp zawng anilo e, min fawp reng chunga ka kawngah a chelh chuan ka mur chhuak chuai thei

" Princess " Kan inthlah a kan thaw dun halh halh, thawchhamin kanlo thi lek lek anih hi a, kan thi anih vaih chuan kan thih chhanah ' In kiss vanga thawchham ' tiin ziak tase anuihzatthlak dawn lutuk, chutiang ngaihtuah thlenga ka nuih chhuah chuan akutzungpuia ka hmui tuai zeuh pahin 

" Nuih tur a awm ami? " A ti rilruih 

" Thil ka ngaihtuah alawm " Ka ti a, min en ngal bawk si min ti lai 

" Hei chiah hi ngaihtuah rawh " Ti nghatin kan inhnaih tawh tehreng nen min pawt hnaih leh salha, min fawp leh nghal zat.

Ka birthday zan buaichuar deuh aṭang pawn hun akal tam leh tawha, Saipuia te ṭhian ho chu ka be leh tawhlo hrim hrim, Lawmi pawn min hel renga biak ka tum chang pawn chhuanlam siamin min kalsan daih zel, min be chaklo tu na na na chu tiin biak luih ka tum tawh ngai biklo. Lalai leh Seni te nen chuan pangai deuhin kan awm chhunzawma, Lawmi awmdan ber hi ka hrethiam phalo hetiang anih nuaih lai hian Fela nen kan inkar erawh aṭha phiana, kan mize in anglo lutuk hi kan inmil phian zawkin ka hreṭhin.

" Tinge itum bur bur renga " Karkhat chhung chawlh an nei a, nilengin inah kan uite thar nen anlo awm ṭhin, kan uite thar hi ka birthday present ania ka birthday zan khan ka dawnglo na in atukah kan pahnih in kan la dun. Tlaia ka hna ban aṭangin min tih tauh khum renga ka bialnu zawk hi a ang ṭhin a buaithlak thei asin

" Fela " Room ah alut tur chu ka pawt dinga, a ṭang ve ṭung mai 

" Mipa dang bula i nuih hian i bawp atawi si i hmelchhia" A tih chuan ka meng kawk

" Eng nge i sawi awmzia " 

" Khapa bulah khan hmelṭha deuhin nui ziah suh " A ti hmuk hmuk a, a thilsawi awmzia ka hriat rualin ka nui rah rah, Hmani deuh khan Tea alo leng nawlh a Fela nen kan chengdun tih ahriat khan mak ati ve viau, keimah vang nilo in Fela vang zawkin alo leng cousin anni a Fela nu in ngaihven turin alo chah ve ani maithei. Inhre sa kan nih avangin kalo titi pui leh hlut ṭhin a, Tea pawh ahma zawng aiin alo leng zing zawk

" Tea te chu i cousin anih kha, mipa dang ngaihven hman pawh ka nilo " A banah ka sawi pah leu leu a

" Chupawh nise lo len reng angailo, inla hmelṭha deuhin i lo nuih ziah leh nghal" A thikthu hi a chhe viaua, a lungawi loh chuan hmeichhia nen an danglam lo, Tea lah hian a fiam peih ṭhin sia, tunkar chu tihtauh kar ani ringawt

" Inleng te lo tihtauh khum bur bur chi ani hleinem " Ka tih chuan a titau areh ṭan niin ka hria

" Ka bialnu hmelṭhapa " Ka kaisawna sofa ah ka ṭhutpui

" I bialnu ka nilo e " A ti hluk

" I titau peih sia ka bialnu ang mai ini " Ka ti chu a duhlo khawp mai, inla pa zetin a ṭhu ṭha nghal hmaka min en run run bawk 

" Ka lakah i thikthu a chhia tih hriatte hian ka ngaih aṭha, ngaiah min neih ka hlau " A biang tawnah hmeh sakin a hmui kawh vu chu ka fawhsak zeuh a, a hmuiah ka seh sak zeuh bawk, ahmuia seh hi aduhlo a ka sehsak chang pawn min hau ngam chiah silo in a phun bul bul zel

" Ka duhna che hian kumkhua chu a daihlo maithei chiang taka ka sawi theih chu ka damchhung adaih tih hi ani " Ka kut avawn chu lakangin a fawp vang vang

" Damchhung chauh maw? " Hrethiamlo deuha ka tih avang chuan

" Thih hnu piahlam ram khi hmangaih bik awm tawh lohna an tih vang in kan tan hun bik a awm tawh dawnlo, kan tan chuan kan damlai hun hi kan hun pawimawh kan hunbik chu ani " A chut titi ṭhin mahila thu dangdai ril deuh si hi sawi tur a hre leh nulh zel

" Engtin nge chutiang te i hriat " Nui sen sen chungin phur deuhin ka zawta

" Kristian hlabu ah ka hmu " A ti leh mauh mai, sawi zawm tur hi avang ṭhin asin

" I dangdai ṭhin si " Ka tih chuan ka sam atuai thur leh vek, kan awmdun hian kan titi dun ve melh melh ngailo, kan insual titih ziah ka sam khawih hi ka duhlo tih ahrua a min chhaih nan min tuai thur sak veka, kei lahin ka dawh mai mai silo kan ri chul zel, kan chauh hnap hnuah zawi zetin amah ka ngheng ar ar zela ka nitin hun hman hian lung ati awi ṭhin

" Kan in ngaizawng sia chendun reng hi amawi chiahlo kati" Kan ngawih vang vang hnuah ka ti a, ka sam thur bum mai chu ka chul mam thuak thuak

" Mawi deuha chendun kher angai ami? " A ti a, Ngaihtuah kim viau tur zawk si hi angaihtuah tawi tak tak alawm

" Kan in ngaihzawn lai kha chuan mawilo tho mahse, kan in ngaizawnglo a, tunah chuan kan in ngaizawng tawha hmingchhiat a awl zual bik alawm, ram dang angin in ngaizawng innei lo a chendun hi kan sakhuana in ala support velo " Ka tih pawh chuan 

" Kan in ngaizawnglo angin ngai mai rawh " A ti sam leh et mawle

" I mawl ami Lalruatfel " Vin zeta ka tih chuan

" Kan hmingchhiat hmain kan innei dawn nia " Ti pahin ka biangah alo piai nawk zui 

" I ngai awlsam si ninawm, mipa aiin hmeichhe tan hmingchhiat a awla, mipa hmingchhiatna chuan rei a awh ngailo hmeichhia erawh chuan damchhung a daih tawh " Lawmlo deuhin ka ti bai bai 

" Awm hran chu ka ngaihtuah duhlo, thil lo la thlenglo vanga riru tihbuai chu a ho iti velo ami Princess " A ti dam thlapa

" Lo la thleng thei ania " Kala ti ve hram

" Mahse, alo la thleng chuang hleinem " a ti ve khauh, ka hnial zui peih tawhlo.

" Tv en ang aw, hnathawh tur i nei em? " Phone khawih reng anuam silo, titi dun chiam tur hi avang ve bawk si kan pahnih ang tho hi midang in ngaizawng tehi anni ve angem le kati mahse, keini chu kan chengduna msg a inbiak chiamte kha kan neilo. Midang chu karkhatah vawi2 lek inhmu te aṭhen inhmu zing deuh te chu vawi3 vawi4 te an inhmu a, khatiangah kha chuan sawidun tur ngah deuh pawh nise a awm a, keini chu inhrilh kher ngailo in kan hun hmandan leh kan thil tih kan inhre tawn veka, sawi dun melh melh tur hi avang ve em asin, ti chung hian sawi tur hi keimah zawk hian ka ngah em em renga, Fela hi chu ngaithla tu ani mai.

" Nu deuh ho chu ka en peih tawhlo " Thai drama ka enpui ṭhina tuai lo lang ve sek ṭhin hi a ngaithei thlawtlo

" Chinese drama nge Korean Drama kan en ang " Ka tih chuan min chhanglo in a nur nang ringawt

" Anih en tur lo thlang la, eitur kava la teh ang " Remote ka pe a, Tv ka en hian thil eipah lo chuan ka enthiamlo ka tih ṭhan vang pawh ani maithei, min hrechianglo tan chuan ka ngeiawm ve viau ang, a chuangliam thlak ve em a mahse, chutiangin ka ei tam ngailo ka(Mouth) ruak hi ka ngai theilo ani ber

" Zombie maw? " Puan leh lukham nen eitur keng ṭan chunga ka phei leh chuan Zombie lam daih alo thlang 

" I muhil lo deuh ang " A ti then

" Ka seh ve khawp ang che " A bulah ṭhuthmun ka rema, engamah hmain nuam deuha ṭhut ka tum leh tawp

" Zombie hi chu an rapawm e, zanah ka mumang ah ka hmu leh dawn anih hi " a thlan tawhsa sawisel hreh bawk si Zombie kher chu ka en chak bawk silo. Zombie chu kan en ṭan ta a Thlahrang film leh Zombie tih te hi chu hahdam deuhin ka en ngailo, Ṭang ṭunga ka en laiin Fela chu alo muthlu diam tawh

" Phakar ve ṭhin si " Ti sepin a mutthlukdan remlo zet chu ka theih ang tawkin ka siamrem saka, ka ti che hlek chu alo harh kawk

" Ka mal hi khamla lo mu rawh " Ka tih chuan ṭha deuhin alo mu ve mai, puan chu ka sintir a amuhil ta bawka Film dang ka en nghal daih. Zingah ka harh chuan Sofa ah kalo mu at a, Nizan khan Fela tih harh hlau zetin ka ṭhu mu kha ania, Choka lamah thawm anei rak rak mai mit nuai chat chat chungin choka ah chuan ka lut 

" I va tho zing ve " Ka tih chuan min lo en a

" I mutchhuah te chuan min kaih thawh mai tur ania, tikhan hreawm deuhin awm tawh suh " A ti daih

" I mutui sia ka tiharh duhlo che alawm " Nui var var chunga ka tih leh pawn

" Mut ka awlsam alawm " Ala ti ve ṭang ṭang chair pawt chhuakin dawhkan ka kila, a che vel chu hmuhnawm ti zetin ka thlir reng Thingpui min siamsak in dawhkanah min chhawp thlap a, ka tihsak tur hi min tihsak hlauh zel.

Cont..