Lunglawm Tikimtu chapter-16

 Ka inbual zo ka room a ka luh leh chuan Fela'n bedsheet alo thlak meka, ka thawm ahriat rualin alo lehhawi vat, min nuih var vara aphur surh chu engvang tehhrep nge mawni. Dressing table ah ṭhu in ka sam ka hru ro thuak thuak a, drower hawnga hair dryer ka phawrhchhuak chu 

" Kalo ti ang " Engtik laiin nge ka bul alo thlen hman pawh ka hrelo, Hair dryer chu plug ah a fit a, ka sam chu aman min chhemro sak, darthlaang aṭang chuan ka en renga, anui hmel hmuh chu anuam khawp mai, ka sam achhem ro laiin ka hmaiah chuan kan product chu ka hmang chhin a

" I phur riau mai " Sam chhemro na a dahṭhat mawlh mawlh lai chuan kati, ka biakna avang chuan athil tihlai dahin min lo en 

" Chuti ami? " Ati a nuilo ang hmakin a awm leh vel, a chetdan chu ka nuih pui hak hak

" Bedsheet kha kalo su ang " Bedsheet keng chunga chhuah atum chu ading leh rih

" Ka ti thei alawm " A tih chuan ka lu ka thing nar nar

" Kalo ti ang, eirawng bawl zawk rawh " Ka tih chuan abu nghata, Bedsheet chu a kengchhuak tho ahnungah ka zui chhuak ve nghala, bedsheet min pek hnuah choka ah alut a keipawh bathroom ah ka lut ve nghal. Zanah chuan Common room ah kan awma kan hna kan thawk ve ve thung, inluahhran chungchang chu sawipui ka rilruk deuha mahse, ahna akhawih tui reuh lutuka engmah ka sawipui ta lemlo

" Ilo laklawh ami? " Zan arei tawh a, keichu nichinah ka hna pawh ka khawih zo daih tawh Fela erawh ala tui ngar ngar khawp mai 

" Min mutsan mai rawh " Ati a en pawh min en lo, min ngaihthah lutuk chu ka ngaihdan ani leh lo, ngawi rengin ka tho a room ah ka luhsan nal nal kawngka ka kalh tlat bawk, kawngka ka kalh chhan hi chu ka lungawi loh vang ani hranlo, ka room ah lo luh atum leh ngawt ang tih ka hlauh vang zawk ani, thil tisual mahila zawngchhang ka tumlo. Zingah chuan ka harh hma leh viaua kan khua ah khan ka tho hma ṭhina ngaiah ka nei leh ṭan dawnin ka hria, aṭha nge ṭhalo pawh ka hrelo, room aṭanga ka chhuah chuan Sofa ah Fela alo mu renga, min ti phu zawk lo chauh alawm, puan chuan ka khuh ṭha a choka ah ka pheisan.

" Inluah tur zawn ka tuma " Chaw kan ei laiin kati a, a thil ei lai chawl meuhin min en

" Angai ami? " Ati hmuka

" Umm, chendun reng chu amawilo ka tih kha, kan induh tawna induh a inngaizawng ta chu tih loh tur thlengin kan tih phah a, kan pahnih ngawta chendun chu atih chi loh alawm " 

" I inchhir thu min hrilh i tum ami? " Atih leh hluk chuan lu ka thing nawk nawk

" Chutiang lam anilo, ka sawi tum chu " Ka tih lai mekin a tho nulh a, akut asil hnuah choka aṭangin a chhuak nal nal. Hamhaih leh bangbo fe in a chhuah na lam chu ka melh ngawt ngawt, chaw ei pawh atui tawh biklo a keipawh chu ka kham ve nghal, ei hmun ka tihfel hnuah choka aṭangin ka chhuak a, hmuh tur ala awm mai lo lehnghal, ka thusawiah khan ka inchhir thu ka sawitel miahlo a, khatianga angai kha amak kati

" Fela " A room kawngka ka kik a, ka ko pah bawk min chhan loh avangin ka hawng ta tawp

" Ka thusawi kha i ngaikawi mai mai anihkha " A tukverh aṭangin pawnlam alo thlir a, ahnungah chuan dingin a kawrah ka pawt zauh

" In ngaihtuah ka duh " Tih chauhin min chhang, ka lam pawh alo hawilo hrim hrim 

" Ka inchhir vang anilo ania, chutiangin engmah kala ngaihtuah ngailo " Ka tih leh pawh chuan milim ang maiin ading khawng reng a, chutiang na na na chu tiin ka chhuahsan veleh mai, hnakal tura ka insiam te chu ka phurlo a, Fela chu nichin deuha achhuak diam tawh.

Office ka thlen pawh chuan ka harhvang lo khawp mai, diktak chuan ahma kha ka pha thei tawh biklo, ngaihtuah tur leh lungkham ka ngah veta deuh pawh ani maithei

" Lokal rawh, i thawkrim lutuk " Break ah pawh chuan computer hmaah kala ṭhu renga, Dari'n min kuah tho leh nawk nawk

" Engmah ka ei chak vaklo, ka zawi lutuk " Ti mahila min kaichhuak lui leh tho, eitur nghaka kan ṭhut lai te chuan an titi ka pawh ka zawm ṭha peihlo ani ber mahse, theihtawka inthununin ka inti harh lui hram hram thung, zawhna ka chhang peihlo a ka awmdan hi sawifiah chi pawh anilo

" Enteh u " Thil hrechhuak thutin ka ti hluai 

" Eng ber " Chimawm fe in an hawikual vel a

" Inluah tur minlo zawnpui teh u, kan company hnaivai deuh ah hian ka duha " 

" Avang viau ang, inluah tur hi avang thei lutuka avan bakah ato thei riau a engpawh nise kalo ngaihvenpui dawn che nia " U zira'n ati a

" To deuh mahse apawilo " Ka ti ve mai, to lutuk erawh ka ngam kherin ka ring chuanglo

" Fela nen in inhau ami? " Tea'n kan thil ei zo office kan pan leh mek laiin ati a, kan kal muan deuh avangin midang chuan kan sawi an hre velo ang

" Hau lo e " 

" In luah tur i zawng sia amak kati deuh mai mai mawle" Ati a

" Nia, han chendun reng kha nupa pawh kan ni silo a, anuam kati lo mawle " Ka tih ve chuan

" Nia adik reng, hmeichhe hmingchhiatna hi chu aho a, mipa aiin adaihrei daih bawk, adaihrei mai pawh anilo damchhung adaih " Ati ve duah, company a ka hun hmandan chu angai reng a, engmah han sawi thar vak tur a awm lemlo. Banah taxi in Dorm ah ka kal a Lalai te ka ngaih tawh vang ani, room ah chuan Seni chauh alo awm a

" Lalai hna ala banglo ami? " Ka tih chuan

" Bang tawh e, thil leiin a chhuak lawk, inlo intawk lo ami? " 

" Tawk lo, Lawmi ve thung hi " Ka ti leh a, Ka bday zan aṭanga khan min la hel char char a, kan khua ka awm laiin Fela leh Seniori thlalak minlo thawn ringawt bawk

" Ka hrelo e a, Puia hmu turin a chhuak leh tawh aniang " ngaihsam fe in ati leh 

" Saipuia te anlo hawng tawh alaw " Ka ti hu, kan khua ah anla awm reng emaw tia

" Ka hrelo Lawmi mizia hi adang tulh tulh mai " Atih mek laiin Lalai alo hawng ve nawlh a, min hmu thut chu mak atih hmel lutuk, mu ar ar chungin kalo nuih var vara

" Thluakfinga nen in in hau leh tawh ami? " Ati leh kher Lalremruati ngeiawm thiam dan hi chu 

" Thluakfinga chu thuhran Sairengpuia te ṭhian ho ka hne zia chu maw, kan khua ah pawh hahdamin ka awm theilo" Ka ti hlak hlak, insawithawl ka chakna arei tawh ka rilru a tawt tup tup chang hi chuan a kianga awm hi ka chak ber ṭhin, kanu ai maha ka hreawmna ka thlenna anni a, Ṭhianṭha hi chu anlo hlu ngawt mai

" Anlo kal veleh tak tiraw? Kar liamta chhung khan Lawmi hlim hmel kan hmu tak tak hleinem " Anui pah a

" Kal e an ṭawngthei si, zankhat phei chu kan inhau nek alawm " Ka ti hmuar hmuar

" Engtin nge an tih leh, zu an heh si tiang em em a han mawl mai chu e, ahma in tiang lutuk hi anni pawn ka hre silo a " Anti a, Seni chu chair ah aṭhu a ka bul ah alo tawh hnai, Lalai chu khumah alo ṭhu ve a, keipawh mu tawhlo in ka tho ve tawh. Kan khuaa thil thleng vel chu ka theih ang tawka chipchiar in ka hrilh a, ka sawi chhung chu uluk deuhin anlo ngaithla, Kapa te nen kan in nghir ngho dan pawh ka hrilh tel a, ka sawi zawh meuh chuan ka thawl huaiin ka hria, Fela nen kan chungchang erawh ka sawitello.

" I rilru ti hah lutuk suh, i patea thusawi pawh adik alawm, mipa leh hmeichhia chendun chu thil mawi anilo a, i nutei erawh chu ati anglo anih chu. Thil hi awlsam taka chinfel theihreng aharsa zawnga tih ṭalh hi a awm ve ania, i pa nen in inkar awh siamṭhat har ani lovang mahse, fanu zawk inih angin tlawm zawkah ṭanga i pa chu i dawr ve angai ang, i pa pawn chu chu aphut pawh ani maithei asin" Lalai'n ati a, thu lai lak athiam lutuk hi Lalai ti Lalai tu ani ve tlat

" Pathianin Israel ho Sal aṭanga ahruai chhuah khan Kanan ram kha ni reilo te kal anih laiin an phun chiar luat tukah Pathian in thlaler ah kum eng emaw zat ahruai tak zawk kha, awlsam taka fel thei reng hi kan hriatthiam loh luatah rei tak nghah te angaih phah ṭhin " Seni'n alo ti ve ngei bawka Lalai nen kan nuih vur vur

" Min nuih su Pathian thu ka sawi hian min nuih ziah " A titau der vela kan hlim tlang phian, keipawh ka zang hawk in ka hria. Rin aiin dorm ah chuan ka awmrei a Fela nen nilengin kan inbe lo, atawpah chuan keimah zawkin ka call leh ta nge nge ala la lawk theilo leh nghal a

" Dorm ah ka awm a, in ah i awm tawh em? Kalo haw harlo ang " Call a chhan rualin kati nghal zung zung

" Lo hawnglo zawk mai rawh, professor in project min pe a, kan team in zanah in ah kan ti dawn, nuam itilo ang " Alo ti dam thlup

" Aw le " Tih te chauhin ka chhanga call chu ka dah nghal daih, Lo hawnglo mai rawh min ti kher chuan min ti na veng veng thei, tukina ka thilsawi ah khan huat tur ka sawitel loh nen nilengin min belo a, inthlahrung deuh chungin tunah ka call a ka hlawhchhuah chu ' Lo hawng lo mai rawh ' tih ani, ka hawnglo ang ka hawnglo khawp ang. Tlai chaw pawh ka eilo a Lalai te hnenah pawh ka riah tur thu bak ka hrilh lo, chaw ei tura min sawm luih pawn ka mut duh thu ka hrilh a, ahnuah chuan an chhuak diak Lawmi pawh alo hawng tawha mahse, ka be duh ta biklo.

" Thluakfinga nen in in hau chiang mai " Seni leh Lawmi lo luh ve hmain Lalai alo lut a

" Hau lo " Ka tih chuan 

" Ka awihlo ania aw, engtin nge atih che " Ka kawr ah apawt sek a, atawpah chuan ka ṭhu chhuak ta nge nge

" Sawi pawh ka sawi peihlo " Pawr deuhin kati a, Lalai chuan mitmeng dam thlapin min en reng

" Sawi la, hreawm iti lutuk pawh azia maithei asin " A tih leh takah chuan 

" Zingah inluah tur zawn ka tum thu vel ka hrilh hria a, angai kawi ringawt a " ka ti a, zep theih ni heklo kan mudun tih pawh ka sawi tel ta nge nge, tlaia ka biak dan te ka hrilh tel a, min lo chhanlet dan ka sawi chuan Lalai pawh a chek tlak tlak 

" In ngaihzawn lai hian thu inbat fuh lo deuh hi a awm ve ṭhin alawm, engpawh nise zanin chu riak phawt la naktukah Vari(Little princess) nen in hawng dawn nia. Inla innei lo a athu ang zawng zawnga i awm chhan tur a awmlo ania " A ti a, keipawh ka bu nghat nghat, Vari sawi takah chuan Fela ahawn khan lak atuma Lalai ten anlo phallo a, tunah pawh Lalai khumah amu zangthal huang mai. Zanah chuan kei lo ang takin ka muhil thei lo a, ṭhiante tui taka an mut laiin ka mu meng kar mai, Fela nen kanla inbe lo zel a An team ah chuan Seniori atel ngei dawn tih ka hrechiang bawk si diktak chuan ka thika ka thik miau avangin ka zeldin lo thei silo, ka mu mai mai te chu ka hah a ka hreawm ngawih ngawih, thildang ngaihtuah tum lahin ka ngaihtuah thei silo.

" Sangsang " Min sawi paha Lalai'n min koh chuan peih lo deuhin ka meng

" Fela'n alo lam che " A tih chuan ka harhchiang kawkin ka hria

" Hawn tir rawh, keimahin ka hawng ve mai ang " In letin mut leh mai ka tuma

" Tihtauh pawh angaih tawh loh chu, hawng phawt la ṭha deuhin sawi dun ru " Lalai'n atih tlat avangin peihlo deuhin ka tho

" Khawnge midang " 

" An chhuak lawk anih kha, Khalai ah khan nizana i thawmhnaw kha ka dah " A ti zung zunga nizanah Lalai thawmhnaw ka haksak tawp kha ania

" I bag kha kalo khai ang " Lalai'n ka bag min khaisak a, min duat ṭhin lutuk hi abulah hi chuan ka pangchang zual bik tlat zel, ka tai na riai riai chu tlem in ahreawm kati ve deuh kal pawh ati nuam vaklo. Kawtah chuan Fela Seni leh Lawmi te chu anlo ding khawma Seni'n Vari a pawm, an bul kan thlen rualin Vari chu ka pan nghala

" Engmah i ei mumal silo, in i thlen veleh in eipuar ang che" Lalai'n ati zung zung a ka bu nghat nghat, Fela'n motor kawngka hawn atum chu ahawn hmain ka hawn khalha, ka ṭhu lut nghal hmak aruala ka hawn avang hian ka lungawi ta tihna ani hauhlo. Vari chu ka be mawlh mawlh a, Fela chu melh pawh ka melh eihlo, nizana min ṭawngkhum dante, nilenga min belo te khang zawng zawngte khan minti lungawi lo ani. 

" Eng nge i ei ang " Inchhung kan luh rualin ati a, chhanglo in room ah ka luhsan leh daih, Vari chu khumah ka nghata keipawh ka muthla ve nghal thak, ka kawng bakah ka taksa pumpui hi akham vel vek. ka thawhna la reilo mahse, ka mutchhuak ala reh chuanglo a ṭha deuha ka sira Vari mu chu kuah thakin ka chhing leh riai riai.

Vari bauh ṭhat ṭhat thawmin min ti harh a, ka ṭhu chhuak nghal hluai, ka khum sirah Fela ṭhu in Vari chu alo chhaiha ka harh tih ahriat rualin min lo en nghal vut

" I mutui em? " A ti var, ' aw ' ti a ka chhan hnuah ka tai na zawk avang chuan ka tai chu ka dawm nghal vang vang a, peihlo deuhin ka tho chhuak a ka awmdan hi adik miahlo, rang zetin khum lam chu ka en lehnghala rin ang ngei ngeiin kalo tlang tak tak, Lalruatfela pawn chu chu alo hmu ve chiah ani mahna ' Hei hi ' ati a, rum zeta ka melh avang chuan angawi leh rih

" Ava han buaithlak tak " Ka ti hlak, tunlai chu chhe bawm kani ringawt

" Nimina ka thiltih vang kha ami? " Vari pawm chungin alo kal hnaia, Bedsheet a thisen kai chu a thlek kual

" Chhuak mai teh " Vin fe a ka tih pawh chuan a che sawn eih lo

" Naute i chhiat tihna ami? " A tih leh lek phei chuan ka ngei lutuk chu a samah ka keh sak nawk nawk, ' Ana' ati chul mai alawm

" Scientific i zir ani lawm ni? Mawl hu suh " Ka ti leh ṭhat a, thinrim ka chak zek zek chu achhan ka hrechiang viau mai bawk si

" I va turu ve " Asam ka thlah hnuah ati ṭuak, ngei zetin ka melh ram ram a, Lalruatfela chuan asam chul mam thuakin aner pah nung a, ngaihsak zawmlo in ka pad dahna kava ensan daih, pad lah chu kalo neilo leh nghal huiham ava buaithlak ṭhin tak, pad kher kher hi chu nghei ka hlaua ka inlei khawl ziah zela thla hmasa khan ka hmangzo a kalo lei tawhlo anih hi 

" Dawrah pad min va lei teh " Thaw halh chungin Fela chu ka tira

" Eng nge pad chu " Alo ti let hu

" Stay free va lei rawh, i hria em? " Ka ti leh ṭhata tai na bawk si Zawhna min zawt let chhen chu ka hne lutuk 

" Stay free te chu hria e " Min kalpel pahin ati bul bul, ala phun hram chu chum zui awk ka chak lutuk

" Pawisa i keng ami? I chhuah leh tawp " Ka tih pawh chu ahre hman tawhlo aniang alei thiam ve ngut ang emaw, Bedsheet chu ka hlip nghal sawk sawk a ka thlakna ala rei loh nen ka ngei hle mai. A dang phah leh tur pawh ka che peih tawh rihlo, ka thawmhnaw hak tur la chhuakin bedsheet nen bathroom ah ka lut a, engdang zawng aiin bedsheet chu ka su hmasa bera ka suk zawh hnua ka spin leh mek laiin 

" Khawnge i awm? " Lalruatfela'n ati lang lang

" Khawi minlo pe rawh " Bathroom kawngka chu hawng hlekin ka kut ka rawlh chhuak a, Fela chuan ka kutah pad chu alo dah ve mai, ka period hi chuan keimah hi ka confi theilo ka inbual te hi nidang zawng aiin ka inbual rei ziah. Bathroom aṭanga ka chhuah chuan alo reh leh ṭhap tawh, Fela pawh akal leh tawh aniang room ah ka lut tlanga, ka study table ah chuan Pad thar alo awm ṭeuh mai, ka dahṭhatna ṭhinah ka dahfel zung zunga, Sana ka en chuan alo tlai duai tawh, kamu nawn leh kher kha apawi ani Boss ka phone a ka tlai deuh tur thu ka hrilh chuan 'Awle ' alo ti ve thluam a atih chi khawp mai 

" Eng nge a " Room aṭanga ka chhuah leh chuan choka ah Fela alo ri rak rak a

" I eitur " Fridge ah thil adahlut a, eng nge tih erawh ka hre thei chiahlo 

" Chocalate maw!? " Fridge ah chuan chocalate alo dah thluah a, chocalate lo pawh eitur adah nual mai Nodless vel chu chhuarah adah leh bawka, a thil lei ho adah fel vek hnuah thawkṭha inti zetin min en

" I va fel ve " Ka tih chuan anui a, chutiang zawng zawng atih chu ka ring lemlo, a reh vang vang kha lab ah akal leh ta emaw ka ti a mahse, ka eitur minlo leisak zawk anih hmel. Choka aṭangin achhuak a chaw hmeh ka en kual vel laiin gas bula Fela phone chu alo eng pap pap 

" Hello " Seniori hnen aṭangin call adawnga

" Sangsang, nangmah elaw " Alo ti zang vah

" Umm, eng nge nita " Nem vaklo chuan kati let

" Englo ania in inah khan ka file pakhat ka theihnghilh a, Fela kha minlo hrilhsak la aremchan chuan lab ah minlo kensak teh se " A lo ti zung zung hreawm atih ve hmel lutuk

" Aw le, kalo hrilh dawn nia " Ka ti ṭha veleh mai a

" Ka lawm ngawt ang " Atih hnuah call chu adah ve nghal mai, phone chu dahsak leh mai ka tum a mahse, google a athil search lo lang chu ka en chak leh pek tlat, Search ah chuan Hmeichhe period chungchang te, an eichak leh an ei duh ṭhin ang reng atam mai chutiang chu alo search nual a, a chetdan naupangchhia zet hian min ti hlim ṭhin, ama tawkah alo buai veleh viau anih dawn hi. Ka ke bulah Vari alo vir kual leh sek takah chuan pawm kangin Fela chocalate min lei pakhat chu ka lachhuak a

" Princess, Company ah thlah i ngai em? " Sofa ah sawngnawi deuha ṭhu chunga Vari ka biak mawlh mawlh laiin Room aṭanga Fela lo chhuak chuan ati a

" I hman leh min thlah la, hman loh leh ka kal thei tho " Ka tih chuan ' Ka hman ' Rang zetin ati 

" Kala lungawi miahlo ania " Sofa ah Vari ka daha room a ka luh dawn chuan Fela chu ka melh ram ram

" I awm anawm loh chuan in boss hnenah chawh dil maila, i hawn duh leh min lo call dawn nia " Company kan thlenga, ka chhuah hmain ka kutah chelhin ati duah

" Ka call i chhang duh meuh ang maw " Ka tih chuan aphun hluk a

" Tlaiah nimin chungchang chu kan sawiṭha dawn nia " A ti a, chhang tawh lemlo in ' Ka kal dawn, ni hman nuam le ' Ka ti a motor aṭanga chhuakin Company ah ka luhsan. Nileng chuan ka awm anuam vaklo a mahse, hawn chu ka dil biklo hna hautak a awmlo a zuau lutuk anga lan chu ka duh biklo, Period vang mai maia hna ban hmat chu miin zuau minti lutuk palh ang mahse, ka tai leh taksa chu ana ve ṭhin khawp mai. Chhun chwlhah pawh kal chhuak ve peihlo in ka dawhkan ah ka bawk thlawp a, Fela chocalate min lei ka ken chu ka ei nuap nuap, Vawiin chu msg in minlo ve zeuh zeuha ka chhang ṭha peihlo thung, nimin ah biak pawh min be duhlo a aawm dan hi ka ngei rih hrim hrim. Tlaiah chuan Tea'n in in lamah ka kual dawn atih tlat avangin min thlah a, ka hnial ve renga hnial reng nuamlo khawpin min sawm ve tlat bawk si, in thleng min thlah hnuah lo peng lemlo chuan ' In hau tawh su ' ati a, min tlansan nghal nal nal, Inchhunga ka lut fel chiah ka phone alo ri nghal ral ral a, Fela ani leh nghal 

" In ah ka awm tawh " Call ka chhan rualin kati nghal tlawng 

" Kalo hawng ṭep, lo indim la " Alo ti dam thlup, min duatna aw ri hi chuan min fan bik riau zel, ahma deuha ka period in titak hian ka la na lemlo a, Fela nen kan inhriat hma pawn lak nat bik thla leh lak nat lem loh chang ka nei ṭhin, tunah kala na em em a Fela'n ngaihsak taktein min ngaihsak bawk si a awmdan ka thiamlo mai dawn. A sawi ang tak takin alo hawng harlo a Inchunga ka thawmhnaw pho ka seng laiin inkawtah alo tlan lut ve mek

" I ṭha em? Bus in nge Taxi in i hawn " Min hmuh rualin min lo hnaih ruaka, hmeichhia zawk ang mai hian zawhna min zawh leh ṭeuh tawh hi

" Tea'n min thlaha " Ka tih chuan chawpchilhin atum nghal hmak 

" Min lo be rawh ka ti che ani lawm ni " A ti nghut

" Ka tihbuai che ka hlau alawm " Ka ti a

" Min ti buailo, nidangah chuan mipa dang inthlah tir tawh suh " Ati leh hmuk

" Aw le boss " A lungawi lo leh tak tak dawnin ka hria, chutia ka chhan tak vang nge ahmel pawh apangai leh ta viau. Ka thawmhnaw sengho chu sofa a ṭhu chungin ka thlep mawlh mawlh a, ka bulah Vari nen anlo ṭhu ve reng tv achhuah ve em ema a en tak tak chuanglo. Kan inkar chu aṭha chu ani leh mai, ka lungawi loh rukna pawh ka sawichhuak duh ta biklo a, kan inkar ṭha lai tih chhiat leh ka duhlo. Zanah chuan room ah hna athawk ve ngeia aluh dawnah min hrilh thlap, vawiin lamah hnathawh tur ka hawn loh avangin keichu ka awl viaua, Korean drama chhuak thar Twinkling watermelon chu ka en mai mai, movie ka en apianga hmaih theih miah loh eitur ka inchhawp leh nual bawka, Fela'n chocalate min leisak tam bawka nuam Singkhaw hi animai. Ka taksa kham lutuk avang chuan duh ang pawn tv chu ka en tui theilo a, ṭhut reng pawh peihlo in ka mu leh nge nge mahse, sofa ah chuan duh angin ka tal thei lo nen tv off in bathroom ah ka inthlak leh te te a chumi hnuah ka mu lut a, Period la na ve miah lo te hi kava han awt ṭhin tak, thlatin chuan hetiang hian kala na ngailo mahse, lak nat bik riau thla hi ka nei ṭhin a, ka laknat loh thla chuan anuam thei lutuk Puan sin ṭha sat sat in ka mu kawm ngala Ka room kawngka alo inhawng rak Fela alo lut a

" Hei tuilum ip, i tai leh kawng vel kha dep la " Atih chuan hnukulh fe in ka en vang vang, athiam ang tawka min ngaihsakna chu ka tan ahlu

" Ka lawm e " Ka tih chuan nui sukin abu nghat, tuilum ip min pek hnuah min fawp zeuhin ' Muttui, min mamawh chuan minlo kaitho dawn nia ' ati ril ruih a, ka bula riak tura sawm ve mai rilruk mahila ka sawm talo chu ania thil tih chi ni heklo le. Tuilum ip chuan min chhawk ve viau lehnghal rin ai takin ka mutui em em bawka, zinga ka thawh veleh meuh chuan Fela alo tho leh diam tawh

" Naktukah kanu alo zin dawna " Atih chuan ka thingpui inlai ka phut ṭhawt lo chauh

" I nu maw? " Ka ti chiam 

" Umm, hmuh che aduh " Ati sam et lehnghala kei ka thinphu arang nghal dawt dawt 

" Min hau ang em? " Ka tih chuan nui vur vurin athil tihlai dah meuhin min lo en a, ka hmel serious tak chu ahmu thiam nge anui hmel chu abo nghal hmak

" I hlauthawng anih kha kanu chuan tumah ahau ngailo" Ati dam thlup

" Min hnem lo emai " Ti hlarin ka chhuahsan nal nal, Fela nu hi a thlalak ka hmu tawha Fela'n a room ah an chhungkaw thlalak pawh a tar nghe nghe. Face to face chuan kala hmulo thung, sawi tawh angin mizoram lamah an tal tamlo a, hmu pawh ni ila ahma zawng chuan kanu ṭhiannu ani maia kanu ṭhiannu ani tih pawh tun hnaiah ka hre chauh a, kanu ṭhiannu anih piah lamah ka bialpa nu ani tawh tlat a, ka nervous nghal em em pawh hi a awmlo hranlo.

" I nu chuan chaw hmeh ngainat bikte anei em? Vawiin ah ka hna banah kalo bazar ang, angainat zawng leh a duh chi min hrilh zung zung teh " Kan chaw ei laiin kati a, ka helhhawlh deuh tlat 

" Engpawh a ei thei alawm, i nu lokal a i awmdan ang khan awm tawp rawh " Ati a, ka awmdan hi ahrethiam thlawtlo 

" Kanu lokal khan nangpawh i mizia adang vek kha aw, ngaihsam fe in ṭawng reng suh " Ka tih chuan angawi a, chaw a ei chhunzawm tuam tuam, chhuih chawrh kava han chak tak.

Hna ka kala kan hun hmandan chu angai ang tho ani, ka taksa kham ṭhum chu ala reh hlei theilo, Kan chawlh laiin Dari ka ring vel min malis saka anuam ve khawp mai

" Sangi, inluahtur ka hmu mai thei " U zira'n atih chuan rang deuhin alam ka hawi nghal

" Khawi ah " Ka ti nghal var

" Kan company aṭang hian ahla hranlo, Ka ṭhianpa Saia tein ania, ahnuai saw luah theihin an siama tunah hian luah mek an awm mahse, thla thar ah hian an insawnchhuak maithei a " A tih chuan

" Min lo sawisak em? aman te pawh lo sawipui nghal rawh aw " Ka ti zung zung ka ṭawng zung zung chu Miriami leh Dari'n min nuih vak vak a

" Nizanah ka hrilh alawm, an insawnchhuah dawn chuan kalo hrilh leh ang che atih kha, luah man chu atlawm lutuk lo mai thei ato lutuk chuanglo ang, an inhnuai saw azau ṭha a " 

" Aw le, min lo ngaihven sak rawh aw " Ka ti tel leh hram, Kan hna banah chuan bazarah ka tlang ta ngeia kanu ka call pah bawk, Lalruatfela azawh tlak siloh kanu tal ka zawh loh chuan 

" Aw, Sangi " Alak rualin alo ti nghal, Hello te pawh han tih ve hmasak awm

" Hello te ti ve ṭhin la " Ka tih chuan 

" A ho mai mai, ka biak tur ka chiang alawm " Alo ti ve tlat

" Englo I ṭhiannu alo zin dawna, ka vawikhat hmuhna tur ani bawk si, a duhzawng min lo hrilh teh " Ka ti a, zawi muangin kawngah ka kal pah hnak hnak, thawm lah chu a reh lo em em lehnghala kanu ṭawng ri pawh ka hre ṭha theilo

" Lui lam sa angaina lutuk, chakai te kha leitur zawngla mahse, an man dan zawt uluk rawh aw, Pa pawh a ngaina reng, Ei theih loh vak aneilo thlai hnah te kha lei uar la. Alo kal anih phei chuan aman eirawngbawl atum leh vek mai ang midang rawngbawl ei athiam hleinem " Alo ti bawrh bawrh, an ṭhian dun chuan an sial hle mai kanu pawn a rawngbawl lo chu a eiṭha peihlo

" Nu, i ṭhiannu hi asual em? Biak harsa deuh ang te kha ani ang a, ṭawngkam ka thiamlo ve ropui si " Chaw hmeh enkual dun dun pah chuan kati bawrh bawrh a, kanu alo chek tlak tlak 

" Tetei chu asual lo kei angin a phunchiar lo bawka, Fela nen khan an mizia a in ang khawp ang, Amah adam dapa kan mizia a in anglo mahse, kan inkawm ngeih ve em em tho a. Fel deuh khan awmla Tetei chuan awm mai mai te athiamlo a, thil atih hma te khan tihtur te kha zawng ve zung zung ang che " Alo ti leh duah 

" Awi ka ning, alo kal chhung chu dorm ah ka awm rih dawn mawni " 

" Iti anglo emai, i huphurh anihkha huphur chhan tur a awmlo, a ei dawn che pawh ni hleilo " Kanu zaidamna pawn atlin leh ta vaklo nge min lo vin leh hlak hlak tawh

" Anih leh engtin nge ka koh ang " Ka tih leh chuan vin zetin ' Thansangi em em chu aw ' alo ti vak

" Ka hrelo ve animai alawm, vawikhat pawh kala hmulo a ka nervous ve anih hi " Ka ti let ve hlar

" Nu tete iti dawn nia, hnaisailo nu " Ati a call adah nghal daih, tum bar in phone chu ka en rum vaka, sawtna phei chu a awm chuanglo. Kanu sawi ang chuan lui lam sa chu ka enkuala vanneih thlak deuhin Chakai tharlam deuh ka hmu nawlh, ka lei ta vata mahse, a to khawp mai. In ka thlen meuh chuan kawtah Kan thluakfinga leh Vari'n min lo hmuak leh reng tawh, ka hawmg min hmuh rualin ka thil khai minlo chhuh a

" Eng nge i lei em em a " Ka thil khai chu a thlek a, ka hah bawk nen chhan pawh chhanglo in inchhungh ka lut 

" Hetiang lei angailo ka tih kha " Ka thil lei ho kan dah chhuah laiin ati bul bul a

" I nu chu chaw lawng kan eipui dawn ami? " Ka ti hlar

" Thinchhenu, i thinchhiat ala reh dawnlo ami? " Kan thusawi nena inmil lo lutuk in ati hlauh lehnghal

" I ṭawng peih lutuk " Bawkbawn lian ṭha deuh chuan a lu ah ka vua a, ṭhen sawkin atuai nghal vut vut

" Malsawma sawi ang tak takin i bialpa ni tur hian kungfu chu thiam angai anih hi " A ti a, ka ngaihven zawm duhlo ka thil lei ka dahchhuah zawh hnuah Chakai chu bucket ah ka chhuah a, thi anla awm miahlo naktukah daih siam tur ani sia tihian lo awm rih rawh se, ka chhuah ta chu nuam anti ve khawp mai, naktukah chhuan hlum tur anni tih chu inhria se an che kual peih tawp awm silo a, kan hma hun kan hre lawk theilo hi chu keini mihring mai nilo thilnung dang te pawh kan vannei ani. A tukah chuan Fela nu lam turin Lengpuiah kan kal a, engvang teh hrep nge mawni ka zun lah chu a chhuak sek leh nghal

" Alo thleng " Fela'n atih chuan

" Lo buaipui lawk, washroom ah kava kal leh lawk ang e " Ka ti a, ka kalsam leh nal nal, ka zung zo ka chhuah leh chuan Fela leh nu pakhat hleitling deuh hi anlo ding dun tawha, Fela nu chu ani ngei ang

" I zung zo tawh maw? Anih chuan kan kal dawn mi? " Min hmuh rualin Fela'n ati sawk sawk a, Nu tetei chuan min be lemlo in min en vang vang, amah a inthawm dan leh a hmel hrim hrim azahawm em em bawk si biak mai dan tur ka hre biklo

" A hma ah hian ṭhu rawh, ahnungah kalo ṭhu zawk ang e" A hma ah aṭhut duh takah kati a ahnungah ṭhut ka tuma, ahnungah chuan min luhkhalh daih, lai hu in Fela ahnunga bungrua dah lut mawlh mawlh chu ka en ringawt

" Nu tete, i lo thlawk nuam em? " Biak loh tawp ai ah kan tlan chhuah hnu chuan kati a

" Thlawhna chuan hi chu ngaiah kala nei theilo, chuvang ania Bawiha tlawh tur pawn kalo zin zen zen ngam loh" Ati bawrh bawrh, ka thaw huai mai

" Keipawh ka rap tlat " Ka ti a, atirah min be silo aṭawng mawh deuh anih ka ring ve ngawta mahse, rin aiin aṭawng duh kanu nen an ṭawngdan vel a in ang em em mai lehnghal

" I hahdam huai em? " Nu tetei inchhungah alut hmasa a, Fela nen kan khawmuang

" Atirah khan min be silo a, aṭawng mawh viau turah ka ngai hmana " Ka ti nang nang

" I nu nen khan an in ang lutuk " Ati ve a kan ngaihdan a in ang anih hmel

" Chakai te inlo lei alaw ava tui dawn ve, a bawppui lah chu alian ṭha sia " Bucketa chakai ka dah ho chu a en a

" Nu tete Kalo chhum ang, in tifai hma la " Inla fel deuhin ka ti zung zung, inchhung kan luh aṭangin ṭhut mai mai ala neilo reng reng

" Aw le, rin aiin ka chau riau " Ati a, room ah alut bo ve ta

" Chakai chu chhum tur ami? " Fela choka ah alo lut a

" Umm, chhumna tur tui ka chhuang mek " 

" Chaw hmeh dang chu siam vak angailo, chakai a awm chuan atawk " A ti deuh duah a, ka hmui ka ti sawi zeuh chu alo hmu hman nge 

" I hmui ti sawi ziah suh " Ati nghut, ka tui chhuan a so a Chakai chu thlak mai ka tum

" Tikhan i thlak tawp dawn mi? " Fela'n ati a, a chil a lem khalh 

" Ka thlak tawp mai loh ten " 

" That hmasa phawt rawh, anung chunga chhum te chu iti anglo emai " A ti teh tlat a, thawpui kala hluai ringawt

" Ka khawng hlum phawt dawn mi? " Ṭawng rin hlau deuhin kati kha kha 

" Chutiang anilo, anung chunga chhum te chu " ati leh hrama thlak luih ka tum lahin Min chelh tlat bawk si, amah zawk hi ka khawng hlum zawk dawn nge pawh ka hrelo

" Diklo a awm ami? " Nu tetei choka ah alo lut a, mak ti deuhin kan pahnih chuan min en tawn zak zak, a awm ve reng gas bulah kan ding a Chakai ka dahna bucket ka kenga Fela'n ka kut a chelh bet tlat bawk si, mak tih loh chi pawh anilo

" Nu, nangman lo siam rawh Princessi hian anung chungin chhum atum " Lalruatfela'n ati zawt zawt, ' Engmah anilo' te atih ve ka ring ania, anu hnenah a zualko zawt zawt

" Tiang ngawt hian alawm chakai ka chhum ṭhin " Ka ti ve tlat a, Nu tetei pawn min tih vak dan ahrelo nge anui a

" Kalo siam ang e, Ka fapa hi chuan lainatna te hi angah asin " Ati a anui pah vur vur, ngei deuhin Lalrutfela min chelhna chu ka thing thla a, Nu tetei chuan ka tui chhuanso chu suanin chakai chu amal tete in a chiah hlum a, chhum hlum nen danglamna a awm loh nen kan thluakfinga hian engti ngaihin nge angaih pawh ka hrelo e

" Chhum hlum nen a in ang reng sia " keipawh hi ngawih mai mai hi ka thei thlawtlo, Fela chu a chhuak daih a hmelchhe ber bur lutuk mai

" Bawiha hi chu a cial ve alawm, thil te hi aharsa zawng zel hian akalpui ṭhin a, keini'n awlsam taka kan tih mawp mawp ang hi ani velo. A tetlai phei chuan ahahthlak ṭhin ania " A fapa chanchin asawi lai chuan Nu tetei mit chu a de sar sar a, a fapa ahmangaihzia chu achanchin asawi zawng ringawt pawn amitah alangchhuak thei hial ani

" Kalo chhunzawm tawh ang, kan thu a inhmulo laklawh mai mai anih kha, chiah hlum hmasa rawh tise ahar loh nen " Towel nen inbual tumin alo chhuak ve vek tawha, kan ti khawtlai vek anih hi

" Inthlahrung lutuk suh che, ka fapa nen in chungchang pawh ka hre vek tawh alawm, min zah lutuk lo la " A ti a, ka samah achul zeuh, chumi hnuah choka aṭang chuan achhuak ve a keipawn lawm ru deuhin chakai chu ka siam chhunzawm. 

" Chakai chu atui tak tak hle mai, i pa Thana ei atan ka it" Chaw ei laiin Nu tetei chuan ati a, Thana atih hi a pasal Fela pa ani

" Kapa'n chakai a ei duh loh kha " Fela'n atih chuan

" Ei duh e, kei berin ka ei tlut tlut zel sia a ei ve mai loh chuan " Nui hak hakin ati a, an nufa chuan an in chhang tawk khawp mai

" Sangi, chakai chu i ei na nge " Ati leh daiha, chakai hi eidan ka thiamlo a ei loh ah ka tlak tawp zel

" Umm, ka ngaina vaklo "

" Thil tui deuh i chan anih chu, Fela leh a pa pawh hian an ngaina lo a mahse, tunah chuan i pa thana pawn a ei duh ve tawh lutuk " A ti leh bawrh bawrh, Nu tetei ho chuan zanriah chu puar takin kan ei.