Lunglawm Tikimtu chapter-21

 " Ka biak hian tlanchhe pahin min chhang ziah suh " In chhung ka lut nge lutlo kanu'n alo ti leh nghala, min hauh hi chu avan peih ve chiang tak

" Ka tlanchhe pah kherlo " Ka tih chuan rum zetin min en a

" I tlanchhia ka tih chuan i tlanchhia animai " A ti leh daih, phakar ve bawk sia

" Lucy kha eirawngbawl pui rawh, vengchhaka i pi adamlo a, ka han ngaihven ve lawk ang " Ti paha achhuak chu ka zui chhuak leh a

" Amah pawn abawl ve thei reng alawm, i bulah kalo kal ve dawn " 

" I va han a tak em i upat ve tawh nen hian, thil te hi ngaihtuah chiang ve ṭhin rawh " A ti hlak hlak

" A bawl zo ṭep tawh tho alawm, naktukah ka bawl ve mai ang " Ka ti ṭalh, kanu chu ka zui ve zela ala phun char char ka zui fuhlo khawp mai

" Nakinah chuan mo ila ni ve dawn, chuvang chuan Lucy dinhmun pawh hrethiamla, kawmngeih tum rawh amah ala naupanga ahriat ngai miahloh te inchhunga awm chu ahreawm dawn ania, mo kan nih hian inthlahrun ana duh bawk " Ngawi rengin kanu thusawi chu ka ngaithla a, ka chhanglet lem hleilo Lucy hi ahranpa in ka ngei anilo a huatna pawh ka neilo, Midang kawm nel zung zung hi ka thiamlo a, kanu lah hian kawm nel zung zung thei turah hian min ngai lehnghal, ka kum tam tawh mahse, ṭawngkam thiam tak ka nilo hi abuaithlak, Thawveng leh harhvang takte hian ṭawngkam anlo thiam lutuk kherlo tih chu keimah aṭang hian a chiang khawp mai.

Zanah chuan kanu te an room ah an awma, Mampuia te nupa lah kapi te tlawhin an chhuak daih bawk si, keimah chauhin sitting room ah min awm tira, min han ngaihsak loh zia hi. Ka room ah lutin kapa te pek tur envlope chu kala a, an room ah an awm laiin pe fel diam ila aṭha ang

 " Kan tello hi chuan i awm rei theilo mawle " Ka lut nge lutlo kanu'n alo ti nghal, kapa chu khumah amu zuar a kanu'n a chawn alo zutsak

" Vel che hian a, i intithei sia maw " Ka ti kha kha, kapa chuan min nuih hak hak thunga kapa nen kan inkar pawh ahma ang mai kha ani leh tawh, in hau ṭhin in inti vui vai mahila Pafa karah inhuatna a awm reng theilo

" Ka chawn hi ana riau a min zutsak anih hi, i nauten an lensan che ami? " Thawhkan deuh pahin kapa chuan ati a, an khumah chuan ka ṭhu kai ve nghal

" Lensan daih e keimah chauh in alawm ka awm " Vui aw deuha ka tih chuan kanu achek tlak tlak

" I nep ṭhin emai " A ti a

" Nep thil anilo e, areh ve tho asin " Ka ti let hlak

" Englo ania thil pek che u ka duh vang ania kalo luh " Kanu'n min chhan leh hma chuan ka ṭawng khalh

" Eng nge ni " Kapa zawkin ati a, chhang talo chuan Envlope chu ka pe, a chhunga awm an hmuh hnu chuan kei leh envlope chu min en tawn seka an over e

" Ava tam ve i inluah man te i pe tawh em? " Kapa'n ati dam dap

" Pe e, ka hlawh apung ve tawh alawm, ka mamawh tur ka lei tawha kha kha christmass present anih kha, hlawh pawh la leh ila khatiang zat chu ka pe thei tawhlo ang che u, tun thla chu bonus anih kha " Ka ti duah chu kanu leh pa chuan an lawm ngang mai, an in en a hlim tih hriat taka an in nuih lai chuan ka thinlung hi ati hlim veng veng. Kan hmangaihte an hlim hian kan hlim ṭhin an tih hi tunah hian ka hrechiang khawp mai, kanu leh pa te hlimna hi thlen reng ka duh, ka thei ang em tih erawh ka hrelo, kan hmahun chu Pathian kutah a awm miau si a.

Pathian hruaina in Christmass leh kumthar chu kan hmang a, buaina leh chhiat tawh thu hrelo in boruak muanawm tak hnuaiah kan hmang zo ve ta, keipawh ka chak ṭhin em em kohhran ah leh ka ṭhalai puite bulah ka tamtal tam ve theia anuam kati khawp mai, zai len khawm te anuam si tum ṭum chu anuam velvek maiin ka hria, Kumthar kan hman zawh hnu lawkah Aizawl ah ka let leh thung a, kan khua ka ngai veng veng. Lalruatfela'n kar khat lek chawlh anei hlauha kan in ngai vesi Kan khua rilru ah la awm reng mahse, ka bialpa ngaihthah ngawt atheih bik siloh avangin Aizawlah ka awm leh diam tawh chu ania. Fela hmuakin Airport ah ka awm a hlim leh phur zetin alo chhuahna tur chu ka en reng, rei vaklo ah alo chhuak a ahma ang rengin ala hmelṭha em em tho. Ngaiin thlahlel viau mahila ka hmuh takah chuan tihber tur ka hre leh silo

" I lawm vak lo ami? " Ka hmaa alo din ruala atih chuan ṭawngkaa chhang mailo in kalu ka thing nawk nawk 

" Min lo ngai lutuk zawk ani maw " A tih leh chuan 

" Kal phawt ang " A banah ka kuaha, tiang taka ka ngai hi mak ka inti

" Nimin lamah pawh kalo tifai lo reng reng " A in chhungah kan luta a awm lohna la rei vaklo mahse, abal reuh lutuk

" A pawilo, kan tifai zuai mai dawn alawm " A ti awlsam leh et a, ahnungah ka din avangin alo leh hawia nui vur vur chungin ka hmuiah alo fawp zeuh, awmṭha leh nghal mailo chuan min kuah nghal hlu hlu

" Ka ngai che " Ati a, a inla hrang leh nghal mai dawn emaw ka tih laiin min kuah nghet sauh sauh

" Keipawn ka ngai lutuk lutuk lutuk che alawm " Kuah let paha ka tih ve chuan anui che dawt

" Ka bulah riak turin sawm ta che ila, min beng em lo ang tiraw? " inla zei fahranin ati khanglang

" Ka hnek duh ang che " A naka piai sak pah chuan kati a, min kuahna pawh athlah rawk rawk mai alawm

" Kalo thlen ve chiah hi " Dim vaklo a atih chuan

" Ni reng e ilo thleng ve chiaha, hahdam ve phawt rawh " Nui sen sen a ka tih leh rualin aphun hluk, inchhung chu azualpui kan tifaia, room ka tihfai sak laiin Fela chu a inbuala, bedsheet pawh ka thlaksak leh vek azin dawnte chuan bedsheet te hi hlih ve tur ania a awm rei dawn silo

" Ka inah chaw chu kan ei mai dawn mi? " Room ah alo luh ruala kalo tih chuan abu nghata, kawr aha lo a boxer nen chauh a awm, a taksa hi chu ama tawkah nalh ve tak ani, a inhruk leh thuak thuak hnuah towel chu chair ah adah leh tawp a, asam ala hun bawk si adarah afar thla fep fep a

" Dah tingtawm ringawt zel suh " Ram hmarhin kati a, towel chu la in dim lo deuhin alu chu ka hruksak

" Min dim ve deuhla " A lo tih chuan ka dim lo sauh

" Towel hi dah tingtawm ziah suh, pawnah i zar chhuak peihlo anih pawn chair ah hian zar pharh tal zel rawh " Ti hlak hlakin room aṭangin ka chhuahsan a towel chu inchungah ka han pho. A inthlak fel hnuah kan in lam chu kan pan leh a, kan inhmu leh thei ta chu kan hlim dun khawp mai, motor a khalh lai pawn a kut leh lam a awl changin kakut alo vuan ve ziah a, nuih hi ati za ṭhin asin 

" I ṭhianpa chu alo hawng leh tawh alaw " U duhi'n inhnuai kan pan tur chu min lo hmu leh hmana, min biak takah chuan din loh chi ani silo

" Aw, alo hawng zuai akal leh dawn " Ka ti ve mai

" Anih chu i lungleng thei sia tiraw? I hlim awm " Nui har har chungin ati leh a, ' Nia ' tiin ka nui lui a

" Fela, Sangi hi a luck ania veng uluk rawh aw, inleng pawh anei thei teh ania " Kal mai kan tum laiin alo ti leh nui mahse, athilsawi duhdan chu ka ngaihdan ani lo khawp mai

" Inleng ka neih ngailoh kha, iti anglo emai " Chang deuh fakin kati a, lungawi lo deuh ang chuan ka lang chuanglo, lem zetin ka nuiha Fela chu ka kalsawn pui nghal

" Inleng chu i nei ṭhin tak tak ami? " Inchhung kan luta kawngka ka khar ṭhat leh laiin Lalruatfela'n min zawt, min zawh leh kha ka ring sa hrim hrim

" Min ring miahlo ami? " A zawhna pawh chhang ta chuanglo chuan zawhna ka zawt let ve daih

" Zawhna ka zawt hmasa che " Tak ngalin min en, U duhi thilsawi vang mai maia min ringlo nghal ringawt chu ka lawmlo

" Christmass hma daih khan Tea'n tlaikhat min thlah chubak inleng ka neilo, ka ṭhiante zankhat anlo riak bawka" Lungawi vaklo chuan kati a, kalpelin ṭhutthlengah ka ṭhu tau hmak

" Ka rin loh vang che anilo, ka zawtchiang mai che ani " Ka bulah alo ṭhu ve nghal, ka en duhlo lui tlat

" In tih tauh khum lo teh ang, i bulah hun ka hmang rei dawnlo ania " A ti bul bul a

" Min ringlo awm fahrana thil min zawt kha ka lungawilo alawm " 

" Thil chu engpawh nise chiang taka hriat hi ka duh ṭhin, nangpawn Tea lo len thu chu kan in biak laiin sawi tur alawm " A ti ve duaha Tea lo len khan ka hrilh lo tak e, a thik ve ṭhin sia athinrim leh phah ang tih ka hlau ani

" I thinrim leh vak ka hlau alawm, kan inhmu thei bawk silo a ka thlem thiam dawn bawk lo che a " Ka tih chuan ka chalah zawi tein a pen keuh a

" Ahunlaia thinrim hian buaina tur tamtak kan pumpelh thei ania " Nui seih chungin ati a, ahmelṭha tih hi ahre sia hmelṭha deuhin anui ziah. Hun rei tak minla awmbo sanlo mahse, ka tan chuan rei fia fia tak mai ania, eirawng abawl leh surh surh a, chair ah ṭhuin dawhkan ka bawha a chetla chu ka thlir reng

" Ka duh hmel bik ngawih ngawih che " Ka tih chhuah hliai takah chuan athiltih lai dahin ka lam alo hawia

" Engmaw i sawi " A ti a, pawisawilo zetin min en kur bawk si

" Ti hian i eirawngbawl en in kalo awm ve renga, ka duh hmel bik ngawih ngawih che " Ka tih nawn leh chuan anui chhuak hawk

" Va mu hahdam rawh ka tih pawn i duh tlat silo a " A ti a, akut chu silin a apron hak hmaa hru thuak thuak pah chuan ka ṭhutna bulah alo kal hnaia

" Ka duhlo alawm " Melh chho kiau chungin kati, akut chuan ka biang adawma bahkhawr rim anam nghal vung vung

" Bahkhawr i khawih ani maw " Ner nang chunga ka tih chuan nui vur vurin

" A rimtui iti em? " A ti ham ham

" A rim ana emai " Ka biang adawmna akut vai persak pah chuan kati a, amah lah chu anui hawk hawk leh nghal

" Kan romantic lo ve e " A ti a anui tawp leh theilo

" I ninawm nui reng suh, Ṭhinga " Pawr hlara ka tih chuan anui tawp ve ta hram

" Kan in karah Bahkhawr par tir lovang aw " A tih leh zel chuan keipawh insum thei tawhlo chuan ka nui chhuak ve hawk, bahkhawr mai mai pawh kan han lawm ta viau chu ania a va ho mai mai tak.

" Min zaisak leh dawn em? " Kan chaw eikham pawnah kan ṭhu a, ka inluah kawt vel hi azau nuam riaua zanah lah thla eng alang chiang theiin a eng nuam ṭhin si, lungleng mi tan chuan ṭah zawih zawihna tham ani. 

" Ka zaithiamlo " A ti a awihlo tak kani, chhanglo in inchhungah ka lut a, ukulele keng chungin ka chhuak lehnghal a 

" Kha lem, i zai leh ngei angai " Phur zetin kati a amalchungah ukulele chu ka dah

" Kan pahnihin aw " Ka lam lo hawi chungin ati a, kalo en ve reng bawk si alai deuh nge hawisawn vutin Ukulele chu a thlek kuala

" Eng hla nge kan sak ang " Ṭhut hnaih sauh pahin kati a, Fela chuan Ukulele chu a ri adik nge diklo a test ve mek bawk

" Hetiang hi chu ka perh thiam vaklo " A ti leh bul bul tawh, a thilsawite hi ka awihlo ve chiang e 

" Ka awih hlawllo che, guiter aiin ukulele perh te chu aharlo zawk " Kati chiam a, Lalruatfela anui suk suk

" Eng hla nge kan sak ang Princess " Dam diai in ati a

" Isual atel ve tih kha, i thiam em? " Ka ti a, a thiam ka ring chiah lemlo

" Pu google kha lyrics dil rawh " Ati a ka thiamlo ati silo a athiam turah ngai ang, Ka phone phawrin Google ah lyric chu ka search, Ka hmuh hnu chuan Ukulele chu perhin kan zai ṭana he hla hi chu hmani deuh aṭang khan nalh kati thara athu engkim hian min hneh ngawih ngawih

' Ka thinlung ril hian chhan sen loh zawhna, a dawng ṭhin mahse, ka chhang thiam lo. Envangin nge maw ti a inzawtin chhanna ka neilo ka ring thiam silo ' Fela pawn azaithiam ve khawp mai, Ukulele ri lah analh phian bawk si

kan aw nalh lam chu sawi talo mai ila, Pathian kan fak hi chuan zai nalh vak hi alo ngai hranlo e. Tlai deuh takah pawh chuan hawn ala tum miahlo a, ani hi riah atum veleh tak tak aniang

" I riak dawn ami? " Ka tih chuan 

" Riak lo tur hetiang em em a rei ka awm dawn ami? " Alo ti let hluk

 " Kan chaw ei kha a rum viau ami? Iva pawr ve " Min chhang pawr lutuk a thil ka tisual ta emaw kati dawn alawm

" Hnawk minti ami? " A ti nghuta ading hluai tawh, bo fe in ka dak chho a 

 " Hey..thinrim turin engmah ka sawi loh kha, zawhna ka zawt mai che alawm " A kut ah ka chelhsaka ka sawi pah zeuh zeuh

" Keipawn thinrimin ka sawi hleinem " A ti a, a aw ki chu ala nem chuanglo

" Inchhungah lut ang " Ka ding ve a, inchhungah ka kai lut 

" Titau hma sia " Zawi tea ka tih sep chuan

" Nangpawh nila i lungawi biklo ang, ka titau lo ka lungawilo mai ani " A ti leh nghut, aruk tete in ka nui tet tet tawh amah lah hi inla lungawi lo ve ropui sia

" Zawhna ka zawt mai che ania, i pawr vak khera ka tan pawh anuam hleinem " Common room ṭhutphaha ka ṭhupui hnuah kati nang nang, Vari'n min lo zuan leh that that tawha ahmain a duat theih nen a inla lungwi lo bawka Vari pawh a tlawhsawn deuh nawk nawk

" Iti na anga sin " Ka tih te chuan rum zetin min en a, ka ngawi nghal hmak zel, a lungawi lo miau bawk sia engmah sawilo chuan ka ṭhu ve ta reng, diktak chuan aninawm duh khawp mai Lalruatfela lah chuan athei em em mai lehnghal a

" Min hlau ami? " Kan ngawih dun chawrh chawrh hnuah alo ti veleh nawlh

" Engvangin nge ka hlauh ngawt ang che " Lawm vaklo in ka ti a

" Ka bula awm i hreh, min pehhel tlat anih hi " 

" Chutiang engmah a awmlo " Ka ti nghal vat vat, chutiang ngaihdan atthlak lutuk te chu engtin nge alo neih theih

" Rilru dang i pu ta zawk nge " A tih leh chuan sawi tur pawh ka hre tawhlo, ka rilru nilo pui pui min puttir ani ringawt alawm

" Chutin ka rilru nilo pui pui min puttir suh " Hawisawn hmak pahin kati ve hlak

" Min hnar chang hian khitiang rilru khi ka pu ṭhin, ka mizia i hria a min nin maite ka hlau, nangmah vang hian hlauh ka ngah ta khawp mai " Za lo zeta nui chungin ati a, a aw rik dan chu na ti ngawih ngawih a ang, chu chu ka sawifiah thiam dan ber ani, Insawifiah chiam dan tur leh sawi ber tur ka hre tawh silo, hmeichhe tiha mawilo khawpa hnaih chilh ruakin ka fawp hmasa ta a, ka fawp thut chu a bangbo deuh nge chet mai nachang ahrelo mahse, pangai turin hun aduhrei lo ngang mai, uar zetin min fawp let a min kuah bet rawk rawk 

" Ka mipa thlakhlelh ber ini tih i in hrelo ami? " Kan in thlah zawk lai chuan ka ti halh, Ka thlahlel tih hi ahrethiam lo nge a hrethiamlo der ni.

A tukah chuan ka hmai za mer mer avang chuan peihlo deuhin ka meng siar siar a, Hnai set sawtah Lalruatfela'n uluk deuhin min lo thlir dauh dauh, ka meng nghal kawka Ka awmdan avangin Fela chuan min nuih suk suk lehnghal

" Awm hla teh " Lai zetin a hmaiah ka nam saka, anui hawk hawk lehnghal, thawmhnaw mumal kala inbel miau lo a azahthlak ve ṭhin lutuk

" Vun mam nu " Rum zetin ka melh ram ram tawh

" I hur anih mai chu a " Ka ti hlak a Fela chu aphun nghal hluk

" I itawm ka tihkha " A lai duh reuh bawk silo, hun dangah lem a laih hmat theih tehlul nen.

" Lalai te chu tlai lamah min lampui rawh aw " Ka tih chuan

" Anlo hawng ve tawh dawn mi? " A ti a, ṭawngkaa chhanglo chuan ka bu nghat, Lawmi chu alo hawnna arei tawh aniang ka hmu zeuh zeuha mahse, min hmulo ang maia a awm tlat ṭhin avangin ka hrelo awm ve hmiah hmiah. Titak hian rei tak a ṭhian ni tawh min haw hlawm tawp thei hi ka fak thlawt, ka theih veloh thil anih avangin ka fak em em bawk ani. Fela chu a pa te insak tir a endik dawna, kei erawh Vari nen in kan nghak nileng leh dawn aniang, hna kanla ṭan ve miau silo a tihtur vak pawh ala awmlo, Fela kal hnu chuan kan khua aṭanga kanu pangpar phun tur ka lak ho chu Pot ah leiṭha dahin ka phun ve mawlh mawlh, ahma in Pangpar hi ka ngaina lutuk lo a Nu tetei khan khawih vel min ti tui laklawh tlat

" Pangpar i ngaina ve ami? " Keima tawkah kala buai ve nak nak lai chuan U duhi alo chhuk ve a

" Ngaina lutuk lo tihtur a awm silo a ka tia, ka buaipui ve chhin mai mai anih hi " Ka ti zung zung, Vari teikual sek chu awmṭha turin ka ti leh sep a, ka hauh vena chu eng atan mah atilo

" Ka ngaina lo lutuk, Saia nu alo zin chang hian phun tur te hi min lo ken a, achang leh a tih nun sa pot in alo keng ṭhin bawk. Keilah hi pangpar khawih neuh neuh ka misa silo a, a hawn hnu lawkah athi leh daihzel " Ka bulah lo ṭhu in ati bawrh bawrh

 " Keipawh ka ngaina lutuk lo mahse, inbula pangpar hmuh tur a awm ve hi anuam ka tia, nun an ti hlim ve tlat ṭhin " Ka ti let ve a, U duhi pawh chu abu leh nghat nghat

" Fela chu kaltir tawh suh, innei daih ru in ngaihzawn rei lutuk chu ngaia inneih a awl ania aw " Pangpar chungchang sawi lai mek mekin thusawi thlak kual hi athiam asin 

" Kanla in ngaizawng reilo alawm, a zirlai te hi zo ve phawt se " Ka ti a, Fela chungchang leh inneih tih ang reng vel hi ka ṭhiante bulah pawh ka sawi vak ngailo a, U duhi bula sawi chu anuam kati lo

" Ka hrilh ve mai mai che anih chu, rei deuh in ngaihzawn kher angailo ania, mipa in inneih aduh anih chuan pawm tawp rawh, chu chu ka rawn duh che " A ti leh siam siam asawi tui mai sia keilah ka tui vak bawk silo 

" Kalo hrereng ang " Ka ti a, ka chhangṭha vaklo ati nge 

" Ka han chho teh ang Naupang ho khi an in ngeihlo sia, anlo inti ṭap leh palh ang " Ati a, chutia hawn atum takah chuan nuamlo ka ti veleh deuh

" Thingpui te lum ila, ka thingpui lum tuizia pawh ila hre tawp nang " Ka ti leh hnuhnawh

" Chhunah kalo kal leh zawk ang, kurtai kan nei alawm kalo kengthla dawn nia " Tiin min kalsan a, hmeichhe fel ve tak chu ani alawm, mi biangbiak athiamin sawi tur ahrethei si. 

Tlai lamah chuan hrilh nawn ngai miahlo in Fela chu alo hawng ve nulh a, Keimah zawkin Lalai te lam an ngai tih ka theihnghilh ṭep alawm

" Thil i hrerei thei e " Thingpui siamsak rak rak pahin kati a

" Chuvang chuan natna hriatrengtur min pe suh " Ati deuh ngei a, ei lo zeta 

" Over e " Ka tih chuan ani pawh anui ve tho, thingpui kan in a akalna chanchin te ka zawt pah siam siam, zawh chin chiah chiah min chhang ṭhin hi chu engtia tih tur nge ka hre tawhlo 

" Zawhna chin chiah chiah min chhanga, thui deuh te pawn swifiah ve ṭhin rawh " Ka tih chuan

" Zawhna bak bak sawite chu aṭawngtheih thlak " A ti hmak leh nghala, ahnunglama en rum vak bak tihtheih hi avang ṭhin asin, kan thingpui inna no ka silfai leh hnuah Lalai te lam turin anlo thlenna tur Sumo counter lam kan pana

" Room pakhat zawk kha ka tukverh te hawn tur ania, kalo ngaihtuahlo reng reng " Ka ti hliai, Lalai leh Seni ka inah an awm rih dawna Fela lah ' i riak leh dawn em? ' ti a zawh chi ani mang silo

" Eng atan " A ti sup 

" Lalai te an lo awm rih dawn alawm " Ti a ka chhanlet chuan Fela chu a ner deuh nang mai, amah ka enlai tak ania ka hmu chiang em em mai bawk si 

" Ner kual vel lo mai teh aw " Nui hak hak chungin kati hlak

" Mikhual room ah i muttir dawn nia " Ala ti ang tak deuh deuh a, chhan pawh ka chhang peih tawhlo.

" Kava chau tak " Motor aṭanga alo chhuk nge chhuklo Seni'n ati nghala, ka lo nuih vur vur Sumo counter kan thlen hnuah rei deuh fe kan nghaka, tunah hei anlo thleng ve chiah 

" Lala, motor i rui alaw " Lalai chu pawr fep in Seni hnungah alo chhuk a Sawi ve kherlo mahse, Seni'n ka chau atih aiin a chauh hmel daih zawk

" Khanu khan alawm minti rui ve ṭep, aluak burh burh bawk si " A ti leh hlak hlak, Lalai chu ka kuaha azawi ngiai mai, motor ruih hi chu hreawm ve deuh ania 

" Min lo hruai turin ani lawmni ilo kal, minlo tihpui ta che " an bag an hlanga Seni'n Fela chu a vin leh hlak hlak tawh

" Bungrua hlanpui tur chein kalo kallo " Fela lah chuan ati ve tlat a an sirah ading tlat, zawi deuhin Lalai pawh anui a

" I bialpa ber bur hi chu aw " Motor kan chuan hnuah pawh Seni'n ati leh ṭhin, a hmaah an pahnih in an chuanga keiin ahnungah Lalai ka chuanpui, a hma ṭhute pahnih chu an in melh rum hnai thei sia, Seni'n a sawisel hlak hlak laiin Fela chuan hmalam enin uluk takin motor akhalh a, Seni chu chhanlet en ah a enlo ve hrim hrim.

" Motor chuan ka nindan chu " Ka inluah kan thlenga motor aṭanga ian chhuk chiah Lalai'n ati sep, Seni leh Fela chu kan hmaah an kala Lalai nen an hnungah kan kal thung

" Aniang motor ruih chu ahreawm ve em alawm " Ka ti ve mai, Motor ruih hreawmzia chu asawi a sawifiah chi anilo tawn hriatfiah chi ani. 

" Ka rilru a chhia ka ti dawn nge pawh ka hrelo, Accident tawh mai ila ka ti rum rum mawle, ahreawm lutuk a " A tih chuan ka nui chhuak hawk, amah leh a thilsawi chu a inrem hlawl lo.

" Princess, ka kal leh lawk dawna chaw ei ah min nghak su aw, kapi te inah ka ei ang " Ka bula lo ṭhutthlak pahin ati sap

" Tinge? " Ka tih chuan

" Kapi ten min sawm ve tlat a, Zanah chuan kalo kal ang " Ati a, Lalai leh Seni erawh bathroom ah an awm daih, Vari an bual paha an bengchheng chel chul khawp mai

" Insak naah chuan va fimkhur ang che, thil te kha iva ti ve leh vak ang e aw, intih palh a hlauhawm " Ka ti ve duah a, a kal tur chu motor adahna thleng ka thlah, A kalliam hnua inah ka luh leh chuan Lalai te pawh anlo inbual zo ve chiah a, Seni chuan towel in Vari atuam a alo pawm chhuak

" Khawnge Kan thluakfingpa chu " Seni'n ati leh phawr phawr a

" An insak kha a enpui a, api ten chaw ei ah an sawm nghal ani awm e " Ka ti a

" A chut chut nen hian a chimawm thiam ve e " Ati nang nang a, Vari chu a hru hul pah thuak thuak

" A ma tawkah a nghal ve em asin " Ka tih chuan

" Ngeiawm si huat theih siloh tawk lek lek ṭawngkam athiam si " Uar fe in ati leh a, Lalai nen kan nuih vur vur

" Lawmi nen in inhmu ṭhin em? " Lalai nen eirawng kan bawla, Seni chu Vari nen an lengchhuakin ka hria

" Hmu e min be ngai silo a, ka be biklo " Ka ti mai

" A awmdan hi amak ngawt mai, msg hian min lo be deuh renga, in inhmuh ṭhin thu leh i biak ngai loh thu asawi ṭhin" Lalai'n atih chuan ka nui hak, azat vang anilo a amak ka tih vang ani zawk mah

" Biak hmanin a khawsa hleinem, kain sawithiam thil anilo keichu ka sual a min be duhlo tih hriat reng reng biak luih ṭalh hi ka peih velo " Ka ti hmak hmak, ka thinrim tet tet mai

" A zia hi amak chho tulh tulh, hua la ka duh vang anilo a mahse, fimkhurla aṭha in ka hria " A ti a Lalai hmel chu a serious ang reng

" Diklo a awm ami? " Bang bo deuh a ka tih chuan

" Chutiang engmah a awmlo mahse, mihring rilru kalsual laklawh leh lungawina neilo te hian tih hreh an nei ngailo a, fimkhur rawh ka ti anih chu " A ti duah, Ka rilru ah Lawmi alo lang nghal, Saipuia'n a hnawl chhanah min puh tlat a, ka lakah rilru chhe takte pu ta se, awi! Ka duh theilo ka ṭim uai thei. Chutiang em em chuan Lawmi hi asuallo hetiang hi ka ngaihtuah tur anilo, Tunah inla hrang rih mahse, nakinah kan ṭhian zingah alo la tel leh em em ang.

Zanah chuan Fela chu alo lang veleh nawlh a, Eitur alo lei nual mai, Seni'n alo be ṭha khawpa, Seni nui vur vur en ngur chunga

" I vir e a " Fela'n atih chuan Seni nui lai atawp hmak

" Lalruatfel hmelchhe chiangkuangpa " A ti pawr hlara Fela dinglai chu a ngalah apetsak chawrh, Fela chhuatah a ṭhu hnawka a ngal atuai nghal vut vut

" Mi vir te chuan tha kan ngah asin " Seni'n ati ham ham, Fela chuan rum zetin Seni ding lah chu a en a, Lalai nen chuan nuih chhuah hlau zetin kan hmui ka seh ngar ngar, Kan nuih chuan Lalruatfela hi alawmlo zual leh dawn chianga, Seni lahin nuam ati leh dawn si Hemi te pahnih em em hi chu 

" Lalai leh Princessi eitur bak kalo leilo " Lo ding ṭiah ṭiah chungin Fela'n ati veleh, Hepa pawh hi han ngawih ve tawh rih mai awm

" I over anih mai chu a " Ti hlakin Fela thil lo lei ho chu Choka ah aphei pui daih, Fela pawh anui ve tawp 

" A vung hrim hrim ang " A ṭhu a akekawr a pawt chho sawt sawt

" Ana viau ami? " A ngal khawihsak pah chuan kati a, a vung deuh dawn ani maithei, Seni chu avan chhirna em em 

" A chak dan chu a " A ti hluk

" Ui leh kel thlunpawlh ang hlauh inni " Lalai'n alo ti ve bawk, Seni lah chuan kan boruak hre tawh maplo in a bialpa nge midang zawk abe leh lar lar tawh

" Lala, film entur lo zawng ru, eitur ka siam chhuatah khan pher phah ula " Choka aṭangin Seni'n alo ti lang lang 

" I duh leh lo phah ve mai rawh " Fela'n ati let leh hram pek, ka kheuh zeuha engah mah angai silo

" Zeilopa, eitur min lo siampui rawh " Ṭha deuh chuan alo ti let hlauh a, alo pawr viau ka ring ania, Fela pawh chu choka ah aphei veleh tho, Lalai'n pher a phah a keiin film entur kalo thlang thung

" Tada " Ti vakin Seni alo langa, Lalai nen kan inpeihfel vel chiah ani, aman engmah a kenglo a ahnungah Fela erawh kan eitur kengin bawr deuhin alo kal ve thung

" Atui dan tur hi in feel pha em? " A mah chuan ati lar lar

" Engtik laiin nge hetiangte i siam hman, phone i hmang mai mai emaw ka ti a " ka tih chuan Sam sei ber ang hrimin asam chu atheh vel a, anihna takah chuan asam hi asei hlawllo

" Ka bialpa hian min ringhlel peih lutuk a, nichin pawh khan inṭhen mai ang min be ṭha peihlo alo ti leh a, ka ning tawh lutuk ' Nachhawkna eila mu lum rawh ' ka ti a, call ka dah nghal daih " A tih leh chuan Kan nui vek, Fela anui ring zuala Seni thilsawi hi alawm ve thei hrim hrim

" A ngaizawng che chu a inchhir ve viau ang " Lalai'n nui pat pat chungin ati a

" A hmelṭha sia ka ṭhen phal silo, a lerh lo lutuk hi abuaithlak zawk, kan in fawh ve pawn keiman a kawr ka hlihsak ziah " A ti tel leh a, chu em em chu ka awihlo khawp mai

" Mipa chut leh zeilo chu ka ngaizawng peihlo iti ani lawmni " Ka ti a, ka mitko ka kan zeuh 

" Nia ka peihlo alawm mahse, biak tawh loh ka tum hian zei deuhin min be leh nulh zela ka kalsan theilo " Nodless hip luh hrak pahin ati 

" A bem che nge i bem zawk? " Fela'n a ti ve leh khauh, zawhna te hi abei maksak ve asin

" A mipa berin chutiang te min zawh " Seni'n ati a Fela chu a nuih kur kur, Fela pawh chutia Seni'n anuih chu nuamlo ati leh deuh nge atukhum a khawih leh nauh nauh tawh

" Ka duh che minti ve dawna Ka duh tih asawia adang a awk tlat sia, arei si ka dawhthei tawhlo in ' ka duh che min duh ve em? ' ka ti a, ' Kalo in ngaihtuah ang ' ati " A tih chuan ka nui nghal tlawk tlawk, Fela hi azeilo ve viau kati a dawhtheih angai ka tih vei nen, Seni bialpa mai mai chu'h

" Awi! Tak tak ami? " La nui vur vur chungin ka ti leh

" Tak tak e, nakinah kala inhmelhriat tir dawn che u ania " A ti a, Tv en in kan hlim tlang ta phian a, Fela ariak ve dawn emaw tih laiin

" Ka riaklo mai ang " Ati teh tlat a

" Lala, kan hnawk riau in i hre velo maw " Seni'n chimawm deuha nui tet tet chungin ati leh hram 

" Tui deuh khan lo mu ula, Seni chu hnung kham urh in mu rawh se " A kal dawna Fela'n atih chuan Seni huat tawk atling leh khawp mai.

Fela vangin hun hi kalmuang deuh se ti mahila kan duhna vang ngawtin ni hian a chhuah hun ahai silo, hun chu akal duak duak ni maiin ka hria, Fela pawh a kal ahun leh ṭep tawha keini pawn hna kan ṭan veleh ṭep tawh. Lalai te pawh dorm ah an kir leh tawha, Fela lah an in ansak mek enpuiin nitin akal ve ṭhin, hunawl anei ngailo ve khawp mai, zanah erawh min lo hmu ziaha kan riakdun ngai tawhlo thung. Hna kan ṭan leh hunah chuan hunawl ka nei tam thei tawh dawn silo a ka tia, vawiin chu inbul vel ka tifaia, U duhi'n ka tifai lai min hmua min lo pui lehnghal, ati zahthlak tak tak ani

" Helai chauh hi ani tawh sia ka chhohsan mai ang che aw, Vawiin chu I u Saia eitur pek angai sia " Tiin a ding a azi mar ṭalh ṭalh

" Aw han chho rawh, awm mai mai pahin ka tifai ve mai mai anih hi, a hnim lutuk pawh anilo " Ka ti zung zung, U duhi chuan min chhohsan a, hla play in ka tihlai chu ka zawm leh mawlh mawlh, U duhi a awm chuan hla a play theihloh a amah atiti ve ṭhin si, hna ka thawh ve chuan hla play pahin mahniin ti chet chet ila anuam ka ti ber

" I chau em? " Tiri avang chuan ka hawi chhuak vat, Lalruatfela'n nui var varin min lo en reng a, tun ang hunah kan inhmu ngai silo a, alo kal chu amak ka ti deuh

" I buailo ami? " Ka ti hliai 

" Zanah kalo kal hman dawn silo a, tunah kalo hmu che " A ti a

" Eng nge itih dawn " 

" Professor in titi dun aduh deuh a " Ati veleh mai, ka thiltih lai ka zawh hnuah inchhungah kan inzui lut a, Kut sil tura choka ah ka luhsan laiin Common room ah akal tlang

" Apawi hleinem mahse, naktukah chuan ka bulah i awm char char angai tawh ang, atuk leh maiah min kalsan leh daih tawh dawn si " Ka kut ka sil zo a abulah chuan ka ṭhu ve tharh

" I bula awm baka nuam a awm hleinem " Ṭawngkam mawihnai deuh ahman ve chang hian ka nuih aza tlat zel. Min kalsan leh hnu chuan ka intifai a, zanah kan inhmu leh thei rih dawn silo a, ka lungleng hma lutuk hi keimah hi ka in ngei tawp. 

Zanah chuan inleng ka nei dawnlo bawka ka tia, kawngkhar ka kalh hma a, Fela nen msg in kan inbe pah reng, khumah mu lum in Vari chuan min lo hnaih ve sat sat reuh a, vawt hi ati ve ṭhin ania. Reife kan inbia a vawiin lamah a chauh ka ring ve bawk nen mu hma turin kati a, a ngaihdan anih loh viau hlau mahila ' Ka chau riau, naktukah kalo kal ang, nangpawh mu hma rawh ' alo ti let ve mai, kan in muttui hnuah phone dahin ka muṭha sat sat a, Vari lah chu ka tal apiangin alo che ve sek leh nghal Saisira mit ka chhing chiah ka phone alo ri a, Lalruatfela hi min lo call leh ṭalh ami le ti rilru nauh nauh chungin ka phone chu ka en a mahse, Tea hming zawk alo lang 

" I mu tawh ami? " Ka pick rualin alo ti nghal

" Mut ka tum tawha, tinge? " Ka ti a, msg in min lo be ve zeuh ṭhin tih loh chu kan inbe ngailo tluk ani

" I kawngka bulah ka awm, ka lakalwh lutuk a kawngka min hawnsak thei ang em? " A aw aṭang chuan a hmanhmmwh hmel viau a, zawhna inzawh chiam hun ani silo, hmanhmawh deuhin ka tho leh sawk sawk a, kawngka ka hawn rualin Tea alo lang nghal, Vari lah chuan alo bauh ṭhat ṭhat lehnghal

" Vari, keimah ka nih hi min bauh tawh suh " A ti dut a, alo kalchhan awmang ka ngaihtuah ngial pawn ka hrethiamlo

" A hmu khat che a chuvang aniang " Ka ti a Vari chu bauh tawhlo tura tiin ka pawm kanga, a bauh tawp ve nghal mai

" Ka tibuai che a tihpalh lutuk, ka laklawh lutuk a " Hrethiamlo zeta ka ding chu min lo en a, hreawm atih hmel tak tak, ka lakah asual ngailo a tunang hunah minlo tibuai anih chuan dinhmun khirh takah a ding ve tak tak aniang

" Tibuai lo e mak ka ti deuh mai mai alawm " Ka tih chuan lem deuhin anui a

" Ṭhu phwt la ka hrilh ang che " A tih chuan a ṭhutna piahah chuan ka ṭhu, ka bialpa pawh nilo mipa nena zan tlai tawh taka awmdun chu anuam duh vaklo, Tea ka ngaih khawloh vang pawh ani chuang pawn ka hrelo

" Kapa nen kan in hau deuha, ṭhiante pan mai tur ka hre silo a " A ti hulh, chhanlet dan tur ka bangbo angreng

" In hauh ve hlek te hian kan inkar athuk zual sawt ṭhin alawm " Ka ti let sep a, kan ngawih dun vang vang hnuah intur hi alo phawrh nawlh

" Kha hei hi in rawh " Tiin bottle pakhat alo lakchhuah chu min hawnsakin ka lamah alo lek phei a, eng tui nge pawh ka hrelo e a

" Eng nge a, in zawk mai rawh " Ban ta mailo chuan ka ti 

" Ka intur pawh kalo lei alawm, indun ila kan inzawhah keipawn ka letsan ang che " a tih takah chuan ngaihṭhat loh na neilo chuan ka in ve ta a, ala tui zek leh nghal 

" Ava tui ve a, Fela nen kan intur lei ve angai anih hi " Ka ti siam siam, Fela hming ka lamrik kher nachhan pawh bialpa ka nei tih hrenawn leh se ka duh, Bottle chhunga thil tui ka inzawh hnu rei vak lo ah chuan namen loh in ka mut alo chhuak a, Tea ṭawng bawrh bawrh te chu an hla ruai ruai zel mahse, inti harh lui hramin ka kutte chu ka sik pah ngar ngar, Tea chu hawng thuai thuai se ka khumah mutthilh vang vang ka chak

" Sangi " Tea'n min ko ri chu ka hre ruai a, engkim chu a thim nghal mup.

Cont..