Lunglawm Tikimtu chapter-23

 Tlaia in ah ka hawn chuan Liani athleng tawh tih hriat zetin kawngka alo in hawng a, thil rimtui deuh alo nam chhuak chem chem bawk

" Hello nulian " ka ti lut lang lang 

" Thansang khatin min ko suh " Choka aṭangin alo ti vin hlar

" I va siam rimtui chem chem ve " A thilsiam chu ka bih duk duk a

" Chaw i ei ngailo ami? Chaw hmeh leisa zawng zawng a ṭawih deuh vek alawm, saw ka paih nual mai " Ti hlak hlakin choka bawhhlawhbawm chu a kawk va

" Pasal i nei dek dek a, phun i thiam nghal em em ringawt, i zirchhuah a ṭhing emai " ka tih zat zat chuan ka lu ari fawk

" Liandingpui ana " Pawr deuhin kati a, kan thawm chu kan dimlo dun ve khawp mai

" Chaw te ei mumal veta che, i cher chhiat tawh sa nen " A tih leh lai mek chuan room ah ka luhsan daih, Liani bulah khan ka nui a ka room ah ka luh rualin ka nui hmel te chu vawm bo ang hlauh ani leh tawh. 

" Malsawma chi chak zia chu " Kan chaw ei laiin kati a, Liani anui vur vur, In entir turin alo kal a Malsawma ahna a laklawh sia kei min rinchhanin alo kal leh tawp ani, rinchhan tur ka mamawh lai takin midangin min rinchhan chu ani sia maw, kan tlu rup ang tih te pawh ahlauhawm

" Ka rai tih ka hriattirh aṭangin aphur lutuka aninawm ngawih ngawih, tunah pawh kanu emaw ka nau te in kalpui tir rawh ati a mahse, i bulah ka thleng duh sia keimahin kalo kal lui anih hi " Ati bawrh bawrh, Malsawma lungni lo kual tur vel ka ngaihtuaha ka nuih aza deuh.

Liani nen chuan khum khatah kan mu a, Zantir lamah chuan atiti siam siam mahse, a daihreilo khawp mai kei kala men kiau laiin ani chu a muhil tui lutuk tawh. Ka muhil theilo a ka pang akham zung zung bawk si, Liani tih harh ka hlau ve sia ahreawm duh ngei mai, dim deuhin ka tho ṭhem ṭhem a, Liani chu en leh zeuhin room aṭang chuan ka chhuak, ka tui ahal pawh ka hrelo ania tui ka in takah chuan ka in leh ṭeuh tho. Room ah pawh lut tawhlo in common room ah chuan a ṭhu a, ṭhutphahah ka ke hlang kangin thil thui deuh ka ngaihtuah, Tunah hian Fela hi a mu thei ang em nge ani pawh mu theilo in hreawm ti takin ala awm mek ang mahse, mipa ani a ani chuan reilo ah hmalam apan leh theih mai ka ring

" I muhil theilo ami? " Muk deuha thil ngaihtuah laiin Liani'n alo ti thut a, ka phu chiang lutuk Sofa aṭangin ka tla lo chauh alawm

" Min ti phu lutuk " Rum deuhin ka en a

" Ka harh a ilo awm silo, minti hlauthawng fe zawk " Kei aia rum mah in min en let 

" Tuiin turin ka tho alawm " Ka tih chuan

" Diklo a awm tiraw, zep i nei tlatin ka hria " Chik deuha min en reng chungin ka bulah chuan alo ṭhu ve a, ka hun tawn mek hi ka hrilh ve kher duh ang em ka hrethiamlo, min rin loh chuan ka natna tur ka insiam belh leh mai mai dawn tih lah ka chiang mai sia. Lalai leh Fela'n min rin loh aṭang khan tumai pawh hian min ringlo vek dawn niin ka ngai tlat tawh ka dawih zual ngawih ngawih

" Chutiangin zep ka neilo " Ka ti a, Liani pawh chu ka en ṭha ngam vaklo

" Khaw khatah awmlo in inhmu tamlo mahila, ka hrechiang ve tho che ania " A tih chuan, ka ngawi vang vanga mahse, ahnu deuhah chuan ka harsatna leh ka thil tawnte chu ka hrilh ve vek

" Chupa chu ava zaklo ve, dawt ala sawi ngam zui ania, mipa pawh ani dawn ami? " Ka sawi zawh rualin Liani chuan ati hlak hlak, min ring nia ka hriatna chuan min ti hahdam

" Min rin ka ringlo a " ka ti a

" Engvang ngawtin nge ka rin loh ang che, Fela i duhzia chu i mitmeng ah alangchhuak vek zel a, Sairengpuia mah i kawp lo a, Fela i phatsan chu ka ring lo hrim hrim " A tih chuan tawitein ka nui

" Fela ka ngaihtuah a, engtin nge a awm ve ang hmalam apan leh daih tawh zawk ang nge, mipa chu mipa an nia keimah avang chuan anat reng ka ring lo " Liani chu ka hrilh nge keimah chu ka inhrilh pawh ka hre thiamlo, ngaithlatu ka nei chu anuam kati tih erawh ka hrechiang 

" Thil hi a eng zawngin thlir hram hram rawh, i chunga thil thleng hi hriatthiam tumla, i hriatthiam tlat chuan i hahdam mai ang " A ti a, room a kan mut luh leh meuh chuan zinglam dar2 ani duai tawh. Kan mut tlai tawh tehlul nen atukah chuan Liani chu ala tho hma leh thei tho a, keichu ka tho chhuak peihlo thung ka lu ana et et a, ka meng peih meuhlo ani e chaw pawh ka ei peihlo 

" Min lo nghak rawh ka kalpui ang che " Room a Liani lo lut chu kalo bia a

" A ngailo lo mu hahdam zawk rawh, keimah pawn ka kal thei alawm " A ti a, eng nge atih pah ni ari deuh rak rak mai

" Ka ṭha tawh alawm nachhawkna in min chhawk tawh, kalo insiam ve lawk ang e " Ka tho a, ka lu chu la rit bur tho mahse, Liani amah a han kaltir chu anuam ka ti silo, kei min rinchhanin alo kal ve em em a ka kalpui loh chuan Malsawma'n min lo chhuahchhal leh palh ang 

" Kalpui ka ngai kher hleinem " In aṭanga kan chhuah hnu pawh chuan ala ti ve hram, a mizia nena inmil lo deuhin inthlahrun te hi a pe na ve thei ania

" Pan duh bik i nei em? " Ka tih chuan

" Malsawma'n ka ṭhiannu Zoliani clinic ah kal mai rawh u atia " A ti a, a awmna hmun vel asawi chuan Fela ṭhianpa Dr hruaizela clinic nen a inhnaih hmel khawp mai

" Dr hruaizela clinic nen ava inhnaih awm ve " 

" Ka hrelo, a sawi danah aṭhiannu clinic bik pawh anilo aniang " A ti nawi niai, a hrechianglo ve ṭhin ania, a sawina hmun kan thlen chuan Dr hruaizela clinic ani tak tak a, Dr Zoliani chu a ṭhu ve tho anih dawn hi, hmani deuh khan hmeichhe doctor a ṭhu ve tawh dawn an ti ve tak kha, Dr Hruaizela chu alar ve tawha a chanchin pawh hriattur atam. Malsawma'n alo be lawk aniang Liani hming alo ziahtir fel diam a, a nupui hi chu a ngaihsak ve hlarh hlarh ania

" Pawnah hian kalo nghak ang che " Liani chu doctor room ah alut a, pawnah chuan in entir tur dang lo awm vete bulah chuan ka ṭhu ve kar, helai hmunah pawh hian Lalruatfeaa nen kan sulhnu hriatchhuah tur a awm leh tho, ka damloh laia min ngaihsakzia te, a thilsawi awm anglo zet zet nuihzatthlak bawk si te kha engtikah nge ka hriat leh theih ang, ka hre leh tawh kherlo maithei bawk, ṭawng nawk nawk thawm atam sia pawnah ka chhuak daih a, Liani chuan min lo zawng chiamlo turah ngai ang

" Sangi " Titu lam chu ka hawi, Dr Hruaizela chu ka piah deuhah alo ding a, ka hmel a hmuh chian tak vang nge ka lam panin alo pen pawk pawk, ka bul pawh alo thleng harlo a 

" Ilo hawi hma kha chuan ini tih ka chiang hleinem " ati leh dut dut

" I damṭha maw " Kalo ti ve tawp, Fela lam hnai ka hmuh chang hian nuamlo ka ti leh tlat ṭhin

" Damṭha e, i damṭha leh tawhlo zawk ami? " A tih chuan ka inrin hmain ka nui chhuak hawk

" Aih, ka ṭhiannu kalo kalpui zawk a " 

" Kan Ruatfela lah chu a awm hla vung vung mai sia " A ti leh a, tawitea nui chungin 'nia' ka ti ringawt

" Damlo check tur ka nei tawh sia ka luhsan mai ang che, kan inhmu leh dawn nia " A ti zung zung a, ' Aw le ' ka tih hnuah min luhsan mipa polite tak zawng ani e, Pawnah chuan ka awm ta reng a, rin aiin Liani chu a rei zek lehnghal, ka nachhawkna ei in min chhawk zo tawh nge ka lu lah chuan nat achak leh em em tawh si a, vawtin min ṭham deuh ar ar bawk. Liani pawh rei deuh hnuah alo chhuak ve hrama, alo ri chhuak leh bawrh bawrh adul pawh tlem in a puar ve deuh tawh anih hi, thawmhnaw lian lam aha a in ah kha chuan a puar tih ahriat miah loh

" Rei minti " A ti nghal a, ka nuih ringawt

" Tilo e, naute chu aṭha em? " Kalo ti a, ka mualpho mai loh nan ka insangmar ṭalh ṭalh, ahma zawng aiin vawt ka ti zual leh nghal

" A hrisel ṭha lutuk, kan hawng mai dawn mi? " Ati zung zung a, ka hniallo khawp mai 

" Tihtur dang i nei tawhlo ami? " Hawn tuma taxi a kan chuan vek tawh hnuah ka ti leh hnuhnawh

" Naktuk pawh kala cham dawn alawm " A ti then a, kan ngawi dun vang vang, Liani chuan Driver chu abe sawm peih zeka Driver lah chu pa upa lam sawi tur hre zet ani bawk nen an inbe thei khawp mai.

" In entir ve nghal tur che alawm " Inchhung kan lut a, ka khuasik tih Liani'n ahriat chuan min hau hlak hlak

" Ka ṭha alawm nachhawkna ka ei anga ka zia leh mai ang, i lo kal chhunah ka mutsan reng che a anuam lo. nangpawh i chau ang mu hahdam rawh " Ka ti deuh duah, Room ah lutin nachhawkna ka ei hnuah ka mu a puan ka sin hlun bawk, ka khur deuh der der a ahreawm kher mai, Kanu ka ngaia Fela ka ngai em em bawk, ka damloh laia min duat ṭhin dante rilru ah athar a, tinge ka chungah fair lo taka thil athlen bik le, hetiang tuar tur hian ka chak tawk bik loh nen, a hreawm emai. Ka phone chu khur der der chunga khawih luiin Fela nen kan thlalak ka dahṭhat chu ka en a, ka mittui avangin ka hmu phe riai leh nghal

' Engkim hi ka mumang nise, harhchhuak tawh ila hlim deuhin awm dun thei ila tiraw ' Tiin min chhanglet ve theilo Fela thlalak chu ka be mawlh mawlh, chutia ka awm chu kalo muhil tlang aniang ka harh leh chuan alo tlai duai tawh, Liani a awm ve bawk sia inti harh luiin ka thlan tlakna avangin keimah hi ka huh dup a ka ban chuap mai, room aṭanga ka chhuah chuan Liani sofa a lo muhil bam chu ka hmu hmasa ber, alo zin khat nen duh ang pawn kan inkawm mumal thei silo a Liani lakah pawh a inthlahrun awm khawp mai. Thawm dim deuhin bathroom ah ka luhsan a, ka inbual zawhah pawh Liani chu alo la harh lo. Ka bedsheet pawh a hnawm chuap avangin ka thlak nghal daih, suk turin suk tur ka dahkhawmna ah ka vawm lut nghal daih, suktur dahkhawl hi ka sim theilo 

" I nuam deuh tawh em? " Eirawng ka bawl mawlh mawlh laiin Liani alo lut ve a

" Tehreng mai ka ṭha var tawh, room pakhat saw kati fai reng alawm amuttheih reng " Ka ti zung zung, tum ṭum chu ka thlan atla nasa bawka ka inbual fai var bawk si ka harh ve kawk mai, ka lu na pawh a awm tawhlo hrim hrim 

" Mutthilh ka tum pawh anilo, ka mu zal mai mai a kalo muhil daih " A nui pah ar ar a

" I lo zin ve ṭuma ka damlo kher hi ka haw khawp mai, ka dam tawh turah ngai ila kan inkawm char char thei tawh ang " Ka ti ve a, thutak deuha sawi ve laiin

" Ka kawm peih vaklo hrim hrim che " A tih chuan a hnungah na vaklo in ka beng

" I rai ve hi rai pawh i anglo " Ka ti 

" Ka zaka thawmhnaw lian pui pui ka ha lui anih hi " A ti zat zat lehnghal

" I inhmeh alawm, hmeichhia chuan rai an inhmeh vek " Ka tih chuan

" Iti vel mai mai anih chu, dul kiar pangai pawh kan zak a, lian tawka kawh va chu e zahthlak dawn lutuk " A ti tan tan, azak ve tak tak aniang zak eng ang mahse, nakinah chuan a puar kawh lah dawn tho sia

" Inpa lawm i siam tho alawm " 

" Zing tin lian vat vat se ati a, kei ka zak si ka vawhlum ṭep tawh ang " A ti hak hlak, an nupa mizia hriatchian chuan nuih loh theih pawh anilo ṭhin.

Liani pawn kan khua ah min hawnsan leh tawh a, nitin hnathawkim keima tawkah ka buai ve ṭhin khawp mai, hnathawka buai reng ṭhin ni mahila nitin hian Lalruatfela theihnghilh lai ka nei ngailo, biak ka chak ṭhina be turin ka huaisen tawk tawhlo. Lalai pawn ngaihdam min dila an hunawl apiangah Seni nen anlo leng ve ziah, ka hun tawn chu aharsa mahse, ka ṭhiante an awm a ka inti chak hram hram ani. Tea pawn min biak atum fo company ah leh in lamah pawh mahse, vawikhat pawh ka be ngailo, Fela nen cousin annih na pawh zah zolo leh keiin ṭhian anga ka enna ka ngainat vena pawisa lo in ka luhlulna a cho chhuak a, tuna achunga ka chetdan hi chu aphu ngawih ngawih, ka mihrinna a chhuah a ka tawrhna in min hneh chang phei chuan thi daih se tih chang ka nei ṭhin. 

" Dari, nimina ka sign tawh file kha kalo en nawn lawk " Ka room aṭanga chhuakin Dari seat chu ka pan ding nghala, ka taksa chak loh vang nge ka kal te hi ka nghetlo riau

" Min lo koh mai tur alawm, ka lo pe thei reng che ania " Dawhkana file lo dahchhuah pah chuan ati sep, nuam lo atih hmel viau

" A ho lutuk room a tawm ngut ngut pawh ka ning ve alawm " Ka ti a, file chu ka keu let thuak thuak a

" Diklo a awm ami? " Ti a U zira'n min zawh chuan 

" A awm emaw ka tia mahse, a awmlo anih hi kalo tibuai nuai che u a azialo hlemai, in tih lai tih zawm leh ru " Ka ti zung zung a File chu Dari ka pe, in hera kal leh mai ka tum lai chuan kalu ahai thuta ka bing nghal mup, ka khawhmuh athim nghala ka tlu dawnin ka hria hlauthawng zetin chelhtur ka dap ruai

" Sangi " Dari'n ati vak ri chuan min ti harh leh kawk a, ka thil hmuh erawh ala phe khawp mai, ka mit ka chhing a Dari dawhkan tlang chu ka hmer ngawt ngawt

" I ṭha em? " Dari'n ka kut min chelhsak paha atih chuan ka bu nghat, hlauthawng ru deuh chung chuan ka meng siar siar a ka thilhmuh pawh afiah ta deuh e, U zira leh Miriami Bawihtei leh Tea te chuan min lo hual ṭhapa, a zahthlak duh ang reng khawp mai

" Ka ṭha tawh, ka lu alo hai thut alawm mawle " Kati zawi sep 

" Room ah va hahdam rawh, hna i thawk nasa lutuka i taksa in atuar anihkha " U zira'n ati a, asawi dik ve reng rilru lak pen nan ka tia hna ah ka insawrbing nasa a, hma kan sawn phah bawk mahse, ka taksa hian chhiatlam apan thung ani. Miriami leh Dari'n ka room ah min kalpui a, chhuak ta mailo chuan min ṭhutpui ve reng

" In hna va thawk leh tawh rawh u, keimah pawn ka awm thei alawm " ka tih pawn 

" Kan chhuah hnuah hna ilo thawk leh phet ang " anti tlata tirhchhuah hleihtheih pawh an nilo, ka chet phut changa ka luhai thei lutuk hi abuaithlak ṭhin khawp mai, thil ka ei mumallo lutuk pawh ani hranlo, chaw hi chu a hunah ka eithlap zel a mahse, ka eitam ngailo thung kamram ka ei ta vaklo a, chhunah lah ṭhiante rualin thil ka ei ve ziah bawk si, ka chhuanlam ber chu zan ka mu theilo hi ani.

" Ka thlah ang che " Kan hawng tur chu Tea'n ati a, Kan thawhpuite hian kan buaina an hre ve lemlo a, hriatchhuah reng tlak ni heklo le 

" Nia, inthlah tir rawh " Dari'n alo ti vat

" Aih, keimahin ka hawng thei " Ka tih pawh chuan min tilui tlat a

" Taxi in ka hawng mai ang " Taxi lokal chu pharin ṭhiante mitmei pawh ka veng kual peihlo

" Ka kalsan mai ang che u " Ka tih hnuah taxi ah chuan lutin ka kalsan ta a, chak zeta min tlanpel fua tu chu Ramluahpuia ani

" I van hneawm tak " Ka inluah ka thlenga pawnah Ramluahpuia alo la awm hram

" Inbe lawk ang sawi duh ka nei " A tih chuan thawpui kala halh

" Ka be peihlo che, i hmel ka hmuh hian ka chunga diklo taka thil thleng kha ka hrechhuak ziah, buaina hlawm inih hi " Ka ti deuh ṭhat, kalpelin kawngka ka hawnga luhsan mai ka tum lai chuan

" A reilo ang " Tiin ka banah alo chelh leh hram, ka ban achelhna chu talchhuah mai ka tuma achelh nghet phian thinrim zetin

" Min thlah rawh, min tihbuai reng dawn chuan thih pawh ka hnial miahlo ania, thi law law turin min duh zawk ami?" Ka ti vin ṭhat, ka chungah diklo takin a che a aduh duh dana min sawpkual chhan tur a awmlo, ka kut chu ka phih let sawka athlah ve mai, inchhungah luhsanin kawngka chu ka kalh nghal hmak, room ah lutin khumah ka mu nghal thlawp a, eng sual nge ka tiha buaina hian min duh em em le, buaina hrang hrang hian in ka kalkawng hi an ti hnawk zung zung a, thianfai zel tur chuan a chauhthlak ṭhin emai. Rei fe ka mut hnu chuan kala inthlak silo ka mutthilh hma chuan ka tho a, ka inthlak hnuah angai te bawkin ka mu leh nghal diam, mu pah chuan phone ka khawih ve mai mai a, phone ka khawih khatzia hi ka online khat lutuk, whatsapp ah ka lut a, Fela last seen ka check leh hmasa ber, chumi hnuah msg dang ka en kuala Saipuia msg chuan ka mit ala ta ber 'Fela alo hawng dawn ' tih alo ni, rang zeta chhang letin ' Engtikah' kati a, hmanhmawh lai berin Saipuia chu a online thei reng reng lo leh nghal. Fela ah chuan ka lut leh a, ' Ilo hawng dawn ami? Tih chu thawn turin ka type thlap tawh mahse, ka clear leh a, adang type leh in ka type leh ho pawh ka clear leh zel, be hmasa tur chuan ka huaisen tawk tawhlo a, ka inthlahrung ngawih ngawih tawh.

A tukah chuan tlai lamah hna kan ban tawh hnuah Saipuia alo lang veleh nawlh a

" I hman em? " Alo luh rualin ati nghal

" Hman loh pawh a awmlo tinge " Ka ti hluai

" Anih chuan khawiah emaw kal lawk ang " Aṭhu zet tawh chu a ding leh nghal a

" Khawiah maw ka lengchhuak chaklo, tunlai chu ka awm anuamlo ka zawi vel vek " Ka ti nang nang

" Areilo ang lokal mai teh " A ti leh tu tu tawh eng nge ahriat ni

" Kan tihtur tal chu sawi vela " Ka tih pawn asawi duh tlat silo

" I hre mai ang " A ti a, ka ngei reuh tak tak ani.

" Mak iva ti awm ve " Min hruaina hmun chu Fela in ani, inkawtah kan din rualin mak ka tih luatah engmah ka sawi theilo

" Alo hawng tawh maw " Ka ti a ka thinphu arang nghal dawt dawt

" Umm, kanla inhmu chuanglo i hmu ve duh tih ka hria a, kalo hruai hmasa che anih hi " A ti zung zung a, Sairengpuia chungah lawmthu awm rawh se, Doorbell a hmet a, ka kut chuan ka awm ka khawih a achhunga mi chu a su dup dup 

" Lo len i phal chiah na nge " Kawngka lo hawngtu chu Fela ani a, min beisei lo tih hriat zetin min hmuh rualin a meng nghal kawk 

" Lo kal ru " Kawngka min kian a, atira min en zawk bak min en nawn leh tawhlo hrim hrim, chute mai mai chuan min ti na tawk em em, Ka in ang maia ka ngaih ka tlangnel em em na chu tunah chuan tim daiin ka dai lut a, engkim mai chu ka tana thil thar vek ang mai ani

" Ee, inlo kal ve ani maw " Mafaka leh mipa pakhat kala hriat ngai loh hi anlo awm a, ka tel ve chu min beisei lo tlang hlawm aniang, mak an tih hmel ṭhin emai Saipuia bulah inthlahrung dakin ka ṭhu ve a, Mafaka te tak tak pawn Saipuia chu ṭha deuhin an bia a kei erawh awm velo ang maiin min ngai, Ka piahah Fela alo ṭhu ve bawka ka en sek laiin ani chuan vawikhat pawh minlo en velo. Ka tet tawh sa nen ka te zual chem chem a, kalo kal veta kher kher chu ka inchhir ngawih ngawih, ka mittui ahnai kuara ka kawchhung hi a tawt tup tup in ka hria

" Rf, towel ka keng lutlo reng reng " Bathroom aṭanga hmeichhe aw ngei maiin alo tih chuan Saipuia te ṭawng hlut pawh an tawp nghal vek a, rang zetin Fela lam chu ka hawi nghal ani pawn min lo en ve chiah a, amitmeng ah chuan eng nge angaihtuah ka hrethiamlo. A tho vut a room ah lutin towel nen bathroom lam apan leh

" Tunge a " Saipuia'n a tih chuan hre chak zetin ka beng ka chhi ve kar

" Fela'n alo hruai hawng ve alawm " Nui huah huah chungin Mafaka'n ati a, ka thu hriat chuan min ṭhawng lutuk nge ka pum hi a let but but mai, Lalruatfela'n hmeichhia alo hruai hawng maw! Keiin hmalam pan ka theih loh laiin ani chuan hmeichhe dang alo hawnpui anih chu

" Puia hi engmah i hrilh ve na nge, a bangbo teh ania " Fela lo chhuak leh chu Mafaka chuan alo zawt a

" Hrilhna hun ala awmlo " Nui suk chungin ati, Saipuia chuan min lo en nghal vut a, tawite in kalo nuih Fela pawh a pha reng renglo, anih chuan ani hian nupui anei dawn tihna emni, chutia mumallo zeta ka awm lai chuan ka kua a let but a, ka hmui chu hup hmanlo ila chuan ka uak vak ngei ang, engmah sawi hmanlo chuan rang zetin pawnah ka tlan chhuak a, ka kawchhung a awm zawng zawng hi lo chhuah an tum ta emaw tih turin ka awm, ka awmdan chu a hreawm lutuk, pawnah chuan ka uak ṭhat ṭhat a mahse, engmah alo chhuak chuanglo

" I ṭha em? " Saipuia'n ka hnungah alo chul a, mittui parawl kuang in ka en 

" Ka ṭha " Ka ti tak na a ka ṭha hlawl lo

" Ka hawng tawh mai ang, ka bag min zu lak la keimahin ka hawng mai ang " Ka phun sep a, Saipuia chuan a hriattheih pawh ka ringlo

" Kalo hruai ta kher kher che ani, hmeichhia alo hruai hawng tih ka hrelo tak tak ania " Inthiamlo zeta atih chuan 

" A pawilo ka beidawn nan a khang thil ka hria pawh kha aṭha tho " Ka ti leh a, ka bag min laksak turin Saipuia chu inchhungah alut leh, Saipuia kal hnu chuan ka mittui alo luang thla ngiai ngiai a, rang zetin ka hruhul sawk sawk. Hetiang em em a zahna leh hreawm tihna hi kala tawng ngailo

" Kha, damdawi hi ei rawh " Saipuia lo chhuak leh chuan tui bottle leh damdawi hi alo keng chhuak tel a, ka ner nghal nang 

" Ka ei duhlo ka thu hriatin min ṭhawn lutuk vang mai mai anih kha " Ka ti a, ka kam ṭhuah ka duh avangin tui bottle erawh chu ka ban

" Fela'n damdawi hi min pe a " Saipuia'n atih leh chuan ka kam ṭhuah lai ka tawp chat mahse, ka hamhaih reilo thung

" Ka lo kawl ang e " Tui bottle pek let pah chuan damdawi chu ka ban a, ṭha deuh chuan ka bag nen min pe ve mai 

" Min thlah lo mai rawh aw, keimaha kal ka duh " Ka tih chuan ka hmelah ka tihtakzia a hmu pawh ani mahna

" Fimkhur rawh, thil ṭhalo pui pui te kha ilo ngaihtuah ang e, rilru fim tak put tum ang che thil ṭhalo deuh iti anih chuan, kei hi engtikah mah ka inthiam thei tawh dawnlo, chu chu min hriatsak ang che " Ngenngawl deuhin ati a, ka inthah a ring deuh aniang

" Lungngai suh, Ka harsatna hneh theilo khawpa chaklo ka nilo, Nunna pawh hlut zolo tur khawpin ka harsatna hian min la hneh lo " Ka tih chuan hahdam huai hmel a pu, Mahni nunna la ṭhinte hi mi tamtak chuan an dawihzep anti fo a mahse, keichuan an huaisen kati mahni nunna lak hi mi dawihzep tan chuan atheih loh. Taxi pawh phar duhlo in ke in ka in luah thleng ka kal thleng ṭhaka, keimah hi ka a ruaiin ka hria, kawngka kalhin room ah ka luttlang nghal a, khum bula chhuatah ṭhuin hah zetin thawk kala leh halh ṭhin A ni chuan hmalam a pan tawha beisei tur a awm tawhlo. 

Ka phone vibrate chur chur chuan ka ngaihtuahna ram aṭangin min ti harh kawk mai, khua alo thim vek tawha ka ṭhut tawmna ka ke amu churh churh mai, ka phone ri chu a tawpa alo ri nawn leh, ka bag aṭang in ka phone chu ka phawrh a

" Hello " Ka ti tham ṭiak

" I ṭha em? " Vin zetin Lalai'n alo ti a

" Ka ṭha alawm tinge? " Ka ti a, ka ke mu churh churh chu ka hmet pah mawlh mawlh

" Kawngka hi lo hawng rawh, kan tihchhiat i duh loh chuan" Alo ti vin leh ṭhat, ka tho ṭiah ṭiah a ka ke chu rah pawh ahreawm zawk alawm le

" Ehe, tehṭhap che u chuan " Kawngka ka hawnga pawnah chuan Lalai Seni leh Saipuia te anlo awm ṭhap

" Mawli " Lalai'n ka banah min beng pawp a, min nem lut rawk rawk

" Eng nge ni vak " An awmdan chu ka hrethiamlo lutuk, Lalai phei chu ṭap hrep hmel a pu leh nghal

" Kawngka i hawng thei silo, kan ko vak vak chea min chhang thei silo, kan call chu chhang lo pheila chuan kawngka saw kan ti chhia ang " Seni'n ati bawrh bawrh, awi an hahthlak e

" In hlauthawng mai mai anihchu " Ka tih te chuan Lalai'n min vin let hlara, engmah pawh ka sawi ngam tawh lo, common room ah kan ṭhu ṭhap a, ka ṭhiante chu ka melhkual ralh ralh

" Min ngai rapthlak e " Ka ti leh ṭhin

" I mawl em alawm, kan koh nasat che nen " Seni chuan ati hlak

" Ka muhil ve alawm " Ka tih te chuan rum deuhin min en a 

" Sairengpui, eng thil ṭhalo mah ka ngaihtuahlo ka tihkha" Saipuia chu ka chhuahchhal ta ringawt

" Tunlai ah chuan thleng theilo tak tak a awm hleinem " Ati daih lehnghal, khua an van ti var lo tak

" Engpawh nise kan ṭha tlanga aṭha, Lala eirawngbawl rawh, Sangi khawnge i pads inthlak ka duh " Seni'n thawveng halhin ati leh zat zat tawh

" Bathroom ah ka dahna ngaiah khan " Ka ti a, Bathroom ah chuan atlanlut nghal chan chan

" Ka va hawng teh ang, Fela pawh chanchin ka hrilh veleh loh chuan " Ding hluai pahin Saipuia chuan ati a

" Fela maw " Ka ti hu, Fela hming arik tel hi chuan keimah hi min la nghawng ṭhin khawp mai

" Hetah kanlo kal a kawngka a inkalh bawk sia, U duhi khian Puia nen in chhuak tih asawi a, Puia kan call a abulah i awm bawk silo, kawngka a in kalh kan tih khan Sairengpuia alo hlauthawng lutuk a min ti phawklek vek alawm, Fela pawh kawngka ilo hawn hma thleng kha a awm " Lalai'n ati a, chutia ka tibuai lutuk chu a inthlahrunawm ngei mai, Saipuia chu chaw ei ah sawm ve mahila aduh bik tlat lo

" Tinge i pads saw avan ngai rei ve, thla hmasa a ka hmansak bak che kha ila hmang leh miahlo ami? " Lalai nen rawng kan bawl laiin Seni'n alo ti bawrh bawrh

" Ka period mumallo lutuk tunlai chu " Ka ti ve mai, ka period mumallo riau a hetiang reng anih chuan in entir angai maithei

" In entir rawh, chutiangte chu in entir vat tur alawm " Lalai'n ati a

" Ka period hun a insawn dawn aniang ka ti deuha " Ka ti maia hlauhthawnna vak ka neilo

" Awih awm loh arei lutuk tawh, hlauhthawnna lah hi i nei bawk silo a " Lalai bawkin ati hlak

" Nanghi ilo rai te anilo maw " Nui ar ar chungin Seni'n ati leh peka Lalai'n a beng thlawp

" Min beng ziah suh ka fiamthu anih kha " A ti a

" I fiamthu lah hi nangmah bak hian i hlimpui silo a " Ka ti a, ala nui uar sauh leh nghal. Lalai leh Seni'n min riahpuia, chhuatah mutna phahin kan mu dal Seni chuan vawiin a an mangan zia leh Lalai ṭap sek anin zia asawi a, Lalai lah azak tawh deuh bawk nen Seni a beng leh ṭawlh zel. 

Hna kal turin tlai deuh tawhah ka chhuak, nizan chu Lalai leh Seni inhauh mial mial laiin ka muhil daiha, mutmu ka tuah ṭha ngailo bawk nen ka mutui khawp mai, zingah pawh Lalai te hawnglai ka hrelo msg min hnutchhiah a, eirawng minlo bawlsak diam bawk. Damdawi dawr ka kalpel dawn chuan Nizan lama Seni thusawi kha ka hrechhuak a, kalpel mailo chuan ka ding deuh vang vang

' In hriatchian tluk a awm hleinem ' ti rilru chungin dawr chhungah chuan ka lut a, test kit chu chi hran pathum lai ka lei, pakhat ringawt chu a dik tawk loh ka hlauh vang ani dawr nghaktu lah chuan min en hrek hrek lehnghal a.Comoany ka thlenga Ka room ah pawh chuan hna pawh thawklo in ka thil lei chu ka en tlawk tlawk

" A ho mai mai ka rai awmlo emai " A khat tawkin ka ti sek a mahse, ka chiang ngam silo

" Boss, coffee hi i duh ve em? " Washroom hman tumin ka chhuak a, Miriami'n min lo be ding

" Boss min ti tawh su ka upat hmel emai " Ka tih chuan an nui har har hlawm 

" Kan boss kha i ni ve miau sia " An ti leh kher, Boss min tih hian nuam ka ti tlatlo

" Washroom ah ka lut lawk ang, coffee chu min lo chah kep ula, ka rilṭam riau eitur dang pawh min lo chahsak teh u " Ka ti a, office aṭanga chhuakin washroom ah hmanhmawh deuhin ka lut nghal, toilet ah lutin test kit chu kala chhuak a, a tihdan an ziah ang chuan kati a, ka tih zawh hnuah chuan ka en leh lawk ngamlo, ka hum ngawt ngawta ka mit ka chhing tlat, ahnu fe ah chuan tim daiin test kit chu ka en 

' A ni theilo ang ' ka phun chhuak sep a, ka en ngai ka en tlawk tlawk, pakhat chiah chu adiklo maithei asin tiin adang pahnih chuan ka test leh ve ve a, ahmasa ber ang khan rin sen pahnih alang kalh, ka kut chu akhur hlak hlak a thawk kala sek bawk. Office ah chuan ngaihtuahna mumallo zetin ka let leh a, 'tu fa nge ni ang? chu zawhna inzawh angai ta chu ania, hmeichhe khawlo tak ka ang hle mai, ka nunram hrechianglo tan chuan hmeichhe khawlo tak chu ka ni ngei ang le.

" Thil chah alo la thlenglo deuh a, alo thlen hunah room ah kanlo pe dawn che ania " Ka room ah luh tlang mai ka tum a Dari'n min lo biak avang chuan ka ding leh rih

" Aw le, ka hmanhmawh vaklo " Ka ti a, room ah chuan ka luhsan hlawm, ka pum chu ka dawma ka rai ka ring thei hlawllo ani, kalo in ngai ṭha lutuk te pawh ani maithei, Test kit pathum chu ka en reng a, avaiin a positive vek bawk si

" Sangi " Ka ngaihtuahna ka kawm melh melh laia min koh thut avang chuan ka phu zawka 

" Tinge kawngka i kik loh " Ka ti hlak, test kit chu bag ah ka khung nghal sawk sawk a, ka thinphu pawh arang nghal dawt dawt alawm

" Kawngka ka kik a, min chhawn thei silo a " Tea chuan ati a, ani berkher alo lut lehnghal tunah hian ka hmu chaklo ngawih ngawih 

" Anih chu " Ka ti leh hmak, rilru a buai nuaih chuan uluk taka ṭawngkam thlehmawi pawh atheih loh ani e, Ramluahpuia hian ṭawngkam ṭha aphu pawn ka hre chuanglo

" Thil chah alo thleng " Dawhkanah sarang hi alo dah a

" Pawnah ei ve ila aṭha ang " Sarang chu la in ka chhuak nghal nalh, mahni chauha ka awm chuan thil ka ei leh tak tak pawn ka ringlo, ṭhiante bulah awm ila athawventhlak deuh

" Keimah chuan atui dawnlo emai " An lo ṭhutkhawm na a ṭhut ve pah chuan kati a

" Kan tello hi chuan i tlei theilo anih hi " Miriami'n nui har har chungin alo ti a, Dari leh Miriam'n ṭawng an in chuh nak nak karah U zira'n thu ho deuh nuihzatthlak bawk si asawi tel reng bawk si, rilru kal bing tur an veng viau. Thil kan ei zawh chuan midang ho chu an chhuak harha kei erawh ka chhuak ve peihlo, Ka room bik ah luh leh mai ka tum a kan meeting na ṭhin room ka kalpel dawn chuan ṭawngri ka hriaa ka ding deuh chat, an chhuak vekin ka hre sia, room ah lut talo chuan meeting room zawk chu ka pan hnai

" Ka hrilh dawn engkim ka hrilh vek tawh ang, hmeichhe pahnih thuhnuaia awm reng ka tum tawhlo " Titu chu Tea ngei ani, mi ṭawng ngaihthlak ruk du du chu thilmawi anilo tih hre mahila ka ngaithla chak tlat

" Eng thilṭha mah i sawi chhuak chuanglo ang " Tia chhanglet tu chu Bawihtei ani bawk, engvang tak ni ang maw ahma in Tea leh Bawihtei an inbiak ngai ka hre silo a, Bawihtei thu hnial kalh peih ber ber chu Tea ani reng sia

" Thudik tal ka sawi dawn alawm " Tea bawkin atih leh laiin Kawngka lamah thawm a awm a, Midang ho anlo let tawh aniang rang zetin ka room ah ka lut nghal, an thusawi kha eng nge awmzia ka hrelo a, arukin anlo in ngaizawng anih ka ring. Tlaiah chuan thawhpuite an hawn vek hnuah ka hawng ve chiah ang kati a, ka room ah kala awm hnufual an thawm areh tak diakah chuan, ka bag leh ka kawr chung la in ka room aṭang chuan ka chhuak ve nghala

" Inbe lawk ang " An hawng vek tawh ang chu tih naklaiin Tea alo la awm kur

" Ka sawi chian em kha, inbiak ka peihlo " Ning zeta ka tih chuan

" A pawimawh lutuk, i nun thlak hlawk thei thil ani " A tih chuan zalo fahranin kalo nui

" Kha zan khan nang hian ka nun chu i thlak vek alawm, ka hlimna zawng zawng min laksak vek " Ram hmarhin kati a

" Khathil thleng diktak kha i hre chak lo ami? I hriat duh chuan ka thusawi i ngaihthlak ngei angai ang " Fiah zeta min en in ati ve nghat

" Min vo ami? " Lawmlo deuha ka tih chuan

" Thudik i hriat duh leh duh loh ani mai chuan heipawh hi ka hmu ania " Tiin test kit pakhat hi alo lek chhuak va va, phawk zetin ka en a engtin nge saw saw alo neih theih

" Office ah khan i thlauh a, hemi chungchang pawh hi i hrechak ang tih ka hria ania " A ti leh zat zat

" Anih chuan sawi ta che " 

" Hetah chuan ka sawi duhlo, thuruk sawi nan chuan ahim tawklo iti velo ami? " Hawi kual thuak pahin ati a

" Hun ka nei hleinem, Vari adamlo a Doctor hmuhpui ka ngai " A thilsawi tur hi hre chak viau turah min ngai em mawni

" Ka kalpui ang che " Ala ti hram

" Thudik min hrilh lo anih chuan apawi viau ang aw " Ti a vo khar kharin kan inzui chhuak a, in ah Vari hruai leh tete in Vety clinic ah kan kalpui, kan vanduai ve hrim hrim nge Clinic ah chuan Fela leh hmeichhe pakhat anlo awm ve a, Tea nen berkher kan kal bawk si, hmai a uang duhlo ngei mai. A bula hmeichhia chu alo hruai hawng an tih nu kha anih ka ringa, ka rilru a chhia aniang an inhmeh ka ti chuanglo. 

" I phatsanna chu atuar vaklo aniang " Ka bengbula Tea'n alo tih sur sur chuan a nakah ka nghawk sak sawk

" I buaina turah chauh buai rawh, minlo hnaih reng reng suh " Zawi khauh deuhin kati a, Fela te chu eng ti a heta lokal ve nge annih ka hrelo a, ṭhu mai mai tur chuan anlo kal ka ring lemlo.

Cont..